8
1 बति येसु ओलिवा मरक्ना गुटत पोरो सोत्तोर.
2 दुस्रो नेटि बेय सक्रेन, वोर मल्सि मंदिर्तगा वातोर.
अस्के वेलेटिर लोकुर वोन्गा मीरे मातेर.
ते येसु, वूरकुन बोदा करुसन साटि उद्तोर.
3 अस्केने, बोदा वेह्वलिर सास्तिरिर अनि परिसयुल्क पीर कीनेके साप्डे माता अद वेय्लोन तत्तेर.
अनि अद वेय्लोन सम्दिर नड्डुम निपुसीसि,
4 “गुरुजि!
इद वेय्लो पीर कीनेके साप्डे माता.
5 ईतल वेय्लोन बंडने पासि जकना इन्जेर मोसेना कानुंतगा हुकुम मंता.
ते निमे बतल इंति?”
इन्जेर येसुन पूसि कीतेर.
6 वोन पोरो पिरदि किय्ले, तप्नगा पियना इन्जेर अद सवल येसुन पूसि कीतेर.
बति येसु बूड वरिसि, बोमितगा लिहि कीसेर मत्तोर.
7 वूर तम्वा जिद सुटि किय्मकि.
ते येसु तला तह्चि वूर्के सूड्सेर, “मिह्गटल बस्केन पाप किय्मकि, वोर मोदोल इद वेय्लोन पोरो बंडा वाटा वचो” इन्जेर वेह्तोर.
8 अनि उंडे बूड वरिसि, बोमितगा लिहि कीसेर मत्तोर.
9 अद गोस्टि केन्चि तान तत्तुर वूर, मात्रलिर्गटल मोदोल कीसि, सम्दिरे वोरोन पेजेय वोरोर अगटल सोत्तेर.
ते सिरिप अद वेय्लोये येसुन मुने निल्सि मत्ता.
10 ते येसु उंडे उंदि जोका तला तह्चि, “बायि!
नीकुन तत्तुर वूर बेंदिर?
नीकुन बोरे सिक्सा वाट्मकिय?”
इन्जेर पूसि कीतोर.
11 ते अद वेय्लो, “वाट्मकि पर्बु!”
इन्जेर जवब सीता.
अस्के येसु, “नना गिर नीकुन सिक्सा वाटोन.
इगेटल सोन अनि इङेडल पाप किय्मा” इन्जेर वेह्तोर.]
येसुये दुनियता वेड्चि आंदुर
12 मर्ला येसु, वूर पर्जतुन सङा, “नना दुनियतुरकुन वेड्चि आसि मंतोन.
ना पेजेय ताक्वलिर सिकटितगा ताकुर.
बति वूरकुन जीवता सरि तोह्ले वेड्चि सींतोन” इन्जेर वेह्तोर.
13 ते परिसयुल्क, “नीवा निमे गवा वेह्चेर मंति.
अद गवा करल इन्जि वोपा परोम”* इन्जेर इत्तेर.
14 अस्के येसु, “नना वेह्वल गवा करल इन्जि वोपय लागर.
बारितेके नना बगटल वातोनो, बगा दांतोनो नाकुन टावा.
बति अदेन बारेते मीकुन टावा सेले.
15 सादरन माय्नलिर मोडि मिरट बह्रि दिस्ततुन पिय्सि, तस्वा कींतिट.
बति नना अहन बोने तस्वा कियोन.
16 मोका तस्वा कीतेके गिर, नावा तस्वा करले आंता.
बारितेके तस्वा कीनेके, नाकुन सारि किय्वल बाबो गिर ना सङा मंदंतोर.
17 ‘इविर माय्नलिरा गवा सतेमे’+ इन्जेर मीवा दर्मता कानुंतगन लिहि कीसि मंता.
18 नावा नना मोदोडोर गवदारना अनि नाकुन सारि किय्वल बाबो रेंडवा गवदारल आंदुर” इन्जेर वूरकुन वेह्तोर.
19 अस्के वूर केन्चि, “नी बाबो बगा मंतोर?”
इन्जेर पूसि कीतेर.
ते येसु, “ननय आयि, ना बाबोय आयि, मीकुन टावा सेले.
नाकुन करि कींदिट्ते, ना बाबोन गिर करि कींदिट” इन्जेर वूरकुन वेह्तोर.
20 इव गोस्टिङ मंदिरतुन रोपो हुंडिता जागतुन करुम निल्सि वेह्तोर.
तेर बति वोन बोरे पिय्मकि.
बारितेके, वोना वकत निंद्लेके मत्ता.
नना सोंवडगा मिरट वाया पर्विट
21 अस्के उंडे उंदि जोका येसु, “नना दांतोन.
मिरट नाकुन मह्ककिट बति, नना मीकुन पुटोन.
मिरट मी पाप्क मापि आय्वक्नेन सांतिट.
