लूका 9

येसु तंवा कामुन साटि बारा जन्क सिस्यलिरकुन रोह्‍वल

1 उंदि दिया येसु तंवुर बारा (12) जन्क सिस्यलिरकुन केय्सि, सम्दो तीर्क्नङ बूतकुन तेंड्सि पूड्ले अनि हरियेक बेमरिन चोकोट किय्ले सक्ति अनि अदिकार सीतोर.

2 अनि वूरकुन सारि कीसेर, “बगवंतना राजुन बारेते वेहट अनि बेमरिने मंवलिरकुन चोकोट कीम्ट.

3 मीवा यात्रतुन साटि, बेड्डेय आयि, तेय्लय आयि, चंदिय आयि, कोतङ आयि, उंडे उंदि आङ्डेय आयि वोय्मट.

4 उंदि नाटे सोत्ता पेजे, अद नाटनल पेसिनल वेरि, मीकुन करुम कीतुरा रोने मंट.

5 बदे उंदि नाटे सोत्ता पेजे, बोरे मीकुन करुम किय्वेके दानिर्ते, वूर अहन कीतता निसनित साटि, अद नाटनल पेसिनेके, मीवङ कालकुन तुंड्ता दुबा जडि कीसि^* वरट” इन्जेर सिस्यलिरकुन येसु वेह्‍तोर.

6 अस्के वूर अगटल पेसिसि, नार-नाटे तिरिसेर, बगवंतन बारेता चोकोट्ना कबुर पचर कीसेर, बेमरिने मंवलिरकुन चोकोट कीतेर.

हेरोद अंतिपस परेसन आय्वल

(मत्तयि 14:1-12; मार्क 6:14-29)

7 अद गट्कते, अव सम्दो कामकुन बारेते गलिलया येरियतोर राजल हेरोद अंतिपस^* केन्चि, परेसन आतोर.

बारितेके, ‘बाप्तिस्मा सिय्वल योहन सासि-नेंड्तोर’ इन्जेर कहितुर इत्तेर.

8 उंडे कहितुर, ‘येलिया पर्वक्तल दिस्तोर्’ इत्तेर अनि उंडे कहितुर, ‘तोत्तुर पर्वक्तलिर्गटल वोरोर नेंड्सि वातोर्’ इन्जेर इत्तेर.

9 बति हेरोद मात्रम, “नना सिपायिरा केय्दे योहंता तला नट्कुसीतोन.

बति उंडे गिर वोन बारेते, इव गोस्टिङ केन्जा वासेरेन मंतङ.

वोर बोर मंदर बेहे?”

इन्जेर इत्तोर.

अनि वोन बेटे मायना इन्जेर कोसिद कीतोर.

सियुङ हजर्क मांदितुन येसु जेवुन सिय्वल

(मत्तयि 14:13-21; मार्क 6:30-44; योहन 6:1-14)

10 अपोस्तुल्क येसुनगा मल्सि वासि, तमा कीतङ सम्दो कामकुन बारेते वेह्‍तेर.

अस्के येसु, वूरकुन तंवा सङा बेत्सयिदा इंवल चहरतुन करुम्ना बोरे मनुर अद जागतगा वोतोर.

11 बति अदेन बारेते, गेंडेङ गेंडेङ मांदि करि कीसि, वोन पेजेय अगा गिर सोत्तेर.

ते वूरकुन करुम कीसि, बगवंतना राजुन बारेते वेह्‍तोर.

अनि बेमरिते मंवलिरकुन चोकोट कीतोर.

मांदितुन येसु जेवुन दोस्वल

12 पोड्द सोन्जेर मनेके, बारा जन्क सिस्यलिर येसुनगा वासि, “मरट इंके बोरे मनुर अद जागतगा मंतट.

अदेन साटि वीर मांदितुन आजु-बाजुतङ नह्‍क्नगा अनि गूडनगा सारि कीम.

अस्के वूर तम्वा चंदिता अनि मंवडा सव्लत सूडंतेर” इन्जेर वेह्‍तेर.

13-14 बति येसु वूर सङा, “मिरटे वूरा चंदिता इंतजम कीम्ट” इन्जेर वेह्‍तोर.

अगा लग-बग सियुङ हजर्क (5,000) माय्नलिर^* मत्तेर.

ते वूर सिस्यलिर, “मह्‍गा सिरिप सियुङ सारिङ, रंड मीन्के मंतङ.

ममोट वीर सम्दिर साटि, चंदि येच्चि, तरना इंति कि बतल?”

इन्जेर पूसि कीतेर.

अस्के येसु सिस्यलिर सङा, “उंदि उंदि गुरुप्नगा पनस (50) जनकुन उपुसट” इन्जेर वेह्‍तोर.

15 अहन वेह्‍ता तीर पर्जतुन उपुस्तेर.

