मार्क 11

येसु येरुसलेम सोंवल

(मत्तयि 21:1-11; लूका 19:28-40; योहन 12:12-19)

1 अहन येरुसलेम सोन्जेर मनेके, अद नगुडल जरसि लक मंवल ओलिवा मरक्ना गुटत पोरोडङ नह्‍क बेत्पगे अनि बेतनियतुन करुम येव्तेर.

अस्के येसु तंवुर सिस्यलिर्गटल इविरकुन मुने सारि कीसेर,

2 “इचुला!

अद दिस्वल नाटे नेङ्नेकेन उंदि रोता रचत मुने चुडुसि गादि दोह्‍चि मंवल मीकुन दिसंता.

तान पोरो इंके वेरि बोरे उद्मकि.

अदेन सुटि कीसि तरट.

तोले अद देस्नगा कोडतुन बद्लि गादितुन चोकोट्ना जंवर इन्जेर मानि कीसि वाडकम कींदिर

3 “अहन सुटि कीनेके, ‘अद चुडुर गादितुन बारि सुटि कीसि वोंतिट?’

इन्जेर बोरे पूसि कीनुर्ते, ‘इद गादि पर्बुन जुरत मंता.

काम आता पेजे मल्सि येंटने सारि कींतोर’ इन्जि वेहट” इन्जेर वेह्‍तोर.

4-5 येसु वेह्‍तपे सिस्यलिर अद नाटे सोत्तेर.

अगा उंदि गलिता रोतुन मुने, चुडुर गादि दोह्‍चि मत्ता.

अद चुडुर गादितुन सुटि कीनेके, कहितुर माय्नलिर अद सूड्सि, “अद चुडुर गादितुन बारि सुटि कींतिट?”

इन्जेर पूसि कीतेर.

6 ते सिस्यलिर, “इद गादि येसुन जुरत मंता” इन्जेर इत्तेर.

ते अद केन्चि, वूर माय्नलिर, “वोम्ट मन्जे” इन्जेर वोप्तेर.

7 वूर इविर सिस्यलिर, अद चुडुर गादितुन येसुनगा तचि, तान पोरो तम्वङ साल्वङ वाट्तेर.

अवेन पोरो येसु उत्तोर.

8 सरिय मंवलिर वेलेटिर पर्जा, येसुन राजन दात मानि कीसि, वोर वाय्वल सरितगा तम्वङ साल्वङ तार्तेर.

कहितुर वहुकुन बग्ला मंवलिक सींदि मरक्नङ कांदङ तचि अद सरिय तार्तेर.

9-10 अनि वूर पर्जा, येसुन मुनेत्क अनि पेजेट्क ताक्सेर,

“बगवंतने डगुर-पान वायि!

जेय जेय कार!

^* पर्बुना अदिकार्दे^* वाय्वन बगवंतल आसिर्वाद सियिर!

तोत्तोर मा राजल दाविदुन दात राज ताकुस्वल राजल वातोर.

स्वर्ग्नगा मंवल बगवंतने डगुर-पान वायि!”

⁺

इन्जेर किलिसेर मत्तेर.

11 अहन येसु येरुसलेम नेङ्ता पेजे, अगा मंवल मंदिर्तगा सोत्तोर अनि तान सिर्मुट मंवल सम्दोतुन दिहंते तिरिसि सूड्तोर.

अद वकत्ने पोड्द सोन्जेर मत्ता काड्कि, तंवुर बारा जन्क सिस्यलिरकुन पिय्सि बेतनियतगा सोन्जि अद रातुन आरम येत्तोर.

साद्मकि अद अन्जुरि मरा

(मत्तयि 21:18-19)

12 दुस्रो नेटि बेतनियतल वानेके येसुन कर्वस्ता.

13 वूरा सरदुन जरसि लक आकिङ मंवल उंदि अन्जुरि मरा दिस्ता.

ते वोर अद अन्जुरि मरतगा सोन्जि, पंडिङ मह्‍क्तोर.

ते वोन आकिङ तपुसि, बतङे पुट्मकि.

^* बारितेके अद साद्वल कालम आयो.

14 ते येसु, “नीवङ पंडिङ इङेडल बस्केट्के बोरे तिंवेके दानिर” इन्जेर इत्तोर.

अद गोस्टितुन सिस्यलिर केन्ज्तेर.

येसु मंदिरतुन सुदुड-पान किय्वल

(मत्तयि 21:12-17; लूका 19:45-48; योहन 2:13-22)

15 येसु येरुसलेम येव्ता पेजे, मंदिर्ता आव्रतगा सोन्जि, अगा बेपरि किय्वलिर सम्दिरकुन बह्‍रि पेसुस्तोर.

