योहन 1

योहन

योहन लिहि कीता चोकोट्ना कबुर

बगवंतना वचन माय्नना रूप येत्वल

1 कलि गडे माय्वक मुनेने वचन इंवल^* मत्तोर.

बगवंतन सङा वोर वचन इंवल मत्तोर.

वोर वचन बगवंतले आंदुर.

2 वोर वचन इंवल मोदोडले बगवंतन सङा मत्तोर.

3 कलिता सम्दोतुन बगवंतल वोर वचंतुन हिंदले गडि कीतोर.

वोर सेल्वा उंदि गिर वस्तु गडे माय्मकि.

4 वोन्गा जीवा मंता.

अद जीवा सम्दिरकुन वेड्चि सीता.

5 वेड्चि सिकटितगा बहंते पारंतयो, अह्‍ने पर्जतङ दिल्क्नगा वोर वेड्चि सीसेर मंतोर.

बति बस्केट्के अद वेड्चितुन सिकटि^* पिहा परो.

6 बगवंतल वोरोर माय्नन सारि कीतोर.

वोना पोरोल बाप्तिस्मा सिय्वल योहन.^*

7 अद वेड्चितुन बारेते तना वेह्‍वल गवतुन केन्चि, सम्दिर वोर वेड्चितुन दात्नोन पोरो बरोसा इरनिर इन्जेर वातोर.

8 अद वेड्चि सिय्वल योहन आयोर.

बति वेड्चितुन दात्नोन बारेते, वेह्‍ले वातोर वोर, सिरिप गवदारल आंदुर.

9 इद दुनियतुरकुन, बोर्ते जीवता सते वेड्चि सीसेर मंतोरो, वोर वासेर मंतोर.

10 वोर वचन इंवल इद दुनियते वातोर.

वोना केय्देने बगवंतल सम्दो गडि कियुस्तोर.

बति इद दुनियतुर वोर करल बोर आंदुर इंवल वोड्कि किय्मकि.

11 वोर तंवुर्गा वातोर, बति वूर इज्रयेल लोकुर^* वोन वोप्मकि.

12 तेर बति, बोर-बोर्ते तंवा पोरो बरोसा इर्तेरो, वूर सम्दिरकुन बगवंतनुर मरि-मियड आय्ले अदिकार सीतोर.

13 आड-माड्सोन मरि-मियड जल्मा आतपिनय मेंदोल अनि नेतुडे वूर जल्मा आय्मकि.

बति बगवंतल वूरकुन नेमि कीततुन^* हिंदले वोनुर मरि-मियड आतेर.

14-15 वोर वचन मायनल आसि, दर्तुरित पोरो वासि, मा नड्डुम पिस्तोर.

बाप्तिस्मा

योहन येसुन बाप्तिस्मा सिय्वल

सिय्वल योहन वोर वचंतुन बारेते, “‘ना पेजेटल बोर्ते वांतोर’ इन्जि वेह्‍तोनो, वोर वेरे आंदुर.

वेर नाकुन तेर मोदोडले पिसि मत्ता काड्कि, नाकुन तेर डगुर आंदुर” इन्जेर जोर्ते गवा वेह्‍तोर.

वोर वचन माकुन बगवंतना बर्पुर सतेमुन अनि बर्पुर पेर्मता-दयतुन तोह्‍तोर.

इद सत अनि पेर्मता-दयतुन सूड्सि, बगवंतना मय्मतुन करि कीतट.

बगवंतल तंवोर वोरोरे मंवल मरिन सीता मय्मा इदे आंद.

16 वोना बर्पुर पेर्मता-दयतुन हिंदल, मरट सम्दिर आसिर्वादुन पेजेय आसिर्वाद येच्चेर मंतट.

17 अव बव इत्तेके, मोदोडा आसिर्वाद तंवा इचा तीर पर्जा पिसनिर इन्जेर बगवंतल मोसेना केय्दे, दर्मता कानुन सीसि मत्तोर.

बति इंके, रेंडवा आसिर्वाद येसु किरिस्तुना केय्दे अद कानुंतुन तेर चोकोट्नङ पेर्मता-दया अनि सतेम इंवलिकुन सीतोर.

18 बोरे बस्केने बगवंतन सूड्मकि.

बति बस्केट बाबोन सङा मंवल^* वोरोरे मरि आय्वल, माकुन बगवंतन बारेते वेह्‍चि तोह्‍तोर.

