मार्क
मार्क लिहि कीता चोकोट्ना कबुर
बाप्तिस्मा सिय्वल योहन सरदुन सुद्रि किय्वल
1
1 बगवंतनोर मरि येसु किरिसतुन बारेते चोकोट्ना कबुर मोदोल आय्वल.
2-3 तोले मलाकि पर्वक्तल दर्मा-ग्रंत्नगा,
“इचुला!
नावोर कब्रियन नीकुन तेर मुने रोहंतोन.
वोर नी साटि सरि तयर कीसि, इरंतोर”+
इन्जेर बगवंतनोर मरिन बारेते लिहि कीतोर.
अह्ने येसया पर्वक्तल गिर,
“‘बगवंतल* वायन साटि सरि सुद्रि कीम्ट’
इन्जेर वोरोर बोडि गुटनगा किलिसेर मंतोर”+
इन्जेर लिहि कीतोर.
4 बोडि गुटनगा किलिवल बोर इत्तेके, बाप्तिस्मा सिय्वल योहन आंदुर.
वोर, “कीतङ पापकुन वोप्सि मंदुन मार्युसि बाप्तिस्मा येतट.
अहन कीकिट्ते, बगवंतल मीवङ पापकुन मापि कींतोर” इन्जेर पर्जतुन बोदा वेह्तोर.
5 ते यूदया येरियतल अनि येरुसलेम्ना आजु-बाजुतल वेलेटिर लोकुर योहंतगा वातेर.
वूर तम्वङ पाप्क वोप्सेर, अद योर्दन लविडगा वोना केय्दे बाप्तिस्मा येच्चेर मत्तेर.
6 योहन हूटक्ना बूरने तयर कीतङ पाङुक पोंड्दुर अनि तोल्दे तयर कीता पटिते नडिदुन आव्रि कींदुर.
वोर जाडि-कोडन अनि सुर्वे निय तिन्जि पिसेर मंदुर.
7-8 वोर योहन, “नना मीकुन येते बाप्तिस्मा सीसेर मंतोन.
बति नाकुन तेर डगुर सक्तिवंतल वासेर मंतोर.
वोनङ चेपुल्क्ना पटि रेह्वल सेव्कन मोडि गिर नना कामि सियोन.
वोर मीकुन पवित्रा आत्मते अनि तड्मिते बाप्तिस्मा सींतोर*” इन्जेर बोदा वेह्तोर.
सेव्कल माल्कनङ चेपुल्क्ना पटि रेह्वल
येसु बाप्तिस्मा येत्वल
9 उंदि दिया येसु गलिलया येरियता नजरेतु चहर्दल योहंतगा वातोर.
अनि वोर योहंता केय्दे अद योर्दन लविडगा बाप्तिस्मा येत्तोर.
10 अनि अद येतल बह्रि वानेकेन हाबर कोले मासि, स्वर्गनल बगवंतना पवित्रा आत्मा उंदि पारेवत दात वोर येसुन पोरो रेय्ता.
11 अस्के स्वर्गनल उंदि लेङ, “निमे नावोर लाड्नोर मरिनि आंदि.
नी हिंदल, नना बचोरेय आनंद्ने मंतोन” इन्जेर येसुन सङा वेह्वल केन्जा वाता.
बगवंतनुर दूतलिर येसुना सेवा किय्वल
12 अद आता पेजे येंटने पवित्रा आत्मा येसुन बोडि गुटनगा वोता.
13 अगा येसु चालिस (40) दिवोस्क जंवरकुन नड्डुम मनेके, येसुन वेले तीर्क्ने तंवङ आसनगा कोंडि किय्ले सय्तन सूड्तोर.
अस्के बगवंतनुर दूतलिर वोन्गा पावे मासि, वोना सेवा कीतेर.
बगवंतल दिल्क्नगा राज ताकुस्वल गट्का वाय्वल
14-15 योहंतुन हेरोद राजल जेलतगा वाटुसीता पेजे, येसु गलिलया येरियते मल्सि सोत्तोर.
