येसु अनि वोनुर तमुक
7
1 इद आता पेजे, यूदुल्क्नुर अदिकारिर येसुन जक्ले सूड्सेर मत्ता काड्कि, यूदया येरियतगा वोर सोन्मकि.
सिरिप गलिलया येरियतगन तिरिसेर मत्तोर.
2 बति अद गट्कते यूदुल्क्ना डेरना सड+ करुम वासेर मत्ता.
3 ते येसुनुर तमुक, “निमे इगेटल यूदया सोन.
अस्केन अगटुर नी बक्तलिर नीवङ मय्मतङ काम्क सूडंतेर.
4 इगेन मत्तेके नीकुन डगुर-पान वायो.
निमे करलेने इव मय्मतङ काम्क कीतेके, दुनियतुरकुन तोहा” इन्जेर तादन वेह्तेर.
5 इत्तेके, वोनुर तमुक गिर येसुनगा बरोसा इर्मकि.
6 ते येसु, वूरकुन इत्तोर, “ना बारेते वोड्कि अरुस्वल वकत अजुन वायोये.
बति मिरट बस्के गिर अगा सोंदा वचो.
7 दुनियतुर मीकुन मेच्वक मंदा परुर.
बति वूर किय्वलिक काम्क करब मंतङ इन्जेर नना वेह्ता काड्कि, नाकुन वूर मेचुर.
8 मिरट सडदुन साटि सोंटु.
नावा वाय्वल वकत निंद्वा काड्कि, नना इंके मी सङा वायोन” इन्जेर वूरकुन वेह्तोर.
9 इहिन वेह्चि, येसु गलिलयतगन आग्तोर.
10 बति वोनुर तमुक सडदुन साटि सोत्ता पेजे, येसु गिर उजगिरिते आय्वा, मक्डिते अगा सोत्तोर.
11 अद सड जर्ग्नेके यूदुल्क्नुर अदिकारिर, “वोर बगा मंतोर?”
इन्जेर वोन साटि मह्क्तेर.
12 ते अद मांदितल कहितुर, “येसु चोकोट्नोर मायनल आंदुर” इन्जेर अनि, उंडे कहितुर, “सेले-सेले वोर पर्जतुन पसि किय्वल आंदुर” इन्जेर कुसा कुसा चर्चा कीतेर.
13 बति यूदुल्क्नुर अदिकारिरा वेरेते, येसुन बारेते बोरे उजगिरि वड्क्मकि.
येसु डेरना सड जर्ग्नेके मंदिरतगा बोदा करुस्वल
14 अद सड मोदोल आसि अर्दो दिवोस्क आता पेजे, येसु मंदिर्तगा सोन्जि, बोदा करुस्वल सुरु कीतोर.
15 अद केन्चि वूर, “असल वेर बोरे गुरुनगा सिक्सान येत्मकि.
बति वेन इचोर वेले गियन बगटल वाता?”
इन्जेर वूर यूदुल्क गुल आतेर.
16 ते येसु, “नना वेह्वलिक गोस्टिङ नावङ आयोङ.
बति नाकुन सारि किय्वल बगवंतनङ आंदुङ.
17 मिह्गटल बोरे आयि बगवंतना इचा तीर ताकना इंदनुर्ते, इव गोस्टिङ नह्गटल वासेर मंतङ कि सेलेके, बगवंतनल वासेर मंतङ इंवल करि कींतोर.
18 बोर्ते सोंता गोस्टिङ करुसंतोरो, वोर तंवय डगुर-पांदुन कोरंतोर.
बति बोर्ते तनकुन सारि किय्वने डगुर-पान वायना इंतोरो, वोर बरोसतोर आंदुर.
वोन्गा करब बतय सेले.
19 मोसे दर्मता कानुंतुन मीकुन सीतोर.
तेर बति मिह्गटल वोरोर गिर अवेकुन पिय्सि ताक्सेर सेल्विट.
इदेन बद्लि नाकुन जक्ले सूड्सेर मंतिट” इन्जेर येसु इत्तोर.
20 अद केन्चि दुस्रोक नह्कनल वातुर वूर, “एहे!
नीकुन बूर जक्ले सूड्सेर मंतेर?
