गुटत पोरो बोदा वेह्वल
5
1 येसु पर्जतङ अव गुब्डन सूड्सि, उंदि गुटत पोरो सोन्जि उत्तोर.
ते वोनुर सिस्यलिर गिर वोन करुम सोन्जि, उत्तेर.
2 अस्के येसु इहिन बोदा वेह्वल सुरु कीतोर:
3 “तमकुन बगवंतना जुरत मंता इन्जेर करि कीसि,
आत्मता बक्तितगा चुडुर-पान कीसि, ताक्वलिर्निट, आसिर्वाद येतंतिट.
बारितेके स्वर्ग्ना राज* आतुरय आंद.
4 इंके दुक्सते बोब्ले माय्वलिर आसिर्वाद येतंतेर.
बारितेके बगवंतले वूरकुन सुम्जि कींतोर.
5 सादु-पांदे पिस्वलिर आसिर्वाद येतंतेर.
बारितेके वूरे पूरो दर्तुरितुन ईसदार्क आंतेर.
6 बगवंतना नदुडे नियत्नुर आयना इन्जेर कोर्वलिर* आसिर्वाद येतंतेर.
बारितेके बगवंतले वूरा इचतुन पूरि कींतोर.
7 दयते सूड्वलिर आसिर्वाद येतंतेर.
बारितेके बगवंतल वूरकुन दयते सूडंतोर.
8 सुदुड दिल वालिर आसिर्वाद येतंतेर.
बारितेके वूर बगवंतन सूडंतेर.
9 सांतित साटि काम किय्वलिर आसिर्वाद येतंतेर.
बारितेके बगवंतल वूरकुन तंवुर मरि-मियड इन्जेर केयंतोर.
10 नियतुन साटि दुक्सङ बोगे माय्वलिर आसिर्वाद येतंतेर.
बारितेके स्वर्ग्ना राज आतुरय आंद.
11 “मिरट नावुर बक्तलिर आता काड्कि, पर्जा मीवा हिजत वोतेकेन आयि, सेलेके दुक्सा सीतेकेन आयि, सेलेके बेय अनेलम्ने मी पोरो सम्दो लबड गोस्टिङ वेह्तेकेन आयि, मिरट आसिर्वाद येत्वलिर आंतिट.
12 बारितेके स्वर्ग्नगा बगवंतल मीकुन डगुर इनम सींतोर.
अदेन साटि आनंद अनि कुसिते मंट.
इद तीर्दे वूर मीकुन तेर मुने तोत्तुर पर्वक्तलिर्कुन दुक्सा सीतेर” इन्जेर वेह्तोर.
सोवोर अनि वेड्चित बारेते
13 अहन वेह्वल आता पेजे, येसु पर्जतुन सूड्सि, “मिरट इद दुनियतुर साटि सवद सिय्वल सोवोडुन मोडि मंतिट.
बति अद सोवोर तंवा सवद सोडुस्तेके, ताना सवदुन मल्सि तर्ले दुस्रो सरि सेले.
ईतल सोवोर बह्रि वाडिसिय्लेक अनि माय्नलिर दिव्सेर सोंलेके बति, दुस्रो बततुने कामि सियो.
14 मिरट इद दुनियतुर साटि वेड्चित दात्नुर आंदिट.
गुटत पोरो मंवल चहरदुन बोरे मकुसिया परुर.
15-16 अदे तीर्दे बोरे आयि डिवेतुन निरुसि अड्डेतुन बूड मुचुर, बति तान दीसोडतगने इरंतेर.
अस्के रोतगा मंवलिर सम्दिरकुन वेड्चि सींता.
अह्ने मीवा वेड्चि गिर लोकुर मुने पारनल सूडट.
अस्के मिरट किय्वलिक चोकोट्नङ काम्क सूड्सि, स्वर्ग्नगा मंवल मी बाबो बगवंतन वूर डगुर-पान सींतेर” इन्जेर वेह्तोर.
दर्मा-ग्रंतुन पूरि किय्ले येसु वातोर
17 उंडे गिर येसु, “नना मोसेना कानुंतुने आयि, पर्वक्तलिर वेह्तङ गोस्टिने आयि पासि वाट्ले, वातोन इन्जेर सोन्च किय्मट.
नना अव सम्दोन पासि वाट्ले वाय्मकि बति, पूरि किय्लेने वातोन.
18 हाबर अनि दर्तुरि नासेडम आनुङ बति, दर्मता कानुंतगा मंवल सम्दो पूरे मानल वेरि, तान्गा मंवल चुडुसि गोस्टि गिर तप्सि सोनो.
इद सतेम आंद.
