मत्तयि 15

रोपोडा सुदुड मंवडुन बारेते येसु बोदा किय्वल

1-2 कहितुर परिसयुल्क अनि सास्तिरिर येरुसलेमनल वासि, “नीवुर सिस्यलिर केय्क नोर्वक्ने जेवुन कीसेर, मा तोत्तुरङ नेकिन पिय्सि बारि ताक्सेर सेलुर?”

इन्जेर येसुन पूसि कीतेर.

3 ते येसु, “मीवङ नेकिन साटि, बगवंतनङ आगेन मिरट बारि वीड्सि, ताक्सेर मंतिट?”

इन्जेर उल्टा पूसि कीतोर.

4 अनि, “‘मी अवल-बाबोन मान सीम्ट’⁺ अनि ‘अवने आयि बाबोने आयि राङ्तोर वोन मरंता सिक्सा वाटा लागर’⁺ इन्जेर गिर बगवंतल आगे सीतोर.

5-6 बति मिरट उंदि मोका बोरे, ‘नावुर अवल-बाबोन सिय्वलिक कोतन बगवंतन सींतोन’ इन्जेर वेह्‍तेके, अहन वोर अवल-बाबोन मानि किय्वेके गिर, ‘बतय आयो’ इन्जेर वोन वेहंतिट.

मिरट मी तोत्तुरङ नेकिङ पिय्सि ताक्ले, बगवंतना वचंतुन गिर वीड्सि ताक्सेर मंतिट.

7 मिरट पसि किय्वलिर आंदिट!

तोले येसया पर्वक्तल मी बारेते इहिन वेह्‍वल बरोबरे आंद:

8 ‘वीर पर्जा बगवंतल आय्वल नाकुन तम्वङ सिव्लिने मानि कींतेर.

बति वूर कपेटलिरङ दिल्क नह्‍गटल वेले लक मंतङ.

9 नावङ हुकुमकुन बद्लि, तमो निव्डि कीता अद बोदा वेहंतेर.

अदेन साटि, वूरा पार्तना-विंति नाकुन कामि सियो’⁺ इन्जि बगवंतल वेहुस्तोर” इन्जेर इत्तोर.

10-11 अनि येसु अद मांदितुन तन्गा केय्सि, “बहिडा बदे वस्तु माय्नना पेटितगा सोन्जि, अस्ट बस्ट कियो.

बति माय्नना दिल्तल बव्ते बह्‍रि वांतङो, अवे माय्नन अस्ट बस्ट कींतङ.

इंवलिक गोस्टिन अर्तम किय्ले कोसिद कीम्ट” इन्जेर वेह्‍तोर.

12 अद आता पेजे सिस्यलिर तन्गा वासि, “निमे वेह्‍वल वूर परिसयुलकुन सोङ वानल कीता इंवल टावय कि?”

इन्जेर पूसि कीतेर.

13-14 ते येसु, “वूर बारेते परेसन आय्मट.

वूर गुड्डिरकुन सरि तोह्‍वलिर गुड्डिर आंदिर.

गुड्डि उंडे वोरोर गुड्डिन सरि तोह्‍तेके, वूर इविर्ते डोडोतगा अरंतेर.

स्वर्ग्नोर ना बाबो उर्स्मकि अद हर मोडोकतुन सीर्क अरिक तेर्सि वाटंतोर” इन्जेर परिसयुलकुन बारेते वेह्‍तोर.

15 अस्के पेतुरु, “अद नमुनतुन माक पोडि कीसि वेहा” इन्जेर पूसि कीतोर.

16-20 ते येसु, “तिंवलिक सम्दो तोड्दल रोपो पेटितगा दांतङ.

अनि अगा अव जीरे मासि, मेय्दडा रूप्ने मेंदोडल बह्‍रि अरंतङ.

अदेन साटि केय्क नोर्वक जेवुन कीतेके गिर बे-सुदुड आयुर.

बति दिलतुन रोपो मन्जि, तोड्दल बह्‍रि वाय्वलिक करब सोन्च्क, माय्नलिरकुन जक्वल, पीर किय्वल, लन्जेतनम किय्वल, कले काम, पकट वेह्‍वल अनि रेह्‍चि वड्क्वल इंवलिक माय्नन बे-सुदुड कींतङ.

इदेन बारेते मीकुन टावा सेले कि?”

इन्जेर वेह्‍तोर.

कनान देस्नगा कीता सेवा

(मार्क 7:24-30)

21 अनि येसु अनि वोनुर सिस्यलिर मांदितल अलग आसि, अद गलिलया येरियतल तूरु अनि सीदोन इंवलिक नगुक्ना येरियतगा सोत्तेर.

