सय्तन येसुन परिक्सा किय्वल
4
1 येसु पवित्रा आत्मते निन्चि योर्दन लविडा येरियतल मल्सि वातोर.
अस्के अद पवित्रा आत्मा वोन बोडि गुटनगा वोता.
2 अगा चालिस (40) दिवोस्क वेरि येसुन तंवङ आसनगा कोंडि किय्ले सय्तन सूड्तोर.
अव दिवोस्क्नगा वोर उपस मत्ता काड्कि, वोन बेय कर्वस्ता.
3 अस्के सय्तन वोन्गा वासि, “निमे बगवंतनोर मरिनि मंद्किते, इद बंडतुन, ‘सारित दात मारिया’ इन्जि आगे सीम!”
इन्जेर इत्तोर.
4 बति येसु, “‘नरिमन्कल सिरिप गाटो-सारितेन पिसोर’+ इन्जि दर्मा-ग्रंत्नगा लिहि कीसि मंता” इन्जेर जवब सीतोर.
5 अस्के सय्तन, येसुन बेय डङल गुटत पोरो वोसि, बेय सप्ने दुनियतङ सम्दो राजकुन तोह्तोर.
6 अहन तोह्चि, “इव सम्दो राजकुन पोरो अदिकार अनि अवेन हिंदल, पुट्वल सोबा अनि डगुर-पान नीकुन सींतोन.
अहन सिय्वल अदिकार नावा केय्दे मंता.
नाकुन पसंद वातोन अद सम्दोत सिया परंतोन.
7 अदेन साटि, निमे ना मुने मुर-टोङ्रङ कोट्सि, नावय पूजा कीकिते, अद सम्दोतुन नीकुने सींतोन” इन्जेर सय्तन येसुन सङा वेह्तोर.
8 ते येसु, “‘नी पर्बु आय्वल बगवंतने काल्क करना अनि सिरिप वोनय सेवा तुङना’+ इन्जि दर्मा-ग्रंत्नगा लिहि कीसि मंता” इन्जेर सय्तंतुन जवब सीतोर.
9 अस्के, सय्तन येरुसलेम्ना मंदिर्ता टिक्रितगा वोसि, येसुन निपुस्तोर.
अनि, “निमे बगवंतनोर मरिनि मंद्किते इगेटल बूड डेह्का.
10 बारितेके, ‘नीकुन काबाडन साटि बगवंतल नी बारेते तंवुर दूतलिरकुन आगे सींतोर.’+
11 अनि, ‘वूर दूतलिर नीवा कालदुन बंडा लाग्वक्ने नीकुन आन्जंतेर’+ इन्जि दर्मा-ग्रंत्नगा लिहि कीसि मंता कि?”
इन्जेर सय्तन पूसि कीतोर.
12 ते येसु, “‘नी पर्बु आय्वल बगवंतन परिक्सा किय्वा’+ इन्जि दर्मा-ग्रंत्नगा लिहि कीसि मंता” इन्जेर वेह्तोर.
13 अद तरिकते सय्तन, ईतङ आसनगा कोंडि किय्ले सूड्ता पेजे, मर्ला मोका पुटनल वेरि येसुन सुटि कीसि सोडितोर.
सय्तन येसुन परिक्सा कियवल (4:1-13)
येसु गलिलया येरियतगा सेवा सुरु किय्वल
14 अस्के येसु पवित्रा आत्मता सक्तिते निन्चि गलिलया येरियते मल्सि सोत्तोर.
वोन बारेता कबुर अद येरिया पूरो कप्ता.
15 यूदुल्क मीरे माय्वल सुनगोक्नगा वोर सोन्जि, बोदा वेह्चेर मंदुर.
अद केन्चि, हर वोरोर वोन मानि कींदिर.
येसु तना बेर्स्ता नाटे सोंवल
16 उंदि दिया तना बेर्स्ता नजरेतु चहर्ते सोत्तोर.
