बूत पिय्तोन चोकोट किय्वल
5
1-4 अद आता पेजे येसु अनि वोनुर सिस्यलिर गलिलया सम्दुर्ता हंदा बाजुन मंवल गेरसेन येरियतगा वातेर.
रूकतल रेय्सि जरसि मुने सोनेकेने, बूत सोप्रे मासि मंवल मायनल वीच्क्ना जागतगा येसुन दिस्तोर.
वोनङ केय-कालकुन सकलिने दोह्चि इर्ंदिर बति, अव वोन सांतिते मंवल माय्नन मोडि मार्युसा पर्मकि.
बारितेके, वोर वेले ताकद वाले आता काड्कि, वोन बोरे दोह्चि इरा पर्मकि.
दोह्तेके गिर अवेन नमुसि वाडि सींदुर.
5 वोर अव वीच्क्नगा अनि गुटनगा हिके-हके तिरिसेर नर्का-पियल किलिसेर, तंवा तना बंडने पासि गाव्क कीसेर मंदुर.
6 ते वोर मायनल लक मनेकेन येसुन सूड्सि, वोन्गा विच्चेर सोत्तोर.
अनि वोन मुने मुर-टोङ्रङ कोट्सि उत्तोर.
7-8 ते येसु वोन्गा मंवल बूतुन सङा, “वोन्गटल बह्रि वरा” इन्जेर हुकुम सीतोर.
ते वोर, “येसु!
सक्तिवंतल बगवंतनोर मरिनि!
ना जोलित बारि वांति?
नाकुन दुक्सा सिय्मा इन्जि, नीकुन जुल्मा कीसेर मंतोन” इन्जेर जोर्ते किलितोर.
9 ते येसु, “नीवा बता पोरोल?”
इन्जेर पूसि कीतोर.
अस्के अव बूत्क, “नावा पोरोल ‘मंदा’ बारितेके ममोट बेय वेले गेंडे आसि, वेर माय्ननगा सोप्रे मासि मंतोम” इन्जेर वोर माय्नना तोड्दे पल्कुस्तङ.
10 अनि, “माकुन इद येरियतल रोह्मा” इन्जेर येसुन बेय जुल्मा कीतङ.
11 अद वकत्ने अगा मंवल गुटा करुम बेय वेले पदिना मंदा मेय्सेर मत्ता.
12 अदेन साटि अव बूत्क येसुन सङा, “माकुन अव पदिनगा सोप्रे माय्ले तेर मोका सीम” इन्जेर जुल्मा कीसि कोर्तङ.
13 ते येसु अद गोस्टितुन वोप्तोर.
अव बूत्क वोर माय्ननगटल पेसिसि, पदिनगा सोप्रे मातङ.
सम्दो पदिङ रंड हजर्क (2,000) वेरि मत्तङ.
ते अव पदिङ गुटत पोरोडल सड्कल विच्चेर सोन्जि, सम्दुरतगा मुडुङ्सि सातङ.
14 अद वकत्ने पदिङ मेह्वलिर परर आसि, तम्वा चहर्ते अनि आजु-बाजुतङ नह्क्नगा सोन्जि अद कबुर कपुस्तेर.
ते केन्ज्तुर वूर पर्जा अगा बतल जर्ग्सि मंदर इन्जेर सूडन साटि वातेर.
15 वूर येसुनगा वासि सूड्तेके, बूत्क सोप्रे मासि मत्तोर वोर मायनल चोकोटे कप्डिङ केर्सि, दब उच्चि दिस्तोर.
ते अद सूड्सि, वूरकुन बेय वेरे पिय्ता.
16 बूत्क सोप्रे मातोन अनि अव पदिन बतल बहन जर्ग्ता इंवडुन सूड्तुर वूर, अगा वातुरकुन वेह्तेर.
17 ते इद सम्दि केन्चि वूर पर्जा, “निमे मावा येरियतुन सुटि कीसि सोन” इन्जेर जुल्मा कीतेर.
18 ते येसु सोंले रूकतगा उच्चि मनेके, बूत्क सोप्रे मासि चोकोट आतोर वोर वासि, “नाकुन गिर नी सङा वाया सीम” इन्जेर येसुन जुल्मा कीतोर.
19 बति येसु वोप्मकि.
इदेन बद्लि, “नी पोरो बगवंतल दया तोह्चि बतल बहन कीतोर इंवल गोस्टितुन रोन सोन्जि, सम्दिरकुन वेहा” इन्जेर वेह्तोर.
20 ते वोर मायनल देकपोलि येरियतगा* सोन्जि, येसु तनकुन बतल बहन कीतोर इंवल गोस्टितुन वेह्तोर.
अद केन्चि सम्दिरे बेय गुल आतेर.
उंदि वेय्लोन चोकोट किय्वल
21 अगटल येसु अनि वोनुर सिस्यलिर रूकते मल्सि सम्दुर्ता हंदा डर्डिते सोत्तेर.
वोन सूड्ता बरोबर वेलेटिर मांदि येसुन सिर्मुट गुब्डा आतेर.
22-23 अस्केन सुनगोग्नोर डगुर अदिकारि यायिरु इंवल येसुनगा वातोर.
