लूका 8

येसुना सेवा किय्वलिक वेय्लोक

1 अद आता बरोबर येसु हर उंदि चहर्ते, हर उंदि नाटे तिरिसेर बगवंतना राजुन बारेता चोकोट्ना कबुर पचर कीसेर मत्तोर.

वोन सङा वोनुर बारा जन्क सिस्यलिर मत्तेर.

2-3 वीर बरोबर तम्गा मंवलिक बूत्क तेंड्सि पूड्ता पेजे चोकोट आतङ अनि बेमरिनल चोकोट आतङ अव वेय्लोक गिर मत्तङ.

अवेनङ पोरोल्क: मग्दलेनेता मरियल (तान्गटल येडुङ बूतकुन येसु तेंड्सि पूड्सि मत्तोर), कूजना वेय्लो योहंनल (वेर कूजल हेरोद राजनोर कारोबारि आसि मत्तोर) अनि सुसंनल.

इवे आय्वा उंडे वेले जनिक वेय्लोक गिर मत्तङ.

इव सम्दो वेय्लोक तम्वा दनम्ने येसुन अनि वोनुर सिस्यलिरकुन सेवता काम्नगा मदत कींदुङ.

येसुना सेवा कियवलिक वेय्लोक (8:1-3)

तीर-तीर्क्नङ बोमिना नमुना

(मत्तयि 13:1-17; मार्क 4:1-12)

4 उंदि दिया येसुनगा वेले चहर्कनल बेय वेले पर्जा वासि मीरे मासेर मत्तेर.

ते येसु वूरकुन नमुनता रूप्ने इहिन बोदा वेह्‍तोर:

5 “वोरोर केतिदारल विजा वीतन साटि वाव्टे सोत्तोर.

वोर विजा वीच्चेर मनेके, इचुसा विजा सरदुन पोरो अर्ता.

ते सरिय सोंवलिर अद विजतुन जार्तेर अनि पिटेङ वासि तित्तङ.

6 उंडे कहिता विजा पाटा बोमितगा अर्ता.

बूड वेले पद्ना सेल्वा सोन्जि, अद विजा पिर्ता बति, किड्डा-मोड्डा वत्ता.

7 उंडे कहिता विजा चह्‍क्नङ पोदेलनगा अर्ता.

अद विजतङ मोलोकन बरोबर चह्‍क्नङ पोदेलङ गिर बेर्स्ता काड्कि, मोलोकन अव दाबि कीसि वाड्तङ.

8 उंडे कहिता विजा चोकोट्ना बोमितगा अर्ता.

अद विजा (पिर्ता, बेर्स्ता, सेन आता, बरे मासि दानने निंता) बेर्सि, बर्पुर नूर पाल्क पंटा आता” इन्जेर वेह्‍तोर.

अनि “इदेन अर्तम कियना इंद्किट्ते, चोकोट केन्चि, तेन बारेते सोन्च कीम्ट!”

इन्जेर जोर्ते वेह्‍तोर.

बगवंतना वचन तीर बाव-बक्तितगा बडे माय्वल

(मत्तयि 13:18-23; मार्क 4:13-20)

9 अस्के सिस्यलिर, “गुरुजि!

इद नमुनता अर्तम बतल आंद?”

इन्जेर येसुन पूसि कीतेर.

10 ते येसु, “बगवंतल तंवा राजुन बारेते करि किय्वल गियन मीकुन सीतोर.

बति ग्रंत्नगा लिहि कीता अदेन पूरि किय्ले, दुस्रुरकुन नमुनना रूप्नेने वेह्‍चेर मंतोन.

अदेन साटि,

‘वूर सूडंतेर बति वूरकुन दिसो,

केन्जंतेर बति वूरकुन अर्तम आयो’⁺”

इन्जेर सिस्यलिरकुन वेह्‍तोर.

11 अनि “इद नमुनता अर्तम बतल इत्तेके: विजा इंवल बगवंतना वचन आंद.

12 सरदुन पोरो अर्ता विजा बूर इत्तेके, वचन केन्ज्वलिर.

बति वूर वचन केन्चि, बचे माय्वल सय्तंतुन पसंद मनो.

अदेन साटि वूरङ दिल्कनल अद वचंतुन तेंड्सि वाटंतोर.

13 पाटा बोमितगा अर्ता विजा बूर इत्तेके, वचन केन्चि आनंद्ने वोपंतेर.

बति अव वूरा मंदगा उद्दोङ.

अदेन साटि इचुसि वकत वेरि, वूर नमंतेर.

