बगड-नियत्ने ताक्वल कारोबारिना नमुना
16
1 येसु तंवुर सिस्यलिर सङा, “वोरोर दनेवंतना रोन वोरोर कारोबारि काम कींदुर.
उंदि दिया कहितुर, ‘वोर नीवा आस्तितुन आगम करब कीसेर मंतोर’ इन्जेर कारोबारिन बारेते दनेवंतन पिरदि कीतेर.
2 ते दनेवंतल वोन केयुसि, ‘नी बारेते पर्जा वेह्वलिक करब काम्क करल आंदुङ कि?
निमे इंके वेरि कीता कारोबारिना लेका नाकुन हव्लि कीम.
इङेडल नह्गा काम किय्मा’ इन्जेर वोन वेह्तोर.
3 “ते वोर कारोबारि तंवा तना मंदे, ‘कारोबारिना कामनल ना माल्कल नाकुन तेंड्सि वाट्सेर मंतोर.
नाकुंते केति काम कीनल सक्ति सेले.
बिचेम तल्कका इत्तेके लजन वाटेङ आंता.
इङे बतल कीका?
4 नाकुन अद नव्करितल तेंड्सि वाड्ता पेजे, कहितुर तम्वङ रोह्क्नगा नाकुन मान सीनल, बतल कियनयो नाकुन टावा’ इन्जेर सोन्च कीतोर.
5 अनि तंवोर माल्कन बाकि मंवलिर्गटल वोरोन वोरोन केयुस्तोर.
वूर वाता पेजे मोदोडोन सङा, ‘निमे ना माल्कन बचोर बाकि मंति?’
इन्जेर पूसि कीतोर.
6 ते वोर मायनल ‘नूर (100) सोरङ ओलिवा निय बाकि मंतोन’ इन्जेर वेह्तोर.
अस्के कारोबारि, ‘इद रसिद येता अनि अगा उच्चि येंटने पनस (50) सोरङ इन्जेर लिहि कीम’ इन्जि वेह्तोर.
7 अद आता पेजे, उंडे वोरोन सङा, ‘निमे बचोर बाकि मंति?’
इन्जेर पूसि कीतोर.
ते वोर मायनल, ‘नूर (100) पोतेङ गोह्क बाकि मंतोन’ इन्जेर वेह्तोर.
ते कारोबारि, ‘इद रसिद येच्चि, तान हसि (80) पोतेङ इन्जेर लिहि कीम’ इन्जि वेह्तोर.
8 बगड-नियत्ने ताक्वल वेर कारोबारि इहिन गुमि कीतोर.
तेर बति, वोनोर माल्कल वोन मेच्तोर.
बारितेके, इद दुनियतुर लोकुर दुस्रुरकुन बहन सूडना अनि वूर सङा बहन मंदना इंवडगा वेले चतुर मंदंतेर.
सत्ना वेड्चिते ताक्वलिर वेले जोकङ अचोर चतुर मनुर.
9 अदेन साटि, नना वेह्वल बतल इत्तेके, इद दुनियतगा मीवा बगड-नियत्ने कमय कीता आस्तिते दुस्रुरकुन मदत कीसि, सोप्तलिरकुन कमय कीम्ट.
अस्के मिरट बस्केट मंवल स्वर्ग्नगा सोत्ता पेजे, बगवंतल मीकुन करुम कींतोर.
10 चुडुक गोस्टिनगा नमकम्ने मंवल डगुक गोस्टिनगा गिर नमकम्ने मंदंतोर.
चुडुक गोस्टिनगन पसि कीतेके, डगुक गोस्टिनगा गिर पसि कींतोर.
11 अदे तीर्दे मिरट इद दुनियता आस्तिता गोस्टितगन नमकम्ने मंविट ते, स्वर्ग्ना करल आस्तिता गोस्टितगा मीकुन बोर नमंतोर?
12 मिरट दुस्रुरा आस्तिता गोस्टितगन नमकम्ने मंवेके, ‘इद आस्ति मीकुने सोंतम’ इन्जेर बोर सीनुर?
बोरे सियोर!
13 रोन सेवा किय्वल दासि, इविर माल्कलिरा सेवा वोर्सोन किया परोर.
मोका अहन कीनुर्ते, वोरोन पेर्मते सूड्सि, उंडे वोरोन मेच्वक आंतोर.
सेलेके वोरोन मानि कीसेर, उंडे वोरोन चुडुर-पांदे सूडंतोर.
मिरट दनमुन पेर्मते सूड्किट्ते, बगवंतन पेर्मते सूडा पर्विट” इन्जेर येसु वेह्तोर.
बगवंतना उंदि गिर गोस्टि तप्सि सोनो
14 दनमुन पेर्मा किय्वलिर परिसयुल्क, येसु वेह्तङ गोस्टिङ केन्चि, वोन चेडि कीतेर.
15 ते येसु वूर सङा, “मिरट लोकुर मुने नियत्नुर आंदुम इन्जेर तोह्ले सूडंतिट.
बति मी दिलतगा बतल मंता इंवल बगवंतन टावये.
लोकुर वेले मानि किय्वडुन बारेते बगवंतन असले पसंद मनो.
