येसु पार्तनत बारेते वेह्वल
11
1 उंदि दिया बगयो उंदि जागा येसु पार्तना कीसेर मत्तोर.
अद पार्तना आता पेजे वोरोर सिस्यल, “पर्बु!
योहन तंवुर सिस्यलिरकुन पार्तना करुस्तपिनय, माकुन गिर निमे करुसीम” इन्जेर पूसि कीतोर.
2 ते येसु, “पार्तना कीनेके मिरट इहिन इंदना:
‘स्वर्ग्नगा* मंवल मा बाबा!
निमे पवित्रवंतनि आता काड्कि, नीवा पोरोडुन डगुर-पान वायि.
दर्तुरितुर लोकुर पोरो नीवा राज वायि.
3 हर दिवोस माकुन पह्जे मत्ता अद चंदितुन सीम.
4 माकुन उल्टा पाप कीतुरकुन मापि कीतोम.
अह्ने मा पापकुन गिर मापि कीम.
ममोट पाप्नङ आसनगा अर्वक्ने काबाडा’”
इन्जेर करुस्तोर.
येसु पार्तनत बारेते वेह्वल (11:1-4)
मीकुन पह्जे मत्तन साटि बगवंतन तल्कट
5-6 अनि येसु उंडे गिर वूर सङा, “मी रोपो बोने वोरोर सोप्तल मत्तोर इंटु.
वोर उंदि दिया नर्का सरिय सोनेके, नीवा रोन आग्तोर इन.
वोन तिंले निह्गा बतय सेल्वेके नी रोतुन बाजुतोर सोप्तनगा सोन्जि, ‘ना रोन तिंले बतय सेले.
नाकुन मूंद सारिङ सीम’ इन्जेर तल्क्ति इन.
7 अस्के वोर रोपोडले, ‘नाकुन परेसन किय्मा!
कावड केह्चि मंता.
नना अनि नावुर चुडुक कांडिर मींड्सि मंतोम.
नना तेच्चि नीकुन बतय सिया परोन’ इन्जि वेह्तोर इंनु.
8 अस्के वोर नीवोर सोप्तल आता काड्कि, वोर तेच्चि सिया पर्वेके गिर, निमे लजे माय्वक्ने दुम पूसि किय्वल कीनेके, नीकुन पह्जे मत्तङ सम्दो तप्वक सींतोर.
9 अदेन साटि मिरट बगवंतन तल्क्सेरेन मंट.
वोर तप्वक मीकुन सींतोर.
मह्क्सेरेन मंट.
मीकुन तप्वक पुटंता.
कावड तापि कीसेरेन मंट.
मीकुन तप्वक अद उग्डो आंता.
10 बारितेके तल्क्वल हर वोरोन सिय्वल जर्गंता.
मह्क्वन पुटंता.
तापि किय्वन कावड कोले मांता.
11 मिह्गटल बाबो आसि मंवल बोरे आयि, तंवोर मरि मीन तल्क्तेके, तान बद्लि तरस सींतोरिय?
12 सेलेके मेन्ज तल्क्तेके मिचो सींतोरिय?
असले सियोर!
13 मिरट करेबलिर आतेके गिर, बति मी मरि-मियडुन चोकोट्नङ चीज्क सियना इंवल मीकुन टावये.
सोन्च कीम्ट!
स्वर्ग्नगा मंवल चोकोट्नोर मी बाबोते, तनकुन तल्क्वल हर वोरोन पवित्रा आत्मा तप्वक सींतोर” इन्जेर वेह्तोर.
येसु सक्तितोर माल्कल
14 उंदि दिया येसु वोरोर माय्ननगटल मुक्डि बूतुन तेंड्सि पूड्सेर मत्तोर.
अद पेसिसि सोत्ता पेजे, वोर मायनल वड्क्वल मोदोल कीतोर.
अद सूड्सि पर्जा बेय गुल आतेर.
