कमंडर्ता बरोसा
7
1 इद तीर्दे येसु अव सम्दोन बारेते पर्जतुन वेह्चि, कपेर्नहोम इंवल चहर्ते सोत्तोर.
2 अगा सिपायिरोर कमंडर मत्तोर.
वोनोर सेव्कल वोरोर बेमरिते अर्सि, सानल आसि मत्तोर.
वोर सेव्कन कमंडर वेले मानि कींदुर.
3 वोर कमंडर येसुन बारेते केन्चि, यूदुल्क्नुर कहितुर पेदोलकुन केयुसि, “‘ना सेव्कन चोकोट किय्ले वायना’ इन्जेर वोन कोरट” इन्जि, वूरकुन येसुनगा सारि कीतोर.
4-5 ते वूर येसुनगा वासि, “पर्बु!
वोर वेले चोकोट्नोर आंदुर.
मा पर्जतुन वेले पेर्मते सूडंतोर.
मावा सुनगोगुन गिर वोरे दोहुस्तोर.
वोर अदिकारिन, निमे मदत कीतेके चोकोट मंदंता” इन्जेर जुल्मा कीतेर.
कमंडर येसुनगा बरोसा किय्वल
6 ते येसु वूर पेजेय सोत्तोर.
तंवा रोतुन जरसि लक मनेकेन कमंडर तंवुर सोप्तलिरकुन केय्सि, “पर्बु!
निमे तक्लिब येत्मा.
निमे नावा रोन वाय्ले, नना कामि सियोन.
7 अह्ने नना निह्गा वाय्ले गिर कामि सियोन.
सिरिप नीवा जबन सीतेके आयर.
ना सेव्कल चोकोट आंतोर.
8 हुकुम सिय्वल इत्तेके नाकुन टावये.
बारितेके नना उंडे वोरोर अदिकारिन बूड मंवना आंदुन.
ना बूड मंवलिर सिपायिर पोरो नाकुन अदिकार मंता.
नना वोरोन, ‘सोन’ इत्तेके दांतोर.
उंडे वोरोन, ‘वर’ इत्तेके वांतोर.
अनि ना सेव्कन, ‘इद कीम’ इत्तेके कींतोर इन्जि वेहट” इन्जेर सोप्तलिरकुन येसुनगा रोह्तोर.
9 कमंडर रोह्तुरङ गोस्टिङ केन्चि, येसु गुल आतोर.
अनि तंवा पेजेय वाय्वलिर सङा, “वेन अचोर बरोसा वालेन इज्रयेल पर्जतगा गिर बोन्गने सूड्मकि इन्जि मीकुन वेह्चेर मंतोन” इन्जेर इत्तोर.
10 बस्केते येसुनगा रोह्तुर मल्सि कमंडर्ता रोन वातेरो, अस्के वूरकुन बेमरिते मंवल सेव्कल चोकोट आसि दिस्तोर.
सातोर डियोन येसु नेंडुस्वल
11 अद आता पेजे, येसु नायिन चहर्दे सोंले पेसितोर.
वोनुर सिस्यलिर अनि वेलेटिर पर्जा गिर वोन सङा सोत्तेर.
12 अद चहर्ता पाटकुन करुम सोनेकेते, कहितुर कूरदुन कान्चि वासेर मत्तेर.
सातोर वोर रांडे वेय्लोनोर वोरोरे मरि आंदुर.
अद वेय्लोन सङा, अद चहर्तुर वेलेटिर लोकुर वासेर मत्तेर.
13 अद वेय्लोन सूड्सि, पर्बुना दिलतगा बेय किवुल लाग्ता.
ते वोर, “बायि आड्मा!”
इन्जेर इत्तोर.
14 अनि सोन्जि पाडेतुन इट्तोर.
ते कांद वाय्ललिर आग्तेर.
अस्के येसु, “डियोनि!
नना वेह्चेर मंतोन, तेदा!”
इन्जेर इत्तोर.
15 ते सातोर वोर तेच्चि उत्तोर अनि वड्क्वल सुरु कीतोर.
वोना अवनगा वोन येसु हव्लि कीतोर.
16 अद सूड्सि सम्दिर बेय वेरिसि, “मा नड्डुम डगुर पर्वक्तल वातोर.
बगवंतल तंवा पर्जतुन मदत किय्ले पावे मातोर” इन्जेर बगवंतन डगुर-पान सीतेर.
17 येसुन बारेता इद कबुर पूरो यूदया येरियतगा अनि आजु-बाजुतङ सम्दो येरियनगा गिर कप्ता.
बाप्तिस्मा सिय्वल योहन जेलतगा अर्वल (7:11-17; 18-23)
योहन येसुनगा सेव्कलिरकुन रोह्वल
18 इव जर्ग्तङ सम्दो गट्नन बारेते, योहंतुर सिस्यलिर वोन वेह्तेर.
