सिडयिङ्ना देस्कनल गियन वालिर वाय्वल
2
1 हेरोद राजल राज ताकुस्वल गट्कते, यूदया येरियता बेत्लेहम्नगा येसु जल्मा आतोर.
अद गट्कते सिडय्तङ देस्कनल गियन वालिर येरुसलेम वातेर.
2 अनि वोर राजन सङा, “यूदुल्क्नोर राजल आय्वल बगा जल्मा आतोर?
वोना जल्मतुन बारेते तोह्वल सुकुमुन सिडयिङ बाज ममोट सूड्तोम.
अनि ‘वोन पार्तना-विंति कीसि वाकट’ इन्जि वातोम” इन्जेर वेह्तेर.
सुकुम तोह्ता तीर गियन वालिर वाय्वल
3 अद गोस्टि केन्चि, हेरोद राजल तंवा मंदगा तका-पिका आतोर.
अनि येरुसलेम्नुर लोकुर गिर गुल आतेर.
4 अस्के वोर राजल डगुक कटोडलिरकुन अनि सास्तिरिर सम्दिरकुन उंदि जागा केयुसि, “किरिस्तु बगा जल्मा आय्वल मंतोर?”
इन्जेर पूसि कीतोर.
5 ते वूर, “यूदया येरियता बेत्लेहम चहरतगा” इन्जेर जवब सीतेर.
अनि, “इदेन बारेते,
6 ‘यूदया येरियता बेत्लेहम चहर्ति!
निमे यूदयतगा मंवलिक चहर्कनल बतय कमि आय्वि!
बारितेके निह्गटल राज ताकुस्वल वोरोर वांतोर.
वोर ना पर्जा आय्वलिर इज्रयेल लोकुरकुन गाय्किन दात मंदंतोर’+
इन्जि पर्वक्तल लिहि कीतोर” इन्जेर वेह्तेर.
7 अद आता पेजे हेरोद राजल वूर गियन वालिरकुन कुसये केयुसि, अद सुकुम दिस्ता गट्कतुन बारेते वूरकुन पूसि कीसि, करि कीतोर.
8 अनि वूरकुन बेत्लेहम सारि कीसेर, “मिरट सोन्जि वोर मोड्डन बारेते दिहंते मह्क्सि, वोना पता करि कीम्ट.
अहन करि कीता पेजे नह्गा वासि वेहट.
अस्के नना गिर सोन्जि वोन पूजा कींतोन” इन्जेर वेह्तोर.
9 ते वूर राजनङ गोस्टिङ केन्चि, तम्वा सरि तमा पेसितेर.
अस्के सिडयिङ बाज्नेके दिसि मत्ता अद सुकुम दिसि, वोर मोड्डल मंवल रोतुन पोरो आगनल वेरि, वूरकुन तेर मुने मुने सोन्जेर अद सरि तोह्ता.
10 ते वूर अद सुकुमुन सूड्सि बेय आनंद येत्तेर.
11 अनि अद रोतगा सोन्जि वोर मोड्डन अनि वोना अवल मरियन सूड्तेर.
अनि मोड्डन मुने मुर-टोङ्रङ कोट्सि पार्तना-विंति कीतेर.
अहन कीता पेजे, तमा तत्तङ अव इनम्क्नङ संदोकङ तेरिसि, सोने, बारिता ऊदुन मोडितङ चीज्क अनि गमा गमा गाडि सिय्वल निय* वोन मुने इर्तेर.
12 अद आता पेजे, बगवंतल वूर गियन वालिरकुन सप्नते दिसि, “हेरोद्नगा सोन्मट” इन्जेर वेह्तोर.
ते वूर दुस्रो सरिय तम्वा देस्नगा सोत्तेर.
योसेप, तंवा वेय्लोन अनि मोड्डन पिय्सि ईजिप्ट देस्ने परर आसि सोंवल
13 वूर सोत्ता पेजे, बगवंतनोर दूतल योसेपुन सप्नते दिसि, “हेरोद वेर मोड्डना परन येत्ले, मह्क्वल मंतोर.
अदेन साटि तेच्चि, मोड्डन अनि वोना अवन पिय्सि, ईजिप्ट देस्ने परर आसि सोन.
अनि ‘वरा’ इन्जेर नना नीकुन वेहनल वेरि अगने मन” इन्जेर वेह्तोर.
14 ते योसेप तेच्चि, तंवा बाय्कोन अनि मोड्डन पिय्सि, रातो-रात ईजिप्ट देस सोंले पेसितोर.
15 अनि वोर हेरोद्ना मरन आनल वेरि अगन मत्तोर.
इदेन हिंदल बगवंतल मोदोल तंवोर पर्वक्तना केय्दे, “ईजिप्टनल नावोर मरिन केय्तोन”+ इंवल गोस्टितुन पूरि किय्लेने इहिन जर्गुसीतोर.
16 अद आता पेजे बस्केते हेरोद तनकुन वूर गियन वालिर पसि कीतेर इन्जेर करि कीतोरो, अस्के वोन बेय सोङ वाता.
ते तना वूर गियन वालिर्गटल बरोबर करि कीता कालमुन पिय्सि, “बेत्लेहम्नगा अनि तान सिर्मुट मंवलिक नह्क्नगा मंवलिर रंड साल्क अनि तान तेर कमि वहि वालिर सम्दिर मोड्डलिरकुन जकट” इन्जेर हुकुम सीतोर.
17-18 इदेन हिंदल बगवंतल तोलेने यिर्मिया पर्वक्तन सङा,
“रामा इंवल नाटे बेय दुक्सते आड्वल
अनि बोब्ले माय्वल लेङ केन्जा वाता.
अद लेङ तंवा संतांदुन साटि आड्वल राहेल्ता आंद.
वूर संतान तन्गटल टूटे माता काड्कि,
अद बोना केय्देन सुम्जे माय्मकि”+
इन्जेर वेहुस्ता गोस्टि पूरे माता.
ईजिप्टनल नजरेतु चहर्दे वाय्वल
19-20 हेरोद्ना मरन आता पेजे, बगवंतनोर दूतल ईजिप्ट्नगा मंवल योसेपुन सप्नते दिसि, “तेदा!
मोड्डना जीवा येतना इंवल सातोर.
अदेन साटि तेच्चि, मोड्डन अनि अवन पिय्सि इज्रयेल देस्ने सोन” इन्जेर वेह्तोर.
21 ते योसेप तेच्चि, मोड्डन अनि अवन पिय्सि इज्रयेल देस्ने सोत्तोर.
22 बति योसेप, बेत्लेहम मंवल यूदया येरियतुन हेरोद राजन बद्लि, वोनोर मरि अर्केलायस राज ताकुसंतोर इन्जेर केन्चि, अगा सोंले वेरितोर.
ते बगवंतल वोन सप्नते दिसि, वेह्ता तीर गलिलया येरियते सोत्तोर.
23 अगा सोन्जि नजरेतु इंवल चहरतगा पिसेर मत्तोर.
इदेन हिंदल, “वेर नजरेत्नोर आंदुर इन्जि केयनिर” इन्जेर मोदोल पर्वक्तलिरा केय्दे वेहुस्ता गोस्टि पूरे माता.