अनि वोर, “‘मीवङ दिल्क्नगा राज ताकुसंतोन’ इन्जेर बगवंतल वेह्ता गट्का वाता.
ते मिरट कीतङ पापकुन वोप्सि, मीवा मंदुन मार्युसि, बगवंतना चोकोट्ना कबुडुन पोरो बरोसा इरट” इन्जेर बगवंतना राजुन बारेते पर्चर कीतोर.
तना वेह्वलिक करिले सिस्यलिरकुन येसु केय्वल
16 येसु गलिलया सम्दुर्ता डर्डितल ताक्सेर सोनेके, सीमोंतुन अनि वोनोर तमुर आंद्रेयन सूड्तोर.
वूर बोयलिर आता काड्कि, येतगा जार्क वाड्सेर दिस्तेर.
17 ते येसु वूर सङा, “ना पेजेय वरट!
पर्जतुन नावा चर्नते तर्वलिर मोडि, नना मीकुन तयर कींतोन” इन्जेर वेह्तोर.
18 ते वूर येंटने तम्वङ जार्क सुटि कीसि, येसुन पेजेय पेसितेर.
मीन्क पिय्ले येतगा जार वाट्वल
19 येसु उंडे जरसि मुने सोत्तोर.
ते जेबेदयिनुर मर्क याकोब अनि योहन रूकतगा उच्चि, जार्क सुद्रि कीसेर मत्तेर.
20 ते येसु वूरकुन केय्तोर.
अस्के वूर तम्वोर बाबो जेबेदयिन अनि बूय्तलिरकुन रूकतगन सुटि कीसि, येसुन पेजेय सोंवल मोदोल कीतेर.
येसु बूतुन तेंड्सि पूड्वल
21 अहन येसु अनि वूर कपेर्नहोम इंवल चहर्ते सोत्तेर.
अगा आरम्ना दिवोसुन नेटि येसु सुनगोग्नगा सोन्जि, बोदा वेह्वल सुरु कीतोर.
22 बोदा वेह्वलिर सास्तिरिर वेह्तपिनय आय्वक्ने बर्पुर अदिकार्दे वेह्तोर.
ते येसुना अद बोदा केन्चि वूर पर्जा गुल आतेर.
यूदुल्क मीरे माय्वल सुनगोग
23 अस्के अद सुनगोग्नगा बूत सोप्रे मातोर मायनल मत्तोर.
24 ते वोन्गा मंवल बूत बेय जोर्ते, “ये!
नजरेत्नोर येसु!
मा जोलित बारि वासेर मंति?
माकुन नासेडम किय्ले वाति कि?
निमे बोनि आंदियो नाकुन टावय.
निमे बगवंतनोर पवित्रवंतनि आंदि” इन्जेर किल्युसीता.
25 अद केन्चि येसु, “निमे किलिमा अनि वोन्गटल बह्रि वरा” इन्जेर जोर्ते दम्कि सीतोर.
26 ते अद बूत वोर माय्नन गजा गजा हालि कीसेर जोर्ते किल्युसि, बह्रि पेसिसि सोत्ता.
27 इद सूड्सि वूर पर्जा गुल आतेर.
अनि, “इद इहिन-बहन जर्ग्सेर मंता?
बूतकुन गिर तंवा सक्ति अनि अदिकार्दे वोर दम्कि सीसेर मंतोर.
अव वेरिसि बह्रि पेसिसेर मंतङ!”
इन्जेर वोरोन सङा वोरोर वड्क्तेर.
28 अहन येसुन बारेता गोस्टि पूरो गलिलया येरियते सप्ने पग्रे माता.
येसु वेलेटिरकुन चोकोट किय्वल
29 अद सुनगोगनल बह्रि वाता पेजे येसु, याकोब अनि योहंतुन सङा सीमोन अनि आंद्रेयना रोन सोत्तोर.