इदेन हिंदल नना सोंवडगा मिरट वाया पर्विट” इन्जेर वूरकुन वेह्तोर.
22 ते वूर यूदुल्क, “वोर सोंवडगा माकुन वाया पर्विट इंतोर.
मोका तंवा तनय सांतोरोय बतलो?”
इन्जेर वड्क्तेर.
23 अस्के येसु, “मिरट इद दुनियतुर आंदिट.
अनि मीवा सोन्च इद दुनियतुन बारेतेन मंदंता.
नना स्वर्ग्नोना आंदुन.
अनि नावा सोन्च-विचर अलग मंदंता.
24 अदेन साटिने, मीवङ पाप्क मापि आय्वक्नेन सांतिट इन्जेर वेह्तोन.
ना बारेते वेह्ता गोस्टित पोरो बरोसा इर्वेके, मीवङ पाप्क मापि आय्वक्नेन सांतिट” इन्जेर वेह्तोर.
25 ते वूर, “असल निमे बोनि आंदि?”
इन्जेर पूसि कीतेर.
अस्के येसु, “नना मोदोडल बोना आंदुन इन्जेर वेह्चेर वातोनो, वोनय आंदुन.
26 मीकुन तस्वा किय्ले, मी बारेते वेले गोस्टिङ नह्गा मंतङ.
बति सिरिप नाकुन सारि कीतोनल केन्ज्तङ गोस्टिने दुनियतुरकुन वेह्चेर मंतोन.
वोर सतेवंतल आता काड्कि, वोर किय्वल तस्वा गिर सतेमे आंता” इन्जेर वेह्तोर.
27 बति, येसु तंवोर बाबो बगवंतन बारेते वेह्तोर इंवल वूर अर्तम किय्मकि.
28 ते येसु, “स्वर्ग्नोर माय्नन बस्केते मोद्नगा टाङि कींतिटो अस्के, ननय वोना आंदुन इंवल करि कींतिट.
अचोरे आय्वा, नावा नना बतय किया परोन.
बति बाबो बव्ते नाकुन करुसीतोरो, अवे गोस्टिङ मीकुन वेह्तोन इन्जेर गिर मिरट करि कीकिट.
29 नाकुन सारि किय्वल, ना सङा मंतोर.
वोन आनंद सिय्वलिक काम्क बस्केट नना कीता काड्कि, वोर नाकुन वोरोने बस्केन सुटि किय्मकि” इन्जेर वेह्तोर.
30 इव गोस्टिङ केन्चि, वेलेटिर वोन्गा बरोसा इर्तेर.
अब्राहम्ना संतान अनि सय्तंदा संतान
31 अदेन साटि, येसु तंवा पोरो बरोसा इर्तुर यूदुलकुन सङा, “ना गोस्टि पिय्सि ताक्तेके, करलेने ना सिस्यलिर आंतिट.
32 अस्के मिरट सतुन* करि कींतिट.
अद सतेम मीकुन मोक्डो सुटि कींता” इन्जेर वूरकुन वेह्तोर.
33 “ममोट अब्राहम्ना कांदांतुर आंदुम.
इंके वेरि ममोट बोन्गन दासिपान किय्मकि.
बति माकुन मोक्डो सुटि कींता इन्जि बहन वेह्ति?”
इन्जेर येसुन पूसि कीतेर.
34 ते येसु, “पाप किय्वल हर वोरोर, पापुन दासि आंतोर.
35 दासि-मायनल बस्केट रोतुर सङा मनोर.
बति मरि बस्केट गिर रोतुर सङने मंदंतोर.
36 अदेन साटि, बगवंतनोर मरि मीकुन पापनल मोक्डो सुटि कीनुर्ते, मिरट रोतुर दात करलेने मोक्डो आंतिट.
37 मिरट अब्राहम्ना कांदांतुर आंदिट इन्जेर नाकुन टावये.
तेर बति, नाकुन जक्ले मिरट सूड्सेर मंतिट.
बारितेके मी रोपो नावा गोस्टितुन जागा सेले.
38 ना बाबोनगा सूड्तने नना वेह्चेर मंतोन.
अह्ने मिरट गिर, मी बाबोनल केन्ज्तङ गोस्टिन पिय्सि कीसेर मंतिट.
इद सतेम आंद” इन्जेर वूरकुन वेह्तोर.
39 ते वूर, “मा बाबो अब्राहम आंदुर” इन्जेर वेह्तेर.
अस्के येसु, “मिरट अब्राहम्ना कांदांतुर आतेके, अब्राहम कीतपे मिरट गिर कींदिट.
40 नना बगवंतनल केन्ज्ता सतुन वेह्ता काड्कि, मिरट नाकुन जक्ले सूड्सेर मंतिट.
बति अब्राहम अहन किय्मकि.
41 मिरट मी बाबो कीतपे कीसेर मंतिट” इन्जेर वेह्तोर.
