निमे उंडे मला जल्मा येता लागर
3
1 परिसयुल्क्ना बाज्नोर निकोदेम इंवल यूदुल्क्नोर मुके अदिकारि मत्तोर.
2 वोर उंदि रात्ना येलते येसुनगा सोन्जि, “गुरुजि, ‘निमे बगवंतनगटल वातोनि आंदि’ इन्जेर माकुन टावये.
बारितेके, निमे किय्वलिक मय्मतङ काम्क बगवंतना सात सेल्वा बोरे किया परोर” इन्जेर वेह्तोर.
3 अस्के येसु, “वोरोर पूना जल्मा येता बीगर, बगवंतना राज्नगा ईसा येता परोर.
* इद गोस्टि सतेम आंद” इन्जेर निकोदेमुन वेह्तोर.
4 अस्के निकोदेम, “बुडियल आतोर मायनल बहन जल्मा येता परनुर?
उंडे उंदि जोका अवना पीटे नेङ्सि जल्मा येता परनुर कि बतल?”
इन्जेर येसुन पूसि कीतोर.
5 ते येसु, “वोरोर येते अनि आत्मते+ जल्मा आया बीगर, बगवंतना राज्नगा नेङा परोर.
इद गोस्टि सतेम आंद” इन्जेर वेह्तोर.
6 “अवल-बाबो मेंदोडुन जल्मा सिया परंतेर.
बति आत्मतुन बगवंतना आत्मा जल्मा सिया परंता.
7 अदेन साटि, ‘पूना जल्मा येता लागर’ इत्तेके निमे गुल आय्मा.
8 वडि तनकुन इस्टम वाता अद बाजनल वांता.
मिरट अद वडिता आवज केन्जंतिट बति, अद वडि बगटल वांतयो, बेके दांतयो इंवल मीकुन टावा सेले.
अह्ने बगवंतना आत्मते जल्मा आय्वल गिर मंदंता” इन्जेर येसु वेह्तोर.
9 ते निकोदेम, “इद बहन जर्ग्मड मंदर?”
इन्जेर येसुन पूसि कीतोर.
10 अस्के येसु, “इज्रयेल्क्नोर डगुर गुरुनि आंदि.
इदेन बारेते नीकुन करे मायो कि?”
इन्जेर इत्तोर.
11 “माकुन करे माता अदेन बारेते अनि सूड्ततुन बारेते वेहंतोम.
इद गोस्टि सतेम आंद.
बति मावा गवतुन मिरट नम्विट.
12 नना मीकुन इद दुनियतङ गोस्टिन बारेते वेह्नेकेन बरोसा किय्विट.
ते स्वर्ग्नङ गोस्टिन बारेते वेह्तेके बहन बरोसा कीकिट?”
इन्जेर वेह्तोर.
13 “स्वर्गनल रेय्सि वाय्वल स्वर्ग्नोर माय्नल आय्वल नाकुन तपुसि, दुस्रोर बोरे पोरो स्वर्ग्नगा सोन्मकि.
14 मोसे बोडि गुटनगा पितुडा उंदि तरस कीसि, डङल कटेतगा बहंते लिम-लोम कीतोरो,+ अह्ने स्वर्ग्नोर मायनल आय्वल नाकुन गिर मोद्नगा टाङि किया लागर.
15 अहन कीतेकेन, ना पोरो बरोसा इर्वलिरकुन बस्केट पिस्वल जीवा पुटंता.
16 “बगवंतल दुनियतुरकुन बेय लाड कीता काड्कि, तंवोर वोरोरे मंवल मरिन इद दर्तुरितगा सारि कीतोर.
वोन पोरो बरोसा इर्वल हर वोरोर नासेडम आय्वक्ने, वूरकुन बस्केट गिर पिस्वल जीवा पुटना इन्जेरेंते इहिन कीतोर.
17 दुनियतेरकुन सिक्सा वाट्ले बगवंतल वोर मरिन सारि किय्मकि बति, बचि किय्लेने सारि कीतोर.
18 “वोन्गा बरोसा इर्वन सिक्सता तस्वा मनो.
बति बरोसा कियोर वोन, बगवंतनोर वोरोरे मंवल मरिन बरोसा किय्वा काड्कि, इदेन मुनेने वोना सिक्सता तस्वा आता.
