लूका 3

बाप्तिस्मा सिय्वल योहन पर्बुना सरदुन सुद्रि किय्वल

(मत्तयि 3:1-12; मार्क 1:1-8; योहन 1:19-28)

1 तिबेरिया महा राजल राज ताकुस्वल पंद्रा साल्दा गट्कते, पोंति पिलातु यूदया येरियतुन गवर्नर अनि हेरोद गलिलया येरियतुन अदिकारि आसि मत्तोर.

हेरोद्नोर तमुर पिलिपु, इतुरया अनि तरकोनितस येरियन अनि लूसनियल अबिलेने येरियतुन अदिकारिर आसि मत्तेर.

2 अस्के अंनल अनि कयपा इंवलिर पेर्सुर कटोडलिर आसि मत्तेर.

अद गट्कते, बोडि गुटनगा पिसेर मंवल जकरियनोर मरि योहंतगा बगवंतना वचन वाता.

3 ते वोर योहन वासि, योर्दन लविडुन आजु-बाजुतङ येरियनगा तिरिसेर, “मिरट मीवङ पाप्क चुक चुके मातता अनि बगवंतल अवेन मापि कीतता निसनि आय्वल बाप्तिस्मा येतना” इन्जेर बोदा वेह्‍तोर.

4 इदेन बारेते येसया पर्वक्तना ग्रंत्नगा,

“‘बगवंतल^* वायन साटि सरि सुद्रि कीम्ट’

इन्जेर वोरोर बोडि गुटनगा किलिसेर मंतोर.

5 हर उंदि लोदि मूरा लागर.

हर उंदि गुटा अनि मेटा बोमित मट्रम आया लागर.

वकेडलिक सरिङ सड्कल आया लागर.

डोड्डोङ-कप्पिने मंवलिक सरिङ सपय आयय लागर.

6 अस्के माय्नना कंवडितुर सम्दिर बगवंतना बचि किय्वल सक्तितुन सूडनिर”⁺

इन्जेर लिहि कीसि मंता.

7 बाप्तिस्मा येत्ले, पर्जा गुब्डङ गुब्डङ योहंतगा वातेर.

ते योहन, “मिरट विक वाले तरस्क्ना संतांदुन दात्नुर आंदिट.

सिरिप बाप्तिस्मा येत्तेके, बगवंतना सिक्सतल तपुसिया वचो इन्जेर बोर वेह्‍तोर?

ननते वेह्‍मकि!

8 चोकोट्नङ मरक चोकोट्नङ पंडिङ सीतपिनय, चुक चुके मातोम इन्जेर तोह्‍ले, चोकोट्नङ काम्क कीम्ट.

‘ममोट अब्राहम्ना कांदांतुर आता काड्कि, बगवंतल माकुन सिक्सा सियोर’ इन्जेर सोन्च किय्मट.

बारितेके, मिरट सेल्वेके गिर, अब्राहमुन साटि बगवंतल इव बंडनल गिर संतान पुटुसा परंतोर इन्जि मीकुन वेह्‍चेर मंतोन.

9 बहंते इंके पंडिङ सादो अद मरतुन डुंडुसिय्ले, नट्कन साटि मोद्नगा मर्स मोप कीसि तयर मंतोरो, अह्‍ने इंके पाप्नङ काम्कनल मार्युर वूरकुन बगवंतल सिक्सा सिय्ले तयर मंतोर”^* इन्जेर योहन वेह्‍तोर.

10 अद केन्चि मांदितल कहितुर, “बगवंतना सिक्सतल बचे माय्ले माकुन बतल कीम इंति?”

इन्जेर पूसि कीतेर.

11 ते योहन, “बोन्गते रंड आङ्डेङ मंतङो वोर, केर्ले दिक सेलोर वोन उंदि सियना.

अह्‍ने बोन्गते चंदि मंतयो वोर, तिंले दिक सेलोर वोन सङा तूसि तिंदना” इन्जेर वेह्‍तोर.

12 अस्के वोन्गा कहितुर टेक्सा वसुलि किय्वलिर गिर बाप्तिस्मा येत्ले वातेर.