अनि मुर-टोङ्रङ कोट्सि, “नावा चुडुर मियड दुक्ने अर्सि सानल आसि मंता.
दया कीसि निमे वासि, नावा मियडुन पोरो नीवा केय इर्तेके, अद चोकोट आसि पिसंता” इन्जेर जुल्मा कीतोर.
24 ते येसु वोर अदिकारिन सङा सोत्तोर.
वोन पेजेय वेलेटिर मांदि गिर येसुन इटना इन्जेर दुरेङ-पोदेङ सोन्जेर मत्तेर.
25 अद मांदितुन रोपो लङ आसि बारा (12) साल्कनल मंवल बेमरि वाले उंदि वेय्लो मत्ता.
26 अद वेय्लो वेलेटिर वय्दुरकुन तोह्ता.
तन्गा मंवल कोता सम्दो कर्चि कीता.
बति अद बेमरि इचुर गिर कमि आय्मकि.
उंडे उल्टा अद बेमरि जास्ता आता.
इहिन अद वेय्लो वेले तक्लिब्क बोगे माता.
27-28 अद वेय्लो येसुन बारेते केन्चि, तंवा मंदे, “येसुना पाङुडा काटुन इट्तेके गिर आयर.
नना चोकोट आंतोन” इन्जि मत्ता.
अदेन साटि मांदितुन बरोबर येसुन पेजेये वासि, वोना पाङुडा काटुन इट्ता.
येसुना पाङुडा काटुन इट्सि बेमरि वाले वेय्लो चोकोट आय्वल
29 अहन इट्ता बरोबर तंवा बेमरितल चोकोट आता.
तंवा मेंदोडगा जर्ग्ता अद कार्यतुन बारेते वेय्लो करि कीता.
30 अद वकत्ने, तंवा सक्ति बह्रि सोडितप येसु करि कीतोर.
अस्के पेजे मल्सि मांदितुन सङा, “ना पाङुडुन बोर इट्तोर?”
इन्जेर पूसि कीतोर.
31 ते वोनुर सिस्यलिर “पर्जा सम्दिर गिर दुरेङ-पोदेङ वासेर मंतेर इंवल नीकुन टावा मन्जि गिरे, ‘ना पाङुडुन बोर इट्तोर?’
इन्जेर पूसि कींति” इन्जेर इत्तेर.
32 बति येसु, “तनकुन बोर इट्सि मंदनिर” इन्जेर सिर्मुट सूड्सेर मत्तोर.
33 अस्के अद वेय्लो तंवा साटि जर्ग्ता अदेन करि कीता.
अनि वेरेते तरा तरा आसेर मुने वासि येसुनङ कालकुन पोरो अर्सि, तनकुन बतल बहन जर्ग्ता इंवल सतेमुन वेह्ता.
34 ते येसु तान सङा, “बायि!
नीवा बरोसय नीकुन चोकोट कीता.
इद दुक्सतल सुटे माति.
सांतिते रोन सोन” इन्जेर वेह्तोर.
साता पेडिन नेंडुस्वल
35 येसु अहन वड्क्सेर मनेकेन, वोर यायिर इंवल अदिकारिना रोतल कहितुर वासि, “गुरुजिन वटि आगय परेसन किय्मा.
नीवा चुडुर मियड मार्ता” इन्जेर वेह्तेर.
36 अद केन्चि पटि किय्वक्ने यायिरतुन सङा, “दादा!
निमे वेरिमा.
सिरिप बरोसते मन” इन्जेर येसु वेह्तोर.
37-40 अनि येसु अगटल पेसिसि, यायिर्ता रोन करुम येव्नेक्ते बेय जोर्ते आड्सेर, बोब्ले मासेर मांदि दिस्तेर.
ते वूर सङा, “बारि वटि आगय आड्सेर, बोब्ले मासेर रोपो-बह्रि तिरियंतिट?
अद पेडि साय्मकि बति, नरुम्सेर मंता!”
इन्जेर वेह्तोर.
अद केन्चि वूर येसुन चेडि कीतेर.
येसु वूर सम्दिरकुन बह्रि रोह्तोर.
अनि पेडिनुर अवल-बाबोन अनि तंवुर सिस्यलिर्गटल पेतुर, याकोब अनि वोनोर तमुर योहन वीर मुविरकुन तपुसि दुस्रोन बोने तंवा सङा अद पेडि मंवल कम्रतगा रोपो वाया सिय्मकि.
येसु साता पेडिन जीवते नेंडुस्वल
41 येसु सोन्जि, अद चुडुर-पेडिना केयदुन पिय्सि, “तलिता कुमि!”
इन्जेर इत्तोर.
“चुडुर बुचा, तेदा!”
इन्जेर इद गोस्टिता अर्तम.
42 ते येंटने अद पेडि तेच्चि ताक्वल सुरु कीता.
तान बारा (12) साल्क्ना वहि मत्ता.
अद सूड्सि, वूर सम्दिर बेय गुल आतेर.
43 बति येसु, “इद गट्नतुन बारेते बोने वेह्मट” इन्जेर आगे सीतोर.
अनि, “तान तिंले बतय सीम्ट” इन्जेर वेह्तोर.