योहन बोदा वेह्वल
3
1-2 कहि साल्क आता पेजे पवित्रा आङुडि* सिय्वल योहन, यूदया येरियतङ बोडि गुटनगा, “स्वर्ग्ना राज करुम वाता.
मीवा मंदुन बगवंतना बाजुन मलुसट” इन्जेर बोदा वेह्वल सुरु कीतोर.
3 वेन बारेते येसया पर्वक्तना ग्रंत्नगा,
“‘बगवंतल* वायन साटि सरि सुद्रि कीम्ट’
इन्जेर वोरोर बोडि गुटनगा किलिसेर मंतोर”+
इन्जेर लिहि कीसि मंता.
4 वेर योहन हूटक्ना बूरने तयर कीतङ पाङुक पोंड्दुर अनि तोल्दे तयर कीता पटिते नडिदुन आव्रि कींदुर.
वोर जाडि-कोडन अनि सुर्वे निय तिन्जि पिसेर मंदुर.
5 अद गट्कते येरुसलेमनल, यूदया येरियतल अनि योर्दन लविडा आजु-बाजुतङ येरियनल वेलेटिर लोकुर योहंतगा वातेर.
6 अनि वूर तम्वङ पाप्क वोप्सि, चुक चुके मासेर, वोना केय्दे योर्दन लविडगा बाप्तिस्मा येच्चेर मत्तेर.
7 अस्के परिसयुल्क अनि सदुकयुल्क वेलेटिर तन्गा वाय्वल योहन सूड्सि, “मिरट विक वाले तरस्क्नङ पिलन दात्नुर आंदिट!
सिरिप बाप्तिस्मा येत्वडुन हिंदल, बगवंतना सिक्सतल तपुसिया वचो इन्जेर मीकुन बोर वेह्तोर?
ननते वेह्मकि!
8-9 चोकोट्नङ मरक चोकोट्नङ पंडिङ सीतपिनय, चुक चुके मातोम इन्जेर तोह्ले, चोकोट्नङ काम्क कीम्ट.
‘ममोट अब्राहम्ना कांदांतुर आता काड्कि, बगवंतल माकुन सिक्सा सियोर’ इन्जेर सोन्च किय्मट.
बारितेके मिरट सेल्वेके गिर अब्राहमुन साटि बगवंतल इव बंडनल गिर संतान पुटुसा परंतोर इन्जि मीकुन वेह्चेर मंतोन.
10 बहंते इंके पंडिङ सादो अद मरतुन डुंडुसिय्ले, मोद्नगा मर्स मोप कीसि नट्क्ले तयर मंतोरो, अह्ने इंके पाप्नङ काम्कनल मार्युर वूरकुन बगवंतल सिक्सा सिय्ले तयर मंतोर”* इन्जेर वेह्तोर.
11 अनि, “मिरट मीवा मंदुन मार्युसीता काड्कि, नना मीकुन येते बाप्तिस्मा सीसेर मंतोन.
बति नाकुन तेर डगुर सक्तिवंतल वासेर मंतोर.
वोनङ चेपुल्क्ना पटि रेह्वल सेव्कन मोडि गिर नना कामि सियोन.
वोर मीकुन पवित्रा आत्मते अनि तड्मिते बाप्तिस्मा सींतोर.
12 वोर तंवा कडता जागा चोकोट सपय कींतोर.
तुडुस्वल सेति वोना केय्दे मंता.
वोर आपे गोहकुन तुडुसि, अवेन गोदम्नगा इरंतोर.
बति पोटुन पिरो अद तड्मितगा वाट्सि डुंडुसंतोर” इन्जेर योहन वेह्तोर.
येसु बाप्तिस्मा येत्वल
13 अद गट्कते येसु गलिलया येरियता नजरेतु चहर्दल बाप्तिस्मा येत्ले, योर्दन लविडुन करुम मंवल योहंतगा वातोर.
14 बति योहन, “ननय नी केय्दे बाप्तिस्मा येतना बति, निमे नह्गा बारि वासेर मंति?”
इन्जेर येसुन आपुस्ले सूड्तोर.
15 ते येसु, “इंकेट्ते इद कार्या वीडुसीम.
बारितेके बगवंतना बर्पुर इचतुन पिय्सि मरट इद कार्या वीडुस्वल नायमे आंद” इन्जेर वेह्तोर.
16 अहन येसु बाप्तिस्मा येच्चि, येतल बह्रि वातोर.
अस्केने हाबर कोले मासि, बगवंतना पवित्रा आत्मा उंदि पारेवत दात येसुन पोरो रेय्वल योहन सूड्तोर.
17 अस्के स्वर्गनल, “वेर नावोर लाड्नोर मरि आंदुर.
वेन हिंदल नना वेले आनंद्ने मंतोन” इंवल उंदि लेङ केन्जा वाता.