अनि “गुरुजि, माकुन बतल कीम इंति?”

इन्जेर पूसि कीतेर.

13 ते योहन, “सर्कार वेह्‍ता अचोरे टेक्सा वसुलि कीम्ट.

तान अदिक वसुलि किय्मट” इन्जेर वेह्‍तोर.

14 अस्के कहितुर सिपायिर गिर वोन्गा वासि, “माकुन बतल कीम इंति?”

इन्जेर पूसि कीतेर.

ते योहन, “जुल्मतेन आयि, लबड कसुर वाट्सिन आयि, बोन्गटले कोतङ येत्मट.

मीकुन वाय्वल तन्कतेने कुसिते मंट” इन्जेर वेह्‍तोर.

15 पर्जा बचि किय्वल किरिसतुन साटि सूड्सेर मत्तेर.

अदेन साटि, मोका वेरे किरिस्तुयो बतलो इन्जेर योहंतुन बारेते, मंदगा सोन्च कीतेर.

16 ते योहन, “नना मीकुन येते बाप्तिस्मा सीसेर मंतोन.

बति नाकुन तेर डगुर सक्तिवंतल वासेर मंतोर.

वोनङ चेपुल्क्ना पटि रेह्‍वल सेव्कन मोडि गिर नना कामि सियोन.

वोर मीकुन पवित्रा आत्मते अनि तड्मिते बाप्तिस्मा सींतोर.

17 वोर तंवा कडता जागा चोकोट सपय कींतोर.

तुडुस्वल सेति वोना केय्दे मंता.

वोर आपे गोहकुन तुडुसि, अवेन गोदम्नगा इरंतोर.

बति पोटुन पिरो अद तड्मितगा वाट्सि, डुंडुसंतोर” इन्जेर वेह्‍तोर.

18 उंडे गिर योहन वेले गोस्टिङ वेह्‍चेर, पर्जतुन चोकोट्ना कबुर पचर कीतोर.

येसु बाप्तिस्मा येत्वल अनि हेरोद योहंतुन जेल्दगा वाटुस्वल

(मत्तयि 3:13-17; मार्क 1:9-11)

19-22 ते पर्जा बाप्तिस्मा येच्चेर मत्तेर.

अस्के येसु गिर वोन्गा वासि, बाप्तिस्मा येत्तोर.

पवित्रा आत्मा पारेवता रूप्ने रेय्वल

अनि वोर पार्तना कीसेर मनेके, हाबर कोले माता.

ते पवित्रा आत्मा पारेवता रूप्ने येसुन पोरो रेय्ता.

अस्के, “निमे नावोर लाड्नोर मरिनि आंदि.

नी हिंदल नना बचोरेय आनंद्ने मंतोन” इन्जेर उंदि लेङ हाबडल केन्जा वाता.

इद सम्दो आता पेजे, योहन हेरोद राजन, “निमे तप कीसेर मंति!”

इन्जेर पर्जतुन मुनेने इत्तोर.

बारितेके, वोर हेरोद तंवोर तमुर पिलिपु पिसि मनेकेन, वोना बाय्को हेरोदियन तुङ्सि मत्तोर.

अनि दुस्रोक गिर वेलेन तप्क कीसि मत्तोर.

तनकुन अहन इत्ता काड्कि, हेरोद योहंतुन जेलतगा वाटुसि, उंडे उंदि तप जोडि कीतोर.

योहनता केयदे येसु बाप्तिस्‌मा येत्वल (3:19-22)

येसुना कांदांता चरित्रा

(मत्तयि 1:1-17)

23 येसु लग-बग तीसा साल्क्ना वहिते बोदा वेह्‍वल मोदोल कीतोर.

पर्जा वेर येसुन योसेप्नोर मरि इंदिर.

योसेप हेलिनोर मरि आंदुर.

24 हेलि मत्ततुनोर मरि आंदुर.

मत्ततु लेविनोर मरि आंदुर.

लेवि मेल्किनोर मरि आंदुर.

मेल्कि यंननोर मरि आंदुर.

यंनल योसेप्नोर मरि आंदुर.

