लूका
लूकल लिहि कीता चोकोट्ना कबुर
तियोपिला साबुन लूकल चिटि लिहि किय्वल
1
1-4 मान-मर्यदा वाले तियोपिला साब!
मा नड्डुम जर्ग्तङ गट्नन मोदोडल कुद सूड्सि, वेलेटिर सेवा किय्वलिर माकुन अवेन वेह्तेर.
वूर वेह्तङ केन्चि, वेलेटिर लोकुर अवेन पोडि कीसि लिहि कीतेर.
अव सम्दो गिर मोदोडल करलेन बर्पुर जर्ग्तङ इन्जेर दिहंते सूड्सि, करि कीतोन.
अनि अव गट्नन उंदित पेजेय उंदि जर्ग्ता तीर नीकुन लिहि कियना इंवल सोन्च नाकुन वाता.
साब इवेन वाचि कीसि, निमे मोदोल केन्ज्ति अव सम्दो गिर, सतेमे आंदुङ इन्जेर करि कियना इंवले नावा इचा.
सुरु अय्वल
योहंता जल्मतुन बारेते वचन
5-6 अद गट्कते हेरोद राजल राज ताकुस्वल यूदया येरियतगा, जकरिया इंवल कटोडल मत्तोर.
वोर अबिया कटोडा कांदांतोर आंदुर.
वोना वेय्लो अहरोन कटोडा कांदांता आंद.
ताना पोरोल एलिजबेत.
वीर आड-माड्सो बगवंतना इचा तीर पिसेर मत्तेर.
अनि वोनङ हुकुमकुन अनि नेकिन पिय्सि कसुर सेल्वक्ने ताक्तेर.
7 तेर बति एलिजबेत गोड्डु मत्ता काड्कि, वूरकुन संतान आय्मकि.
वूर इविर गिर बेय बुडि-बुडियलिर आसि मत्तेर.
8 जकरियल मंवल कटोडा गुरुप्नुरा सेवा किय्वल वकत वाता.
ते वोर येरुसलेम्ना मंदिरतगा बगवंतना सेवा कीसेर मत्तोर.
9 अस्के बगवंतना मंदिरतगा दूप वाटन साटि कटोडा-पांदुन पिय्सि रिवज तीर चिटिङ वाड्तेर.
अंटित्क जकरियना वंत वाता.
10 ते पर्जा सम्दिर गिरे बह्रि पार्तना कीसेर मनेके, जकरियल मंदिरतगा रोपो सोन्जि, दूप वाड्सेर मत्तोर.
11 अस्केने अद दूप्ना बोव्लतुन तिना बग्ला, बगवंतनोर दूतल निल्सि दिस्तोर.
12 ते दूतन सूड्ता बरोबर जकरियल दड्कि तिन्जि, बेय वेरितोर.
13 बति दूतल, “जकरिया वेरिमा!
मरिन साटि निम कीता पार्तना बगवंतल केन्ज्तोर.
नी वेय्लो एलिजबेत मोड्डन जल्मा सींता.
वोन योहन* इन्जेर पोरोल दोसा.
14 वोना जल्मतुन हिंदल नीकुन बेय कुसि लागंता.
वोर पुड्ता काड्कि, पर्जा सम्दिरकुन गिर वेले आनंद लागंता.
15-17 बारितेके, बगवंतना नदुडे वोर डगुर-पान वाले आंतोर.
कल आयि, निसा वरुस्वलिक रसङे आयि, वोर उंनोर.
अवना पीटेत रोपो मनेकेडले, बगवंतना पवित्रा आत्मते, वोर निन्चि मंदंतोर.
येलिया पर्वक्तन मोडिता दिल्ते अनि सक्तिते पर्बुन तेर मुने पर्जतगा दांतोर.
वूर किय्वलिक पाप्कनल मलुसि, तिरिसि बाबो बगवंतना सेवा कीनल कींतोर.
बगड-नियत्ने ताक्वलिरकुन नियत्ने पिसनल सोन्च वायुसंतोर.
इहिन इज्रयेल लोकुर्गटल वेलेटिरकुन वूरोर पर्बु आय्वल बगवंतनेके मलुसंतोर.
इद तीर्दे पर्बुन साटि, पर्जतुन वोर तयर कींतोर” इन्जेर दूतल वेह्तोर.