तक्लिब्नङ परिक्सङ वानेकेन बक्तितल बह्‍के मांतेर.

14 चह्‍क्नङ पोदेलनगा अर्ता विजा बूर इत्तेके, वचन केन्जंतेर.

बति पिस्वडुन बारेतङ सोन्च-विचर्क, दन-दव्लत अनि सुक-बोग्नङ आसङ वूरकुन आपुसंतङ.

बगवंतन आनंद सिय्वलिक काम्क वूर किया परुर.

15 चोकोट्ना बोमितगा अर्ता विजा बूर इत्तेके, वचन केन्चि, तम्वा दिलतगा चोकोटे इर्सि, वचन तीर ताक्वलिर आंदिर.

वूर बगवंतन आनंद सिय्वलिक काम्क वोर्चि, कीसेर मंदंतेर.

विजा वीत्वाना अनि विजता नमुना (8:4-15)

गियन उंदि डिवेतुन दात्ना आंद

(मार्क 4:21-25)

16 “बोरे आयि, डिवेतुन निरुसि अड्डेते मुचंतेरिय?

बोरे मुचुर.

अह्‍ने तान बोरे कटुडुन बूड इरंतेरिय?

बोरे इरुर.

बति रोपो वाय्वलिरकुन वेड्चि सियना इन्जेर, तान दीसोडतगन इरंतेर.

17 अद वेड्चिते मकुसि इर्तङ अव अनि मुच्चि इर्तङ अव सम्दो गिर तात्कर दिसंतङ.

18 अदेन साटि मिरट केन्ज्वडुन बारेते दिहंते मंट.

बोर्ते नावा बोदतुन दिहंते केन्जंतोरो, वोन उंडे अदिक अर्तम आनल बगवंतल गियन सींतोर.

अनि बोर्ते दिहंते केन्जोरो, वोर केन्ज्ता अदेन गिर बगवंतल तेंड्सि वाटंतोर” इन्जेर येसु वेह्‍तोर.

डिवेता नमुना (8:16-18; 19-21)

येसुना अवल अनि तमुक

(मत्तयि 12:46-50; मार्क 3:31-35)

19 अद गट्कते येसुन सूड्ले, वोना अवल अनि तमुक वातेर.

येसुन सिर्मुट बेय मांदि मीरे मासि मत्ता काड्कि, वोन करुम वूर सोंदा पर्मकि.

20 ते वोरोर मायनल वासि, “नी अवल अनि तमुक नीकुन सूड्ले वासि, बह्‍रि निल्सि मंतेर” इन्जेर येसुन वेह्‍तोर.

21 बति येसु, “बगवंतना वचन केन्चि, वचन तीर ताक्वलिरे नावा अवल अनि नावुर तमुक आंदिर” इन्जेर इत्तोर.

येसु तुपांतुन अनि हेल्वन सिम-सम किय्वल

(मत्तयि 8:23-27; मार्क 4:35-41)

22 उंदि दिया येसु तंवुर सिस्यलिर सङा रूकतगा उच्चि, “इद सम्दुर्ता हंदा डर्डिते दाकट देट” इन्जेर इत्तोर.

ते वूर रूकते पेसितेर.

23 अहन वूर सोन्जेर मनेके, येसु नरुम्सेर मत्तोर.

अद वकत्ने सम्दुरतगा बेय डगुर तुपान तेत्ता.

अव हेल्वने रूकतगा येर निन्चेर सोत्ता काड्कि, गंडम्नगा कोंडे मातेर.

24 अदेन साटि सिस्यलिर येसुनगा सोन्जि, “पर्बु!

पर्बु!

मरट मुड्गंतट!”

इन्जेर वोन जोपनल तेह्‍तेर.

वोर तेच्चि तुपांतुन अनि अव हेल्वन दम्कि सीतोर.

ते अव येंटने सिम-सम दबे मातङ.

25 अस्के वूरकुन, “मी बरोसा बगा सोत्ता?”

इन्जेर पूसि कीतोर.

इद सम्दो सूड्सि वूर बेय वेरितेर अनि गुल आसि, “वेर असल बोर आंदुर?

तुपान अनि हेल्वन दम्कि सीनेकेन, वेर दम्कि सीतपिनय ताक्सेर मंतङ” इन्जेर तम्वा तमा वड्क्तेर.

येसु तुपानतुन सिम-सम कियवल (8:22-25)

येसु वोरोन्गटल बूतकुन तेंड्सि पूड्वल

(मत्तयि 8:28-34; मार्क 5:1-20)

26 अनि रूका ताकुसेर गलिलया सम्दुरतुन हंदा डर्डिते मंवल गेरसेन येरियतगा येव्तेर.

