दव्डे माता अद पुट्ता पेजे वाय्वल आनंद
15
1 उंदि जोका टेक्सा वसुलि किय्वलिर अनि दुस्रुर पापिर+ येसु वेह्वलिक गोस्टिङ केन्ज्ले, वोन्गा मीरे मातेर.
2 अद सूड्सि परिसयुल्क अनि सास्तिरिर, “वेर येसु पापिरकुन करुम कींतोर.
अनि वूर सङा मीरे मासि तिंतोर” इन्जेर गोल्ग्तेर.
3 अस्के येसु वूरकुन इद नमुना वेह्तोर:
4 “मिह्गटल वोरोन्गा नूर (100) गोरेङ मंतङ इंट.
अवेनगटल उंदि गोरे बूले मातेके, अव नोवद नोव (99) गोरेन वोर बोडि गुटनगा सुटि कीसि, तप्सि सोत्ता अद गोरे पुटनल वेरि मह्क्ले सोनोर इंतिट कि?
तप्वक मह्क्ले दांतोर!
5 अनि अद पुड्ता पेजे सेटनगा वाट्सि, आनंद्ने रोन पिय्सि वांतोर.
6 अनि वोनुर सोप्तलिरकुन, आजु-बाजुतुरकुन केय्सि, ‘नावा तप्सि सोत्ता अद गोरे पुड्ता.
अदेन साटि ना बरोबर आनंद येतट’ इन्जेर वेहंतोर.
7 अह्ने पापनल कब्ले माय्वल जुरत सेले वूर नोवद नोव (99) नियत्नुरकुन तेर, कब्ले माय्वल वोरोर पापेस्तन बारेते तप्वक स्वर्ग्नगा वेले आनंद येतंतेर” इन्जेर वेह्तोर.
दव्डे माता अद बिला पुट्तेके वाय्वल आनंद
8 अहन वेह्ता पेजे येसु, “उंदि वेय्लोनगा दहा कूरतङ बिलङ मत्तङ इंट.
अवेनगटल उंदि बिला बगयो तूर्ता.
ते अद वेय्लो डिवे निरुसि, बिला पुटनल वेरि, रोन पूरो सिय्सि मह्क्वक मंदर कि?
तप्वक मह्कंता!
9 अद पुड्ता पेजे तंवङ सोप्तलिकुन अनि आजु-बाजुतङ वेय्लोकुन केय्सि, ‘नना तुह्ता बिला नाकुन पुड्ता.
अदेन साटि ना बरोबर मिरट गिर आनंद येतट’ इन्जेर वेहंता.
10 अदे तीर्दे कब्ले माय्वल वोरोर पापेस्तन बारेते, बगवंतन मुने दूतलिर तप्वक आनंद येतंतेर” इन्जेर येसु वेह्तोर.
बूले मासि ताक्तोर वोर मरिना नमुना
11 येसु उंडे गिर इहिन वेह्तोर: “वोरोर माय्नन इविर मर्क मत्तेर.
12 वूर्गटल चुड्डोर बाबोन सङा, ‘बाबगो!
आस्तितल नाकुन वाय्वल ईसा तूसि इंके सीम’ इन्जेर पूसि कीतोर.
ते बाबो वूर इविरकुन अद आस्ति तूसि सीतोर.
13 कहि रोज्क्ने वोर चुड्डोर तंवा ईसतुन वोम्सि, कोतङ पिय्सि लङ्ना देस सोत्तोर.
अगा सुक-बोग्ने पिस्ले, करब आदत्क करिसि, कोतङ सम्दो कर्चि कीतोर.
14 वोनङ सम्दो कोतङ मार्ता पेजे, अद देस्नगा बेय डगुर करु अर्ता.
अस्के वोन्गा तिंले-उंले गिर बतय सेले मत्ता.
15 “ते अद देस्नोर वोरोर माय्ननगा सोन्जि, काम पूसि कीतोर.
पदिङ मेह्वल मरि
16 ते वोर बेय करुते मत्ता काड्कि, पदिङ तिंवल पीचिते तेर पेटि निह्का इन्जेर सूड्तोर.
तेर बति, वोन तिंले बोरे बतय सिय्मकि.