18 ते जकरियल, “निमे वेह्ता तीर करल जर्गंता इन्जेर नाकुन बहन करे मायर?
बारितेके, नना बुडियना आतोन अनि ना वेय्लो गिर डुगल मातरि आता” इन्जेर दूतन वेह्तोर.
19 अस्के दूतल, “नावा पोरोल गाब्रियेल.
नना बगवंतना चर्नते सेवा किय्वल दूतना आंदुन.
मोड्डल पुट्वल चोकोट्ना कबुडुन नीकुन वेहा इन्जेर, बगवंतल नाकुन रोह्तोर.
20 इचुला केन्जा!
इद गोस्टि बरोबर वकत्ने जर्गंता.
बति इदेन निमे नम्वा काड्कि, इद गट्ना जर्गनल वेरि, मूकनि आसि मंदंति” इन्जेर जकरियन वेह्तोर.
21-22 अगा बह्रि मंवलिर सम्दिर, “जकरियल इचोर वेले जेल मंदिरतुन रोपो बारि मंतोरेय?”
इन्जेर गुल आसेर मत्तेर.
आक्रित बस्केते वोर बह्रि वातोरो, अस्के वूर सङा बतय वड्का पर्मकि.
अद सूड्सि, जकरियन मंदिरतगा बगवंतना दर्सन आता इन्जेर पर्जा करि कीतेर.
बारितेके, वोर मूकल आसि, केय्क हालि कीसेर मत्तोर.
23 अव सेवा किय्वलिक दिवोस्क मार्ता पेजे, जकरियल तंवा रोन सोत्तोर.
24-25 कहि रोज्क आता पेजे, वोना वेय्लो एलिजबेत दिवोस्क मत्ता.
ते अद, “बगवंतल ना पोरो दया तोह्चि, पर्जत नड्डुम सोत्ता हिजतुन नावा गर्बि निपुसि, काबाड्तोर” इन्जेर सियुङ महिनङ वेरि, बोने दिस्वक्ने मत्ता.
येसुना जल्मत बारेते वचन
26 एलिजबेत सारुङ महिनना पीटेते मनेके, गलिलया येरियता नजरेतु चहर्दा उंदि कोरो पेडिनगा, बगवंतल गाब्रियेल दूतन सारि कीतोर.
27 अद कोरो पेडिना पोरोल मरियल.
दाविद्ना कांदांतोर योसेप इंवल माय्नन सङा, ताना काजे-कोब्रे आसि मत्ता.
28 ते बगवंतनोर दूतल तान्गा वासि,
बगवंतनोर दूतल मरियन पावे माय्वल
बगवंतल नीकुन आसिर्वाद सीसि, नी सङा मंदंतोर” इन्जेर वेह्तोर.
29 बति मरियल अव गोस्टिङ केन्चि, तकपिका आता.
अनि अव गोस्टिना अर्तम बतल मंदर बेहे इन्जेर सोन्च कीसेर मत्ता.
30 ते अद सूड्सि दूतल, “मरिया निमे वेरिमा!
बगवंतल नी पोरो दया तोह्चेर मंतोर.
31 इचुला केन्जा!
निमे पीटे मन्जि, मोड्डन जल्मा सींति.
वोन येसु इन्जेर पोरोल दोसा लागर.
32 वोर बेय डगुर-पान वाले आंदुर.
वोन सर्वा सक्तिवंतल बगवंतनोर मरि इन्जेर केयनिर.
वोनोर तोत्तोर दाविद राजना राजा-गादि, पर्बु आय्वल बगवंतल वोन सींतोर.
33 याकोब्ना कांदांतुर पोरो, वोर बस्केट राज ताकुसंतोर.
वोना राज बस्केट्के मूरे मायो” इन्जेर तान वेह्तोर.
34 ते मरियल “नना कोरो पेडिना आंदुन.
इद बहन जर्गर?”
इन्जेर दूतन पूसि कीता.
35 अस्के दूतल, “बगवंतना पवित्रा आत्मा नी पोरो रेयंता.
अनि वोर सर्वा सक्तिवंतना सक्ति निह्गा वांता.
इदेन हिंदल, नीकुन पुट्वल मोड्डल पवित्रा मंदंतोर अनि वोन बगवंतनोर मरि इन्जेर केयंतेर.
36 मरिया इचुला केन्जा!
नी चुटम एलिजबेत, तंवा मातरि-पांदे पीटेते मंता.
