आरम्ना दिवोसुन नेटि येसु चोकोट किय्वल
3
1 उंडे उंदि जोका येसु सुनगोग्नगा सोत्तोर.
ते अगा केय अर्सि मंवल वोरोर मायनल मत्तोर.
2 आरम्ना दिवोसुन नेटि उंदि मोका वोन चोकोट कीनुर्ते, ‘येसुन तप्नगा साप्डि कीकट्’ इन्जेर कहितुर परिसयुल्क दिहंते सूड्सेर मत्तेर.
3 येसु वोर केय अर्सि मंवन सङा, “तेच्चि, सम्दिर नड्डुम निला!”
इन्जेर वेह्तोर.
4 अनि वूर परिसयुलकुन सङा, “इद आरम्ना दिवोसुन नेटि चोकोट किय्वल नायम इंतिट कि सेलेके वायुट किय्वल नायम इंतिट?
जीवतुन बचि किय्वल नायम इंतिट कि सेलेके जीवतुन तेंड्वल नायम इंतिट?”
इन्जेर पूसि कीतोर.
बति वूर दबे मत्तेर.
5 ते येसु वूरङ किवुल वायोङ अव दिलकुन सूड्सि, नारज आतोर.
अनि वूरकुन सोङ्ने सूड्सि, वोर केय अर्सि मंवन सङा, “नीवा केय चहा” इन्जेर वेह्तोर.
ते वोर मायनल केय चह्तोर.
येंटने वोना केय बर्पुर चोकोट आता.
6 ते वूर परिसयुल्क सुनगोगनल बह्रि वासि, वोर हेरोद्ना बाज्नुर सङा मीरे मातेर.
अनि ‘येसुन बहन जकना?’
इन्जेर पिलन वाट्वल मोदोल कीतेर.
बेमरिते मंवलिर वेलेटिर येसुन इट्ले वाय्वल
7-8 अद आता पेजे येसु अनि वोनुर सिस्यलिर पर्जतल पाके मासि गलिलया सम्दुरतुन करुम सोत्तेर.
बति येसु किय्वलिक मय्मतङ काम्क केन्चि येरुसलेम नगुडल, गलिलया, यूदया अनि इदुमिया येरियतल, योर्दन लविडा सिडयिङ बाजनल, तूरु अनि सीदोन इंवलिक नगुकनल गिर गुब्डङ गुब्डङ बेय वेले मांदि येसुनगा वातेर.
9-10 बेमरिते मंवलिर वेलेटिरकुन चोकोट कीता काड्कि, येड्कि-दुक्ने मंवलिर सम्दिर गिर येसुन इटना इन्जेर वोर्तो-पोर्तो वासेर मत्तेर.
येसु वूर पर्जा तन पोरो अर्वक मंदना इन्जि, “उंदि चुडुरे रूका तयर कीम्ट” इन्जेर तंवुर सिस्यलिरकुन वेह्तोर.
11-12 अव बूत्क येसुन सूड्नेकेन, तमा सोप्रे मासि मंवलिरकुन बूड सतेलम अरुसि, “निमे बगवंतनोर मरिनि आंदि!”
इन्जेर किलियुसीतङ.
बति येसु, “ना बारेते बोने वेह्मट” इन्जेर अवेन दम्कि सीतोर.
बारा जन्क सिस्यलिरकुन नेमि किय्वल
13 अद आता पेजे येसु गुटत पोरो सोत्तोर.
तंवा सङा वाता मांदितल तनकुन पह्जे मत्तुरकुन केय्तोर.
14-15 ते वूर बारा जन्के वातेर.
वूर तंवा सङा मंदनिर अनि बगवंतना चोकोट्ना कबुडुन पचर कीनिर इन्जि वूरकुन, ‘अपोस्तुल्क’ इन्जेर पोरोल दोस्तोर.
बूत्क सोप्रे मातुर्गटल बूतकुन तेंड्सि पूड्ले, वूरकुन अदिकार सीतोर.
16-19 वूर बारा जन्क बूर इत्तेके, सीमोन वेन पेतुरु इन्जेर येसु पोरोल दोस्तोर.
याकोब अनि वोनोर तमुर योहन.
वीर इविर्ते जेबेदयिनुर मर्क आंदिर.
वीर इविरकुन बोयनेर्गेस इन्जेर येसु पोरोल दोस्तोर.
गर्ज्वलिक टेपन दात्नुर इन्जेर इद पोरोडा अर्तम.
