दुस्रुरकुन तस्वा किय्वडुन बारेते येसु बोदा वेह्वल
7
1 “मिरट दुस्रुरकुन कटिन तरिकते तस्वा किय्मट.
अस्केन बगवंतल मीकुन कटिन तरिकते तस्वा कियोर.
2 बारितेके मिरट दुस्रुरकुन बहंते तस्वा कींतिटो, अह्ने मीवा गिर तस्वा बगवंतल कींतोर.
अनि मिरट बद इसोब्ने दुस्रुरकुन कह्चि सींतिटो, अदे इसोब्ने बगवंतल गिर मीकुन कह्चि सींतोर.
3 उंदि मोद नी कड्दगा अर्ता इन.
निमे अदेन तेंड्वक्ने चुडुसि तुकु अर्सि मंवन सङा, ‘नीवा कड्दा तुकु तेंडा सीम’ इन्जि बहन वेहंति?
4 सेलेके नीवा कड्दगा अचोर डगुर मोद इर्सि, नी मुने मंवल माय्नन सङा, ‘नी कड्दा तुकु तेंडा सीम’ इन्जेर बहन पूसि कीसेर मंति?
5 ये कपेटा!
मोदोल नी कड्दगा मंवल डगुर मोदुन तेंड्सि वाटा.
अस्के नी मुने मंवना कड्दगा अर्ता तुकुतुन तेंडा परंति.
6 “बगवंतनङ पवित्रा वालेकुन केडतङ नेयकुन दात्नुरकुन सिय्मट.
अनि मीवङ मुतेलकुन पदिन मुने वाट्मट.
अहन वाट्किट्ते अव दीव्सि दीव्सि करब कीसि वाटंतङ.
बगवंतल मीवङ जुरतकुन पूरि कींतोर
7 “अदेन साटि, मिरट तल्क्सेरेन मंट.
मीकुन तप्वक सिय्वल जर्गंता.
मह्क्सेरेन मंट.
मीकुन तप्वक पुटंता.
कावड तापि कीसेरेन मंट.
मीकुन तप्वक अद उग्डो आंता.
8 बारितेके तल्क्वल हर वोरोन सिय्वल जर्गंता.
मह्क्वन पुटंता.
तापि किय्वन कावड कोले मांता.
9-10 मिह्गटल बाबो आसि मंवल बोरे आयि, तंवोर मरि सारि सीम इन्जेर तल्क्तेके बंडा सींतोरिय?
अह्ने मीन तल्क्तेके, तरस सींतोरिय?
11 मिरट करेबलिर आतेके गिर बति, मी मरि-मियडुन चोकोट्नङ चीज्क सियना इंवल मीकुन टावये.
सोन्च कीम्ट!
स्वर्ग्नगा मंवल चोकोट्नोर मी बाबोते, तनकुन तल्क्वल हर वोरोन चोकोट्नङ वस्तुङ तप्वक सींतोर.
12 “हर गोस्टितगा मी साटि दुस्रुर बतल कियना इन्जेर आसा कींतिटो, अवेकुन मिरटे वूर दुस्रुर साटि कीम्ट.
इहिन कीकिट्ते मोसेना कानुंतगा अनि दुस्रुर पर्वक्तलिर लिहि कीतङ सम्दो आगेन पिय्सि ताक्तुर आंतिट.
स्वर्ग अनि पातडतगा सोंवलिक सरिङ
13-14 “पातडतगा सोंवल सरि बेय रूंद अनि सपय मंदंता.
अनि अगा नेङ्ले पेर्सा पाटक मंदंता.
इवेनल वेलेटिर दांतेर अनि वूर पातडतगा अर्सि, नासेडम आंतेर.
बति स्वर्ग्नगा सोंवल सरि कुत्लेम अनि कटिंता मंदंता.
अनि अगा नेङ्ले चुडुसि जोपा मंदंता.