19 ते योहन तंवुर सिस्यलिर्गटल इविरकुन केय्सि, “‘वाय्ले मंवल बचि किय्वनि* निमेय आंदि कि?
सेलेके ममोट उंडे वोरोन साटि सूड्सेर मंदा लागर?’
इन्जेर वोन पूसि कीम्ट” इन्जि पर्बुनगा रोह्तोर.
20 ते वूर पर्बुनगा वासि, “‘वाय्ले मंवनि निमेय आंदि कि?
सेलेके, ममोट उंडे वोरोन साटि सूड्सेर मंदा लागर?’
इन्जेर नीकुन पूसि कीम इन्जि बाप्तिस्मा सिय्वल योहन माकुन सारि कीतोर” इन्जेर वेह्तेर.
21 अद गट्कतेन येसु वेलेटिर बेमरिने मंवलिरकुन, दुकेललिरकुन, बूत्क सोप्रे मातुरकुन चोकोट कीसेर मत्तोर.
अनि वेलेटिर गुड्डिरकुन गिर नदुर सीतोर.
22 ते येसु वूर कब्रियलिर सङा, “गुड्डिर सूड्सेर मंतेर.
लेङ्डलिर ताक्सेर मंतेर.
पेर्सा नोपिनुर चोकोट आसेर मंतेर.
चेव्डिर केन्जा पर्सेर मंतेर.
सातुर नेंड्सेर मंतेर.
गरिब्क चोकोट्ना कबुर केन्चेर मंतेर.
इहिन कड्क्ने सूड्तन अनि केव्क्ने केन्ज्तन मिरट मल्सि सोन्जि, योहंतुन वेहट.
23 अह्ने ना बारेते, अनमिना आयोर वोर, आसिर्वाद येतंतोर इन्जि, वोन वेहट” इन्जेर वूरकुन जवब सीतोर.
24 योहन सारि कीतुर कब्रियलिर मल्सि सोत्ता पेजे, येसु अगा मंवल मांदितुन सङा योहंतुन बारेते, “बोडि गुटनेके मिरट बातोन सूडन साटि सोत्तिट?
वडिदे हिके-हके मेलिवल जाडिता गुंतुन दात्नोन ते सूड्ले सोन्मकि.
25 आतोन सूड्ले आय्वेके, उंडे बातोन सूड्कोम इन्जेर सोत्तिट?
वेले सोबतङ पाङुक पोंड्तोन साटि कि बतल?
सेले, सुक-बोग्ने पिसेर सोबतङ कप्डिङ केर्वलिर राज महल्क्नगा मंदंतेर!
26 ते बततुन साटि सोत्तिट?
मिरट पर्वक्तन सूडन साटिने सोत्तिट इन्जेर नना इंतोन.
वोर पर्वक्तन तेर डगुर आंदुर.
27 वेर योहंतुन बारेते ग्रंत्नगा, ‘इचुला, नावोर कब्रियन नीकुन तेर मुने रोहंतोन.
वोर नी साटि सरि तयर कींतोर’+ इन्जेर लिहि कीसि मंता.
28 केन्जट!
दुनियतुर सम्दिर्गटल* योहंतुन तेर डगुर बोरे सेलोर.
बति तम्वङ दिल्क्नगा बगवंतल राज ताकुस्ले वोप्तुर्गटल चुडुर आसि मंवल, योहंतुन तेर डगुर आंतोर” इन्जेर येसु वेह्तोर.
29 (वोर वेह्वल केन्चि, योहन सीता बाप्तिस्मा येच्चि मत्ता काड्कि, वेलेटिर पर्जा अनि टेक्सा वसुलि किय्वलिर गिर बगवंतल नियत्नोर आंदुर इन्जि वोप्तेर.
30 बति परिसयुल्क अनि दर्मा गुरुर योहंता केय्दे बाप्तिस्मा येत्वा काड्कि, तम्वा बारेते मंवल बगवंतना पिलंतुन वूर वोप्मकि.)
31-32 येसु उंडे गिर, “इद पिडितुरकुन बातुर सङा निपुसि बेद-बाव तोह्का?
वूर बोन दात मंतेर?
इत्तेके बाजर्ते उच्चि,
‘ममोट मी साटि सुलुडि उह्क्तोम.
बति मिरट येंद्मकि.
ममोट सातोन साटि पाटा वार्तोम.
बति मिरट आड्मकि’
इन्जेर वड्क्वलिर चुडुक कांडिर दात मंतेर.
33 “बारितेके बाप्तिस्मा सिय्वल योहन वासि, काने तिंवक अनि आङुर रसा उंवक मत्ता काड्कि, ‘वोन बूत सोप्रे माता’ इन्जेर मिरट इंतिट.
