केय-काल्क अर्सि मंवन येसु चोकोट किय्वल
9
1 ते येसु रूकतगा उच्चि, अद सम्दुरतुन वीड्सि तंवा नाटे वातोर.
2 अद वकत्ने कहितुर, केय-काल्क अर्सि मंवन चाप्रता पाडेतगा मींडुसि, येसुनगा पिय्सि वातेर.
येसु वूरा बरोसा सूड्सि, वोर केय-काल्क अर्सि मंवन सङा, “ना मरि, निमे दर्यम्ने मन.
नीवङ पाप्क मापि आतङ” इन्जेर वेह्तोर.
केय-काल्क अर्सि मंवन येसुनगा तर्वल
3 ते अद गोस्टि केन्चि कहितुर सास्तिरिर तम्वा मंदे, “बगवंतन वेर रेह्चि वड्क्सेर मंतोर!”
इन्जेर सोन्च कीतेर.
4 वूर तम्वा मंदगा बतल सोन्च कीसेर मंतेर इंवडुन येसु करि कीसि, “मीवा मंदे बारि अहन सोन्च कीसेर मंतिट?
5 ‘नीवङ पाप्क मापि आतङ’ इन्जेर वेह्वल हल्को कि, सेलेके ‘निमे तेच्चि ताका’ इन्जेर वेह्वल हल्को?
6 तेर बति स्वर्ग्नोर माय्नन पापकुन मापि किय्वल अदिकार इद दर्तुरित पोरो मंता इंवल मिरट करि कियना” इन्जेर वेह्तोर.
अनि केय-काल्क अर्सि मंवन सङा, “तेदा!
नीवा चाप्रतुन पिय्सि रोन सोन” इन्जेर इत्तोर.
7 अस्के वोर मायनल सप्ने तेच्चि, तंवा रोन सोत्तोर.
8 इद सूड्सि, अगा मंवल मांदितुन बाव-बक्तिता वेरे जोमे माता.
ते ईतल अदिकार माय्नन सिय्वल बगवंतन हेतु कीसेर डगुर-पान सीतेर.
मत्तयिन येसु केय्वल
9 अगटल येसु पेसिसि सोन्जेर मनेके, टेक्सा वसुलि किय्वल कम्रतगा उच्चि मंवल मत्तयिन सूड्तोर.
वेर टेक्सा वसुलि किय्वल आंदुर.
वोन सङा येसु, “ना पेजेय वरा!”
इन्जेर वेह्तोर.
वोर मत्तयि तेच्चि, वोन पेजेय सोत्तोर.
10 ते येसु मत्तयिना रोन जेवुन किय्ले उच्चि मनेके, वेलेटिर टेक्सा वसुलि किय्वलिर अनि पापिर वातेर.
अनि वूर, येसु अनि सिस्यलिर सङा जेवुन किय्ले उत्तेर.
11 इद सूड्सि, परिसयुल्क येसुनुर सिस्यलिर सङा, “मीवोर गुरुजि, टेक्सा वसुलि किय्वलिर सङा अनि पापिर सङा उच्चि बारि तिन्जेर मंतोर?”
इन्जेर पूसि कीतेर.
12 अदेन येसु केन्चि, “बेमरिते मंवन वय्दुना जुरत मंदंता बति, जीवत चोकोट मंवन जुरत मनो.
13 नना पापिरकुन केय्ले वातोन बति, नियत्नुरकुन केय्ले वाय्मकि.
अदेन साटि ‘ना साटि बलिदान्क सीम्ट इंवडुन बद्लि, दुस्रुर पोरो मिरट दया तोहना इन्जेर कोरंतोन’.
+ इद गोस्टिता बाव बतल इंवल मिरट सोन्जि करि कीम्ट” इन्जेर वूरकुन वेह्तोर.
उपस पिय्वल
14 अद आता पेजे, योहन तेर सिस्यलिर येसुनगा वासि, “ममोट अनि परिसयुल्क उपस पियंतोम.
बति नीवुर सिस्यलिर बारि उपस पियुर?”
इन्जेर पूसि कीतेर.
15 ते येसु, “नोव्रल तंवुर चुटल-बंदुन तोडो मनेके, बोरे उपस पियुर.
अह्ने नना गिर वीर सङा मनेके, वीर बारि उपस पियना?
बति बस्केते वोर नोव्रन वूर्गटल जुल्मते वोय्वल गट्का वांतयो, अस्के वूर उपस पियंतेर” इन्जेर जवब सीतोर.
16 अनि, “बोरे गिर आयि, पडना कप्डि सर्तेके पूना कपिडे अत्क वाट्सि कोटोर.
अहन कोट्तेके अद अत्क पडना कप्डितुन उंडे इचुर अदिक सरुसंता.
17 आङुर्क्ना पूना कल पडना तितितगा* बोरे वेडियोर.
उंदि मोका वेडितेके आङुर्क्ना पूना कल तितितुन वोहंता.
अदेन साटि तातोक आङुर्क्ना पूना कलदुन पूना तितितगन वेडिया लागर*” इन्जेर येसु वेह्तोर.