उंदि आरम्ना दिवोसुन नेटि* तनकुन आदत मत्ता तीर सुनगोग्नगा सोन्जि, बगवंतना वचन वाचि किय्ले येसु निल्तोर.
17 अस्के वोन्गा येसया पर्वक्तना ग्रंत वोरोर अंदुसीतोर.
ते येसु अद ग्रंतुन येच्चि, तना वाचि किय्वल बागमुन तेरितोर.
18-19 अनि, “बगवंतना आत्मा ना पोरो मंता.
बारितेके गरिबकुन चोकोट्ना कबुर वेह्ले नाकुन नेमि कीतोर.
कोंडे मासि मंवलिरकुन सुटि किय्ले,
गुड्डिरकुन नदुर सिय्ले, नाकुन सारि कीतोर.
आडि किय्वलिर्गटल मोक्डो सुटि किय्ले,
तंवुरकुन बगवंतल बचि किय्वल गट्का वाता इन्जेर वेह्लेन नाकुन रोह्तोर”+
इन्जेर वाचि कीतोर.
20 अद आता पेजे येसु ग्रंतुन तन्गा सीतोनगा अंदुसि उद्तोर.
सुनगोग्नगा मंवलिर सम्दिर वोने तिर्ने सूड्सेर मत्तेर.
21 अस्के येसु, “दर्मा-ग्रंत्नल वाचि कीतङ गोस्टिङ नेंड मिरट केन्ज्नेकेने बर्पुर आतङ” इन्जेर वेह्तोर.
22 ते वूर सम्दिर वोर वेह्तङ दयतङ गोस्टिन वनि कीसेर गुल आतेर.
बति वूर्गटल कहितुर, “एहे!
वेर्ते योसेप्नोर मरि आंदुर कि रा?”
इन्जेर इत्तेर.
23 अस्के येसु, “मिरट ‘वय्दु नीवा निमे चोकोट कीम!’
इंवल सास्तुर नाकुन वेहंतिट.
अनि, ‘कपेर्नहोम्नगा निमे कीतङ काम्क इद नीवा सोंता चहर्ते गिर कीम!’
इन्जि, तप्वक कोरंतिट इंवल गोस्टि नाकुन टावय” इन्जेर वूरकुन वेह्तोर.
24 अनि येसु उंडे गिर, “बोरे पर्वक्तन तंवा सोंता येरियतुर वोपुर.
इद सतेम आंद.
25 अद बहन इत्तेके तोले, येलिया पर्वक्तना कालम्ने, इज्रयेल देस्नगा सडे मूंद साल्क पिर अर्वा सोन्जि करु अर्ता.
अद गट्कते, अगा वेलेने रांडे वेय्लोक मत्तङ.
26 बति अव सम्दो रांडे वेय्लोक्नगा येलियन बगवंतल रोह्मकि.
सिरिप सीदोन येरियता सारेपतु नाटे मंवल दुस्रो जातिता उंदि रांडे वेय्लोनगने रोह्तोर.
27 अह्ने एलिसा पर्वक्तना कालम्ने, इज्रयेल देस्नगा वेलेन पेर्सा नोपि वालिर मत्तेर.
बति वूर सम्दिर चोकोट आय्मकि.
सिरिप सिरिया देस्नोर दुस्रो जातितोर नयमन इंवले चोकोट आतोर” इन्जेर येसु वेह्तोर.
28 इव गोस्टिङ केन्चि, सुनगोग्नगा मंवलिर सम्दिर वोन पोरो बेय सोङुन वातेर.*
29 अनि तेच्चि येसुन चहरतुन बह्रि डग्लि कीसेर वोतेर.
अद चहर डङल गुटत पोरो दोह्चि मत्ता.
ते तान पोरोडल वोन डग्लि किय्ले सूड्तेर.
30 बति वोर येसु वूर मांदित नड्डुमनल पेसिसि, तंवा सरिय तना सोत्तोर.