16 उपुस्ता पेजे येसु, अव सियुङ सारिङ अनि रंड मीन्क पिय्सि, पोरो हाबडेके सूड्सेर बगवंतन दनेवाद वेह्‍तोर.

अनि अवेन टुक्डेङ कीसि, “पर्जतुन वह्‍डि कीम्ट” इन्जेर सिस्यलिर्गा सीतोर.

17 सम्दिर गिरे पेटिमेन तिता पेजे, मेय्तङ टुक्डेङ मीरि कीतेर.

ते अव बारा डालङ निंतङ.

सियुंग हजर्क मानदितुन येसु जेवुन सिय्वल (9:10-17)

येसु असल बोर इंवल गोस्टितुन पेतुरु वेह्‍वल

(मत्तयि 16:13-19; मार्क 8:27-29)

18 उंदि दिया येसु अनि वोनुर सिस्यलिर मांदितल लक सोत्तेर.

अगा येव्ता पेजे वोनुर सिस्यलिर वोन करुम मत्तेर.

बति येसु वोरोरे पार्तना कीसेर मत्तोर.

ते पार्तना किय्वल आता पेजे सिस्यलिरकुन, “पर्जा नाकुन बोर आंदुर इन्जेर मंतेर?”

इन्जि पूसि कीतोर.

19 ते सिस्यलिर, “कहितुर बाप्तिस्मा सिय्वल योहन इन्जेर मंतेर.

कहितुर येलिया पर्वक्तल इन्जेर मंतेर.

उंडे कहितुर तोत्तुर पर्वक्तलिर्गटल वोरोर नेंड्सि वातोर इन्जेर मंतेर” इन्जि वेह्‍तेर.

20 अस्के येसु, “मिरट नाकुन बोर आंदुर इंतिट?”

इन्जेर सिस्यलिरकुन पूसि कीतोर.

ते पेतुरु, “बगवंतल रोह्‍तोर वोर बचि किय्वल किरिस्तुनि आंदि” इन्जेर जवब सीतोर.

21 “इद गोस्टितुन बोने वेह्‍मट” इन्जेर वूरकुन दम्कि सीसि, आगे सीतोर.

22 अनि वूर सङा, “स्वर्ग्नोर माय्नल वेले दुक्सङ बोगे माया लागर.

पेदोल्क, डगुक कटोडलिर अनि सास्तिरिर वोन वोप्वक्ने उल्टा तिरियंतेर.

वोना जीवा येतंतेर.

बति बगवंतल मूंद रोज्क्ने वोन नेंडुसंतोर” इन्जेर वेह्‍तोर.

येसु असल बोर इन्वल गोस्टितुन पेतुरु वेह्वल (9:18-22)

दुनिया कमय कीसि जीवा सुटि किय्वन बतल पाय्दा?

(मत्तयि 16:21-28; मार्क 8:30–9:1)

23 अनि, “ना सङा बोर्ते वाका इंतोरो, वोर तंवा तना पटि किय्वक्ने, हर रोज तंवा तक्लिबुन तना बोगे मासेर^* वाया लागर.

24 बोर्ते तंवा जीवतुन बचि कीका इंतोरो, वोर तंवा जीवा सुटि किया लागर.

बति बोर्ते ना साटि तंवा जीवतुन सुटि कींतोरो, वोर अद जीवतुन दकुसंतोर.

25 परिपन्चम सम्दोतुन वोरोर मायनल कमय कीसि गिर बगवंतल सिय्वल असल जिन्गनितुन सोडुस्तेके, सेलेके वोर मायनल नासेडम आतेके, वोन बतल पाय्दा पुटंता?

26 बोरे मनि ना बारेतेन आयि, नावङ गोस्टिन बारेतेन आयि, लजे मानुर्ते, स्वर्ग्नोर मायनल मय्मता वेड्चिते तंवोर बाबोन सङा अनि पवित्रा दूतलिर सङा मल्सि वानेके, वोर आतोन बारेते गिर लजे मांतोर.

27 बति इगे निल्सि मंवलिर मिह्‍गटल कहितुर मरन आय्वक मुने, दर्तुरित पोरो बगवंतल राज ताकुस्वल सूडंतिट.

⁺ इद सतेम आंद” इन्जेर सिस्यलिरकुन वेह्‍तोर.

येसुना रूप मारिवल

(मत्तयि 17:1-8; मार्क 9:2-8)

28 इव गोस्टिङ वेह्‍ता नेटितल ते लग-बग आट रोज्क आता पेजे, डङल गुटत पोरो पार्तना किय्ले येसु तंवा सङा, पेतुरतुन, योहंतुन अनि याकोबुन वोतोर.

29 येसु पार्तना कीसेर मनेके, वोना मोकोम्ना रूप मारिता.