15 बति वूर्गटल कहितुर, “बूत्क्नोर राजल बयल-जेबुल्ता* सक्तिते अव बूतकुन वेर तेंड्सि पूड्सेर मंतोर” इन्जेर वड्क्तेर.
16 उंडे कहितुर वोन परिक्सा किय्ले, “माकुन स्वर्गनल उंदि मय्मता काम कीसि तोहा” इन्जेर पूसि कीतेर.
17 ते येसु वूरा मंदा सोन्च करि कीसि, “बदे मनि राज तंवा तनय उल्टा आसि, पाके मायर्ते, अद नासेडम आंता.
बदे उंदि रोतुर्गा गिर बेद-बाव पुड्तेके, अद रोन नासेडम आंता.
18-19 सय्तन तंवा तना बय्मन आतेके, वोना राज बहन निला परर?
निला परो.
मिरट नाकुन बयल-जेबुल्ता सक्तिते बूतकुन तेंड्सि, पूड्सेर मंतोर इंतिट.
ते मी लोकुर बोना सक्तिते बूतकुन तेंड्सि पूड्सेर मंतेर?
अदेन साटि मिरट इंवल तप आंद इन्जेर मीवुरे निरुपन कीसेर मंतेर.
20 बति मोका नना बगवंतना अदिकार्दे इव बूतकुन तेंड्सि पूड्सेर मंद्कते, बगवंतना राज मिह्गा वासिन मंता इन्जेर करि कीम्ट.
21 “वोरोर सक्तिवंतल आय्तर्क पिय्सि तंवा महलतुन केप्सेर मत्तेके, वोना जाय्जतुन बोरे इस्का पायोर.
22 बति वोन तेर अदिक सक्तिवंतल वासि, वोन सङा लडेय कीसि मेयंतोर अनि वोर बरोसा इर्सि मत्तङ आय्तर्क सम्दोन इस्का पांतोर.
अनि अद जाय्जतुन लूटि कीसि, दुस्रुरकुन तूसि सींतोर” इन्जेर इत्तोर.
23 येसु उंडे गिर इहिन वेह्वल सुरु कीतोर: “ना बाजुन मनोर वोर, नाकुन उल्टा तिरिवल आंतोर.
पग्रे मासि मंवलिरकुन ना सङा मीरि कियोर वोर, बुज्डि किय्वल आंतोर.
मोदोडतुन तेर आक्रिता हालत वेले करब आय्वल
24 “बूत वोरोन्गटल पेसिसि सोत्ता पेजे, येर सेले अव जागनगा आरम येत्का इन्जेर अद तिरियंता.
बति आरम बगने पुट्वा काड्कि, ‘सुटि कीसि वाता अदे रोन मल्सि दाका’ इन्जेर इंता.
25 अनि अगा सोन्जि सूड्तेके, अद रोन चोकोट चक्ने सिय्सि, सम्दो सव्रि कीसि मंवल तान दिसंता.
26 अस्के तनकुन तेर वेले करेबलिक उंडे येडुङ बूतकुन तंवा सङा पिय्सि वांता.
अव सम्दो अद रोतगा मंवल सुरु कींतङ.
इदेन हिंदल वोर माय्नना गति मोदोडुन तेर उंडे अदिक करब आंता” इन्जेर वेह्तोर.
27 अहन वेह्चेर मनेके मांदितल उंदि वेय्लो, “नीकुन जल्मा सीसि, पाल उह्ता अवन बगवंतल आसिर्वाद सियिर” इन्जेर जोर्ते इत्ता.
28 ते येसु, “हो बति, बगवंतना वचन केन्चि, तान पिय्सि ताक्वलिर उंडे अदिक आसिर्वाद येतंतेर” इन्जेर तान वेह्तोर.
केंचि तान पिय्सि ताक्वल आसिर्वाद येत्वल आंतोर (11:27-28)
बगवंतल तोह्ता निसनि
29 अगा पर्जता गुब्डा बडे मासेरेन मत्ता.