25 योसेप मत्ततियनोर मरि आंदुर.

मत्ततियल आमोस्नोर मरि आंदुर.

आमोस नाहोम्नोर मरि आंदुर.

नाहोम एस्लिनोर मरि आंदुर.

एस्लि नग्गयिनोर मरि आंदुर.

26 नग्गयि मयत्नोर मरि आंदुर.

मयतु मत्ततियनोर मरि आंदुर.

मत्ततियल सिमियनोर मरि आंदुर.

सिमियल योसेक्नोर मरि आंदुर.

योसेक योदनोर मरि आंदुर.

27 योदल योहंननोर मरि आंदुर.

योहंनल रेसनोर मरि आंदुर.

रेसल जेरुबबेल्तोर मरि आंदुर.

जेरुबबेल सयल्तियेल्तोर मरि आंदुर.

सयल्तियेल नेरिनोर मरि आंदुर.

28 नेरि मेल्किनोर मरि आंदुर.

मेल्कि अद्दिनोर मरि आंदुर.

अद्दि कोसामुनोर मरि आंदुर.

कोसाम एलमदाम्नोर मरि आंदुर.

एलमदाम येरुनोर मरि आंदुर.

29 येरु येहोसुवनोर मरि आंदुर.

येहोसुवल येलियाजर्तोर मरि आंदुर.

येलियाजर योरिम्नोर मरि आंदुर.

योरिम मत्ततुनोर मरि आंदुर.

मत्ततु लेविनोर मरि आंदुर.

30 लेवि सिमियोंतोर मरि आंदुर.

सिमियोन यूदनोर मरि आंदुर.

यूदल योसेप्नोर मरि आंदुर.

योसेप योनम्नोर मरि आंदुर.

योनम एलियकीम्नोर मरि आंदुर.

31 एलियकीम मेलेयनोर मरि आंदुर.

मेलेयल मेंननोर मरि आंदुर.

मेंनल मत्ततनोर मरि आंदुर.

मत्ततल नातंतोर मरि आंदुर.

नातन दाविद्नोर मरि आंदुर.

32 दाविद येसयिनोर मरि आंदुर.

येसयि ओबेद्नोर मरि आंदुर.

ओबेद बोयज्नोर मरि आंदुर.

बोयज सल्मांतोर मरि आंदुर.

सल्मान नयसोंतोर मरि आंदुर.

33 नयसोन अमिनदाब्नोर मरि आंदुर.

अमिनदाबु अराम्नोर^* मरि आंदुर.

अराम एस्रोंतोर मरि आंदुर.

एस्रोन पेरेस्नोर मरि आंदुर.

पेरेसु यूदनोर मरि आंदुर.

34 यूदल याकोब्नोर मरि आंदुर.

याकोब इसक्नोर मरि आंदुर.

इसक अब्राहम्नोर मरि आंदुर.

अब्राहम तेरहुनोर मरि आंदुर.

तेरहु नाहोर्तोर मरि आंदुर.

35 नाहोर सेरुग्नोर मरि आंदुर.

सेरुगु रयुनोर मरि आंदुर.

रयु पेलेगुनोर मरि आंदुर.

पेलेगु हेबेर्तोर मरि आंदुर.

हेबेरु सेलहुनोर मरि आंदुर.

36 सेलहु केयिनांतोर मरि आंदुर.

केयिनानु अर्पक्सदुनोर मरि आंदुर.

अर्पक्सदु सेमुनोर मरि आंदुर.

सेमु नोवहुनोर मरि आंदुर.

नोवहु लेमेकुनोर मरि आंदुर.

37 लेमेकु मेतुसेलनोर मरि आंदुर.

मेतुसेलल हानोक्नोर मरि आंदुर.

हानोकु येरेद्नोर मरि आंदुर.

येरेद महललेल्तोर मरि आंदुर.

महललेल केयिनांतोर मरि आंदुर.

38 केयिनान येनोस्नोर मरि आंदुर.

येनोस सेतुनोर मरि आंदुर.

सेतु आदम्नोर मरि आंदुर.

आदमुन बगवंतल गडि कीतोर.