30 अगा सीमोंता आतिहरे येड्किते कटुल पिय्सि मत्ता.
अद गोस्टितुन बारेते वूर येसुन वेह्तेर.
31 ते येसु सोन्जि अद बायिना केय पिय्सि, उद्ले मदत कीतोर.
अस्के येंटने ताना येड्कि कमि आता.
ते अद बायि वूरा सर्बरेय किय्वल मोदोल कीता.
32-33 अंटित पोड्द सोंवल येलते अद चहर्तेर सम्दिर लोकुर अद रोतगा मीरे मातेर.
वूर तम्वा सङा बूत्क सोप्रे मातुरकुन अनि येड्कि-दुक वालिरकुन येसुनगा पिय्सि वातेर.
34 ते वूर्गटल येड्कि-दुक्ने मंवलिर वेलेटिरकुन चोकोट कीतोर.
अनि बूत्क सोप्रे मातुर वेलेटिर्गटल बूतकुन तेंड्सि पूड्तोर.
बति अव बूतकुन तना बोर आंदुर इंवल टावा मत्ता काड्कि, येसु अवेन वड्का सिय्मकि.
येसु वोरोरे मन्जि पार्तना किय्वल
35 येसु तेलरि बय बय आनेकेन तेच्चि रोतल पेसिसि, बोरे मनुर अव गुटनगा सोन्जि, पार्तना कीसेर मत्तोर.
36 सीमोन अनि वोनुर सोप्तलिर तेत्ता पेजे, येसुन मह्क्सेर सोत्तेर.
37 अनि बस्केते येसुन वूर सूड्तेरो, अस्के, “नी साटि सम्दिरे मह्क्सेर मंतेर” इन्जेर इत्तेर.
38 बति येसु, “नना बोदा वेहनल इव आजु-बाजुतङ नह्क्नगा दाकट वरट!
इदेन साटिने नना वातोन” इन्जेर वूरकुन वेह्तोर.
39 अहन गलिलया येरिया पूरो तिरिसेर, अगा यूदुल्क मीरे माय्वलिक सुनगोक्नगा सोन्जि, बगवंतना बोदा वेह्चेर, बूतकुन तेंड्सि पूड्सेर सोंदुर.
पेर्सा नोपि वालेन चोकोट किय्वल
40 अहन सोन्जेर मनेके पेर्सा नोपि* वाले मायनल येसुनगा वासि, मुर-टोङ्रङ कोट्सि, “नीकुन इस्टम मत्तेके नाकुन चोकोट कीसि सुदुड किया परंति” इन्जेर जुल्मा कीतोर.
41 ते वोन पोरो येसुन किवुल लाग्ता.
ते, “नाकुन इस्टमे” इन्जि केय चह्चि वोन इट्सि, “चोकोट आम!”
इन्जेर येसु वेह्तोर.
42 अस्के येंटने वोर मायनल पेर्सा नोपितल चोकोट आसि, सुदुड आतोर.
43-44 अस्के येसु वोन सारि कीसेर, “इद गोस्टितुन बोने वेह्वक्ने सूडा.
बति निमे चोकोट आतोन इन्जेर कटोडनगा सोन्जि तोहा.
अनि सुदुड आतोन इन्जेर सम्दिरकुन निसनि तोह्ले, मोसेना कानुंतगा आगे सीता अद सम्दोतुन कियना” इन्जेर हुकुम सीतोर.
45 बति वोर मायनल अद गोस्टितुन सम्दिरकुन पचर कीसेर सोत्तोर.
अदेन हिंदल येसु अव नह्क्नगा उजगिरि सोंदा पर्मकि.
अनि नहकुन बह्रितङ पडिद्क्नगा मंदुर.
तेर बति येसुना जाडा मह्क्सेर नालुङ कोन्कनल वेले पर्जा वोन्गा वांदिर.