केतिदारना नमुना
4
1 उंडे उंदि जोका येसु गलिलया सम्दुर्ता डर्डितगा सोन्जि, बोदा वेह्वल सुरु कीतोर.
येसु रूकतगा उच्चि बोदा वेह्वल
वोन सिर्मुट वेले मांदि गुब्डा मत्ता काड्कि, येसु वूर सम्दिरकुन सम्दुर्ता डर्डितगा सुटि कीसि, तना रूकतगा उत्तोर.
2 वूर पर्जतुन नमुनना रूप्ने वेले गोस्टिङ करुसेर इहिन बोदा वेह्तोर:
3 “केन्जट!
केतिदारल विजा वीतन साटि वाव्टे सोत्तोर.
4 वोर विजा वीच्चेर मनेके, इचुसा विजा सरदुन पोरो अर्ता.
अद विजतुन पिटेङ वासि तित्तङ.
5-6 उंडे इचुर विजा पाटा बोमितगा अर्ता.
अद विजा वेय्नेन मोडोका वाता.
बति अगा तोडि वेले कोल सेल्वा सोन्जि, अवेनङ सीर्क कोल पार्मकि.
अदेन साटि बस्केते पोड्द पेसितयो अस्के, येदिते किड्डा-मोड्डा वत्तङ.
7 उंडे इचुसा विजा चह्क्नङ पोदेलनगा अर्ता.
ते अद विजतङ मोलोकन बरोबर चह्क्नङ पोदेलङ गिर बेर्सि अव मोलोकन बूड दाबि कीसि वाट्ता काड्कि, पंटा पंड्मकि.
8 बति उंडे इचुसा विजा चोकोट्ना बोमितगा अर्ता.
अद विजा पिर्सिकुन मस्त बेर्स्ता.
अदेनल तीसा पाल्क, साट पाल्क अनि नूर पाल्क अदिक पंटा पंड्ता” इन्जेर वेह्तोर.
9 अनि, “इदेन अर्तम कियना इंद्किट्ते, चोकोट केन्चि, तेन बारेते सोन्च कीम्ट!”
इन्जेर येसु इत्तोर.
बगवंतना वचन तीर बाव-बक्तितगा बडे माय्वल
10 येसु वेह्नेके केन्च्तुर कहितुर लोकुर अनि बारा जन्क सिस्यलिर सङा मीरे मासि, येसु वोरोरे मनेके, “अद नमुनता अर्तम वेहा” इन्जेर पूसि कीतेर.
11-12 ते येसु वूर सङा, “बगवंतना राजुन बारेता मक्डिते मंवल सत्ना गियंतुन मीकुन उजगिरि वेह्तोन.
बति दुस्रुर सम्दिरकुन इद गियन पूरो नमुनना रूप्ने वेहा लागर.
बारितेके,
वूर सूडंतेर बति वूरकुन दिसो,
केन्जंतेर बति वूरकुन अर्तम आयो.
उंदि मोका सूड्सि, अदेन अर्तम कीतेके,
वूर बगवंतना चर्नते वासि पाप्क वोप्ंदिर.
वूरकुन बगवंतल मापि कींदुर”+
इन्जेर वेह्तोर.
केतिदारना नमुनता अर्तमुन येसु वेह्वल
13 येसु वूर सङा उंडे गिर, “मीकुन इद नमुना अर्तम आय्मकि कि बतल?
इदे मीकुन अर्तम आय्वेके, दुस्रोक नमुनन बहन अर्तम किया पर्किट?
14 इगे केतिदारल बगवंतना चोकोट्ना कबुडुन दुस्रुरकुन वेह्वल आंदुर.
15 सरदुन पोरो अर्ता विजा बूर इत्तेके, बगवंतना राजुन बारेता वचन केन्चि, अर्तम कियुर वूर आंदिर.
अदेन साटि सय्तन वूरङ दिल्कनल अद वचंतुन तेंड्सि वाटंतोर.
16-17 पाटा बोमितगा अर्ता विजा बूर इत्तेके, वचन केन्चि आनंद्ने वोपंतेर.
बति अव गोस्टिङ वूरा मंदगा उद्दोङ.
अदेन साटि इचुसि वकत वेरिन वूर नमंतेर.
तक्लिब्नङ परिक्सङ वानेकेन, बक्तितल बह्के मांतेर.
18-19 उंडे चह्क्नङ पोदेलनगा अर्ता विजा बूर इत्तेके, वीर गिर वचन केन्ज्वलिरे आंदिर.
बति दुनियतगा पिस्वडुन बारेतङ सोन्च-विचर्क अनि दन-दव्लतुन बारेतङ आसङ वूरकुन सबुड दाबि कींतङ.
अदेन साटि, चह्क्नगा अर्ता विजत मोडि मंवलिर पंटा सिया परुर.
20 उंडे कहितुर चोकोट्ना बारिता बोमितुन दात्नुर.
बहन इत्तेके, वचन केन्चि, तम्वा दिलतगा चोकोटे इर्सि, वचन तीर ताक्वलिर आंदिर.
ईतुर तीसा पाल्क, साट पाल्क अनि नूर पाल्क पंटा अदिक सिय्वल चोकोट्ना बोमित मोडि मंदंतेर” इन्जेर वेह्तोर.
डिवे इर्वल दीसोडा
21 येसु उंडे गिर वूर सङा, “बोरे आयि डिवेतुन निरुसि दीसोडतगा इर्वक्ने कटुड बूड आयि सेलेके अड्डेतुन बूड आयि, मुचंतेरिय?
