मय्मता काम कीसि तोहा इन्जेर पूसि किय्वल
16
1 उंदि दिया परिसयुल्क अनि सदुकयुल्क वोन परिक्सा किय्ले, “निमे बगवंतना अदिकार्दे वाति इन्जेर निरुपन किय्ले, स्वर्गनल उंदि मय्मता काम कीसि तोहा” इन्जेर येसुन पूसि कीतेर.
2-3 ते येसु, “पोड्द सोंवल वकत्ने हाबर रगल आसि दिस्तेके, ‘नाडिता दिवोस पूरो पिर-वडि सेल्वक्ने चोकोट मंदंता’ इंतिट.
अनि पोड्द पेसिनेके हाबर रगल आसि, टेपङ अरिक मत्तेके, ‘नेंड पिर-वडि वांता’ इंतिट.
कपेटलिर्निट!
इहिन हाबडुन सूड्सि बंटि बतल जर्गंता इंवल वोड्कि किया परंतिट बति, इद कालम्नगा जर्ग्सेर मंवलिकुन बारि वोड्कि किया पर्सेर सेल्विट?*
4 इद पिडितुर करेबलिर अनि पीर किय्वलिर मय्मता कामुन साटि पूसि कीसेर मंतेर.
सिरिप योना* पर्वक्तना निसनितुन तपुसि, दुस्रो बदे निसनि वूरकुन तोह्वल जुरत सेले” इन्जेर वेह्चि, वूरकुन सुटि कीसि अगटल सोत्तोर.
करब किय्वलिर बारेते दिहंते मंदना
5 येसुनुर सिस्यलिर सम्दुरतुन वीड्सि वानेके, तम्वा सङा सारिङ तर्वल मरुङ्तेर.
6 अस्के येसु, “सोवुस्वल चीजुन दात मंवलिर परिसयुल्क अनि सदुकयुलकुन बारेते दिहंते मंट” इन्जेर सिस्यलिरकुन दम्कि सीतोर.
7 ते वूर, “मरट सारिङ तर्वा काड्किने इहिन इंतोर” इन्जेर तम्वा तमा चर्चा कीसेर मत्तेर.
8 अदेन करि कीसि येसु, “कमि बरोसा वालिर्निट!
मिरट सारिङ तर्मकि इन्जेर बारि मीवा मिरट चर्चा कीसेर मंतिट?
9 मीकुन उंडे गिर अर्तम आय्मकि बतल?
सियुङ हजर्क (5,000) मांदितुन सियुङ सारिने, जेवुन दोस्ता पेजे, मिरट मेय्तङ टुक्डेङ मीरि कीसि बचोङ डालङ निह्तिटो, मीकुन हेतु सेले कि?
10 अनि उंडे उंदि जोका नालुङ हजर्क (4,000) मांदितुन, येडुङ सारिङ अनि इचुङ्सि मीन्क्ने जेवुन दोस्ता पेजे, मेय्तङ टुक्डेङ मीरि कीसि, बचोङ डालङ निह्तिटो, मीकुन हेतु सेले कि?
11 नना सारिन बारेते वड्क्सेर सेलोन इन्जेर मिरट बारि अर्तम कीसेर सेल्विट?
परिसयुल्क अनि सदुकयुल्क्ना करब किय्वल बोदतुन बारेतेन दिहंते मंदना” इन्जेर वेह्तोर.
12 अस्के सिस्यलिर पिंडितुन सोवुस्वल चीजुन बारेते आयो बति, परिसयुल्क अनि सदुकयुल्क्ना करब किय्वल बोदतुन बारेतेन दिहंते मंदना इन्जि, वेह्चेर मंतोर इन्जेर अर्तम कीतेर.
येसु असल बोर आंदुर?
13 अनि बस्केते येसु सिजरिया पिलिपि चहरतुन करुम वातोरो, अस्के सिस्यलिर सङा, “स्वर्ग्नोर माय्नल आय्वल ना बारेते पर्जा, बोर आंदुर इन्जेर मंतेर?”
इन्जि पूसि कीतोर.
14 ते सिस्यलिर, “कहितुर बाप्तिस्मा सिय्वल योहन इन्जेर मंतेर.
उंडे कहितुर येलिया पर्वक्तल इन्जेर मंतेर.
उंडे कहितुर इर्मिया पर्वक्तल इंतेर.