दर्मा ग्रंतना वचन पूरे माय्वडुन बारेते येसु वेह्वल (4:16-30)
येसु माय्ननगटल बूतुन तेंड्सि पूड्वल
31 अहन चले मासि, येसु गलिलया येरियता कपेर्नहोम इंवल चहर्दे येव्तोर.
अनि आरम्ना दिवोसुन नेटि बोदा वेह्वल सुरु कीतोर.
32 वोर वेह्वल बोदा अदिकार्दे मत्ता काड्कि, केन्ज्तुर वूर गुल आतेर.
33-34 अस्के अद सुनगोग्नगा बूत सोप्रे मातोर मायनल मत्तोर.
ते वोन्गा मंवल बूत बेय जोर्ते, “ये!
नजरेत्नोर येसु!
मा जोलित बारि वासेर मंति?
माकुन नासेडम किय्ले वाति कि?
निमे बोनि आंदियो नाकुन टावय.
निमे बगवंतनोर पवित्रवंतनि आंदि” इन्जेर किल्युसीता.
35 बति येसु, “निमे किलिमा!
वोन्गटल बह्रि वरा” इन्जेर दम्कि सीतोर.
अस्के अद बूत वोर माय्नन बूड अरुसि, बतय नुक्सन किय्वक्ने वोन्गटल बह्रि वाता.
36 अद सूड्सि, अगा मंवलिर सम्दिर बेय गुल आतेर.
अनि, “इहिन-बहन जर्ग्सेर मंता?
बूतकुन गिर तंवा सक्ति अनि अदिकार्दे वोर डटि कीसेर मंतोर.
अव वेरिसि बह्रि वासेर मंतङ!”
इन्जेर वोरोन सङा वोरोर वड्क्तेर.
37 इद तीर्दे येसुन बारेता कबुर अद येरिया पूरो कप्ता.
येसु वेलेटिरकुन चोकोट किय्वल
38 येसु अद सुनगोगनल पेसिसि सीमोंता* रोन सोत्तोर.
सीमोंता आतिहरे बेय येड्किते कटुल पिय्सि मत्ता.
ते वूर तान साटि येसुन कोर्तेर.
39 ते येसु तान करुम निल्सि, येड्कितुन दम्कि सीनेकेन, अद येड्कि सुटि कीता.
अस्के येंटने अद बायि तेच्चि, वूरा सर्बरेय किय्वल सुरु कीता.
40 अद नेटि पोड्द सोंवल गट्कते, सम्दो तीर्क्नङ बेमरिङ मंवलिरकुन पर्जा येसुनगा पिय्सि वातेर.
अस्के येसु हर वोरोन पोरो केय्क इर्सि, चोकोट कीतोर.
41 वेलेटिर्गटल बूत्क बह्रि पेसिसेर, “निमे बगवंतनोर मरिनि आंदि” इन्जेर जोर्ते किलितङ.
किरिस्तु आंदुर इंवल अव बूतकुन टावा मत्ता काड्कि, ‘वड्क्मट्’ इन्जेर अवेन दम्कि सीतोर.
येसु दुस्रोक चहर्क्ने चोकोट्ना कबुर वेह्वल
42 तेलरि सक्रेन तेच्चि, बोरे मनुर अव गुटनेके सोत्तोर.
पर्जा वोन साटि मह्क्सेर वोन्गा सोत्तेर अनि तम्वकुन सुटि कीसि सोन्मा इन्जेर, येसुन आपुस्ले सूड्तेर.
43 बति येसु, “बगवंतल पर्जतङ दिल्क्नगा मन्जि, राज ताकुस्वल चोकोट्ना कबुडुन बारेते, नना दुस्रोक चहर्क्ने गिर वेहा लागर.
तान साटिने बगवंतल नाकुन सारि कीतोर” इन्जेर वूरकुन वेह्तोर.
44 अनि येसु यूदया येरियते सोन्जि, अगा मंवलिक चहर्क्नङ यूदुल्क मीरे माय्वलिक सुनगोक्नगा बोदा वेह्चेर मत्तोर.