गरिबुन सिय्वडुन बारेते येसु वेह्वल
6
1 “केन्जट!
मिरट किय्वलिक नियत्नङ काम्क सिरिप दुस्रुर सूडना इन्जेर किय्मट.
अहन कीतेके स्वर्ग्नगा मंवल मी बाबो अवेना पंडि मीकुन सियोर.
2 अदेन साटि मिरट दर्मा कीनेके सम्दिरकुन चाटुस्मट.
कपेटलिर तमकुन डगुर-पान सियना इन्जेर सुनगोक्नगा अनि बाजर्क्नगा अहन कींतेर.
वूरकुन वाय्वल पंडि अस्केडा अस्केन पुट्ता इन्जेर करि कीम्ट.
इद सतेम आंद.
3 बति निमे बोरे गरिबुन दर्मा सीनेके, नीवा तिना केय्दे सिय्वल, डेमा केयदुन करे माय्वक्ने सीम.
4 इहिन कुसये किय्वल कार्यतुन नी बाबो बगवंतल सूड्सि, नीकुन ताना पंडि सींतोर” इन्जेर येसु वेह्तोर.
बगवंतन पार्तना किय्वडुन बारेते वेह्वल
5 अनि, “मिरट पार्तना कीनेके कपेटलिर मोडि मन्मट.
माय्नलिर तमकुन सूडना इन्जेर वूर कपेटलिर सुनगोक्नगा, बाजर्क्नगा निल्सि पार्तना किय्वल वेले पसंद कींतेर.
वूरकुन वाय्वल पंडि अस्केडा अस्केन बर्पुर पुट्ता इन्जेर करि कीम्ट.
इद सतेम आंद.
6 बति निमे पार्तना कीनेके, कम्रतगा सोन्जि कावड केह्चि, कडकुन दिसोर वोर बाबोन पार्तना कीम.
अस्के निमे कुसये किय्वल पार्तनतुन केन्चि, नी बाबो बगवंतल नीकुन ताना पंडि सींतोर.
7 अचोरे आय्वा मिरट पार्तना कीनेके, दुस्रोक जातिनुर मोडि वेले गोस्टिङ वड्क्वा.
अव वेले गोस्टिङ वड्क्वडुन हिंदल बगवंतल केन्जंतोर इन्जेर वूर सोन्च कींतेर.
8 वूर दात मिरट पार्तना किय्मट.
बारितेके मिरट पूसि किय्वक मनेकेने मीकुन बतल पह्जे इंवल मी बाबो बगवंतन टावा.
9 अदेन साटि मिरट इहिन पार्तना कियना:
‘स्वर्ग्नगा मंवल मा बाबा, नीवा पोरोडुन डगुर-पान वायि!
10 नीवा राज वायना अनि स्वर्ग्नगा नीवा इचा तीर जर्ग्तपे,
दर्तुरित पोरो गिर जर्गि!
11 नेंड माकुन पह्जे मत्ता अद चंदितुन सीम.
12 माकुन उल्टा पाप कीतुरकुन मापि कीतोम.
अह्ने मा पापकुन गिर मापि कीम.
13 ममोट पाप्नङ आसनगा अर्वक्ने काबाडा.
अनि सय्तंदा केय्दल बचि कीम.
*[बारितेके बस्केट मंवल राजुन पोरो बर्पुर अदिकार नीकुने मंता.
निह्गने सम्दो सक्ति अनि मय्मा मंता.
आमेन!]’
14 “दुस्रुरङ पापकुन मिरट मापि कीकिट्ते, स्वर्ग्नगा मंवल मी बाबो गिर मीवङ पापकुन मापि कींतोर.
15 बति दुस्रुरङ पापकुन मिरट मापि किय्वेके, मी बाबो गिर मीवङ तप कामकुन मापि कियोर.
उपसुन बारेते येसु वेह्वल
16 “मिरट उपस पिय्नेके कपेटलिर मोडि उपस पिय्मट.
वूर तमा उपस पिय्तेर इंवल दुस्रुर करि कियना इन्जेर तम्वङ मोकोम्क दुक्सते इरंतेर.
वूरकुन पुट्वल पंडि अस्केडा अस्केन बर्पुर पुट्ता.
इद सतेम आंद.
17 बति मिरट उपस पिय्नेके तलदुन निय सोक्सि, ऊडट अनि चक्ने मोकोम नोरट.
18 अस्के मिरट उपस पिय्तिट इंवल दुस्रुर करि कियुर.
बति, बगवंतल अदेन करि कीसि, मीकुन चोकोट्ना पंडि सींतोर.
स्वर्ग्नगा मीवा दनम कमय कीम्ट
19 “मी साटि इद दुनियतगा दन-दव्लत कमय किय्मट.