असले मुचुर.
अद डिवे वेड्चि सियना इन्जेर तान दीसोडतगन इरंतेर.
22 “अह्ने आक्रित मुच्चि अनि मकुसि इर्तङ चोकोट-वायुट्नङ गुन-गान्क सम्दो गिर तात्कर दिसंतङ.
23 इदेन अर्तम कियना इंद्किट्ते, चोकोट केन्चि, तेन बारेते सोन्च कीम्ट!”
इन्जेर वेह्तोर.
24 अनि उंडे येसु, “नना वेह्वडुन बारेते दिहंते सोन्च कीम्ट!”
इन्जेर वेह्तोर.
अनि, “मिरट बद इसोब्ने दुस्रुरकुन कह्चि सींतिटो, अदे इसोब्ने बगवंतल गिर मीकुन कह्चि सींतोर.
उंडे तान तेर अदिक गिर सींतोर.
25 बोर्ते नावा बोदतुन दिहंते केन्जंतोरो, वोन उंडे अदिक अर्तम आनल बगवंतल गियन सींतोर.
अनि बोर्ते दिहंते केन्जोरो, वोर केन्ज्ता अदेन गिर बगवंतल तेंड्सि वाटंतोर” इन्जेर वेह्तोर.
बेर्स्वल विजता नमुना
26-27 येसु उंडे गिर, “बगवंतना राज, वोरोर तंवा वाव्टे विजा वीत्तपिनय मंदंता.
अद विजा वोर मायनल रात-दिहा नरुम्सेर, चेतो मन्जेर मत्तेके गिर, वोन करे माय्वके पिर्सि बेर्संता.
28 दर्तुरि तंवा तनय पंटतुन पंडुसींता.
अद बहन इत्तेके, मोदोल मोडोका पिरुसंता.
अद आता पेजे, डेटे बेर्सुसंता अनि पोड्रित वायुसि, सेन दानने बरे मानल कींता.
29 अहन बरे माता पेजे पंटा कोय्वल कालम वाता इन्जेर, केतिदारल सेटेडे पंटा कोयंतोर” इन्जेर वेह्तोर.
मोवेरा दानता नमुना
30 येसु उंडे गिर, “बगवंतना राज बहन मंता इन्जेर वेह्का?
बतता नमुना येच्चि पोडि कीसि वेह्का?”
इन्जेर इत्तोर.
31 अनि, “अद बगवंतना राज मोवेरा दानत मोडि मंदंता.
बोमितगा वीत्वलिक सम्दो दाननल तेर, अद दाना वेले चुडुर मंदंता.
32 बति अद बेर्सि सम्दि बाजि-पालनल तेर, वेले डगुर मरा आंता.
तानङ कांदङ पय्स बेर्सि, पिटे-पुरडुन दड्मि सिय्ले अनि गूडङ दोहन साटि गिर अवेन कामि सींता” इन्जेर वेह्तोर.
33 येसु इद तीर्दे, वूर पर्जा बचोर वेरिते अर्तम किया परंतेरो, अचोर वेरि नमुनङ येच्चि, बगवंतन बारेते बोदा वेह्तोर.
34 नमुनङ येत्वक वूर पर्जतुन बदे बोदा वेह्मकि.
बति बस्केते सिरिप तंवुर सिस्यलिर तंवा पेजेय मंदिरो, अस्के वूरकुन अव नमुनन पोडि कीसि वेह्तोर.
येसु वडि-दूंदडुन दबि किय्वल
35 अंटित पोद्रेक्ना येलते तंवुर सिस्यलिर सङा, “इद सम्दुर्ता हंदा डर्डिते दाकट देट!”
इन्जेर येसु इत्तोर.
36 ते वूर सिस्यलिर अगा मंवल मांदितुन सुटि कीसि, येसु उच्चि मंवल रूकतगा उच्चि पेसितेर.
वूर पेजेय उंडे कहितङ रूकङ गिर पेसितङ.
37 अस्केने उंदि बेय डगुर तुपान तेत्ता.
ते अव हेल्वने रूकतगा येर निन्चेर मत्ता.
38 बति येसु रूकता पेजेटा बागम्नगा सोन्जि, तना तलतुन बूड मेत्ता इर्सि मस्त नरुम्सेर मत्तोर.
ते वूर सिस्यलिर येसुन जोपनल तेह्चि, “पर्बु!
ममोट मुडुङ्तेके गिर, निमे माकुन पटि किय्वि कि?”
इन्जेर पूसि कीतेर.
39 ते येसु जोपनल तेच्चि, अद तुपांतुन सङा, “दब मन” इन्जेर दम्कि सीतोर.
अनि सम्दुर्तङ हेल्वन सङा, “सिम-सम आम्ट” इन्जेर इत्तोर.
ते अव येंटने सिम-सम दबे मातङ.
40 अस्के येसु सिस्यलिर सङा, “मिरट बारि वेरिसेर मंतिट?
नना मीकुन बचि कींतोन इन्जेर उंडे गिर ना पोरो बरोसा सेलेय?”
इन्जेर पूसि कीतोर.
41 ते वूर बेय वेरिसेर, “तुपान अनि हेल्वङ गिर वेर वेह्तपिनय ताक्सेर मंतङ.
असल वेर बोर आंदुरेय?”
इन्जेर तम्वा तमा वड्क्तेर.