19 बारितेके वोर दुनियतुर सम्दिर्गा वेड्चितुन पिय्सि वातोर.
बति लोकुर तम्वङ काम्क करब्नङ कीनेके, सिकटिते मंलेने पसंद कीतेर.
अद तस्वता कारन इदे आंद.
20 करब काम किय्वल हर मायनल वेड्चितुन पसंद कियोर.
तंवङ करब कामकुन मकुसि इरन साटि, वोर वेड्चितगा वायोर.
21 बति सत्ने ताक्वल तंवङ काम्क बगवंतना केय्दे जर्ग्सेर मंतङ इन्जि, अवेन बह्रि तोह्ले, वेड्चिते वांतोर” इन्जेर वेह्तोर.
येसुन बारेते योहन गवा वेह्वल
22 अद आता पेजे, येसु अनि वोनुर सिस्यलिर यूदया येरियतगा सोन्जि, पर्जतुन बाप्तिस्मा सियुसेर, कहि रोज्क अगने मत्तोर.
23 सलिमुन करुम्ना अय्नोन इंवल जागतगा कूब येर मत्ता काड्कि, अगा योहन बाप्तिस्मा सीसेर मत्तोर.
24 ते लोकुर सोन्जि बाप्तिस्मा येच्चेर मत्तेर.
इद गट्ना योहन जेलतगा अर्वक मुनेन जर्ग्ता.
25 उंदि दिया योहंतुर सिस्यलिरकुन अनि यूदुल्क्ना जातितोन नड्डुम सुदुड आय्वल रिवजुन बारेते जट-पट लाग्ता.
26 ते वूर सिस्यलिर योहंतगा वासि, “गुरुजि!
योर्दन लविडुन हंदा बाज, नी सङा बोर्ते मत्तोरो अनि निमे बोन बारेते गवा वेह्तियो, वोर इंके बाप्तिस्मा सीसेर मंतोर.
सम्दिर वोन्गन सोन्जेर मंतेर” इन्जेर वेह्तेर.
27 ते योहन, “स्वर्गनल बगवंतल सीतेकेन तपा बोरे बतय येता परोर.
28 ‘नना किरिस्तुना आयोन.
बति वोन मुने सारि कीतोर वोर कब्रियना आंदुन’ इंवडुन मिरटे गवा मंतिट.
29 नमुनतुन मर्मिनगा नोव्रल मुके आंदुर इंट.
वोरे नोव्रिनोर माल्कल आंदुर.
वोर नोव्रन करुम, वोनोर सोप्तल निल्सि मंले, अनि नोव्रल वेह्ता तीर किय्ले, वोन वेले आनंद लागंता.
अदे तरिकते नना वेले कुसिते मंतोन.
नावा आनंद बर्पुर आता.
30 बारितेके नाकुन चुडुर-पान वायना अनि वोर येसुन डगुर-पान वायना.
31 “स्वर्गनल वातोर वोर सम्दिरकुन पोरोडोर आंतोर.
मरट दर्तुरित पोरोडुर आंदट अनि दर्तुरित पोरो जर्ग्वलिक गोस्टिन बारेतेन वड्कंतट.
बोरेय्ते स्वर्गनल वातोरो, वोर सम्दिरकुन पोरोडोर आंतोर.
32 वोर अगा सूड्ततुन केन्ज्ततुन बारेते गवा वेहंतोर.
बति वोना गवतुन बोरे वोपुर.
33-35 बगवंतल तंवोर मरिन लाड कीता काड्कि, सम्दो अदिकार वोना केय्देन हव्लि कीतोर.
वोन्गा तंवा आत्मतुन बर्पुर सीता काड्कि, वोर सिरिप बगवंतनङे गोस्टिङ वेहंतोर.
बोर्ते वोना गवतुन वोपंतोरो वोर, बगवंतन बारेतङ येसु वेह्तङ गोस्टिङ सतेम इन्जि तोहंतोर.
36 बोर्ते बगवंतनोर मरिन पोरो बरोसा कींतोरो, वोन बस्केट पिस्वल जीवा पुटंता.
बोर्ते वोन पोरो बरोसा कियोरो, वोन बस्केट पिस्वल जीवा पुटो.
बति बगवंतना सोङ वोन पोरो निल्सि मंदंता” इन्जेर बाप्तिस्मा सिय्वल योहन वेह्तोर.