27-29 अनि येसु रूकतल रेय्नेके, बूत्क सोप्रे मासि मंवल अद चहर्तोर वोरोर मायनल अड्डम वातोर.

वोर वेले कालमनल कुडेकेय मन्जेर, तंवा रोन मंवक्ने सिरिप वीच्क्नगन मंदुर.

अद बूत वेले जोकङ वोन्गा सोप्रे मासेर मंदु.

अगटुर वोन सकलिने दोह्‍चि, केप्तेके गिर अवेन नमुसि, बोरे मनुर अव मेटनेके वोंदु.

बूत्क सोप्रे मातोन येसु चोकोट किय्वल

वोर मायनल येसुन सूड्ता बरोबर वोनङ काल्क कर्सि, “येसु!

सक्तिवंतल बगवंतनोर मरिनि!

ना जोलित बारि वांति?

नाकुन दुक्सा सिय्मा इन्जि, नीकुन जुल्मा कीसेर मंतोन” इन्जेर जोर्ते किलितोर.

बारितेके येसु अद बूतुन वोन्गटल बह्‍रि वरा इन्जेर आगे सीसि मत्तोर.

30 अस्के येसु, “नीवा बता पोरोल?”

इन्जेर वोन पूसि कीतोर.

ते वोर मायनल, “मंदा” इन्जेर जवब सीतोर.

बारितेके वोन्गा बेय वेले बूत्क सोप्रे मासि मत्तङ.

31 अव बूत्क, ‘माकुन अंत-लागो अद कोल डोडोतगा रोह्‍म’ इन्जेर येसुन बेय जुल्मा कीतङ.

32 अद गट्कते अगा गुटत पोरो पदिना मंदा मेय्सेर मत्ता.

अवेनगा सोप्रे माय्ले माकुन आगे सीम इन्जेर येसुन कोर्तङ.

ते वोर वोप्तोर.

33 अस्के अव बूत्क वोर माय्ननगटल पेसिसि, पदिनगा सोप्रे मातङ.

अस्के येंटने अव पदिङ गुटत पोरोडल सड्कल विच्चेर सोन्जि, सम्दुरतगा मुडुङ्सि, सातङ.

34 अद सूड्सि पदिङ मेह्‍वलिर परर आसि, तम्वा चहर्ते अनि आजु-बाजुतङ नह्‍क्नगा सोन्जि अद कबुर कपुस्तेर.

35 ते पर्जा अगा बतल जर्ग्तय सूडना इन्जेर सोत्तेर.

अस्के वेरि बूत्क सोप्रे मासि मन्जि, चोकोट आतोर वोर पाङुक केर्सि, येसुनङ कालकुन करुम सादरन माय्नन दात सांत्ने उच्चि मत्तोर.

अद सूड्सि, वूरकुन बेय वेरे पिय्ता.

36 इद जर्ग्नेके सूड्तुर वूर, बूत्क सोप्रे मासि मंवल बहन चोकोट आतोर इंवल अगा सूड्ले वातुरकुन वेह्‍तेर.

37 अद केन्चि गेरसेन येरियतुर सम्दिरकुन बेय वेरे पिय्ता.

ते तम्वा येरियतुन सुटि कीसि सोडियना इन्जेर येसुन कोर्तेर.

अस्के येसु रूकते सोंदन साटि उत्तोर.

38-39 अस्केने, “नी सङा वाया सीम” इन्जेर बूत्क सोप्रे मासि मन्जि, चोकोट आतोर वोर पूसि कीतोर.

बति येसु, “सेले-सेले, निमे रोन सोन्जि, बगवंतल कीता कामुन बारेते वेहा” इन्जेर सारि कीतोर.

ते येसु, तनकुन बतल बहन कीतोर इंवडुन वोर मायनल नाटे सोन्जि, सम्दिरकुन वेह्‍तोर.

येसु वोरोन्गटल बूत्कुन तेनड्सि पूड्वल (8:26-39)

उंदि वेय्लो चोकोट आय्वल

(मत्तयि 9:18-26; मार्क 5:21-43)

40 अद आता पेजे येसु अनि वोनुर सिस्यलिर मल्सि हंदा डर्डिते येव्तेर.

अगा वेलेटिर मांदि मत्तेर.

अदेन साटि वूर येसुन आनंद्ने करुम कीतेर.