16 “योहन वानल वेरि मोसेना कानुन तीर अनि पर्वक्तलिर लिहि कीतङ गोस्टिङ तीर ताक्वल मत्ता.
बति योहन वातोर अस्केडल बगवंतना चोकोट्ना कबुर पचर आसेर मंता.
अनि हर वोरोर बगवंतना कबुडुन वोप्सि, तम्वङ दिल्क्नगा बगवंतल राज ताकुसना इन्जेर वेले कोसिद कीसेर मंतेर.
17 बति केन्जट!
इद हाबर अनि दर्तुरि नासेडम आनुङ बति, दर्मता कानुंतगा लिहि कीसि मंवल उंदि चुडुसि गोस्टि गिर तप्सि सोनो.
18 “इद बस्केट निल्सि मंदंता इंवडा उंदि नमुना: तंवा बाय्कोन पार्कत+ सीसि, दुस्रोतुन तुङ्वल मायनल तान सङा पीर किय्वल आंतोर.
पार्कत आसि मंवल वेय्लोन तुङ्वल गिरे पीर कीता लेकतेन वांतोर” इन्जेर येसु वेह्तोर.
बगवंतना बक्ति किय्वक सातोन पुट्वल जागा
19 अहन वेह्ता पेजे, येसु इद कता सुरु कीतोर: “तोले वोरोर दनेवंतल मत्तोर.
वोर बेय बारितङ रगलिक पाङुक पोंड्सि, सुक-सांतिते चोकोट तिन्जेर पिसेर मत्तोर.
20 वोर दनेवंतना रोत मुने पाटकुन बग्ला लाजर इंवल बिचे-गांडल मंदुर.
वोना मेंदोल पूरो पोट्कुडिङ अर्सि मत्ता.
21 दनेवंतल तिनेके वोना टेबल्दल बूड अर्वलिक मेय्तङ-सुय्तङ टुक्डेङ तिन्का इन्जेर आसते मंदुर.
अचोरे आय्वा, नेय्क वासि वोना मेंदोडङ पोट्कुडिङ नाक्दुङ.
22-23 वोर बिचे-गांडल मार्तोर.
ते बगवंतनुर दूतलिर वोन वोसि अब्राहमुन बग्ला उपुस्तेर.
अद आता पेजे, कहि रोज्क्ने वोर दनेवंतल गिर मार्तोर.
ते वोन माति कीतेर.
वोर दनेवंतल साना लोकम्नगा दुक्सङ बोगे मासेर तला तह्चि पोरो सूड्तोर.
अस्के बेय लङ अब्राहम अनि वोन बग्ला लाजर उच्चि दिस्तेर.
24 ते वोर दनेवंतल, ‘अब्राहम तादो!
ना पोरो दया तोहा.
इद तड्मितगा दुक्सते तल्मेले मासेर मंतोन.
अदेन साटि, वोना बोटा येतगा मुडुसि, ना वेन्जेडुन किनन किय्ले लाजरतुन सारि कीम’ इन्जेर जुल्मा कीतोर.
25 बति अब्राहम, ‘तङ्मरि, निमे बोमित पोरो पिसि मनल वेरि, चोकोट सुक-बोग येत्ति.
बति अस्के, लाजरु वेले तक्लिब बोगे मातोर.
अद गोस्टितुन हेतु कीम.
इंके वेर आरम येच्चेर मंतोर.
निमे दुक्सते तल-मेले मासेर मंति.
26 इवे आय्वा, उंडे उंदि गोस्टि बतल इत्तेके, नीकुन माकुन नड्डुम उंदि अंत लागो अद कोल डोड्डो मंता.
इदेन हिंदल, इगेटुर मिह्गा वाया परुर अनि अगटुर इगे वीड्सि वाया परुर’ इन्जेर अब्राहम वेह्तोर.
27 अस्के दनेवंतल, ‘अहन बेहेते तादो, वोर लाजरतुन ना बाबोना रोन सारि कीम इन्जेर नीकुन कोरंतोन.
28 बारितेके नाकुन सिय्विर तादल-तमुक मंतेर.
दुक्सते तल-मेले माय्वल जागतगा वाय्वक्ने वूर्गा सोन्जि, लाजर दम्कि सिया परंतोर’ इन्जेर कोर्तोर.
29 “बति अब्राहम, ‘मोसेना कानुन अनि दुस्रुर पर्वक्तलिर वेह्तङ वचन्क मंतङ.
अव वचन्क पिय्सि ताकिर’ इन्जेर इत्तोर.
30 ते वोर दनेवंतल, ‘अहन आयो, अब्राहम तादो!
सातुर्गटल बोरे आयि वोरोर वूर्गा सोत्तेके, वूर पापनल कब्ले मांतेर’ इन्जेर वेह्तोर.
31 अस्के अब्राहम, ‘मोसेना कानुन अनि पर्वक्तलिरङ वचन्क पिय्सि, वूर ताक्वेके दानिर्ते, सातुर्गटल वोरोर नेंड्सि वूर्गा सोत्तेके गिर बति, वूर नंमुर’ इन्जि वेह्तोर” इन्जेर येसु परिसयुलकुन वेह्तोर.