केय-काल्क अर्सि मंवन चोकोट किय्वल
2
1 कहि रोज्क आता पेजे, येसु कपेर्नहोम मल्सि वासि, रोन मंतोर इंवल कबुर चहर पूरो पग्रे मासि सोत्ता.
2 ते बेय वेले मांदि अद रोत रोपोडल्ते रचा वेरि निंतेर.
येसु वूरकुन बगवंतना चोकोट्ना कबुडा बोदा वेह्चेर मत्तोर.
3 अद वकत्ने कहितुर, केय-काल्क अर्सि मंवन चाप्रता पाडेतगा मींडुसि, नाल्विरा केय्दे कान्जुसि तरुस्तेर.
4 बति वेले मांदि संद सेल्वक मत्ता काड्कि, वोर माय्नन येसुनगा तरा पर्मकि.
ते वूर रोत पोरो तेर्ग्सि, डगुर गदि कीसि, बरोबर येसुनगा वोन नोडेने चाप्रा अरिक रेह्तेर.
रोतुन गदि कीसि चतनल रोगिन रेह्वल
5 वूरा बरोसतुन सूड्सि, येसु केय-काल्क अर्सि मंवन सङा, “ना मरि!
नीवङ पाप्क मापि आतङ” इन्जेर इत्तोर.
6-7 अद केन्चि अगा मत्तुर वूर सास्तिरिर तम्वा मंदे, “बगवंतन तपुसि दुस्रोर बोरे पापकुन मापि किया परोर.
इहिन-बहन बगवंतन वेर रेह्चि वड्क्सेर मंतोर!”
इन्जेर सोन्च कीतेर.
8 अहन वूरा दिलतगा सोन्च किय्वडुन येसु करि कीसि, वूर सङा, “मिरट इद गोस्टितुन बारि अहन सोन्च कीसेर मंतिट?”
इन्जेर पूसि कीतोर.
9 अनि, “वोर केय-काल्क अर्सि मंवन सङा, ‘नीवङ पाप्क मापि आतङ’ इन्जेर वेह्वल हल्को कि?
सेलेके, ‘नीवा चाप्रता पाडे पिय्सि तेच्चि ताका’ इन्जेर वेह्वल हल्को?
10 बति स्वर्ग्नोर माय्नन दर्तुरित पोरो पापकुन मापि किय्वल अदिकार मंता इंवल मिरट करि कियना” इन्जेर वेह्तोर.
11 वोर केय-काल्क अर्सि मंवन सङा, “‘तेदा!
नीवा चाप्रतुन पिय्सि, रोन सोन’ इन्जि, नना नीकुन वेह्चेर मंतोन” इन्जेर इत्तोर.
12 अस्के येंटने वोर मायनल तेच्चि, तंवा चाप्रतुन पिय्सि, सम्दिर सूड्नेके बह्रि ताक्सेर सोत्तोर.
इदेन सम्दिर सूड्सि बेय गुल आसेर, “इचोर मय्मता काम बस्केन सूड्मकि (अनि) बगवंतने डगुर-पान वायि” इन्जेर इत्तेर.
लेवि इंवल मत्तयिन येसु केय्वल
13 अद आता पेजे येसु उंदुंदि जोका सम्दुर्ता डर्डितगा सोत्तोर.
पर्जा सम्दिर वोन सिर्मुट मीरे मातेर.
ते येसु वूरकुन बोदा वेह्वल सुरु कीतोर.
14 अहन वेह्चि अगटल मुने ताक्सेर सोनेके, आल्पयिनोर मरि आय्वल लेवि टेक्सा वसुलि किय्वल कम्रतगा उच्चि मत्तोर.
वेर टेक्सा वसुलि किय्वल आंदुर.
ते येसु वोन सूड्सि, “ना पेजेय वरा!”
इन्जेर वेह्तोर.
ते वोर लेवि तेच्चि येसुन पेजेय सोत्तोर.
15 येसु अनि तंवुर सिस्यलिर लेविना रोन सोन्जि, वेलेटिर टेक्सा वसुलि किय्वलिर अनि पापिर सङा उच्चि तिन्जेर मत्तोर.
