पार्कतुन बारेते बोदा वेह्वल
19
1 अहन वेह्वल आता पेजे, येसु गलिलयतल पेसिसि, योर्दन लविडुन हंदा बाज मंवल यूदया येरियतगा सोत्तोर.
2 अस्के पर्जा गुब्डङ गुब्डङ आसि, वोन पेजेय सोत्तेर.
ते वूर नड्डुम येड्कि-दुक्ने मंवलिरकुन चोकोट कीतोर.
3 अस्के कहितुर परिसयुल्क येसुन परिक्सा कीसि तप्नगा अट्कि कियना इन्जि, “बदे उंदि कारंतुन पिय्सि, मायनल तंवा बाय्कोन पार्कत सिय्वल नायम इंति कि?”
इन्जेर पूसि कीतेर.
4-5 ते येसु, “कलि गडि किय्वल बगवंतल मोदोल माय्नन अनि वेय्लोन गडि कीतोर.
अदेन साटिने, ‘मायनल तंवुर अवल-बाबोनल वेगोरा आसि, तंवा बाय्कोन सङा उंदि मेंदोल आसि पिसंतोर’ इंवल मिरट वाचि किय्मकि बतल?
6 इद कारंतुन हिंदल, जोड आता पेजे वूर इविर अलग अलग आयो बति, उंदि मेंदोडुन दात मंतेर.
अहन बगवंतल जोडि कीतुरकुन बोरे मायनल पाकि किय्वा” इन्जेर जवब सीतोर.
7 अस्के वूर, “ते मन्जे मायनल तंवा बाय्कोन पार्कत सीसि, पाके माया वचो इन्जेर मोसे बारि हुकुम सीतोर?”
इन्जेर वोन पूसि कीतेर.
8 ते येसु, “मीवा मूजोर-पांदुन पिय्सिने, मायनल तंवा बाय्कोन पार्कत सिया वचो इन्जेर मोसे वोप्तोर.
अचोरे बति, मोदोडल अहन सेले मत्ता.
9 वोरोर तंवा बाय्कोन पीर कीता कारंतुन तपुसि, दुस्रो बदे कारंतुन पिय्सि पार्कत सिय्वा.
बति बोरे गिर आयि, तंवा बाय्कोन पार्कत सीसि, दुस्रोतुन तुङ्वल पीर कीतोना लेकते वांतोर.
अनि पार्कत आसि मंवडुन तुङ्वल दुस्रोर गिर पीर कीतोना लेकतेन वांतोर इन्जि नना इंतोन” इन्जेर येसु वेह्तोर.
10 अस्के सिस्यलिर येसुन सङा, “मर्मिङ आतुर वूरय लेका इहिन मत्तेके, असल मर्मिङ आय्वक मंवले चोकोटोय बतलो!”
इन्जेर इत्तेर.
11-12 ते येसु, “मिरट वेह्ततुन सम्दिर वोपुर.
बति सिरिप बगवंतल केय्तुरे वोपंतेर.
बारितेके कहितुर जल्मतले हिज्डलिर आसि पुटंतेर.
उंडे कहितुरकुन माय्नलिरे हिज्डलिर मोडि तयर कींतेर.
उंडे कहितुर सडसाट मन्जेर, स्वर्ग्ना राजुन साटि चोकोट सेवा कियना इन्जेर मर्मिङ आय्वक मंदंतेर.
बोरे आयि, इद बोदतुन पिय्सि ताका पर्वल ताकना” इन्जेर जवब सीतोर.
चुडुर मरि-मियडुन येसु आसिर्वाद सिय्वल
13 उंदि दिया कहितुर लोकुर, ‘तम्वुर मरि-मियडुन पोरो येसु केय्क इर्सि, पार्तना कियन’ इन्जेर वूरकुन येसुनगा पिय्सि वातेर.
अद सूड्सि वोनुर सिस्यलिर वूरकुन राङि सीतेर.
येसुनगा मरि-मियडुन तर्वल
14 बति येसु, “चुडुर मरि-मियडुन नह्गा वाया सीम्ट.
वूरकुन आपुसिय्मट.
वूर दात्नुरये स्वर्ग्ना राज आंद” इन्जेर वेह्तोर.
15 अनि वूर पोरो केय्क इर्सि पार्तना कीसि, अगटल पेसितोर.