गोड्डुय मंवल तान इंके सारुङ महिनङ ताकंतङ.
अद मोड्डन जल्मा सींता.
37 बगवंतन सङा आया परो इंवल बतय सेले” इन्जेर दूतल वेह्तोर.
38 अद केन्चि मरियल, “नना बगवंतना सेवा किय्वना आंदुन.
निम वेह्ता तीर जर्गि” इन्जेर इत्ता.
अस्के बगवंतनोर दूतल अगटल सोत्तोर.
मरियल एलिजबेतुन बेटे माय्वल
39-40 ते मरियल सप्ने तयर आसि,* यूदा येरियतङ गुटन पोरो मंवल चहर्ते सोत्ता.
मरियल एलिजबेत्ना रोन सोंवल
41-42 ताना लेङ केन्ज्ता बरोबर, एलिजबेत्ना पीटेते मंवल मोड्डल पदा-विदा मेलितोर.
अस्के एलिजबेत पवित्रा आत्मता सक्तिते निन्चि जोर्ते, “बगवंतल सम्दो वेय्लोक्नगटल नीकुने आसिर्वाद सीतोर.
नी पीटेते मंवल मोड्डन गिर आसिर्वाद सीतोर.
43 ना पर्बुना अवल नह्गा ताक्सि वाता.
इहिन-बहन जर्ग्सि मंदर?
44 इचुला केन्जा!
नीवा लेङ केन्ज्ता बरोबर, ना पीटेते मंवल मोड्डल आनंद्ने पदा-विदा मेलितोर.
45 बगवंतल वेहुस्तङ गोस्टिङ जर्गंतङ इन्जेर नम्ता काड्कि, निमे आसिर्वाद येत्ति” इन्जेर मरियन इत्ता.
46 अस्के मरियल,
“नावा आत्मा बगवंतन डगुर-पान सीसेर मंता.
47 नाकुन बचि किय्वल बगवंतनगा नावा मन आनंद येच्चेर मंता.
48 बारितेके, बगवंतना सेवा कीसेर चुडुर-पांदे मंवना आंदुन.
तेर बति, ना पोरो दया तोह्तोर.
अदेन साटि, इङेडल सम्दि पिडिनुर, ‘आसिर्वाद येत्ता वेय्लो’ इन्जेर नाकुन केयनिर.
49 सर्वा सक्ति वाले बगवंतल ना साटि चोकोट्नङ काम्क कीतोर.
वोना पोरोल पवित्रा आंद.
50 तंवा पोरो बाव-बक्तिते मंवलिरा संतांदुन पोरो, पिडिनङ-पिडिङ दया तोहंतोर.
51 पर्बु तंवा केय्दे ताकदुन तोह्तोर.
तम्वा मंदङ सोन्च-विचरकुन पिय्सि, गर्वते मंवलिरकुन पग्रि कीसि वाट्तोर.
52 डगुर-पांदे मंवलिर राजलिरकुन राजा-गादिनल रेह्तोर.
अनि चुडुर-पांदे मंवलिरकुन डगुर-पान सीसि, उपुस्तोर.
53 करुसासि मंवलिरकुन पह्जे मत्ता सम्दो चोकोट्ना सीतोर.
अनि दनेवंतलिरकुन रिकम केय्क्ने रोह्तोर.
54-55 मावुर तोत्तुरकुन तना वेह्ता तीरे अब्राहमुन
अनि वोना संतांदुन पोरो बस्केट दया तोहना इंवल गोस्टितुन हेतु इर्तोर.
अनि तंवा सेवा किय्वल इज्रयेल पर्जतुन मदत कीतोर”
इन्जेर एलिजबेतुन वेह्ता.
56 एलिजबेत्ना रोन लग-बग मूंद महिनङ वेरि मत्ता पेजे, मरियल तंवा रोन मल्सि सोत्ता.
बाप्तिस्मा सिय्वल योहंता जल्मा
57 नोव महिनङ नोव गट्कङ निंता पेजे एलिजबेत मोड्डन जल्मा सीता.
58 अस्के आजु-बाजुतुर अनि चुटल-बंद, ‘तान पोरो बगवंतल वेले दया तोह्तोर्’ इन्जि, तान बरोबर बेय आनंद येत्तेर.
59 अनि वूर आट (8) रोज्क्ने, मोड्डलिरा तोल कत्रि* कियुस्वल कार्यतुन साटि वातेर.
