मत्तयि 1

मत्तयि

मत्तयि लिहि कीता चोकोट्ना कबुर

येसु किरिस्तुना कुटुंबता चरित्रा

(लूका 3:23-38)

1 इद पुस्तक येसु किरिस्तुनुर तोत्तुरङ पोरोल्कनल सुरु आंता.

वेर येसु दाविद्ना कांदांतोर आंदुर अनि दाविद अब्राहम्ना कांदांतोर आंदुर.

2 अब्राहम इसकुन मिय्तोर.

इसक याकोबुन मिय्तोर.

याकोब यूदन अनि वोनुर तादल-तमुकुन मिय्तोर.

3 यूदल पेरेसु अनि जेरहुन मिय्तोर.

वीरा अवल तामरु.

पेरेसु एस्रोंतुन मिय्तोर.

एस्रोन अरामुन मिय्तोर.

4 अराम अमिनदाबुन मिय्तोर.

अमिनदाब नयसोंतुन मिय्तोर.

नयसोन सल्मांतुन मिय्तोर.

5 सल्मान बोयजुन मिय्तोर.

वेर बोयज्ना अवल राहबु आंदु.

बोयजु वोबेदुन मिय्तोर.

वेर वोबेदुना अवल रूतु आंदु.

वोबेदु येसयिन मिय्तोर.

6 येसयि दाविद राजन मिय्तोर.

दाविद सोलोमोंतुन मिय्तोर.

वेर सोलोमोंता अवल मोदोल उरियन तुङ्सि मत्ता.

7 सोलोमोन रेहबामुन मिय्तोर.

रेहबाम अबियन मिय्तोर.

अबियल आसान मिय्तोर.

8 आसाल येहोसपातुन मिय्तोर.

येहोसपात येहोरामुन मिय्तोर.

येहोराम उजियन मिय्तोर.

9 उजियल योतमुन मिय्तोर.

योतम आहजुन मिय्तोर.

आहज हिज्कियन मिय्तोर.

10 हिज्कियल मनसेन मिय्तोर.

मनसे आमोंतुन मिय्तोर.

आमोन योसियन मिय्तोर.

11 योसियल येकोनियन अनि वोनुर तादल-तमुकुन मिय्तोर.

वीरा गट्कतेन यूदुल्क्ना जातितुरकुन पिय्सि, दासि-पांदे इर्ले बबुलोन देस्ने वोतेर.

12 बबुलोन देस्ने पिय्सि वोता पेजे, बूड वेह्‍वलिर जल्मा आतेर.

येकोनियल सयल्तियेलतुन मिय्तोर.

सयल्तियेल जेरुबबेलतुन मिय्तोर.

13 जेरुबबेल अबिहूदुन मिय्तोर.

अबिहूद येलियाकिमुन मिय्तोर.

येलियाकिम अजोरतुन मिय्तोर.

14 अजोर सादोकुन मिय्तोर.

सादोक अकीमुन मिय्तोर.

अकीम येलिहूदुन मिय्तोर.

15 येलिहूद येलियाजरतुन मिय्तोर.

येलियाजर मत्तांतुन मिय्तोर.

मत्तान याकोबुन मिय्तोर.

16 याकोब मरियनोर माड्सो आय्वल योसेपुन मिय्तोर.

अद मरियना पीटे किरिस्तु इंवल येसु जल्मा आतोर.

17 इद तीर्दे अब्राहम्ना कालमनल ते दाविद्ना कालम वेरि, चोव्दा पिडिनुर मत्तेर.

दाविद्ना कालमनल ते दासि-पांदे इर्ले, बबुलोन देस्ने वोनल वेरि, चोव्दा पिडिनुर मत्तेर.

अहन बबुलोन देस्ने वोता कालमनल ते येसु किरिसतुन वेरि, चोव्दा पिडिनुर मत्तेर.

येसु किरिस्तुना जल्मा आय्वल

(लूका 2:1-7)

18 येसु किरिस्तु इद तीर्दे जल्मा आतोर: येसुना अवल मरियना काजे-कोब्रे योसेप इंवन सङा आता.

ते वूर इविर मीरे माय्वक मुनेने, बगवंतना पवित्रा आत्मता सक्तिते मरियल दिवोस्क मत्ता.

19 बति तानोर माड्सो योसेप नियत्नोर आता काड्कि, नाल्विर मुने ताना हिजत वोय्वा इन्जि, कुसये तान सुटि कियना इन्जेर मंदे सोन्च कीतोर.

20 अहन सोन्च कीसेर मनेके, बगवंतनोर दूतल वोन सप्नते दिसि, “योसेप!

दाविद्ना कांदांतोनि!

मरियल नीवा वेय्लो आंद इन्जि तान करुम किय्ले वेरिमा.

बारितेके अद बगवंतना पवित्रा आत्मता सक्तिते दिवोस्क मंता.

21 अद मरियल वोरोर मोड्डन जल्मा सींता.

वोर तंवा पर्जतुन पापनल बचि किय्वल आता काड्कि, वोन ‘येसु’ इन्जि पोरोल दोसना” इन्जेर वेह्‍तोर.

22 इद गट्ना बगवंतल मोदोल पर्वक्तना^* केय्दे इहिन वाग्दन सीता तीर पूरे माता.

23 “केन्जट!

कोरो पेडि दिवोस्क मन्जि, मोड्डन जल्मा सींता.

वोर मोड्डन ‘इमनुयेल’ इन्जेर पोरोल दोसंतेर”⁺ इन्जेर पर्वक्तल वेह्‍तोर.

इमनुयेल इत्तेके बगवंतल मा सङा मंतोर.

24 बस्केते योसेप जोपनल तेत्तोरो, अस्के बगवंतनोर दूतल हुकुम सीता तीर मरियन तंवा बाय्को इन्जेर करुम कीतोर.

25 बति, वोर मोड्डन मरियल जल्मा सीनल वेरि, तान सङा योसेप मींड्मकि.

जल्मा सीता पेजे वोर मोड्डन ‘येसु’ इन्जेर पोरोल दोस्तोर.