येसुन वाय्वलिक परिक्सङ
4
1 अद आता पेजे येंटने सय्तन तोह्वलिक आसनगा कोंडि किय्ले, पवित्रा आत्मा येसुन बोडि गुटनेके वोता.
2 अगा येसु चालिस दिहङ, चालिस रात्क उपस मत्ता काड्कि, वोन बेय कर्वस्ता.
3 अस्के आसङ तोह्वल सय्तन, वोन्गा वासि, “निमे बगवंतनोर मरिनि मंद्किते, इव बंडन सङा, ‘सारिन दात मार्यट’ इन्जि आगे सीम!”
इन्जेर इत्तोर.
4 बति येसु, “‘नरिमन्कल सिरिप गाटो-सारितेन पिसोर बति, बगवंतना तोड्दल वाय्वल हर वचंतुन हिंदल पिसंतोर’+ इन्जि दर्मता कानुंतगा लिहि कीसि मंता” इन्जेर जवब सीतोर.
5 अस्के, सय्तन येरुसलेम्ना मंदिर्ता टिक्रितगा येसुन वोसि, निपुस्तोर.
6 अनि, “निमे बगवंतनोर मरिनि मंद्किते इगेटल बूड डेह्का.
बारितेके, ‘नीकुन काबाडन साटि बगवंतल नी बारेते तंवुर दूतलिरकुन आगे सींतोर’+” इन्जेर वेह्तोर.
अचोरे आय्वा सय्तन, “‘वूर दूतलिर नीवा कालदुन बंडा लाग्वक्ने नीकुन आन्जंतेर’+ इन्जि दर्मा-ग्रंत्नगा लिहि कीसि मंता कि?”
इन्जेर पूसि कीतोर.
7 बति येसु वोन सङा, “‘नीवोर पर्बु आय्वल बगवंतन परिक्सा किय्वा’+ इन्जि दर्मता कानुंतगा लिहि कीसि मंता” इन्जेर वेह्तोर.
8 अस्के सय्तन, येसुन बेय डङल गुटत पोरो वोसि, दुनियतङ सम्दो राजकुन, अवेना सोबतुन अनि डगुर-पांदुन तोह्तोर.
9 अनि येसुन सङा, “निमे ना मुने मुर-टोङ्रङ कोट्सि, नावय पूजा कीकिते, अद सम्दोतुन नीकुने सींतोन” इन्जेर वेह्तोर.
10 बति येसु, “सय्तंदि!
नह्गटल सोडिया!
बारितेके, ‘नीवोर पर्बु आय्वल बगवंतने काल कर्सि, वोनय सेवा कियना’+ इन्जि दर्मता कानुंतगा लिहि कीसि मंता” इन्जेर इत्तोर.
11 अस्के सय्तन, येसुन सुटि कीसि सोत्तोर.
अद गट्कते अचनक बगवंतनुर दूतलिर वोन्गा पावे मासि वोना सेवा कीतेर.
येसु गलिलया येरियते सेवा सुरु किय्वल
12 अद आता पेजे बस्केते योहंतुन जेल्दगा वाड्तेर इन्जेर येसुन करे मातयो, अस्के वोर गलिलया येरियते मल्सि सोत्तोर.
13 अनि नजरेतु चहरतुन सुटि कीसि, कपेर्नहोम इंवल चहर्ते सोन्जि, मंवल सुरु कीतोर.
इद चहर, जेबुलुन अनि नप्तालि येरियना सम्दुर्ता डर्डितगा मंता.
14-16 येसु अहन सोत्ता काड्कि, बगवंतल येसया पर्वक्तना केय्दे,
“जेबुलुन अनि नप्तालि येरियनुरकुन,
सम्दुरतुन बग्ला अनि योर्दन लविडुन वीड्सि मंवलिक येरियनुरकुन
अनि गलिलया येरियतुर,
यूदुल्क आयुर वूर सिकटिते पिसेर मंवलिरकुन अद वेड्चि दिस्ता.
अनि मरंता गट्कते मंवलिर पोरो अद वेड्चि पार्ता”+
इन्जेर लिहि कियुसीता तीर पूरे माता.
17 अद गट्कतल येसु, “स्वर्ग्ना राज करुम वासि मंता.
* पाप्कनल मीवा मंदुन मार्युसट” इन्जेर बोदा वेह्वल मोदोल कीतोर.
येसुनुर सिस्यलिर
18 येसु गलिलया सम्दुर्ता डर्डितल ताक्सेर सोन्जेर मत्तोर.
अस्के बोयलिर आय्वलिर, पेतुरु इन्जेर केय्वल सीमोन अनि वोनोर तमुर आंद्रेयल येतगा जार्क वाड्सेर दिस्तेर.
19 ते येसु वूर सङा, “ना पेजेय वरट!
पर्जतुन नावा चर्नते तर्वलिर मोडि नना मीकुन तयर कींतोन” इन्जेर वेह्तोर.
सिस्यलिर आय्ले येसु बोयलिरकुन केय्वल
20 ते वूर येंटने तम्वङ जार्क सुटि कीसि, येसुन पेजेय सोत्तेर.
21-22 अगटल येसु उंडे जरसि मुने सोनेके, याकोब अनि योहन इंवलिर तादल-तमुर दिस्तेर.
वीरोर बावना पोरोल जेबेदयि.
वीर इविर तम्वोर बाबोन सङा रूकतगा उच्चि जार्क सुद्रि कीसेर मत्तेर.
ते येसु वूरकुन केय्तोर.
अस्के येंटने वूर तम्वा रूका अनि बाबोन सुटि कीसि, येसुन पेजेय सोत्तेर.
येसुन पेजेय पर्जा सोंवल
23 येसु सुनगोक्नगा* बोदा वेह्चेर, स्वर्ग्ना राजुन बारेता चोकोट्ना कबुर पचर कीसेर, गलिलया येरिया पूरो तिरितोर.
अनि पर्जत नड्डुम हरियेक बेमरिने अनि येड्कि-दुक्ने मंवलिरकुन चोकोट कीसेर सोत्तोर.
24 वोर येसुना डगुर-पान सिरिया देस पूरो पग्रे माता.
ते पर्जा तीर-तीर्दङ बेमरिङ मंवलिरकुन, दुक्सनगा मंवलिरकुन, बूत्क सोप्रे मातुरकुन, मुन्ज्का अरुस्वल बेमरितुरकुन, केय-काल्क अर्सि मंवलिरकुन, येसुनगा पिय्सि वातेर.
ते येसु वूरकुन चोकोट कीतोर.
25 गलिलया येरियतल, देकपोलि चहर्कनल,* येरुसलेम नगुडल, यूदया येरियतल अनि योर्दन लविडुन हंदा बाज मंवलिक नह्कनल पर्जा सम्दिर, येसुन पेजेय गुब्डङ गुब्डङ वातेर.