19 ते, बोरे आयि इव आगेनल उंदि चुडुर आगेतुन पिय्सि ताक्वक्ने, दुस्रुरकुन गिर ना दात ताकना इन्जेर बोदा किय्वल स्वर्ग्ना राज्नगा वेले कमि-पांदे मंवलिरा लेकते वांतोर.
बति बोर्ते इव आगेन तना पिय्सि ताक्सेर, दुस्रुर गिर अवेन पिय्सि ताकना इन्जेर बोदा कीसेर मंवल स्वर्ग्ना राज्नगा डगुर-पान वालिरा लेकते वांतोर.
20 बारितेके नियत्ने ताक्वलिर सास्तिरिर अनि परिसयुल्कुन तेर मीवा नियत अदिक आय्वेके, स्वर्ग्ना राज्नगा नेङा पर्विट इन्जि, मीकुन वेह्चेर मंतोन” इन्जेर इत्तोर.
सोङुन बारेते येसु वेह्वल
21 उंडे गिर येसु, “तोले ‘बोनय जीवा येत्वा’+ अनि ‘जीवा येत्वन सिक्सा अरंता’+ इन्जेर मोसेना कानुंतल तोत्तुरकुन वेह्वल मिरट केन्ज्तिट.
22 बति नना इंके वेह्वल बतल इत्तेके, कारन बतय सेल्वक्ने तंवा सङा मंवन पोरो सोङुन वाय्वन सिक्सा अरंता.
अदे तीर्दे उंडे वोरोन, ‘निमे बततुने कामि सिय्वि’ इन्जेर इंवल, पन्च्नुर पेदोलकुन मुने निला लागर.
अह्ने उंडे वोरोन, ‘अरे पिसटि!’
इन्जेर इंवल पातड्ता तड्मितगा अरा लागर.
23-24 अदेन साटि निमे तत्ता अर्पना बगवंतन साटि बलिदान सिय्वल बोव्लतगा इर्सेर मनेके, बोरे वोरोन नी पोरो सोङ मंता इंवल हेतु वातेके, नीवा अर्पनतुन अगन सुटि कीसि सोन.
अनि तप्तोन-चुक्तोन नाकुन मापि कीम इन्जेर कोर्सि, वोन सङा रजु आम.
अहन रजु आता पेजे, वासि नीवा अर्पनतुन सीम.
25 नी पगा-दारल तस्वा किय्वल कचुरितगा सोन्जेर मनेकेन, सप्ने वोन सङा रजु आम.
अहन रजु आय्वेके दाकिते, वोर पगा-दारल नीकुन तस्वा किय्वल अदिकारिनगा हव्लि कींतोर.
वोर अदिकारि नीकुन जेल्दोर अदिकारिना केय्दे हव्लि कींतोर.
वोर जेल्दोर अदिकारि नीकुन वोसि जेल्ते वाटंतोर.
26 अस्के आक्रिता कोता बर्पेय कीनल वेरि, जेल्दल असले निमे पेसिवि.
इद सतेम आंद!
इन्जि नीकुन वेह्चेर मंतोन” इन्जेर इत्तोर.
पीर किय्वल पापुन बारेते येसु वेह्वल
27 अनि येसु उंडे गिर, “‘पीर किय्वा’+ इंवल आगे मिरट केन्ज्तिट.
28 बति नना वेह्वल बतल इत्तेके, बोरे वोरोर तंवा बाय्को आय्वा दुस्रो वेय्लोन मेंदोडा आसते सूड्तेके गिर तंवा मन-दिलतगा पीर कीतोना लेकते वांतोर.
29 निमे पाप किय्ले कारन नीवा तिना कड आयर्ते, अद कडदुन तेंड्सि वाडि सीम.
बारितेके नीवा मेंदोल पूरो पातडतगा बस्केट सिक्सा बोगे माय्वडुन बद्लि, नी मेंदोडा उंदि बागम नासेडम आय्वल चोकोट मंदंता.
30 निमे पाप किय्ले कारन नीवा तिना केय आयर्ते, अद केयदुन नट्क्सि वाडि सीम.
बारितेके नीवा मेंदोल पूरो पातडतगा बस्केट सिक्सा बोगे माय्वडुन बद्लि, नी मेंदोडा उंदि बागम नासेडम आय्वल चोकोट मंदंता” इन्जेर वेह्तोर.
पार्कतुन बारेते वेह्वल
31 अनि येसु उंडे, “तंवा बाय्कोन सुटि किय्वल, तान उंदि चिटितगा पार्कत सीसेर मंतोन इन्जेर लिहि कीसि सियना इंवल गिर दर्मा-ग्रंत्नगा हुकुम मंता.