22 अस्केने कनानिया जातिता उंदि वेय्लो वासि, “दाविद्ना कांदांतोर आय्वल पर्बु!

ना पोरो दया तोहा.

ना मियडगा बूत सोप्रे मासि, बेय दुक्सा बोगे मासेर मंता” इन्जेर जोर्ते जुल्मा कीसेर मत्ता.

23 बति येसु तान बतय जवब सिय्मकि.

अस्के वोनुर सिस्यलिर वासि, “अद वेय्लोन रोहा.

मा पेजेय नङडल जोर्ते जुल्मा कीसेर वासेर मंता” इन्जेर येसुन कोर्तेर.

24 अस्के येसु, “तप्सि सोत्तङ गोरेङ मोडि मंवल इज्रयेल पर्जतुन साटिने, बगवंतल नाकुन सारि कीतोर” इन्जेर वेह्‍तोर.

25 अद वेय्लो येसुन मुने मुर-टोङ्रङ कोट्सि, “पर्बु!

नाकुन मदत कीम” इन्जेर इत्ता.

26 ते येसु, “मरि-मियड तिंवल कानेतुन ऊन्चि नेयकुन वाट्वल बरोबर आयो” इन्जेर वेह्‍तोर.

27 ते अद वेय्लो, “हो, पर्बु!

वाटुर बति, तम्वोर माल्कल तिता पेजे, मेय्तङ-सुय्तङ टुक्डेङ नेय पिलङ तिंदा वचो कि!”

इन्जेर वेह्‍ता.

28 अस्के येसु, “बायि!

निह्‍गा वेले बरोसा मंता.

निमे कोर्ता तीर जर्गंता” इन्जेर वेह्‍तोर.

अद गट्कतेने ताना मियड चोकोट आता.

29 येसु अगटल पेसिसि, गलिलया सम्दुर्ता डर्डिय ताक्सेर सोन्जि, गुटत पोरो उत्तोर.

30-31 अस्के वेलेटिर गुब्डङ गुब्डङ मांदि तम्वा पेजेय कूटलिरकुन, गुड्डिरकुन, केय-काल्क अर्सि मंवलिरकुन, मूकलिरकुन अनि उंडे वेले तीर्क्नङ बेमरिने मंवलिरकुन पिय्सि वासि येसुनङ कालकुन मुने मींडुसीतेर.

ते येसु वूर सम्दिरकुन चोकोट कीतोर.

अदेन सूड्सि, वूर पर्जा बेय गुल आतेर अनि इज्रयेल लोकुरोर बगवंतन डगुर-पान सीतेर.

इचुसि कानेते वेले मांदितुन बर्पुर जेवुन दोस्वल

(मार्क 8:1-10)

32 अद आता पेजे, येसु तंवुर सिस्यलिरकुन केय्सि, “वीर पर्जत पोरो नाकुन बेय किवुल लाग्सेर मंता.

बारितेके मूंद दिवोस्कनल ना सङन मंवल कीनेके, वीर्गा इंके तिंदन साटि बतय सेले.

उपसे वीरकुन रोह्‍वल इस्टम सेले.

मोका वीर नड्डुम सर्दे बगने अरा वचो” इन्जेर इत्तोर.

33 ते सिस्यलिर, “इव बोडि गुटनगा इचोर वेले मांदितुन तिंले चंदि बगा पुटर?”

इन्जेर येसुन पूसि कीतेर.

34 ते येसु केन्चि, “मिह्‍गा बचोङ सारिङ मंतङ?”

इन्जेर उल्टा सिस्यलिरकुन पूसि कीतोर.

अस्के वूर, “येडुङ सारिङ अनि बोड्स्तङ इचुङ्सि चुडुक मीन्क मंतङ” इन्जेर वेह्‍तेर.

35 ते येसु, “बूड उदट” इन्जेर पर्जतुन आगे सीतोर.

36 अस्के अव येडुङ सारिङ अनि मीन्क पिय्सि बगवंतन दनेवाद वेह्‍चि, उरुसि सिस्यलिर्गा अंदुस्तोर.

ते वूर मांदितुन वह्‍डि कीतेर.

37 मांदि सम्दिर गिर पेटिमेन तित्तेर.

अद आता पेजे, मेय्तङ अव टुक्डेङ मीरि कीतेर.

ते, येडुङ डालङ निंतङ.

38 वेय्लोक अनि मरि-मियडुन कह्‍वके, नालुङ हजर्क (4,000) माय्नलिर अगा जेवुन कीतेर.

39 अद आता पेजे येसु, वूर सम्दिरकुन सारि कीसि, तना रूका उच्चि मगदान इंवल येरियते सोत्तोर.