ते वूर, “ममोट पीर कीनेके पुट्तुर आयोम.
बगवंतल वोरोरे मा बाबो” इन्जेर येसुन वेह्तेर.
42 अस्के येसु वूरकुन, “बगवंतल मी बाबो आतेके, मिरट नाकुन पेर्मते सूड्ंदिट.
नावा नना इगे वाय्मकि.
बगवंतले नाकुन रोह्तोर.
43 नना वेह्तङ गोस्टिन मिरट वोप्वा काड्किने, मीकुन अर्तम आसेर सेलेङ.
44 मिरट सय्तंदा बाज्नुर आंदिट.
वोरे मी बाबो आंदुर.
मी बाबोनङ करब आसन पूरि किय्लेने मिरट सूडंतिट.
वोर मोदोडले माय्नलिरकुन जक्वल आसि, सत्ने निल्वल आयोर.
वोन्गा सतेम इंवल असले सेले.
वोर तंवा बुदि पिय्सिने पकट वड्कंतोर.
वोर पकट आता काड्कि, लबडुन पय्दोस कीसि निल्तोर.
45 अदेन साटि, नना मीकुन सतेम वेह्तेके गिर बति, ना पोरो बरोसा इर्विट.
46 नह्गा पाप मंता इन्जेर वोरोर गिर निरुपन किया पर्विट.
नना सतेमे वेह्चेर मंतोन.
बति बारि ना पोरो बरोसा इर्विट?
47 बगवंतनुर बगवंतनङ गोस्टिङ केन्जंतेर.
बति मिरट बगवंतनुर आय्वा काड्किने, नना वेह्ता केन्ज्विट” इन्जेर वेह्तोर.
येसु तोत्तोर अब्राहमुन तेर डगुर आंदुर
48 अस्के वूर यूदुल्क, “निमे समरयतोनि* अनि बूत्क सोप्रे मासि मंतङ इंवल करले आंद सेलेय?”
इन्जेर येसुन राङ्तेर.
49 ते येसु, “नना बूत्क सोप्रे मातोना आयोन.
ना बाबोन मान सिय्वना आंदुन.
मिरट नाकुन मानि कीसेर सेल्विट.
50 नावा पोरोल बडे मायना इंवल नाकुन सेले.
बति नाकुन डगुर-पान वायना इंवल वोरोर मंतोर.
वोरे नाय्दा तस्वा किय्वल आंदुर” इन्जेर वेह्तोर.
51 “बोरे आयि ना गोस्टि पिय्सि ताकनुर्ते, वोर बस्केन मरंतुन सूडोर.
इद गोस्टि सतेम आंद” इन्जेर वूरकुन वेह्तोर.
52 अद केन्चि वूर यूदुल्क, “निह्गा करलेन बूत सोप्रे मासि मंता इंवल इंके माकुन अर्तम आता.
अब्राहम अनि तोत्तुर पर्वक्तलिर गिर मार्तेर.
तेर बति ‘बोर्ते ना गोस्टि पिय्सि ताकंतोरो, वोर बस्केन मरंतुन सूडोर’ इंति.
53 मा बाबो अब्राहम मार्तोर.
निमे वोन तेर डगुनि आंदि कि?
अनि वूर पर्वक्तलिर गिर मार्तेर.
नीवा निमे बोना आंदुन इन्जेर सोन्च कींति?”
इन्जेर पूसि कीतेर.
54 ते येसु, “नावा ननय डगुर-पान सीतेके, तान विलुवा मनो.
मा बगवंतल इन्जेर बोंते मिरट केयंतिटो, वोरे ना बाबो आंदुर.
वोर नाकुन डगुर-पान सीसेर मंतोर.
55 वोर मीकुन टावा सेलोर.
बति नाकुन वोर टावये.
वोर नाकुन टावा सेलोर इंद्कते, नना गिर मी दाते लपङिना आंतोन.
बति वोर नाकुन टावये, वोना गोस्टि नना पिय्सि ताकंतोन.
56 मी बाबो अब्राहम नावा वाय्वल दिवोसुन सूडंतोन इन्जेर आनंद्ने मत्तोर.
अद दिवोसुन सूड्सि आनंद येत्तोर” इन्जेर इत्तोर.
57 अस्के वूर यूदुल्क, “नीकुन अजुन पनस (50) साल्क गिर सेलेङ.
निमे अब्राहमुन सूड्ति कि?”
इन्जेर येसुन इत्तेर.
58 ते येसु, “अब्राहम पुटन मोदोडले नना मंवना आंदुन.
* इद गोस्टि सतेम आंद” इन्जेर वेह्तोर.
59 अस्के वूर, वोन पोरो बंडङ जुरुसि वाट्ले बंडङ पिय्तेर.
बति येसु मक्सि मंदिर्तल बह्रि सोत्तोर.