32 बति नना वेह्वल बतल इत्तेके, वोरोर तंवा बाय्कोन पीर कीता कारंतुन तपुसि, दुस्रो बदे कारंतुन पिय्सि पार्कत सिय्वा.
मोका दुस्रो कारंते पार्कत सीनुर्ते, तान लन्जेन दात तयर कीतोर वोर आंतोर.
अहन पार्कत+ येत्ता वेय्लोन तुङ्वल दुस्रोर गिर पीर कीतोना लेकतेन वांतोर” इन्जेर वेह्तोर.
मरट नियतुन पिय्सि ताकना
33 अनि “‘निमे बगवंतन गोस्टि सीकिते, अद गोस्टितुन तप्वक्ने निपुसा’+ इंवल दर्मता कानुंता आगेत गिर मिरट केन्ज्तिट.
34 बति नना वेह्वल बतल इत्तेके, निमे असले वोट वाट्वा.
इत्तेके स्वर्ग्ना* पोरोडे वोट वाट्वा.
बारितेके स्वर्ग बगवंतल उद्वल राजा-गादि आंद.
35 इद दर्तुरित पोरोडे इन्जेर वोट वाट्वा.
बारितेके इद दर्तुरि बगवंतनङ काल्क इर्वल कुतुल आंद.
येरुसलेमुन पोरोडे इन्जेर वोट वाट्वा.
बारितेके अद नगुर महा राजल आय्वल बगवंतना आंद.
36 अह्ने नीवा तलत पोरो केय इर्सि वोट वाट्मा.
बारितेके नी तलत पोरो मंवल उंदि केलदुन गिर दव्रल किया पर्वि अनि कार्यल गिर किया पर्वि.
37 मीवा गोस्टि करल मत्तेके करल इंदना अनि लबड मत्तेके लबड इंदना.
इव आय्वा दुस्रोक गोस्टिङ तोड्दल वानुङ्ते, अव सय्तंतगटल वातङ आंदुङ.
दुक्सा सीतुर वूर पोरो पगा येत्वा
38 “अनि, ‘कड तेंड्तोना कड तेंडना अनि पल उरुस्तोना पल उरुसना’+ इंवल दर्मता कानुंता आगेत मिरट केन्ज्तिट.
39 बति नना वेह्वल बतल इत्तेके, मीकुन करब कियना इंवन पोरो पगा येत्मट.
हिजत वोय्ले, नीवा उंदि कोर्वितुन* पाय्वन उंडे उंदि कोर्वि गिर तोहा.
40 बोरे आयि नी पोरो पिरदि कीसि, आङ्डे येत्ले सूड्तेके, वोन नीवा सेला गिर सीसि वाटा.
41 बोरे आयि अदिकारि ना सङा उंदि किलो मीटर वेरि वरा इन्जेर जुल्मा कीनुर्ते, वोन सङा रंड किलो मीटर्क सोन.
42 नीकुन तल्क्वन सीम.
निह्गा बाकि तल्क्ले वातोन सूड्सि, पेरे-गेह्मा.
पगा-दारकुन पेर्मते सूड्वल
43 “‘मी आजु-बाजुतुरकुन पेर्मते सूडट’+ अनि ‘दुस्मन-दारकुन पगते सूडट’ इंवल गोस्टि मिरट केन्ज्तिट.
44 बति नना वेह्वल बतल इत्तेके, मी दुस्मन-दारकुन पेर्मते सूडट.
मीकुन दुक्सा सिय्वलिर साटि पार्तना कीम्ट.
45 अस्केन स्वर्ग्नगा मंवल मी बाबोनुर मरि-मियड आंदिट इन्जेर मिरट तोहा परंतिट.
बारितेके बगवंतल चोकोट अनि वायुट्नुरा बेद-बाव सेल्वक्ने पोड्द्ना वेड्चि सीसेर मंतोर.
नियत अनि बगड-नियत्नुरा बेद-बाव सेल्वक्ने पिर्क अरुसंतोर.
46 सिरिप मीकुन पेर्मते सूड्वलिर्कुने मिरट पेर्मते सूड्तेके, बगवंतल मीकुन बारि इनम सियना?
अहंते पापेस्तलिर आय्वलिर टेक्सा वसुलि किय्वलिर गिर तम्वकुन पेर्मते सूड्वलिरकुन पेर्मते सूडंतेरे कि!
47 सिरिप मीवुर दादलिर-बायिकुने मान-पान कीकिट्ते, दुस्रो जातितुर्गटल अदिक बतल कीतप आंता?
टेक्सा वसुलि किय्वलिर गिर अह्ने कींतेर.
48 स्वर्ग्नगा मंवल मी बाबो बर्पुर गुन्क वाले आंदुर.
अदेन साटि मिरट गिर बर्पुर गुन्क वालिर आसि मंट.