अनि वोनङ पाङुक गिर बेय चक दव्रलिक आसि, जगा जगा मिड्चेर मत्तङ.

तोत्तुर पर्वक्तलिर येसुनगा पावे माय्वल

30-31 अस्केने इविर माय्नलिर मय्मते पावे मातेर.

वूर मोसे अनि येलिया इंवलिर तोत्तुर पर्वक्तलिर आंदिर.

येरुसलेम्नगा जर्ग्वल येसुना मरंतुन बारेते, वोन सङा वड्क्सेर मत्तेर.

32 पेतुरु अनि वोन सङा मंवलिर बेय जप्ने मत्तेर.

बति वूरकुन चेव वाता अस्के, येसुना मय्मता वेड्चितुन अनि वोन सङा मंवलिर इविरकुन सूड्तेर.

33 वूर इविर येसुन सुटि कीसि सोन्जेर मनेके, अगा बतल जर्ग्सेर मंतयो करे माय्वक्नेने पेतुरु, “गुरुजि!

मरट इगेन मंवल चोकोट दिसंता.

नी साटि, येलियन अनि मोसेन साटि ममोट मूंद गुड्सेङ वाटंतोम” इन्जेर येसुन इत्तोर.

34 अहन इनेकेन येसुन अनि वोन सङा वड्क्वलिर इविरकुन उंदि टेपा वासि, कप्ता.

अद सूड्सि, वूर सिस्यलिर वेरितेर.

35 अद टेपतल, “वेर नना नेमि कीतोर वोर, नावोर लाड्नोर मरि आंदुर.

वेर वेह्‍वडुन मिरट केन्जट” इंवलिक गोस्टिङ केन्जा वातङ.

36 अद टेपतल गोस्टिङ वाय्वल आग्ता पेजे, सिरिप येसुय दिस्तोर.

वूर सिस्यलिर अगा सूड्तङ गट्नन बारेते दब मत्तेर अनि वेले रोज्क आनल वेरि, अवेन बारेते बोने वेह्‍मकि.

येसुना रूप मारिवल (9:28-36)

बूत सोप्रे मातोर कांडिन चोकोट किय्वल

(मत्तयि 17:14-18; मार्क 9:14-27)

37 दुस्रो नेटि वूर अद गुटतल बूड रेय्सि वानेके, बेय वेले मांदि येसुन मुनेत्क वातेर.

38 अस्केने, अद मांदितल वोरोर जोर्ते, “गुरुजि!

नाकुन वोरोरे मरि मंतोर.

वोन पोरो दया तोहा.

39 इचुला!

वोन्गा उंदि बूत सोप्रे मांता.

अस्के वोर बेय जोर्ते किलियंतोर.

वोना तोड्दल पेस्क पेसियंतङ.

वोना मेंदोडुन गजा गजा हालि कींता.

वोन सुटि किय्वक्ने बेय नोमुर कीसेर मंता.

40 तान तेंड्सि पूडट इन्जेर नीवुर सिस्यलिरकुन कोर्तोन.

बति वूर तान तेंड्सि पूडा पर्मकि” इन्जेर वेह्‍तोर.

41 अस्के येसु, “ना पोरो बरोसा सेलुर वूर मूजोर्क्निट!

नना उंडे बचेजेल मी सङा मन्जि, मीकुन सोसि कीका?”

इन्जेर वूरकुन इत्तोर.

अनि वोर माय्नन, “नीवोर मरिन ना मुने पिय्सि वरा” इन्जेर येसु वेह्‍तोर.

42 वोर कांडि येसुनगा वासेर मनेके, अद बूत वोन बूड अरुसि, मेंदोडुन गजा गजा हालि कियुस्ता.

ते येसु अद बूतुन दम्कि सीसि, तेंड्सि पूड्तोर.

अनि वोर कांडिन चोकोट कीसि, वोनोर बाबोनगा हव्लि कीतोर.

43 अद मय्मतगा बगवंतना सक्तितुन सूड्सि, सम्दिर बेय गुल आतेर.

बूत सोप्रे मातोर कानडिन चोकोट कियवल (9:37-43)

येसु तंवा मरंतुन बारेते वेह्‍वल

(मत्तयि 17:22-23; मार्क 9:30-32)

अहन वूर सिस्यलिर गुल आसेर मत्तेर.

44 ते येसु वूर सङा, “नना वेह्‍वल चोकोट दिहंते केन्जट.

स्वर्ग्नोर माय्नन दुस्रुरा केय्दे हव्लि कींतेर” इन्जेर वेह्‍तोर.

45 बति वूर सिस्यलिरकुन अद गोस्टि अर्तम आय्मकि.

बारितेके, अद वूरकुन अर्तम आय्वक्ने मक्डिते मत्ता.

