येसुना जल्मा आय्वल
2
1 अव दिवोस्क्नगा रोमा राज्ना जनोबता लेका कियना इन्जेर सीजर अव्गुस्तु महा राजल हुकुम जारि कीतोर.
2 सिरिया येरियतगा कुरेनियल गवर्नर मनेके, मोदोल जोका जर्ग्ता जनोबा लेका इद आंद.
3 अदेन साटि हर वोरोर तम्वङ पोरोल्क जनोबा लेकतगा लिहि कियुसना इन्जि, तम्वङ तोत्तुरङ नह्क्ने सोत्तेर.
4 योसेप, दाविद राजना कांदांतोर आता काड्कि, गलिलया येरियता नजरेतु चहर्तल, यूदया येरियते मंवल दाविदु पुड्ता बेत्लेहम चहर्ते सोत्तोर.
5-6 तंवा सङा काजे-कोब्रे आसि मंवल, मरियना पोरोडुन गिर जनोबा लेकतगा लिहि कियुसना इन्जेर वोतोर.
वूर अगा मनेके मरियन नोव महिनङ नोव गट्कङ निंतङ.
7 ते मरियल मडनोर मोड्डन जल्मा सीता.
मोड्डल येसुन चारो वाट्वल कुंडितगा मींडुस्वल
ते वोर मोड्डन गिंदने गूंडि कीसि, चारो वाट्वल कुंडितगा मींडुसीता.
गोरेङ गाय्किरकुन दूतलिर दिस्वल
8 अद चहरदुन आजु-बाजुतङ पोलम्क्नगा, कहितुर गोरेङ गाय्किर रात्ने, गोरेन केप्सेर मत्तेर.
9 अस्के बगवंतनोर दूतल वूर्गा पावे मातोर.
अनि बगवंतना मय्मता वेड्चि वूर सिर्मुट बेय जगर्ने गेर-पाता.
ते वूर गाय्किर बेय दड्कि तित्तेर.
10 अस्के वोर दूतल, “वेरिमट!
दिहंते केन्जट!
नना उंदि चोकोट्ना कबुर पिय्सि वातोन.
अद कबुर पर्जा सम्दिरकुन आनंद सींता.
11 अद बतल इत्तेके, नेंड दाविद्ना बेत्लेहम चहरतगा मीकुन बचि किय्वल जल्मा आतोर.
वोरे पर्बु आय्वल किरिस्तु* आंदुर.
12 इदेना आंवल बतल इत्तेके, चारो वाट्वल कुंडितगा गिंदने गूंडि कीसि, वोरोर मोड्डल मींडुसि मंदंतोर” इन्जेर गाय्किरकुन वेह्तोर.
13-14 अस्के अचनक वोर दूतन सङा, बेय वेलेटिर बगवंतनुर दूतलिर पावे मासि,
“पोरो स्वर्ग्नगा मंवल बगवंतन डगुर-पान वायि!
दर्तुरित पोरो तना लाड किय्वल पर्जतुन सांति वायि!”
इन्जेर पार्तना-विंति कीतेर.
15 अनि वूर दूतलिर अगटल स्वर्ग्नेके मल्सि सोत्ता पेजे, गोरेङ गाय्किर, “जर्ग्ता अदेन बगवंतले माकुन वेहुस्तोर.
बेंद वरट रा!
बेत्लेहम सोन्जि सूड्कट!”
इन्जेर तम्वा तमा इत्तेर.
16-17 अनि सपा-सिपा अगा सोन्जि, मरियन, योसेपुन अनि चारो वाट्वल कुंडितगा मींड्सि मंवल मोड्डन सूड्तेर.
अहन सूड्ता पेजे, दूतल तम्वकुन मोड्डन बारेते वेह्चि मत्ता कबुडुन पचर कीतेर.
18 गाय्किर वेह्ता केन्ज्तुर सम्दिर गिर बेय गुल आतेर.
19-20 गोरेङ गाय्किर केन्ज्तङ अनि सूड्तङ सम्दो गिर मोदोल तम्वकुन वेह्चि मत्ता तीरे जर्ग्ता.