निह्गा बूत सोप्रे मासि मंता कि बतल?”
इन्जेर इत्तेर.
21 ते येसु, “नना आरम्ना दिवोसुन नेटि, कीता मय्मता कामुन सूड्सि, मिरट सम्दिर वेले गुल आतिट.
22 मी मरकुन तोल कत्रि* कियना इन्जेर मोसेना कानुंतगा मंता.
इद रिवज मोसे मोदोल किय्मकि.
बति तोत्तुर्गटल वाता.
तेर बति आरम्ना दिवोसुन नेटि गिर, मिरट इद कार्या कीसेर मंतिट.
23 ना पोरो बारि सोङुन वांतिट?
मिरट वोरोर कांडिन, आरम्ना दिवोसुन नेटि तोल कत्रि कीतेके, मोसेना कानुंतुन बह्के मातप आयो इंतिट.
बति अंटित्क वोरोर माय्नन नना चोकोट कीतेके, नाकुन बह्के मातोर इंतिट.
24 पोरो दिस्वडुन हिंदल, तस्वा किय्मट.
बति सोन्च-विचार कीसि, बरोबर तस्वा कीम्ट” इन्जेर येसु वेह्तोर.
येसुये किरिस्तु कि बतल?
25 अस्के येरुसलेम्नुर कहि जन्क, “वूर अदिकारिर जक्ले, मह्क्वल वेरे आंदुर सेलेय?”
इंवल मोदोल कीतेर.
26 “इचुला सूडट!
वोर उजगिरि वड्क्सेर मंतोर.
तेर बति, बोरे बतय इन्जेर सेलुर.
वेरे करल किरिस्तु इन्जेर अदिकारिर करि कीतेरो बतलो?
27 बति किरिस्तु वानेके, वोर बगटल वांतोर इंवल, बोने करे मायो.
वेर्ते बगटोर इंवल माकुन टावये” इन्जेर वड्क्तेर.
28 अस्के येसु मंदिरतगा बोदा करुसेर, “नना बोना आंदुन अनि बगटल वातोन इंवल माकुन टावये इन्जेर सोन्च कींतिट.
बति नावा नना इगे वाय्मकि.
नाकुन सारि किय्वल सतेवंतल आंदुर.
वोर बोर आंदुरो मीकुन टावा सेले.
29 बति वोर नाकुन टावा.
वोर सोन इन्जेर हुकुम सीता काड्किने, इगे वातोन” इन्जेर जोर्ते वेह्तोर.
30 अद वकत्ने वूर अदिकारिर वोन पिय्ले कोसिद कीतेर.
बति वोरोर गिर वोन पोरो केय वाटा पर्मकि.
बारितेके वोना वकत निंद्लेके मत्ता.
31 तेर बति “किरिस्तु वानेके, वेन तेर अदिक मय्मतङ काम्क कींतोरिय?”
इन्जि, वेलेटिर पर्जा वोन पोरो बरोसा इर्तेर.
32 इव कुसा कुसा इंवलिक गोस्टिङ परिसयुल्क* केन्ज्तेर अनि वीर परिसयुल्क, डगुक कटोडलिर मीरे मासि, येसुन पिय्ले मंदिरतगा केप्वलिरकुन सारि कीतेर.
33 अस्के येसु, “नना उंडे जरसि वकत वेरि, मी सङा मंदंतोन.
अद वकत निंता पेजे, नाकुन सारि किय्वनगा मल्सि दांतोन.
34 मिरट नाकुन मह्ककिट बति, नना मीकुन पुटोन.
नना सोन्जि मंवडगा मिरट वाया पर्विट” इन्जेर वेह्तोर.
35 यूदुल्क्नुर अदिकारिर तम्वा तमा, “मरट मह्क्तेके गिर पुट्वक्ने वेर बगा सोन्मड मंदर बेहे?
मोका दुस्रोक देस्क्नगा पग्रे मासि मंवलिर यूदुल्क्नगा सोन्जि, बगवंतन बारेते टावा सेलुर वूर्कुन* बगवंतना बोदा वेह्मड मंदर कि?
36 ‘मिरट नाकुन मह्ककिट बति, नना मीकुन पुटोन.