वीर्गटल वेलेटिर येसुन नम्सि ताक्वलिर आंदिर.
16 परिसयुल्कुन सङा मंवलिर कहितुर सास्तिरिर, “टेक्सा वसुलि किय्वलिर सङा अनि पापिर सङा मीरे मासि येसु इहिन बारि तिन्जेर मंतोर?”
इन्जेर वोनुर सिस्यलिरकुन पूसि कीतेर.
17 ते अद केन्चि येसु वूर सङा, “बेमरिते मंवलिरकुन वय्दुना जुरत मंदंता बति, जीवत चोकोट मंवलिरकुन जुरत मनो.
नना पापिरकुन केय्ले वातोन बति, नियत्नुरकुन केय्ले वाय्मकि” इन्जेर जवब सीतोर.
उपसकुन बारेते सवल
18 योहंतुर अनि परिसयुल्क्नुर सिस्यलिर उपस्क पिय्सेर मंदिर.
अद वकत्ने वूर्गटल कहितुर येसुनगा वासि, “ममोट उपस पियंतोम.
बति नीवुर सिस्यलिर बारि उपस पियुर?”
इन्जेर पूसि कीतेर.
19 ते येसु, “नोव्रल तंवुर चुटल-बंदुन तोडो मनेके, बोरे उपस पियुर.
अह्ने वीर सङा नोव्रल मनेके, वीर बारि उपस पियना?
20 बति, बस्केते नोव्रन वूर्गटल वोय्वल दिवोस वांतयो, अस्के कहितुर उपस पियंतेर.
21 बोरे गिर आयि, पडना कप्डि सर्तेके पूना कपिडे अत्क वाट्सि कोटोर.
अहन कोट्तेके, अद अत्क पडना कप्डितुन उंडे इचुर अदिक सरुसंता.
22 आङुर्क्ना पूना कल पडना तितितगा* बोरे वेडियोर.
उंदि मोका वेडितेके आङुर्क्ना पूना कल तितितुन वोहंता.
अदेन साटि तातोक आङुर्क्ना पूना कलदुन पूना तितितगन वेडिया लागर*” इन्जेर येसु वेह्तोर.
आरम्ना दिवोसुन येसु माल्कल आंदुर
23 उंदि आरम्ना दिवोसुन नेटि* येसु तंवुर सिस्यलिर सङा पंटा मंवलिक अव वहुकनल सोन्जेर मनेके, वोनुर सिस्यलिर तिंदन साटि इचुङ्सि अव सेङन ऊस्क्तेर.
24 अस्के परिसयुल्क येसुन, “आरम्ना दिवोसुन बारेता हुकुमुन पिय्सि, किय्वा अद कामुन नीवुर सिस्यलिर बारि कीसेर मंतेर?”
इन्जेर पूसि कीतेर.
25 ते येसु, “दाविद राजल अनि वोनुर सोप्तलिर करुसासि मत्तेर.
अस्के वोर बतल बहन कीतोरेय मिरट दर्मा-ग्रंत्नगा वाचि किय्मकि कि बतल?
26 अब्यातार इंवल पेर्सोर कटोडल मनेके, दाविद राजल बगवंतना पार्तना-विंति किय्वल डेरतगा सोत्तोर.
ते कटोडलिर तपुसि बोरे तिंले हक सेलेङ अव निवोद्नङ सारिङ अब्यातार वोन्गा अंदुस्तोर.
अस्के वोर तना तिन्जि तंवा सङा मंवलिरकुन गिर सीतोर.
बति बगवंतल अदेन तप्ना लेकते येत्मकि!”
इन्जेर वूरकुन वेह्तोर.
27 अनि येसु उंडे गिर, “माय्नलिरा पाय्दत साटिन आरम्ना दिवोस नेमे मासि मंता.
बति माय्नलिर तानङ जुरतकुन पूरि किय्ले गडे माय्मकि.
28 ते आरम्ना दिवोसुन पोरो स्वर्ग्नोर मायनल माल्कल* आसि मंतोर” इन्जेर वेह्तोर.