अस्के बाबो जकरियना पोरोले* वोन दोस्लेन आतेर.
60 बति एलिजबेत वूरकुन आपुसि, “सेले-सेले!
वेन योहन इंवल पोरोले दोसा लागर” इन्जेर वेह्ता.
61 अस्के वूर, “येया!
ईतल पोरोल मी चुटल-बंद्नगा बोने सेले कि!”
इन्जेर गुल आतेर.
62 अनि मोड्डन बता पोरोल दोसना इंति?
इन्जेर मूकलिर दात केय्क हालि कीसेर बाबोन वूर पूसि कीतेर.
63 ते वोर, उंदि पाटि तरट इन्जेर केय्क्ने सूचना कीतोर.
अनि अद पाटितगा “वेना पोरोल योहन” इन्जेर लिहि कीतोर.
अद सूड्सि, वूर बेय गुल आतेर.
64 अस्के येंटने जकरियना वेन्जेर वोदल आसि, बगवंतन डगुर-पान सीसेर, वड्क्वल मोदोल कीतोर.
65 अद सूड्सि, आजु-बाजुतुर्गा बेय वेरे जोमे माता.
यूदया येरिया सम्दो इव गट्नन बारेता गोस्टि कप्ता.
66 अद गोस्टि केन्ज्तुर सम्दिर गिर अव गट्नन तम्वा मंदे इर्सि, “वोर मोड्डल उंडे बहन तयर आंतोरेय?”
इन्जेर सोन्च कीतेर.
बगवंतना सक्ति* वोर कांडिन करलेन सात मत्ता.
जकरियल वेह्ता बविसत्ना गोस्टि
67 अस्के वोर कांडिनोर बाबो जकरियल पवित्रा आत्मते निन्चि, बगवंतल इहिन वेहुस्तोर:
68 “मा इज्रयेल लोकुरोर पर्बु आय्वल बगवंतन डगुर-पान वायि!
बारितेके वोर वासि, तंवा पर्जा आय्वल माकुन मुक्ति सीतोर.
69-70 तोले वोनुर नेकितुर पर्वक्तलिरा केय्दे वाग्दन सीता तीर,
माकुन पगा-दारना केय्दल बचि किय्वल सक्तिवंतन,
तंवोर सेव्कल दाविदु राजना कांदांतल रोह्तोर.
71 मा पगा-दार्क्नगटल अनि माकुन मेचुर वूर्गटल बचि कींतोर.
72 मा तोत्तुरा संतांदुन पोरो दया तोहंतोन इन्जेर वाग्दन सीतोर.
अदेन हेतु इर्लेने, बगवंतल इहिन कीतोर.
73 इद वाग्दन मा तोत्तोर बाबो अब्राहमुन सीता आंद.
74-75 मा पगा-दार्क्ना केय्दल वोर माकुन बचि कीतोर.
इदेन हिंदल, मरट सम्दिर गिरे सानल वेरि सुदुड-पांदे अनि नायम्ने पिसेर,
वेरिवक्ने सेवा कियना इंवले बगवंतना इचा.
76 ना मरि नीकुन सर्वा सक्तिवंतल बगवंतनोर पर्वक्तल इन्जेर केयनिर.
बारितेके, निमे पर्बुन मुने ताक्सेर, वोन साटि सरदुन सुद्रि कींति.
77 पाप मापि आय्वडुन हिंदल, बचे माया परंतिट इन्जेर निमे पर्जतुन बोदा वेहंति.
78 बगवंतल तंवा दिलतगा लाग्ता दया अनि किवुलतुन हिंदले, स्वर्गनल वोरोर नीतिवंतन* पोड्द पेसिनेकेडा वेड्चित दात मह्गा सारि कीतोर.+
79 पोड्द पेसिनेके अद वेड्चि बहंते सिकटितुन पूडंतोयो, अह्ने सिकटितगा मंवलिरकुन अनि मरंतुन बारेते वेरिवलिरकुन तंवा वेड्चि सीसि,
वोर सांतिता सर्दे ताकुसंतोर”
इन्जेर वेह्तोर.
80 वोर कांडि बेर्सेर, बाव-बक्तितगा बडे मासेर मत्तोर.
इज्रयेल पर्जतुन बोदा वेह्वल वकत वानल वेरि, योहन बोडि गुटनगा पिसेर मत्तोर.