अदेन साटि बगवंतन डगुर-पान सीसेर अनि पार्तना-विंति कीसेर मल्सि सोत्तेर.
बति मरियल इव सम्दो गोस्टिन तंवा दिलतगा इर्सि, अवेन बारेते हेतु कीसेर मंदु.
येसुना जल्मा आय्वल (1:1–2:20)
वोर मोड्डन मंदिरतगा वोय्वल
21 अवल-बाबो वोर मोड्डन आट रोज्क्ने तोल कत्रि कियुस्वल कार्या कियुस्तेर.
अनि पीटे रेहे माय्वक मनेके, बगवंतनोर दूतल वेह्चि मत्ता अद येसु इंवल पोरोल वोन दोस्तेर.
22 अव चालिस तोकुड दिवोस्क+ मार्ता पेजे, सुदुड आयन साटि, मोसेना कानुंतुन पिय्सि बलिदान सिय्ले, योसेप अनि मरियल येरुसलेम सोत्तेर.
वोर मोड्डन गिर बगवंतन साटि दत्ता सुटि किय्ले, तम्वा सङा वोतेर.
23 बारितेके बगवंतना कानुंतगा, “जल्मा आतोर मडनोर कांडिन बगवंतन साटि दत्ता सुटि किया लागर”+ इन्जेर लिहि कीसि मंता.
24 अनि अद कानुंतगा हुकुम सीतप रंड पारेवङ आयि, सेलेते रंड पुरक आयि, बलिदान सिय्ले वूर सोत्तेर.
25 अद गट्कते, येरुसलेम्नगा सुमेयोन इंवल वोरोर मायनल मत्तोर.
वोर बगवंतना बाव-बक्तिते अनि नियत्ने पिसेर मत्तोर.
दुक्सते मंवल इज्रयेल पर्जतुन बगवंतल सुम्जि किय्ले, बचि किय्वन बस्के रोहंतोरो इन्जेर सूड्सेर मंवल आंदुर.
बगवंतना पवित्रा आत्मते वोर निन्चि मत्तोर.
26 ‘बगवंतल सारि किय्वल किरिसतुन सूडा बीगर मरन आय्वि’ इन्जेर पवित्रा आत्मा सुमेयोंतुन वेह्चि मत्ता.
27 अनि इंके वोर सुमेयोंतुन मंदिर्तगा वोता.
अदे गट्कते दर्मता कानुंतगा लिहि कीता तीर नेकिङ जर्गुसिय्ले, अवल-बाबो मोड्डल येसुन पिय्सि मंदिरतगा वातेर.
28-30 ते सुमेयोन मोड्डन तंवङ केय्क्ने येच्चि,
“पर्बु, निमे वेह्ता तीर नी सेव्कना आय्वल नाकुन सांतिते मरन आया सीम.
बारितेके मा साटि निमे सारि किय्वल बचि किय्वन नना कुद सूड्तोन.
31 वोर बचि किय्वन दुनियतुरा नदुडुन मुने नेमि कीति.
32 यूदुल्क आयुर वूरकुन सतेमुन बारेते वेह्चि तोह्वल वेड्चि
अनि इज्रयेल पर्जतुन डगुर-पान सिय्वल वेरे आंदुर”
इन्जेर बगवंतन दनेवाद वेह्तोर.
33 अव सम्दो केन्चि येसुनुर अवल-बाबो बेय गुल आतेर.
34 अद आता पेजे सुमेयोन वूरकुन आसिर्वाद सीतोर अनि मरियन, “इचुला!
वेर मोड्डन हिंदल इज्रयेल देस्नुर वेलेटिर बचे मांतेर अनि वेलेटिर नासेडम गिर आंतेर.
वेर येसु बगवंतना निसनि आता काड्कि, वेलेटिर उल्टा तिरियंतेर.
35 इदेन हिंदल, पर्जता दिलतगा मंवलिक सोन्च-विचर्क बह्रि अरंतङ अनि नीवा दिलतुन बेय डगुर दुक्सा वांता” इन्जेर वेह्तोर.