बाप्तिस्मा सिय्वल योहंता गवा

(मत्तयि 3:1-12; मार्क 1:1-8; लूका 3:1-9, 15-17)

19 येरुसलेमनल यूदुल्क्नुर अदिकारिर, मोका वेर किरिस्तु मंदर इन्जेर पूसि किय्ले, कटोडलिरकुन अनि लेवियुल्कुन^* योहंतगा सारि कीतेर.

20 ते योहन, “नना किरिस्तुना आयोन” इन्जेर मकुस्वक वूरकुन गवा वेह्‍तोर.

21 अस्के वूर, “ते निमे बोनि आंदि?

येलिया^* पर्वक्तनि कि?”

इन्जेर पूसि कीतेर.

ते, “नना आयोन” इन्जेर इत्तोर.

“मन्जे बविसत्ने वांतोर इन्जि वेह्‍तेर वोर पर्वक्तनि कि?”

इन्जेर वूर पूसि कीतेर.

बति योहन “नना आयोन” इन्जेर वेह्‍तोर.

22 अस्के वूर, “असल निमे बोनि आंदि?

माकुन सारि कीतुरकुन ममोट जवब सिया लागर.

नी बारेते बतल वेहना इंतियो अद माकुन वेहा” इन्जेर योहंतुन पूसि कीतेर.

23 ते योहन, “येसया पर्वक्तल मोदोल वेह्‍तपिनय, ‘बगवंतल^* वायन साटि सरि सुद्रि कीम्ट्’ इन्जेर बोडि गुटनगा किलिवल लेङ्ना ननय आंदुन” इन्जेर वूरकुन वेह्‍तोर.

24-25 अस्के सवल्क पूसि किय्ले वातुर्गटल कहितुर परिसयुल्क, “निमे किरिस्तुनि आय्वि, येलियनि आय्वि, बविसत्ने वाय्वल पर्वक्तनि गिर आय्वि.

ते निमे बद अदिकार्दे बाप्तिस्मा सीसेर मंति?”

इन्जेर योहंतुन पूसि कीतेर.

26 ते योहन, “नना येते बाप्तिस्मा सीसेर मंतोन.

बति ना पेजेटल वाय्वल मी नड्डुम मंतोर.

मिरट वोन वोड्कि किय्विट.

27 ना पेजेटल वाय्वल नाकुन तेर डगुर सक्तिवंतल आंदुर.

वोनङ चेपुल्क्ना पटि रेह्‍ले गिर नना कामि सियोन^*” इन्जेर वेह्‍तोर.

28 इव गट्नङ योहन बाप्तिस्मा सीसेर मत्तोर अद योर्दन लविडुन सिडयिङ बाज मंवल बेतनिया इंवल चहरतगा जर्ग्तङ.

येसुये बगवंतनोर मरि इन्जेर वेह्‍चि तोह्‍वल

29 दुस्रो नेटि योहन तन्गा वाय्वल येसुन सूड्सि,

“इचुला!

वेरे दुनियतुरङ पापकुन कान्चि वोय्वल बगवंतना गोरे पिला आंदुर.

30 इदेन मुने, ‘ना पेजेटल बोर्ते वांतोर इन्जि वेह्‍तोनो, वोर वेरे आंदुर.

वेर नाकुन तेर मोदोडले पिसि मत्ता काड्कि,^* नाकुन तेर डगुर आंदुर’ इन्जेर वेन बारेतेन वेह्‍चि मत्तोन.

31 असल वोर बोर आंदुर इंवल नना वोन वोड्कि कीसि मनोन.

बति इज्रयेल लोकुरकुन वोर तंवा वोड्कि अरुसीनुर इन्जि बाप्तिस्मा सीतोन.

32 अस्केने हाबर कोले मासि, बगवंतना पवित्रा आत्मा उंदि पारेवत दात येसुन पोरो रेय्वल सूड्तोन.

33 येते बाप्तिस्मा सिय्ले नाकुन सारि कीतोर वोर बगवंतले, ‘बोन पोरो पवित्रा आत्मा पारेवत दात रेय्सि उद्वल सूडंतियो, वोरे लोकुरकुन पवित्रा आत्मते बाप्तिस्मा सिय्वल^* आंदुर’ इन्जेर वेह्‍तोर.

अहन वेह्‍वक इत्तेके, वोन नना वोड्कि कीसि मनोन.

34 इद सम्दो सूड्सिने, ‘वेरे बगवंतनोर मरि आंदुर^*’”

इन्जेर बाप्तिस्मा सिय्वल योहन येसुन बारेते गवा वेह्‍तोर.