नना सोन्जि मंवडगा मिरट वाया पर्विट’ इंवडा अर्तम बतलेयो?”
इन्जेर वड्क्तेर.
येसु जीवा निपुस्वल येता वाग्दन सिय्वल
37 अद सड्दा आक्रिता दिवोस बेय मुके मंदंता.
ते अद दिवोसुन नेटि येसु निल्सि, “वट्का वस्तोर वोर, नह्गा वासि येर उंडना.
38 ना पोरो बरोसा इर्तोनगा, दर्मा-ग्रंत्नगा वेह्तपिनय, ‘वोना पेटित रोपोडल जीवा निपुस्वल येर पोङ्सेर मंदंता’” इन्जेर वेह्तोर.
39 वोन्गा बरोसा इर्तुरकुन पुट्वल बगवंतना आत्मतुन बारेते, येसु अद जीवा निपुस्वल येर पोङ्वल गोस्टि वेह्तोर.
येसु उंडे गिर सासि-नेंड्लेके मत्तोर.
अदेन साटि वूर्गा अद आत्मा वाय्लेके मत्ता.
40 इव गोस्टिङ केन्ज्तुर कहितुर, “बविसत्ने वाय्वल पर्वक्तल करलेन वेरे आंदुर” इन्जेर इत्तेर.
41 उंडे कहितुर, “वेर किरिस्तु आंदुर” इन्जेर इत्तेर.
ते उंडे कहितुर, “एहे!
किरिस्तु गलिलयतल बहन वांतोर?
42 ‘किरिस्तु दाविद्ना कांदांतल पुटंतोर अनि दाविद मत्ता बेत्लेहम चहर्तले वांतोर’ इन्जेर दर्मा-ग्रंत वेहंति कि?”
इन्जेर इत्तेर.
43 येसुन हिंदल, पर्जतुन नड्डुम बेद-बाव पुट्ता.
44 ते कहितुर वोन पिय्कोम इन्जेर सूड्तेर.
बति वोरोर गिर वोन पोरो केय वाटा पर्मकि.
यूदुल्क्नुर अदिकारिर येसुन पोरो बरोसा इर्ले वोप्मकि
45 मंदिरतगा केप्वलिर रिकम केय्क्ने मल्सि वाता पेजे, “मिरट वोन बारि तर्मकि?”
इन्जेर डगुक कटोडलिर अनि परिसयुल्क पूसि कीतेर.
46 ते मंदिरतगा केप्वलिर, “वोर मायनल वड्क्तप इंके वेरि बोरे बस्केन वड्क्मकि” इन्जेर जवब सीतेर.
47 ते परिसयुल्क, “वोर मीकुन गिर पसि कीतोरिय?
48 मा अदिकारिर्गटले आयि, सेलेते परिसयुल्क्नगटले आयि, वोरोर तेर वोन पोरो बरोसा इर्तेरिय?
सेले बोरे इर्मकि.
49 बति दर्मता कानुन टावा सेल्वक्ने, वीर पिसलिर लोकुर वोन्गा बरोसा इर्तेर.
ते वूरकुन बगवंतना सापेना लागंता” इन्जेर मंदिरतगा केप्वलिरकुन वेह्तेर.
50 इदेन मुने, येसुनगा सोन्जि, वातुर्गटल वोरोर निकोदेम इंवल वूर अदिकारिर नड्डुम मत्तोर.
51 ते निकोदेम, “वोना गवा केन्ज्वक्ने अनि वोर बतल कीतोर इंवल करि किय्वक्ने, दर्मता कानुंतुन पिय्सि, मरट तस्वा किया पर्कट कि?
तप्वक मरट किया पर्वट!”
इन्जेर वूरकुन वेह्तोर.
52 ते वूर, “ये पिसा!
निम गिर गलिलयतोनि आंदि कि बतल?
दर्मा-ग्रंतुन चोकोट वाचि कीम.
गलिलयतल बोरे पर्वक्तल वायोर इन्जि मंदंता” इन्जेर चेडि कीतेर.
उंदि वेय्लो पीर कीसेर साप्डे माय्वल
53 *[अद आता पेजे वूर सम्दिर बोना रोन वोर सोत्तेर.