आंद्रेयल, पिलिपु, बर्तलोमयि, मत्तयि,* तोमल, आल्पयिनोर मरि याकोबु, तदयि, तंवुरा नायदुन साटि लडय किय्वल कननियतोर सीमोन अनि येसुन दोका सिय्वल इस्करियोत नाट्नोर यूदल.
येसु अनि बूत्क्नोर राजल
20 अद आता पेजे, येसु उंदि रोन सोत्तोर.
अगा गिर वेले मांदि जमा आतेर.
इदेन हिंदल येसुन अनि वोनुर सिस्यलिरकुन तिंदन साटि गिर वकत सेल्वक आता.
21 ते कहितुर, “वोन पिसङ पिय्तङ” इन्जेर येसुन इत्तेर.
अद गोस्टि बस्केते येसुना कुटुंबतुर केन्ज्तेरो, अस्के वोन रोन पिय्सि वोय्ले वातेर.
22 अह्ने वूर मांदितल येरुसलेमनल वातुर कहितुर सास्तिरिर, येसु बूतकुन तेंड्सि पूड्वल केन्चि, “वेर येसुनगा बूत्क्नोर राजल बयल-जेबुल सोप्रे मासि मंतोर.
वोना सक्तितेने अवेन पर्जतल तेंड्सि पूडा पर्सेर मंतोर” इन्जेर इत्तेर.
23 अदेन साटि वूर सास्तिरिरकुन तन्गा केय्सि इहिन नमुनना रूप्ने, “बूत्क्नोर राजल सय्तन तंवङ बूतकुन बहन तेंड्सि पूडंतोर?
24 बदे मनि उंदि राज्नगा मंवलिर नड्डुम बेद-बाव पुड्तेके अद राज नासेडम आंता.
25 अह्ने उंदि रोतुर नड्डुम बेद-बाव पुड्तेके आतल कुटुंबा गिर नासेडम आंता.
26 ते मोका सय्तन तंवा तनकुन बय्मन आसि माय्ननगटल तेंड्सि पूड्तोर इत्तेके, वोना राज निला परो.
अद राज बस्केट गिर मूरेय मांता.
27 इदेन बारेते नाकुन पोडि कीसि वेहा सीम्ट.
बोरे आयि वोरोर सक्तिवंतना रोतगा लूटि किय्ले सोंदना इत्तेके, वोन मोदोल दोह्चि वाटा बीगर, वोना रोतुन लूटि किया परोर.
अदेन साटि वोन मोदोल दोह्तेकेने, अद रोतुन लूटि किया परंतोर” इन्जेर वेह्तोर.
28-29 अनि उंडे गिर, “माय्नलिर कीता हर पापुन अनि रेह्चि वड्क्ता हर गोस्टितुन बगवंतल मापि किया परंतोर.
बति बगवंतना पवित्रा आत्मतुन बोरे रेह्चि वड्कनुर्ते, वोन असले मापि पुटो.
अहन किय्वन बस्केट गिर अद पाप्ना कसुर निल्सि मंदंता.
इद सतेम आंद” इन्जेर वेह्तोर.
30 “तंवा रोपो बूत्क्नोर राजल सोप्रे मासि मंतोर” इन्जेर इत्ता काड्किने, वूरकुन अहन वेह्तोर.
येसुना अवल अनि तमुक
31 अदे वकत्ने येसुना अवल अनि तमुक अगा वातेर.
अनि बह्रि निल्सि, येसुन केयट इन्जेर कबुर सारि कीतेर.
32-35 अस्के येसुन सिर्मुट वेले मांदिता गुब्डा मत्ता.
वूर कब्रियलिर येसुन सङा, “जरसि आगा” इन्जि, “नीवा अवल अनि तमुक नी सङा वड्कना इन्जि, बह्रि निल्सि मंतेर” इन्जेर वेह्तेर.
बति येसु तंवा सिर्मुट मंवलिरकुन तिरिसि सूड्तोर.
अनि, “बद नावा अवल आंद?
बूर नावुर तमुक आंदिर?”
इन्जेर इत्तोर.
अनि “बाबो बगवंतना इचतुन पिय्सि बूर्ते ताकंतेरो, वूरे नावुर तमुक, सेलड अनि अवल आंदिर.
अहन ताक्वलिर मिरटे नावुर तमुक, सेलक अनि नावा अवल आंदिट” इन्जेर वेह्तोर.