41-42 अस्केन सुनगोग्नोर डगुर अदिकारि यायिरु इंवल येसुनगा वातोर.

येसुनङ काल्क कर्सि, “नाकुन उंदिय मियड मंता.

तान लग-बग बारा साल्क मंदंतङ.

अद इंके बेमरिते सानल आसि मंता.

निम नावा रोन वायना” इन्जेर येसुन जुल्मा कीतोर.

ते येसु सोन्जेर मनेके, मांदि वोर्तो-पोर्तो आंदिर.

43 अद मांदितुन रोपो लङ आसि बारा (12) साल्कनल मंवल बेमरि वाले उंदि वेय्लो मत्ता.

^*[अद वेय्लो पिसगतित रोपो कमय कीता सम्दोतुन अद बेमरितल चोकोट आय्लेन कर्चि कीता.]

बति बोरे वय्दुना केय्दे चोकोट आया पर्मकि.

44 अद वेय्लो येसुन पेजेटल वासि, वोना पाङुडा काटुन इट्ता.

ते येंटने ताना बेमरि हटे माता.

45 अस्के येसु, “नाकुन बोर इट्तिट?”

इन्जेर तंवा सिर्मुट मंवल मांदितुन पूसि कीतोर.

ते सम्दिर, ‘नना आयोन्’ इत्तेके, ‘नना आयोन्’ इन्जेर जवब सीतेर.

पेतुरु, “गुरुजि!

इचोर वेले मांदि दुरेङ-पोदेङ वासेर मंतेर.

तेर बति निमे ‘नाकुन बोर इट्तिट?’

इन्जि पूसि कींति” इन्जेर इत्तोर.

46 बति येसु, “नह्‍गटल सक्ति बह्‍रि सोंवल करि कीतोन.

बोरेय बति नाकुन इट्तोर” इन्जेर वेह्‍तोर.

47 अस्के अद वेय्लोन, तना उंडे गिर मक्सि मंदपरोन इन्जेर अर्तम आता.

ते अद तरा तरा आसेर वासि, येसुन मुने मुर-टोङ्रन कोट्ता.

असल तना बारि इट्ता अनि इट्ता बरोबर बहन तंवा बेमरि हटे माता इंवल सम्दिर मुने वेह्‍ता.

48 अस्के येसु, “बायि!

नीवा बरोसय नीकुन चोकोट कीता.

सांतिते सोन” इन्जेर वेह्‍तोर.

साता पेडिन येसु नेंडुस्वल

49 येसु अहन वेह्‍चेर मनेकेने, वोर यायिर्ता रोतल वोरोर वासि, “गुरुजिन परेसन किय्मा साब.

नीवा मियड मार्ता” इन्जेर इत्तोर.

50 तेर बति अद गोस्टि केन्चि येसु, “निमे वेरिमा!

सिरिप बरोसते मन.

अस्के नी मियड चोकोट आंता” इन्जेर यायिरतुन वेह्‍तोर.

51 अनि येसु वोना रोत करुम येव्नेके, तंवा पेजेय पेतुरतुन, याकोबुन, योहंतुन अनि अद पेडिनुर अवल-बाबोन तपुसीसि, मांदितल बोने रोपो वाया सिय्मकि.

52 अद गट्कते यायिर्ता रोतगा मीरे मातुर सम्दिर आड्सेर-बोब्ले मासेर मत्तेर.

अद सूड्सि येसु, “आड्मट!

अद पेडि साय्मकि बति सिरिप नरुम्सेर मंता” इन्जेर वेह्‍तोर.

साता पेडिन येसु नेंडुस्वल

53 अद पेडि साता इन्जेर वूर सम्दिरकुन टावये.

अदेन साटि वूर कव्सेर येसुन चेडि कीतेर.

54 बति येसु, ^*[अद कम्रतल वूर सम्दिरकुन बह्‍रि सारि कीसि] अद पेडिना केयदुन पिय्सि, “बुचा तेदा!”

इन्जेर इत्तोर.

55 अस्के ताना आत्मा तान्गा मल्सि वाता.

ते येंटने अद पेडि तेच्चि उत्ता.

अस्के येसु, “तान तिंले बतय सीम्ट” इन्जेर वेह्‍तोर.

56 अद सूड्सि, पेडिनुर अवल-बाबो बेय निप्ने आतेर.

बति येसु, “इद गट्नतुन बारेते बोने वेह्‍मट” इन्जेर वूरकुन आगे सीतोर.

यायिर्ता मियड सासि-नेनड्वल मयमता कार्या ( 8:41-42,49-56)