अद गोस्टितुन बारेते, येसुन पूसि किय्ले, वूरकुन दर्यम गिर आय्मकि.

सम्दिरकुन डगुर बोर?

(मत्तयि 18:1-5; मार्क 9:33-37)

46 वूर सिस्यलिर, ‘मा बारा जन्क्नगटल बोर डगुर?’

इंवल गोस्टितुन बारेते जट-पट लाग्तेर.

47 वूरङ दिल्क्नगा मंवल अद विचरतुन करि कीसि, येसु वोरोर चुडुर-कांडिन करुम केय्सि, तंवा करुम निपुस्तोर.

48 अनि वूर सङा, “ईतोर चुडुर-कांडिन ना हिंदल बोरे करुम कीनुर्ते, नाकुन गिर करुम कीता लेकतेन वांतोर.

नाकुन करुम किय्वल नाकुन रोह्‍तोर वोर बाबोन गिर, करुम कीता लेकतेन वांतोर.

मी सम्दिर्गटल बोर्ते चुडुर-पान कीसि ताकंतोरो, वोरे सम्दिर्गटल डगुर आंदुर” इन्जेर येसु वेह्‍तोर.

मीकुन उल्टा आयोर वोर मीवोरे आंदुर

(मार्क 9:38-40)

49 अद केन्चि योहन, “गुरुजि!

नीवा पोरोल मुट्सि, बूतकुन तेंड्सि पूड्सेर वोरोर दिस्तोर.

बति वोर मावोर आयोर इन्जि, वोन ममोट रोकि कीतोम” इन्जेर वेह्‍तोर.

50 अस्के येसु, “वोन रोकि किय्मट!

बारितेके माकुन उल्टा ताकोर वोर मा बाजुन मत्ता लेकतेन वांतोर” इन्जेर योहंतुन वेह्‍तोर.

समरयता उंदि नाट्नुर येसुन नंमकि

51-52 येसु स्वर्ग्नेके मल्सि सोंवल वकत करुम येव्ता.

अस्के वोर येरुसलेम सोंले गट निर्नय येच्चि, तनकुन मुने तंवुर कब्रियलिरकुन सारि कीतोर.

ते वूर येसुन लासि सम्दो तयरि कीकट इन्जेर, समरया येरियता उंदि नाटे सोत्तेर.

53 बति अद नाट्नुर येसुन वोप्मकि.

^* बारितेके येसु येरुसलेम सोंदना इंवल निर्नय्ते मत्तोर.

54 ते याकोब अनि योहन इंवलिर सिस्यलिर अद सूड्सि, “पर्बु!

वीरकुन नासेडम किय्ले, हाबडल तड्मि वायुसट इंतिय?”

इन्जेर पूसि कीतेर.

55 बति येसु वूर बाजुन मल्सि, वूरकुन राङि सीतोर.

56 राङि सीता पेजे, वूर अगटल पेसिसि, दुस्रो नाटे सोंले पेसितेर.

येसुना बक्ति कीकोम इंवलिर मुविर जन्क

(मत्तयि 8:19-22)

57 अहन सोन्जेर मनेके, वोरोर मायनल येसुन सङा, “निमे बगा दाकि अगा नना गिर वांतोन” इन्जेर इत्तोर.

58 ते येसु, “कोय्ललिक मंले डोब्रङ मंतङ अनि पिटेन मंले गूडङ मंतङ.

बति स्वर्ग्नोर माय्नन मात्रम नरुम्ले जागा गिर सेले” इन्जेर वोन वेह्‍तोर.

59 अनि उंडे वोरोन सङा, “ना पेजेय वरा” इन्जेर इत्तोर.

बति वोर, “पर्बु!

ना बाबोना जीवा सोंवल गट्का करुम वासेर मंता.

ते वोर मार्ता पेजे माति कीसि वाय्ले, मोदोल नाकुन सोंदा सीम” इन्जेर वेह्‍तोर.

60 ते येसु, “सातपिनय मंवलिरे तम्वुर सातुरकुन माति किया सीम.

बति निम सोन्जि बगवंतना राजुन बारेते पचर कीम”^* इन्जेर वेह्‍तोर.

61 उंडे वोरोर, “पर्बु!

नना नी पेजेय वांतोन.

बति मोदोल ना कुटुंबतुरकुन वेह्‍चि वाया सीम” इन्जेर पूसि कीतोर.

62 ते येसु वोन सङा, “बोरे आयि बोमि ऊड्नेके पेजे सूड्सेर मंदनुर्ते, आतोर माय्नना काम बततुने कामि सियो.

अह्‍ने बगवंतना राज्नगा काम किय्वल तना सुटि कीसि वातोर अदेन सूड्सेर मंदनुर्ते, आतोना काम बगवंतना राज्नगा बततुने कामि सियो” इन्जेर वेह्‍तोर.