बारितेके इगे कमय कीकिट्ते मीवा दन-दव्लत वेलुम पिय्सि सेलेके, चिलुम पिय्सि करब आंता.
अनि कलिर अर्सि गिर तान लूटि कींतेर.
20 अदेन साटि मीवा दन-दव्लतुन स्वर्ग्नगा कमय कीम्ट.
अगा वेलुमे आयि, चिलुमे आयि पियो अनि कलिर गिर लूटि कियुर.
21 बारितेके मीवा दन-दव्लत बगते मंदंतयो, अगने मीवा दिल गिर मंदंता.
कड्क मेंदोडुन वेड्चि सिय्वलिक डिवेङ आंदुङ
22 “नीवा मेंदोडुन वेड्चि कड्क आता काड्कि, नीवङ कड्क चोकोट मत्तेकेन, मेंदोल पूरो वेड्चिते बर्पुर निन्चि मंदंता.
23 अव कड्क चोकोट सेल्वेके, मेंदोल पूरो सिकटिते निन्चि मंदंता.
नीकुन वेड्चि सिय्वले सिकटि आसि मत्तेके, उंडे वेले कह्चर सिकटि नी रोपो मंदंता.
24 “बोरे आयि गडियल इविर माल्कलिरा सेवा वोर्सोन किया परोर.
मोका अहन कीनुर्ते वोरोन पेर्मते सूड्सि, उंडे वोरोन मेच्वक आंतोर.
सेलेके वोरोन मानि कीसेर उंडे वोरोन चुडुर-पांदे सूडंतोर.
मिरट दनमुन पेर्मते सूड्किट्ते, बगवंतन पेर्मते सूडा पर्विट” इन्जेर येसु वेह्तोर.
बगवंतनगा बरोसा इर्सि, दुस्रोता रंदि दोस्मा
25 अद आता पेजे सिस्यलिर सङा, “अदेन साटि नना मीकुन वेह्वल बतल इत्तेके, ‘ममोट जीवते मंले, बतल तिंद्कोम सेलेके, बतल उंड्कोम?
अनि मा मेंदोडुन पोरो बतल केर्कोम?’
इन्जेर परेसन आय्मट.
बारितेके तिंडितुन तेर परन मंवल मुकेता आंद अनि कप्डिन तेर मेंदोल मुकेता आंद.
26 परिवलिक पिटेन सूडट!
अव विजा वीतोङ, पंटा कोयोङ अनि तिंले दानङ गोदम्नगा मकुसोङ.
तेर बति स्वर्ग्नगा मंवल मी बाबो अवेकुन पोसि कीसेर मंतोर.
मिरट्ते अव पिटे-पुरडुन तेर वेले विलुवतुर आंदिट.
27 “रंदि किय्वडुन हिंदल मिह्गटल बोर पिस्वल कालमुन उंदि गंटमेचा बडि किया परंतोर?
बोरे बडि किया परोर!
28 मिरट पाङुकुन बारेते बारि रंदि कींतिट?
केडतङ पुङक पोय्वडुन बारेते सोन्च कीम्ट.
अव काया-कस्टम कियोङ अनि पाङुकुन साटि नूल गिर तयर कियोङ.
29 तेर बति अवेन मंवल सोबा, अचोर डगुर सोलोमोन राजल केर्तङ पाङुक्नगा गिर सेले इन्जेर मीकुन वेह्चेर मंतोन.
30 नेंड पोय्सि, नाडि वच्चि, तड्मितगा वेय्वल जाडितुने, बगवंतल इचोर सोबते निव्डि कींतोर.
ते बरोसा कमि वालिर्निट!
मीकुंते पन्चा-पाङुड तप्वक सींतोर.
31 “अदेन साटि मिरट, ‘बतल तिन्कोम?
बतल उन्कोम?
अनि बतल पोंड्कोम?’
इन्जेर रंदि किय्मट.
32 बगवंतनगा बरोसा इर्मकि वूर दुनियतुर, इवेन साटि पर्पेडे मांतेर.
बति मीकुन इव सम्दोना जुरत मंता इंवल स्वर्ग्नगा मंवल मी बाबोन टावये.
33 ते मोदोल बगवंतना राजुन अनि नियतुन मह्कट.
अस्के वोर अवेन बरोबर इव सम्दोन गिर मीकुन सींतोर.
34 अदेन साटि नाडिता दिवोसुन बारेते रंदि किय्मट.
नेटा दिवोसुन बारेते रंदि किय्वले मस्त आंता.
उंडे दुस्रोक दिवोस्क्ना रंदि किय्वल जुरत सेले” इन्जेर येसु वेह्तोर.