दनेवंतल येसुन बेटे माय्वल
16 अहन येसु सोन्जेर मनेके, वोरोर डियोर येसुनगा वासि, “चोकोट्नोर गुरुजि!
नाकुन बस्केट मंवल जीवा पुटना इत्तेके, नना बद चोकोट्ना काम कियना?”
इन्जेर पूसि कीतोर.
17 ते येसु, “नाकुन बारि ‘चोकोट्नोर गुरुजि’ इंति?
बगवंतल वोरोरे चोकोट्नोर आंदुर.
उंडे दुस्रोर बोरे गिर चोकोट्नोर आयोर.
बस्केट मंवल जीवा नीकुन पह्जे मत्तेके, बगवंतनङ आगेन पिय्सि ताका” इन्जेर वेह्तोर.
18-19 अस्के वोर डियोर, “बव हुकुम्क?”
इन्जेर पूसि कीतोर.
ते येसु, “बोनय जीवा येत्वा, पीर किय्वा, बतय कल्वा, लबड गवा वेह्वा, अवल-बाबोन मानि कियना, नीवा निमे पेर्मते सूड्तपे आजु-बाजुतुरकुन सूडना” इन्जेर जवब सीतोर.
20 ते वोर डियोर, “नना चुडु-गादले इव सम्दिन पिय्सि ताक्सेर मंतोन.
उंडे ना रोपो बतल कमि मंता?”
इन्जेर पूसि कीतोर.
21 अस्के येसु, “नी रोपो बतय कमि सेल्वक मंदना इंद्किते, सोन्जि निह्गा मंवल जाय्जत सम्दो वोम्सि, अव कोतङ गरिबुन तूसि सीम.
अस्के नी साटि स्वर्ग्नगा दन मंदंता.
अद आता पेजे, नावा चर्ना पिय्सि ताका” इन्जेर वेह्तोर.
दनेवंतल डियोर येसुन सङा वड्क्वल
22 बति वोर डियोर डगुर दनेवंतल आता काड्कि, अद गोस्टि केन्चि, नारज आसि, अगटल सोत्तोर.
23 अस्के येसु तंवुर सिस्यलिर सङा, “स्वर्ग्ना राज्नगा दनेवंतल नेङ्वल वेले कटिन.
इद सतेम आंद.
24 बगवंतना राज्नगा दनेवंतल नेङ्वडुन तेर, कोट्वल सुय्दा गदितल उंदि हूटड कड्वल वेले हल्को इन्जि, मीकुन उंडे उंदि जोका वेह्चेर मंतोन” इन्जेर इत्तोर.
25 इद केन्चि सिस्यलिर बेय गुल आसि, “अहन बेहेते, बोर बचे मासि स्वर्ग्नगा नेङा परनुर?”
इन्जेर पूसि कीतेर.
26 ते येसु वूर्के सूड्सि, “नरिमन्कना केय्दे ईतल काम आया परो.
बति सिरिप बगवंतले ईतल काम किया परंतोर” इन्जेर वेह्तोर.
27 अस्के पेतुरु, “नीवा चर्ना पिय्सि ताक्ले, ममोट सम्दो सुटि कीसि वातोम.
ते माकुन बतल पुटंता?”
इन्जेर पूसि कीतोर.
28 ते येसु, “पूना परिपन्चम्नगा स्वर्ग्नोर माय्नल, मय्मता राजा-गादितगा उच्चि मनेके, नावा चर्ना पिय्सि ताक्वलिर मिरट बारा राजा-गादिन पोरो उच्चि, इज्रयेल लोकुरङ बारा कांदानकुन पोरो राज ताकुस्वलिर आंतिट.
इद सतेम आंद.
29 अचोरे आय्वा, ना पोरोडुन साटि, तादल-तमुन, सेलड-तकन, अवल-बाबोन, मरि-मियडुन, बोमिन अनि तंवा रोतुन सुटि कीसि ताक्वल हर वोरोर, नूर पाल्क अवेना पंडि येतंतोर.
इदे आय्वा, वोन बस्केट मंवल जीवा गिर पुटंता.
30 बति आक्रि मंवलिर कहितुर मुने आंतेर.
मुने मंवलिर कहितुर आक्रि आंतेर” इन्जेर सिस्यलिरकुन वेह्तोर.