अस्के येसु, “इद पिडितुर करेबलिर आता काड्कि, मय्मता कामुन साटि पूसि कीसेर मंतेर.
बति योना* पर्वक्तना गोस्टितुन तपुसीसि, दुस्रो बदे निसनि मीकुन तोह्वल जुरत सेले.
30 बहंते योना पर्वक्तल निनेवा नगुडुरकुन निसनित मोडि मत्तोरो, अह्ने स्वर्ग्नोर माय्नल गिर इद पिडितुरकुन निसनित मोडि मंतोर.
31-32 “योनल बोदा वेह्नेकेने निनेवतुर तम्वङ दिल्क्नगा चुक चुके मातेर.
इंके इगे निल्सि मंवल योनन तेर डगुर वाले आंदुर.
तेर बति मिरट चुक चुके मासेर सेल्विट.
अदेन साटि तस्वा किय्वल दिवोसुन नेटि, निनेवा नगुडुर सम्दिर, इद पिडितुर बरोबर निल्सि, वीर तप कीतेर इन्जेर पिरदि कींतेर.
अदे तीर्दे काल्वडा बाज्नेके मंवल देस्ना रानि+ सोलोमोंतङ गियन वाले गोस्टिङ केन्ज्ले बेय लङ्ना देसनल वाता.
इंके इगे निल्सि मंवल सोलोमोन राजन तेर* डगुर वाले आंदुर.
तेर बति मिरट नावङ गोस्टिङ केन्चेर सेल्विट.
अदेन साटि तस्वा किय्वल दिवोसुन नेटि, अद रानि इद पिडितुर बरोबर निल्सि, वीर तप कीतेर इन्जेर पिरदि कींता” इन्जेर वेह्तोर.
मेंदोडा करल वेड्चि
33 “बोरे आयि डिवेतुन निरुसि मकुसुर, सेलेके अड्डेते मुचुर.
बति रोपो वाय्वलिरकुन अद वेड्चि सियना इन्जेर दीसोडतगन इरंतेर.
34 नीवा मेंदोडुन वेड्चि कड्क आता काड्कि, नीवङ कड्क चोकोट मत्तेकेन, मेंदोल पूरो वेड्चिते बर्पुर निन्चि मंदंता.
अव कड्क चोकोट सेल्वेके, नी मेंदोल पूरो गिर सिकटि आंता.
35 अदेन साटि मी रोपो मंवल वेड्चि सिकटि आय्वक्ने दिहंते सूडट.
36 मीवा मेंदोल पूरो वेड्चिते निन्चि मत्तेके, बदे बागम्नगा इचुर गिर सिकटि सेल्वेके, अद बर्पुर उग्वा सीसेर मंदंता.
डिवे पोच्चेर मीकुन वेड्चि सीतपे, मीवा मेंदोल पूरो वेड्चिते निन्चि मंदंता” इन्जेर वेह्तोर.
दर्मतुर अदिकारिरा तपुन तोह्वल
37 अहन वेह्चेर मनेकेने, परिसयुल्क्ना बाज्नोर, “ना रोन जेवि किय्ले वरा” इन्जेर येसुन केय्तोर.
ते येसु सोन्जि जेवि किय्ले उत्तोर.
38 तम्वुर तोत्तुरङ नेकिन पिय्सि, जेवि कियन मुने येसु केय-काल्क नोर्मकि इन्जेर सूड्सि, परिसयुल्क्ना बाज्नोर गुल आतोर.
39 अस्के पर्बु वोन सङा, “मी परिसयुल्क देडियन अनि तालिन बहिडल चक नोरंतिट.
बति मी रोपो लाल्सल अनि करेबलिक गुन्क्ने निन्चि मंदंतिट.
40 पिसलिर्निट!