इदेनल कमि मांदि दांतेर अनि वूरकुन बस्केट मंवल जीवा पुटंता.
मिरट इद कुत्लेम्ना जोपतल नेङ्ले कोसिद कीम्ट.
लबड पर्वक्तलिर बारेते दम्कि सिय्वल
15 “लबड पर्वक्तलिर बारेते मिरट दिहंते मंट.
वूर पोरो सूड्ले, सादु-पांदे मंवलिक गोरेन मोडि दिसंतेर.
बति वूर तम्वा दिलतगा नासेडम किय्वलिक लांडिगलिकुन मोडि मंदंतेर.
16 किय्वलिक कामकुन सूड्सि, वूर बातुर इंवल मिरट करि किया वचो.
बहन इत्तेके, चह्क्नङ वेलिनल आङुर पंडिङ बोरे कोयुर अनि चह्क्नङ पोदेलनल अन्जुरि पंडिङ बोरे कोयुर.
17 इद तीर्दे हर उंदि चोकोट्ना मरा चोकोट्नङे पंडिङ सादंता.
बति वायुट्ना मरा वायुट्नङ पंडिङे सादंता.
18 चोकोट्ना मरा कामि सियोङ अव पंडिङ सादो अनि वायुट्ना मरतगा चोकोट्नङ पंडिङ सादा परोङ.
19 चोकोट्नङ पंडिङ सादो अद मरतुन मायनल नट्क्सि तड्मितगा वाटंतोर.
20 अदेन साटि वूर किय्वलिक कामकुन सूड्सि, बूर लबड पर्वक्तलिर इंवल करि किया परंतिट.
लबड बक्तलिर बारेते दम्कि सिय्वल
21 “नाकुन ‘पर्बु!
पर्बु!’
इन्जेर केय्वल हर वोरोर स्वर्ग्ना राज्नगा नेङुर.
बति सिरिप स्वर्ग्नगा मंवल ना बाबोना इचा तीर ताक्वलिरे अगा नेङा परंतेर.
22 बगवंतल सम्दिरकुन तस्वा किय्वल दिवोसुन नेटि वेलेटिर ना सङा, ‘पर्बु!
पर्बु!
नी पोरोडे ममोट गोस्टिङ वेह्तोम कि?
नी पोरोडे ममोट बूतकुन पूडि सीतोम कि?
अनि नी पोरोडे वेले मय्मतङ काम्क कीतोम कि?’
इन्जेर वेहंतेर.
23 अस्के वूर सङा, ‘मिरट बूर आंदिटो नाकुन टावा सेले.
करेबलिर्निट!
ना मुनेतल सोडियट’ इन्जेर वेहंतोन.
रंड तीर्क्नङ रोह्क दोह्वलिरा नमुना
24 “अदेन साटि नावङ गोस्टिङ केन्चि, अवेन पिय्सि ताक्वल बंडत पोरो तंवा रोन दोह्वल गियन वाले माय्नन मोडि मंदंतोर.
25 पिर वाता, ऊसा वाता अनि वडि-दूंदड गिर वासि पाता.
अद रोन मात्रम उल्टे माय्मकि.
बारितेके ताना बुनदि बंडत पोरो गट दोह्चि मंता.
26 बति नावङ गोस्टिङ केन्चि, अवेन पिय्सि ताकोर वोर, उस्केत पोरो तंवा रोन दोह्वल पिसन मोडि मंदंतोर.
27-28 पिर वाता, ऊसा वाता अनि वडि-दूंदड गिर वासि पाता.
ते वोर पिसल दोह्ता रोन पूरो उल्टे मासि, बोमित मट्रम आता” इन्जेर येसु तना वेह्वलिक गोस्टिङ मह्तोर.
वूर पर्जा केन्चि, बेय गुल आतेर.
29 बारितेके येसु, सास्तिरिर वेह्तपिनय वेह्वक्ने बर्पुर अदिकार्दे वेह्तोर.