36 अद मंदिर्तगने बगवंतनङ गोस्टिङ वेह्वल अना इंवल पर्वक्ति वेय्लो मत्ता.
अद वेय्लो पनियेल्ता मियड अनि आसेर इंवल कांदांता आंद.
मर्मिङ आता पेजे, अद येडुङ साल्क्नेने रांडे वेय्लो आता.
अनि इंके अद बेय डुगा डुगा आसि मंता.
37 अद वकत्ने, तान हसि नालुङ (84) साल्क्ना वहि मत्ता.
अद उपस्क पिय्सि पार्तना कीसेर, रात-दिहा मंदिर्तगने सेवा कीसेर मंदु.
38 मरियल अनि योसेपुन सङा सुमेयोन वड्क्सेर मनेके, अनल वूर करुम वासि, बगवंतन दनेवाद वेह्ता.
अनि मुक्ति सिय्वन साटि सूड्सेर मंवलिर इज्रयेल लोकुर सङा, वोर मोड्डन बारेते वेह्वल सुरु कीता.
39 इद तीर्दे बगवंतना कानुंतगा मत्ता तीर सम्दो नेकिङ मह्चि, योसेप अनि मरियल गलिलया येरियता नजरेत इंवल तम्वा चहर्ते मल्सि सोत्तेर.
40 येसु बेर्सेर मत्तोर.
आत्मतगा बुदि-गियंते बडे मासेर मत्तोर.
बगवंतना दया वोन पोरो मत्ता.
41 पस्का सडदुन साटि हर साल वोनुर अवल-बाबो येरुसलेम सोंदिर.
42 येसुन बारा साल्क्ना वहि मनेके गिर तम्वा आदतुन पिय्सि, अद पंडुग जर्पुसिय्ले, वूर येरुसलेम सोत्तेर.
43 अद पंडुग जर्ग्वलिक दिवोस्क मार्ता पेजे, योसेप अनि मरियल मल्सि तम्वा नाटे सोंले पेसितेर.
बति येसु येरुसलेम्नगने आग्तोर.
अद गोस्टितुन बारेते, वूरकुन टावा सेले मत्ता.
44 मांदितगा मीरे मासि वासेर मंदनुर इन्जि मत्तेर.
अहन उंदि दियता सरि आता पेजे, अवल-बाबो तम्वुर चुटल्क्नगा अनि सोप्तलिर्गा वोन साटि मह्क्तेर.
45 बति वोर पुट्मकि.
बोदा वेह्वलिर नड्डुम येसु मंवल
46 अहन मूंद रोज्क मह्क्ता पेजे, वूरकुन मंदिरतगा येसु दिस्तोर.
अद गट्कते, बोदा गुरुर नड्डुम उच्चि, वूर वेह्वलिक केन्चेर अनि वूरकुन सवल्क पूसि कीसेर मत्तोर.
47 वोर सिय्वलिक जवब्क केन्ज्तुर सम्दिर वोना गियंतुन सूड्सि, बेय गुल आतेर.
48 अद सूड्सि वोनुर अवल-बाबो गिरे बेय गुल आतेर.
वोना अवल, “कोको!
माकुन बारि इहिन कीति?
ममोट दुक्सते नीकुन बेय मह्क्सेर मत्तोम” इन्जेर इत्ता.
49 ते येसु, “ना साटि बारि मह्क्तिट?
नना ना बाबोना रोन मंदना इंवल, मीकुन टावा सेलेय?
*” इन्जेर पूसि कीतोर.
50 बति वूरकुन तम्वा सङा वेह्ता गोस्टि अर्तम आय्मकि.
51 अद आता पेजे येसु अवल-बाबोन सङा नजरेतु चहर्दे सोत्तोर.
अनि वूरा जरब्ने बेर्स्तोर.
वोना अवल इव सम्दो गट्नन तंवा दिलतगा इर्ता.
52 येसु बुदि-गियंतगा अनि मेंदोडगा चोकोट बेर्सेर मत्तोर.
बगवंतना अनि लोकुरा दयते बडे मासेर मत्तोर.
येसुना चुड्डुर-पान (2:40-52)