17 “वोन बुदि वाता अस्के, ‘ना बाबोना रोन बच्विरो वेलेटिर बूय्तलिरकुन मुक्तरि चंदि मंता.
बति नना इगे चंदि सेल्वा सासेर मंतोन.
18 नना इद देसुन सुटि कीसि, ना बाबोनगा दाका अनि, “बाबगो!
नना बगवंतन उल्टा आसि, नीवा नदुडुन मुने पाप कीतोन.
19-20 इङेडल नीवोर मरिना इन्जेर केय्ले कामि सियोन.
नीवुर बूय्तलिर्गटल वोरोना इन्जि, काम्नगा नेमि कीम इंद्का”’ इन्जेर सोन्च कीसि, येंटने बाबोनगा सोंले पेसितोर.
“बति वोर लङ मनेकेन बाबो वोन सूड्तोर.
ते वोन पोरो किवुल लाग्ता.
अस्के विच्चेर मरिनगा सोत्तोर अनि मुका बुर्सि, कलितोर.
बाबोनगा वासि तप कीतोन इन्जेर वोप्वल
21 अस्के वोर मरि बाबोन सङा, ‘बाबगो!
नना बगवंतन उल्टा आसि, नीवा नदुडुन मुने पाप कीतोन.
इङेडल नीवोर मरिना इन्जेर केय्ले कामि सियोन’ इन्जेर इत्तोर.
22 बति बाबो तंवुर सेव्कलिर सङा, ‘सप्ने सोन्जि, सम्दिनल चोकोट्ना पाङुड तचि, वेन पोंडुसट.
वेना बोटतुन मुद्दा दोसि, कालकुन चेपुल्क केरुसट.
23 अनि चोकोट कोडुता पड्डतुन तचि कोयट.
मरट सम्दिर आनंद्ने जेवुन कीकट.
24 सासि-नेंड्तपिनय अनि तप्सि सोन्जि पुड्तपिनय, वेर नावोर मरि मंतोर’ इन्जेर वेह्तोर.
अस्के वूर आनंद्ने जेवुंता काम सुरु कीतेर.
पेर्सोर मरि सोङ आय्वल
25 “अदे वकत्ने पेर्सोर मरि पोलमनल वासेर मत्तोर.
ते तंवा रोतल वाजा-गाजते, पाटङ वार्वल अनि येंद्वल नांद वोन केन्जा वाता.
26 ते वोरोर सेव्कन केय्सि, ‘बतल जर्ग्सेर मंता?’
इन्जेर पूसि कीतोर.
27 ते वोर सेव्कल, ‘नीवोर तमुर वातोर.
रोन वेरि, चोकोटे मल्सि वाता काड्कि, मी बाबल कोडुता पड्डतुन कोयुसि, जेवुन सीसेर मंतोर’ इन्जेर वेह्तोर.
28 अद केन्चि, वोर पेर्सोन सोङ वाता.
ते वोर रोत रोपो नेङ्मकि.
अदेन साटि बाबोय बह्रि वासि, ‘रोपो वरा कोको’ इन्जेर वोन जुल्मा कीतोर.
29 अस्के बाबोन सङा, ‘इचुला बाबा!
इचोङ साल्कनल सेव्कन दात नीवा चाकोरा कीसेर मंतोन.
नीवङ आगेन बस्केन वीड्सि ताक्मकि.
तेर बति, “नी सोप्तलिर सङा दावत कीसि तिन” इन्जेर उंदि चुडुर हेरे गिर नाकुन सिय्मकि.
30 बति नी आस्ति पूरो बोगम-सानिक्नगा कर्चि किय्वल, नी मरि रोन वातोर.
ते वोन साटि, कोडुता पड्डतुन कोयुस्ति’ इन्जेर इत्तोर.
31 अस्के बाबो, ‘कोको!
निमे बस्केट नह्गन मंदंति.
नह्गा मंवल सम्दो नीवये आंद.
32 बति सातोर वोर नेंड्तपिनय अनि तप्सि सोत्तोर वोर पुड्तपिनय, नीवोर तमुर मंतोर.
अदेन साटि, मरट आनंद्ने इद जेवुन तिंवल बरोबरे आंद’ इन्जि इत्तोर” इन्जेर येसु वेह्तोर.