बहिडतुन निव्डि किय्वले रोपोडतुन गिर निव्डि कीतोर कि सेले?
हो!
निव्डि कीतोर.
41 बति मिह्गा मंवलिकुन बर्पुर दिल्दे गरिबुन सीकिट्ते, अस्के बगवंतना नदुडे मिरट सुदुड आंतिट.
42 रेय, परिसयुल्क्निट!
मीकुन सिक्सा तपो.
बारितेके मिरट पुदिना, समरे आय्वा, मेय्तङ सम्दो बाजिनल नूटल दहा ईसङ बगवंतन सीसेर मंतिट.
बति नायमुन अनि बगवंतना पेर्मतुन सुटि कीसेर मंतिट.
अवेन कीसेरेन, इवेन सुटि किय्वक्ने मंदिट्ते, चोकोट आंद.
43 रेय, परिसयुल्क्निट!
मीकुन सिक्सा तपो.
मिरट सुनगोक्नङ मुके माय्नलिर उद्वलिक जागनगा उदना इन्जेर पसंद कींतिट अनि बाजर्क्नगा सम्दिर मीकुन दंडोस दोसना इन्जेर कोरंतिट.
44 रेय!
मीकुन सिक्सा तपो.
रोपो मंवडुन दिसा सियोङ अव गोरिन दात्नुर मिरट आंदिट.
पर्जतुन टावा सेल्वा सोन्जि, वीचकुन पोरोडल ताक्सेर मंतेर” इन्जेर वेह्तोर.
45 अस्के वोरोर दर्मा गुरु, “गुरुजि!
इहिन वेह्चेर मावा गिर हिजत वोसेर मंति” इन्जेर इत्तोर.
46 ते येसु, “रेय, दर्मा गुरुर्निट!
मीकुन सिक्सा तपो.
मिरट बेय वेले नेकि-बदिङ तयर कीसि, पर्जा तोचा परुर अचोर वजन वाटंतिट.
अनि मिरट उंदि बोटते गिर अद वजंतुन तोच्चि वोय्ले मदत किय्विट.
47 रेय!
मीकुन सिक्सा तपो!
मी तोत्तुर पर्वक्तलिर्कुन जक्तेर.
वूरङ गोरिन मिरट दोह्पुसेर मंतिट.
48 करल मिरट मी तोत्तुर कीतङ कामकुन गवदार्क आसि मंले, इहिन कीसेर मंतिट.
वूर बेहेंकि पर्वक्तलिरकुन जक्तेर.
मिरट बेहेंकि वूरङ गोरिन दोह्चेर मंतिट.
49 अदेन साटिन बगवंतल तंवा गियंते, ‘नना वूर्गा पर्वक्तलिरकुन अनि कब्रियलिर्कुन सारि कींतोन.
सारि कीतुर्गटल कहितुरकुन जकंतेर अनि उंडे कहितुरकुन दुक्सा सींतेर’ इन्जेर वेह्तोर.
50 “इद तीर्दे इद दुनियता बुनदि अर्ता अस्केडल सम्दिर पर्वक्तलिर तुह्ता नेतुडुन पिय्सि, इद पिडितुर जिमा येता लागर.
51 हेबेल्ता नेतुडल+ मोदोल आसि, बलि चडि किय्वल बोव्लत अनि मंदिरतुन नड्डुम तूर्ता जकरियना नेतुर+ वेरि, तुह्तुर वूर सम्दिरा नेतुडा जिमा इद पिडितुरे येता लागर इन्जेर वेह्चेर मंतोन.
52 रेय, दर्मा गुरुर्निट!
मीकुन सिक्सा तपो.
गियन वाले रोता कुन्जि मिह्गने इर्तिट.
मिरट रोपो नेङ्मकि अनि नेङ्ले कोसिद किय्वलिरकुन गिर मिरट नेङा सिय्मकि” इन्जेर येसु वूरकुन वेह्तोर.