34 अनि स्वर्ग्नोर माय्नल तिन्जेर-उन्जेर वाता काड्कि, ‘इचुला वेर पुदेलल, कल-पिदेडल, टेक्सा वसुलि किय्वलिरोर अनि पापिरोर सोप्तल’ इन्जेर मिरट इंतिट.
35 बति बगवंतना बुदि-गियंतुन पिय्सि ताक्वलिर सम्दिर, अद बुदि-गियन सतेम आंद इन्जि, निरुपन कींतेर” इन्जेर येसु वेह्तोर.
पापेस्तल वेय्लो येसुनङ कालकुन सेंट सोक्वल
36 उंदि दिया येसुन परिसयुल्क्ना बाज्नोर वोरोर मायनल तंवा रोन जेवुन किय्ले, केय्तोर.
ते येसु वोना रोन सोन्जि, जेवुन किय्ले उद्तोर.
37 इचुला!
अस्केने अद रोन जेवुन किय्ले, येसु वातोर इंवल गोस्टितुन,
येसुनगा वेय्लो सेंट पिय्सि वाय्वल
अनि बंडता बुड्डिते वेले मह्ग्ना सेंट पिय्सि वाता.
38 अनि येसुन पेजे आड्सेर निल्ता.
ताना काडेल्दे वोनङ कालकुन पुह्ता.
तंवङ केल्क्ने उसुम्सि, मांदे कालकुन मुका बुर्सेर, अवेन सेंट सोक्ता.
39 अद सूड्सि जेवि किय्ले केय्तोर वोर परिसयुल्क्ना बाज्नोर, ‘उंदि मोका वेर मायनल पर्वक्तल आय्मड इत्तेके, तनकुन इट्ता वेय्लो बचोर अनि बातल पापेस्तल इंवल करि कींदुर्’ इन्जेर तंवा मंदे सोन्च कीतोर.
40 अस्के येसु, वोना सोन्चुन करि कीसि, “सीमोनु!
नीकुन उंदि गोस्टि वेहा लागर” इन्जेर इत्तोर.
ते वोर, “वेहा गुरुजि” इन्जेर इत्तोर.
41 अस्के येसु, “वोरोर साव्करल इविर माय्नलिरकुन बाकि सीतोर.
ते वूर्गटल वोरोर सियुङ नुह्क (500) कूरतङ बिलङ अनि उंडे वोरोर पनस (50) कूरतङ बिलङ बाकि येच्चि मत्तेर.
42 वूर इविर्गते अद बाकि कंडि किय्ले, बतय सेले मत्ता.
ते वोर साव्करल वूरा बाकितुन मापि कीतोर.
मापि कीता काड्कि, वूर इविर्गटल वोर साव्करन पोरो बोर वेले पेर्मा तोहंतोर इंति?”
इन्जेर पूसि कीतोर.
43 ते, “बोर्ते वेले बाकि मत्तोरो, वोरे तोह्मड मंदर इंतोन” इन्जेर सीमोन वेह्तोर.
अस्के येसु, “निमे बरोबर वेह्ति” इन्जेर इत्तोर.
44 अनि अद वेय्लोनेके मल्सि सीमोंतुन सङा, “इद वेय्लोन सूड्सेर मंतिय?
नना नीवा रोन वातोन.
तेर बति नावङ काल्क नोर्ले निमे येर सिय्मकि.
बति इद वेय्लो तंवा काडेल्दे नावङ कालकुन पुह्ता अनि तंवङ केल्क्ने उसुम्ता.
45 निमे नाकुन मांदे मुका बुर्मकि.
* बति इद वेय्लो रोपो वातगटल मांदे ना कालकुन मुका बुर्सेरेन मंता.
46 निमे ना केलकुन निय सोक्मकि.
बति इद वेय्लो नावङ कालकुन सेंट सोक्ता.
47 अदेन साटि नीकुन वेह्वल बतल इत्तेके, इद वेय्लो कीतङ सम्दो पापकुन मापि पुड्ता.
बारितेके इद तोह्ता पेर्मा डगुर आंद.
बति इचुङ्सि पाप्क मापि आतोर वोर, इचुसि पेर्मय तोहंतोर” इन्जेर वोन वेह्तोर.
48 अनि येसु तान सङा, “बायि, नीवङ पाप्क मापि आतङ” इन्जेर वेह्तोर.
49 बति वोन बरोबर जेवुन उच्चि मंवलिर, “पाप्क मापि किय्वल वेर बोर आंदुर?”
इन्जेर तम्वा तमा वड्क्तेर.
50 अदेन साटि येसु अद वेय्लोन सङा, “नीवा बरोसय पाप्ना सिक्सतल नीकुन बचि कीता.
सांतिते सोन!”
इन्जेर वेह्तोर.
पापेसतल वेय्लोन मापि पुट्वल (7:36-50)