साता पेडिन नेंडुस्वल
18 येसु इहिन वड्क्सेर मनेकेने, यूदुल्क्नोर अदिकारि वासि मुर-टोङ्रङ कोट्सि, “नावा मियड इंकेने मार्ता.
बति निमे वासि नीवा केय तान पोरो इर्तेके अद पिसंता” इन्जेर इत्तोर.
19 ते येसु अनि वोनुर सिस्यलिर वोर अदिकारिन पेजेय पेसितेर.
20 अस्के अचनक अगा, लङ आसि बारा (12) साल्कनल मंवल बेमरि वाले उंदि वेय्लो मत्ता.
21 अद वेय्लो, “येसुना पाङुडा काटुन इट्तेके गिर आयर नना चोकोट आंतोन” इन्जेर तंवा तना इत्ता.
अनि सरिय सोंवल येसुना पाङुडा काटुन पेजेये वासि इट्ता.
22 अस्के येसु पेजे मल्सि तान सूड्सि, “बायि, गटि-दीर्यते मन.
नीवा बरोसये नीकुन चोकोट कीता” इन्जेर वेह्तोर.
अदे गट्कते अद वेय्लो चोकोट आता.
23-24 अद आता पेजे येसु वोर अदिकारिना रोन येव्तोर.
पेडि साता इन्जेर रोत रोपो आड्सेर, बोब्ले मासेर अनि सुलुडि वडुसेर* मंवलिरकुन सूड्तोर.
अनि वूर सङा, “इगेटल सोंट!
अद पेडि साय्मकि बति, नरुम्सेर मंता” इन्जेर इत्तोर.
ते अद केन्चि वूर कव्सेर, येसुन चेडि कीतेर.
25 वूरकुन सारि कीता पेजे, येसु रोपो सोन्जि, अद पेडिना केयदुन इट्तोर.
ते येंटने अद पेडि नेंड्ता.
26 इद कबुर अद येरिया पूरो कप्ता.
इविर गुड्डिरकुन नदुर सिय्वल
27 येसु अगटल पेसिसि सोनेके, इविर गुड्डिर, “दाविद्ना कांदांतोनि!
मा पोरो दया तोहा” इन्जेर किलिसेर पेजेय सोत्तेर.
28 अनि येसु रोत रोपो नेङ्ता पेजे, वूर गुड्डिर वोन्गा सोत्तेर.
ते येसु वूर सङा, “नना मीकुन चोकोट किया परंतोन इंवल बरोसा मीकुन मंतकि?”
इन्जेर पूसि कीतोर.
ते वूर, “हो, पर्बु!”
इन्जेर जवब सीतेर.
29 अस्के येसु वूरङ कडकुन इट्सि, “मीवा बरोसा तीर मीकुन जर्गि” इन्जेर वेह्तोर.
30 अदे गट्कते वूरकुन नदुर वाता.
ते येसु, “इद गोस्टितुन मिरट बोने वेह्मट” इन्जेर दम्कि सीतोर.
31 बति वूर सोन्जि, अद येरिया पूरो वोना गोस्टितुन कपुसीतेर.
32 येसु अनि वोनुर सिस्यलिर रोतल पेसिसि सोनेके, बूत सोप्रे मासि मंवल मूकन कहितुर वोन्गा पिय्सि वातेर.
33 ते येसु, अद बूतुन तेंड्सि पूड्ता पेजे, वोर मूकल वड्क्वल सुरु कीतोर.
अद सूड्सि, वूर मांदि बेय गुल आसि, “ईतल गट्ना इंके वेरि इज्रयेलतगा बस्केन जर्ग्मकि” इन्जेर इत्तेर.
34 बति परिसयुल्क, “वेर, बूत्क्नोर राजना मदत्ने अव बूतकुन तेंड्सि पूड्सेर मंतोर” इन्जेर येसुन बारेते वेह्तेर.
पंटा कोय्वलिर बूय्तलिर
35 येसु सुनगोक्नगा बोदा वेह्चेर, स्वर्ग्ना राजुन बारेता चोकोट्ना कबुर पचर कीसेर, हर उंदि चहर अनि हर उंदि नार तिरितोर.
अनि पर्जत नड्डुम मंवलिर हरियेक बेमरिने अनि येड्कि-दुक्ने मंवलिरकुन चोकोट कीसेर सोत्तोर.
36 अस्के गाय्कि सेलोर अव गोरेङ बुज्डे मातपिनय, पर्जतङ गुब्डङ परेसंते दिस्तङ.
ते वूर पोरो येसुन किवुल लाग्ता.
37 अस्के तंवुर सिस्यलिर सङा, “बेय वेले पंटा कोय्लेन वाता.
बति कोय्वलिर बूय्तलिर कमि मंतेर.
38 तंवा पंटतुन कोय्ले, बूय्तलिरकुन रोहा इन्जेर माल्कल आय्वल पर्बुन पार्तना कीम्ट” इन्जेर वेह्तोर.