येतुन आङुर्क्ना रसा किय्वल
2
1 इद जर्ग्सि रंड रोज्क* आता पेजे, गलिलया येरियता, काना इंवल चहर्ते, उंदि मर्मि-पोरोल जर्ग्ता.
येसुना अवल अगा मत्ता.
2 अव मर्मिनगा येसुन अनि वोनुर सिस्यलिरकुन गिर केय्सि मत्तेर.
ते अगा वूर सोत्तेर.
3 अद जेवुंतगा आङुर्क्ना रसा मार्ता.
ते अवल, “वूर्गा आङुर रसा मार्ता” इन्जेर येसुन वेह्ता.
4 ते येसु, “नाकुन बारि वेहंति वो?
नना बोना आंदुन इंवल वोड्कि अरुस्वल वकत अजुन वायोये” इन्जेर अवन वेह्तोर.
5 अस्के अवल सर्बरेय किय्वलिर सङा, “वोर वेह्ता तीर कीम्ट” इन्जेर वेह्ता.
6 यूदुल्क सुदुड किय्वल कामुन साटि, अगा नारितङ बंडनङ सारुङ सोरङ मत्तङ.
उंदि उंदि सोरा येडुङ-आट बिंदेना येर पिय्ंदुङ.
7 येसु, “अव सोरन येते निहट” इन्जेर सर्बरेय किय्वलिरकुन वेह्तोर.
ते वूर अव सोरङ सिगा सिगा निह्तेर.
8 अस्के येसु, “इङे मिरट!
इचुसि मुडुसि जेवुंता इंतजम कियुस्वनगा वोम्ट” इन्जेर वेह्तोर.
ते वूर वोतेर.
9-10 वोर इंतजम कियुस्वल येतल मारिता अद आङुर रसतुन सवद सूड्तोर.
येतुन आङुर रसा किय्वल
बति वोर इंतजम कियुस्वन टावा सेले.
ते वोर मायनल नोव्रन केय्सि, “दुस्रुर सम्दिर मोदोल चोकोट्ना रसा* वेडिसि, मांदितुन निसा वर्ता पेजे, चप्डि आङुर रसा वेडियंतेर.
बति निमे आक्रि वेरि गिर बेय चोकोट्ना रसा वेड्युसीति” इन्जेर इत्तोर.
11 इहिन येसु गलिलया येरियता काना इंवल नाटे अद मय्मता काम कीसि, तंवा सक्तितुन तोह्तोर.
अदेन साटि वोनुर सिस्यलिर वोन्गा बरोसा इर्तेर.
12 अद आता पेजे येसु, वोना अवल, तमुक अनि सिस्यलिर मीरे मासि कपेर्नहोम इंवल चहर्ते सोत्तेर.
अनि कहि रोज्क वूर अगन मत्तेर.
येसु मंदिरतगा सोंवल
13-14 यूदुल्क्ना पस्का इंवल सड करुम वाता.
ते येसु येरुसलेम सोत्तोर.
अगा येव्ता पेजे, बगवंतना मंदिर्तगा येसु सोत्तोर.
अद मंदिर्ता आव्रतगा बलिदान सिय्ले कोंदन, गोरेन अनि पारेवन वोम्वलिर बेपरिदार्क अनि दुस्रो देस्नङ कोतन बद्लि किय्वलिर गिर अगा उच्चि मत्तेर.
15 अद सूड्सि, येसु नोडेने चाटुन मोडि कीसि गोरेन, कोंदन अनि सम्दिरकुन मंदिर्तल पूडि सीतोर.
वूर कोतङ बद्लि किय्वलिरङ कोतन रीक्सि, वूरङ टेबलकुन उल्टि कीतोर.
16 वूर पारेवङ वोम्वलिर सङा येसु, “नावोर बाबोना रोतुन हाटुमुन दात किय्मट.
इव सम्दिन इगेटल बह्रि वोम्ट” इन्जेर वेह्तोर.
17 अद सूड्सि, “नीवा रोतुन पर्जा वेले मानि कियना इन्जेर आसा कीता काड्कि, दुस्रुर नाकुन बेय उल्टा आसेर मंतेर+” इन्जेर दर्मा-ग्रंत्नगा लिहि कीसि मंता इन्जि, सिस्यलिर यादि कीतेर.
18 बति यूदुल्क्नुर अदिकारिर येसुनगा वासि, “नीकुन बगवंतल अदिकार सीसि मत्तेके, माकुन उंदि निसनि तोहा?”
इन्जेर पूसि कीतेर.
19 ते येसु, “इद मंदिरतुन उल्टि कीम्ट.
तेन नना तिरिसि मूंद रोज्क्ने दोहंतोन” इन्जेर वेह्तोर.
20 अद केन्चि यूदुल्क गुल आसि, “इद मंदिरतुन दोह्ले चालिस सारुङ (46) साल्क पिय्ता.
निमे मूंद रोज्क्ने दोहा परंतिय?”
इन्जेर येसुन इत्तेर.
21 बति येसु तंवा मेंदोडा मंदिरतुन बारेते इद गोस्टि वेह्तोर.
22 सिस्यलिर, येसु सासि-नेंड्ता पेजे, इदेन हेतु कीसि, दर्मा-ग्रंत्नगा लिहि कीसि मंवडुन अनि येसु वेह्ता गोस्टितुन पोरो बरोसा इर्तेर.
माय्नना दिलतगा मंवल येसुन टावा