येसुनुर मोदोडुर सिस्यलिर

35 दुस्रो नेटि दुपरिता नालुङ नेक्नेके योहन अनि वोनुर इविर सिस्यलिर गिरे अगने निल्सि मत्तेर.

36 अदे वकत्ने येसु अगटल वीड्सेर मत्तोर.

वोन सूड्सि, “इचुला!

बगवंतना गोरे पिला” इन्जेर योहन सिस्यलिरकुन वेह्‍तोर.

37 अद केन्चि वूर इविर सिस्यलिर, येसुन पेजेय सोत्तेर.

38 ते अस्के वूर तंवा पेजेय वाय्वल सूड्सि, येसु पेजे मल्सि, “मीकुन बतल पह्‍जे?”

इन्जेर पूसि कीतोर.

ते वूर “गुरुजि^*!

निमे बगा मंदंति?”

इन्जेर पूसि कीतेर.

39 ते येसु, “वासि सूडट” इन्जेर इत्तोर.

अस्के लग-बग पोद्रेक नालुङ नेक्सेर मत्ता.

ते वोर मंवल जागतगा सोन्जि, अंटित्क अगन मत्तेर.

40 योहंता गोस्टि केन्चि येसुन पेजेय सोत्तुर इविर्गटल वोरोना पोरोल आंद्रेयल.

वेर सीमोन-पेतुर्तोर तमुर आंदुर.

41 वेर आंद्रेयल तंवोर तादल सीमोन-पेतुरतुन बेटे मासि, “दादा!

किरिस्तुन^* सूड्तोम” इन्जेर वेह्‍तोर.

42 अनि वोन येसुनगा पिय्सि वातोर.

ते येसु वोन सूड्सि, “निमे योहंतोर^* मरि सीमोंति आंदि.

बति इङेडल नीकुन केपा^* इन्जि केयनिर” इन्जेर इत्तोर.

वेन पेतुरु गिर इंतेर⁺.

येसु पिलिपुन अनि नतनियेलतुन केय्वल

43 दुस्रो नेटि येसु गलिलया येरियते सोंले निर्नय कीतोर.

ते नड्डुम पिलिपुन सूड्सि, “ना सङा वरा” इन्जेर येसु केय्तोर.

44 वेर पिलिप, आंद्रेयल अनि पेतुरु मुविर्ते बेत्सयिदा चहर्तुर आंदिर.

45 पिलिप नतनियेलतुन मह्‍क्ले सोत्तोर.

वोर बेटे माता पेजे, “मोसेना दर्मता कानुंतगा अनि दुस्रुर पर्वक्तलिर लिहि कीतनगा बोन बारेते लिहि कीतेरो, वोर माकुन बेटे मातोर.

वोरे नजरेत चहर्तोर योसेप्नोर मरि येसु आंदुर” इन्जेर पिलिप वेह्‍तोर.

46 अद केन्चि नतनियेल, “एहे!

नजरेतनल बतय चोकोट्ना पुटरिय?”

इन्जेर पिलिपुन पूसि कीतोर.

ते “वासि सूडा” इन्जेर पिलिपु इत्तोर.

47 ते नतनियेल येसुनगा वासेर मनेके वोन सूड्सि, “इचुलट!

वेर करल इज्रयेल जातितोर आंदुर.

वेन्गा कपट बतय सेले” इन्जेर वोन बारेते येसु वेह्‍तोर.

48 ते नतनियेल, “ना बारेते नीकुन बहन टावा?”

इन्जेर पूसि कीतोर.

ते येसु, “पिलिपु, नीकुन केय्वक मुने, निमे अन्जुरि मरत बूड मनेकेन नीकुन सूड्तोन” इन्जेर वेह्‍तोर.

49 अस्के नतनियेल, “ये गुरुजि!

निमे बगवंतनोर मरिनि अनि इज्रयेल लोकुरोर राजनि आंदि!”

इन्जेर जवब सीतोर.

50 ते येसु, “नीकुन अन्जुरि मरत बूड मनेकेन सूड्तोन इन्जेर वेह्‍ततुन हिंदले, बरोसा इर्सेर मंति कि बतल?

इवेन तेर डगुक काम्क सूडंति.

51 अव बव इत्तेके, हाबर कोले माय्वल, स्वर्गनल बगवंतनुर दूतलिर स्वर्ग्नोर माय्ननगा^* बूड रेय्वल, वर्वल मिरट सूड्किट.

⁺ इद सतेम आंद” इन्जेर वेह्‍तोर.