अनि उंडे कहितुर पर्वक्तलिर्गटल वोरोर आंदुर इन्जेर मंतेर” इन्जि वेह्तेर.
15 अस्के येसु, “ते मिरट नाकुन बोर आंदुर इंतिट?”
इन्जेर सिस्यलिरकुन पूसि कीतोर.
16 ते सीमोन-पेतुरु, “निमे बचि किय्वल किरिस्तुनि* अनि जीवते मंवल बगवंतनोर मरिनि आंदि” इन्जेर इत्तोर.
17 अस्के येसु, “योननोर मरि* आय्वल सीमोन, निमे आसिर्वाद येत्वनि आति.
बहन इत्तेके, इद गोस्टितुन सादरन मायनल नीकुन वेह्मकि बति, स्वर्ग्नगा मंवल ना बाबोय वेह्तोर.
18 अदेन साटि नीकुन पेतुरु इन्जेर नना केयंतोन.
इदेना अर्तम बंडा.
इद बंडत पोरो नावङ चर्चिनुरकुन निपुसंतोन.
पातड्तगा मंवलिक सक्तिङ इव चर्चिनुरकुन हारि किया परोङ.
19 स्वर्ग्ना राज्नङ कुन्जिङ नीकुन सींतोन.
इद दुनियतगा निमे बवेंते वोप्वियो, अवेन स्वर्ग्नगा गिर वोपोन.
इगे निमे बवेंते वोपंतियो, अवेन स्वर्ग्नगा गिर नना वोपंतोन” इन्जेर वेह्तोर.
20 अद आता पेजे, “नना किरिस्तुना आंदुन इन्जेर बोने वेह्मट” इन्जेर सिस्यलिरकुन आगे सीतोर.
वाय्वल तंवा दुक्सा अनि मरंतुन बारेते येसु वेह्वल
21 अस्केडल येसु, सिस्यलिर सङा, “येरुसलेम सोत्ता पेजे, स्वर्ग्नोर मायनल वेले दुक्सङ बोगे माया लागर.
पेदोल्क, डगुक कटोडलिर अनि सास्तिरिर वोन वोप्वक्ने उल्टा तिरियंतेर.
वोना जीवा येतंतेर बति, बगवंतल मूंद रोज्क्ने वोन नेंडुसंतोर” इन्जेर वेह्वल मोदोल कीतोर.
22 ते पेतुरु, येसुन बग्ला वोसि, “अहन इन्मा पर्बु!
इहिन नीकुन बस्केन जर्ग्वा!
बगवंतले इद गंडमनल नीकुन तपुसना!”
इन्जेर दम्कि सीतोर.
23 ते येसु पेतुरतुन बाज तिरिसि, “सय्तंदि, ना मुनेतल सोडिया!
निमे नाकुन आपुसेर मंति.
निमे माय्नलिर दात सोन्च कीसेर मंति.
बति बगवंतना सोन्चुन करि कीसेर सेल्वि” इन्जेर वोन इत्तोर.
24 अस्के येसु तंवुर सिस्यलिर सङा, “ना सङा बोर्ते ताकका इंतोरो, वोर तंवा तना पटि किय्वक्ने, हर रोज तंवा तक्लिबुन तना सोसि कीसेर* ना पेजेय ताका लागर.
25 बोर्ते तंवा जीवतुन बचि कीका इंतोरो, वोर तंवा जीवा सुटि किया लागर.
बति बोर्ते ना साटि तंवा जीवतुन सुटि कींतोरो, वोर अद जीवतुन दकुसंतोर.
26 परिपन्चम सम्दोतुन मेय्सि तंवा जीवा सुटि कीतेके माय्नन बतल पाय्दा पुटंता?
अह्ने सोडिता जीवतुन मल्सि येतन साटि वोर बतल सिया परंतोर?
27 स्वर्ग्नोर मायनल, दूतलिर सङा मीरे मासि बगवंतना मय्मते वाय्वल मंतोर.
अस्के हर वोरोन वूर कीतङ कामकुन पिय्सि, वोर इनम सींतोर.
28 इगे निल्सि मंवलिर्गटल कहितुर दर्तुरित पोरो स्वर्ग्नोर मायनल आय्वल बगवंतनोर मरि राज ताकुस्वल सूडा बीगर वूरा मरन आयो.
इद सतेम आंद” इन्जेर सिस्यलिरकुन वेह्तोर.