कोतङ बद्लि किय्वलिरङ टेबलकुन अनि पारेवङ वोम्वलिरङ कुतुलकुन उल्टि कीसि वाड्तोर.

16 अद तीर्दे मंदिर्ता आव्रतगा जर्ग्वल बेपरितुन बंद कीसि वाट्तोर.

17 अस्के येसु वूर सम्दिरकुन, “‘नावा मंदिर दुनियतङ सम्दो जातिनुर पार्तना किय्वल जागा आंद’ इन्जेर दर्मा-ग्रंत्नगा लिहि कीसि मंता.

बति मिरट तेन कलिर मक्वल बुयरित दात तयर कीतिट” इन्जेर बोदा कीतोर.

18 इद केन्चि, मंदिर्तुर डगुक कटोडलिर अनि सास्तिरिर येसुन बहन जकना इंवल पिलन वाट्वल मोदोल कीतेर.

बति वोन पिय्ले वेरितेर.

बारितेके पर्जा वोर वेह्‍वल बोदा केन्चि गुल आतेर.

19 नुल्पे आता अस्के येसु अनि सिस्यलिर अगटल पेसितेर.

वच्चि सोत्ता अन्जुरि मरा

(मत्तयि 21:20-22)

20 दुस्रो नेटि सक्रेन मल्सि अद सरिय वानेके, अद अन्जुरि मरतुन सूड्तेके, सीर्क्नल्ते आकिङ वेरि, पूरो किड्डा-मोड्डा वच्चि मत्ता.

21 येसु सीता सापेना पेतुरतुन हेतु वासि, “गुरुजि अचुला सूडा!

निमे सापेना सीता अद अन्जुरि मरा वत्ता” इन्जेर इत्तोर.

22-23 ते येसु, “अनमिना आय्वक्ने बगवंतन पोरो बरोसा इरट.

अद बरोसते मीवा दिलतगा कोर्ता तीर जर्गंता.

मिरट उंदि गुटतुन सङा, ‘निमे सोन्जि सम्दुरतगा अरा’ इन्जेर इत्तेके गिर, अद अरंता.

इद सतेम आंद” इन्जेर वेह्‍तोर.

24 “अदेन साटि मिरट पार्तना कीनेके, बतङ तल्कंतिटो, अवेन बगवंतल मीकुन सींतोर इन्जेर बरोसा कीम्ट.

अस्के मीकुन अव पुटंतङ.

25 अदे आय्वा मिरट पार्तना कियन मुने, बोरे मीकुन बय्मन आसि मत्तेके, मिरट मुने वोन मापि कियना.

अस्के मीवङ तप कामकुन गिर स्वर्ग्नोर बाबो^* मापि कींतोर” इन्जेर वेह्‍तोर.

26 ^*[उंदि मोका दुस्रुरङ तप कामकुन मापि किय्वेके दाकिट्ते, स्वर्ग्नोर बाबो गिर मीवङ पापकुन मापि कियोर.]

येसुना अदिकारदुन बारेते पूसि किय्वल

(मत्तयि 21:23-27; लूका 20:1-8)

27 येसु तंवुर सिस्यलिर येरुसलेम तिरिसि वासि, अद मंदिर्ता आव्रतगा सोन्जेर मनेके, सास्तिरिर, डगुक कटोडलिर अनि पेदोल्क वासि,

28 येसुन, “निमे बद अदिकार्दे इव काम्क कीसेर मंति?

इद अदिकार नीकुन बोर सीतोर?”

इन्जेर पूसि कीतेर.

29 ते येसु, “नना मीकुन उंदि सवल पूसि कींतोन.

अदेन जवब सीतेके, बोना अदिकार्दे इव काम्क कींतोनो, मीकुन वेहंतोन” इन्जेर इत्तोर.

30 अनि, “योहंतुन बाप्तिस्मा सिय्वल अदिकार, बगवंतनल वाता कि सेलेके माय्ननल वाता वेहट?”

इन्जेर पूसि कीतोर.

31-32 ते वूर, “मरट, ‘बगवंतनल’ इंद्कट्ते, ‘योहंतगा बारि बरोसा इर्मकि?’

इन्जेर पूसि कीनुर.

बति मोका, ‘माय्ननल’ इंद्कट्ते, माकुन सम्दिर बंडने पानिर.

बारितेके योहन पर्वक्तल इन्जेर सम्दिर वोप्तेर” इन्जेर वेरिसि तम्वा तमा कुसा कुसा चर्चा कीतेर.

33 अनि, “अद माकुन टावा सेले” इन्जेर जवब सीतेर.

ते येसु, “नना गिर बद अदिकार्दे इव कीसेर मंतोनो, मीकुन वेहोन” इन्जेर इत्तोर.