येसु पुटि-गुड्डिन चोकोट किय्वल
9
1 अहन येसु सरिय सोन्जेर मनेके, वोरोर पुटि-गुड्डिन सूड्तोर.
2 अस्के सिस्यलिर, “गुरुजि!
वेर गुड्डि आसि पुट्ले कारन, वेर पाप कीतोर कि, सेलेके वेनुर अवल-बाबो कीतेर?”
इन्जेर येसुन पूसि कीतेर.
3 ते येसु, “वेरे आयि, वेनुर अवल-बाबोय आयि, कीता पापुन हिंदल, वेर गुड्डिना जल्मा आय्मकि.
बति बगवंतना सक्ति वेन हिंदल दिसना इन्जेरेन गुड्डिन दात पुट्तोर.
4 पोड्द सोनल वेरि, नाकुन सारि कीतोनङ काम्क मरट किया लागर.
रात आय्ले करुम वासेर मंता.
अस्के बोरे काम किया परोर.
5 बति इद दुनियते मनल वेरि, पर्जतुन वेड्चित दात नना मंतोन” इन्जेर सिस्यलिरकुन वेह्तोर.
6 अहन येसु वेह्चि, तोडितगा उस्क्तोर.
अद ऊच्ने
येसु पुटि-गुड्डिन चोकोट किय्वल
7 अहन सोक्सि येसु, “निमे सिलोयम इंवल कोनेरतगा सोन्जि नोरा” इन्जेर वोन वेह्तोर.
सिलोयम इत्तेके, ‘रोह्तोर वोर्’ इन्जेर अर्तम.
ते वोर सोन्जि नोर्सि, नदुर वाले आसि वातोर.
8 अद जर्ग्ता पेजे, आजु-बाजुतुर अनि वोर बिचेम तल्क्नेके सूड्तुर, “वेर उच्चिकुन बिचेम तल्क्वले आंदुर कि?”
इन्जेर इत्तेर.
9 “ओहो!
वेरे आंदुर” इन्जेर कहितुर इत्तेर अनि, “एहे!
वोन मोडि मंवल दुस्रोर आंदुर” इन्जेर उंडे कहितुर इत्तेर.
बति वोर, “ननय वोना आंदुन!”
इन्जेर वेह्चेरेन मत्तोर.
10 ते, “नीकुन नदुर बहन वाता?”
इन्जेर वूर पूसि कीतेर.
11 अस्के वोर, “येसु इंवल वोरोर मायनल चिक्ला कीसि, ना कडकुन पोरो सोक्तोर अनि ‘सिलोयम कोनेरतगा सोन्जि, नोर्सि वरा’ इन्जेर वेह्तोर.
अस्के नना सोन्जि नोर्तोन.
ते नाकुन नदुर वाता” इन्जेर वेह्तोर.
12 “वोर येसु बगा मंतोर?”
इन्जेर वोन पूसि कीतेर.
ते वोर, “नाकुन टावा सेले” इन्जेर वूरकुन वेह्तोर.
अद चोकोट आततुन बारेते परिसयुल्क करि किय्वल
13-14 आरम्ना दिवोसुन नेटि, येसु चिक्ला कीसि, वोनङ कडकुन नदुर वायुस्ता काड्कि, वूर पुटि-गुड्डि मन्जि चोकोट आतोर वोन परिसयुल्क्नगा वोतेर.
15 नदुर वाय्वडुन बारेते, परिसयुल्क गिर वोन पूसि कीतेर.
ते वोर, “ना कडकुन पोरो येसु चिक्ला सोक्तोर.
ते नना सोन्जि नोर्तोन.
अस्के नाकुन नदुर वाता” इन्जेर वूरकुन वेह्तोर.
16 इद केन्चि कहितुर परिसयुल्क, “वोर आरम्ना दिवोस्ना नेकि पिय्सि ताक्वा काड्कि, बगवंतनल वातोर वोर आयोर” इन्जेर इत्तेर.
उंडे कहितुर, “वोर पापेस्तल मत्तेके, ईतङ मय्मतङ काम्क बहन किया परंतोर?”
इन्जेर इत्तेर.
इहिन वूर परिसयुलकुन नड्डुम बेद-बाव पुड्ता.
17 अस्के वूर उंदुंदि जोका नदुर वातोन सङा, “नीकुन नदुर वायुस्ता काड्कि, वोन बारेते निम बतल इंति?”
इन्जेर पूसि कीतेर.
ते, “वोर पर्वक्तल आंदुर” इन्जेर वेह्तोर.
18-19 पुटि-गुड्डि मन्जि, नदुर वाता अद गोस्टितुन नम्वा काड्कि, वूर यूदुल्क्नुर अदिकारिर, वोनुर अवल-बाबोन केयुस्तेर.
अनि, “पुटि-गुड्डि आसि पुट्तोर वोर मरि, वेरे आंदुर कि बतल?
वेरे मत्तेके, वेर इंके बहन सूड्सेर मंतोर?”
इन्जेर पूसि कीतेर.
20 ते वूर अवल-बाबो, “पुटि-गुड्डि आसि पुट्तोर वोर मरि, वेरे आंदुर इन्जेर माकुन टावा.
21 बति इंके वेन बहन नदुर वाता अनि वेन बोर चोकोट कीतोर इंवल माकुन टावा सेले.
वोर तंवा तना वेहा परनल बेर्स्तोर.
इद गोस्टितुन मिरटे वोन पूसि कीम्ट” इन्जेर वूर अदिकारिरकुन वेह्तेर.
22 वोनुर अवल-बाबो यूदुल्क्नुर अदिकारिरकुन वेरिसि, अहन वेह्तेर.
बारितेके, वोर येसुये, किरिस्तु आंदुर इन्जेर बोरे वोप्तेके, वोन समाज्नल* अलदि वाटंतोम इन्जेर, अदेन मुनेन वूर निर्नय येच्चि मत्तेर.
23 अदेन साटिने अवल-बाबो, “वोर वेहा परनल बेर्स्तोर.
वोने पूसि कीम्ट” इन्जेर वूरकुन वेह्तेर.
24 अदेन साटि, वोर नदुर वातोन उंदुंदि जोका केयुसि, “करल वेहा.
इद काम्ना डगुर-पान बगवंतने वायना.
बारितेके, वोर मायनल पापेस्तल इन्जि माकुन टावा” इन्जेर वेह्तेर.
25 ते वोर, “वोर पापि आंदुरो, आयोरो नाकुन टावा सेले.
बति नाकुन उंदिय टावा.
बतल इत्तेके, इदेन मुने गुड्डिना मत्तोन बति, इंके सूडा पर्सेर मंतोन” इन्जेर इत्तोर.
26 तेर बति वूर, “वोर नीकुन बतल कीतोर?
नीकुन नदुर बहन वाता?”
इन्जेर उंडे उंदि जोका पूसि कीतेर.
27 ते अस्के वोर, “सूडट!
इदेन मुनेन मीकुन वेह्तोन.
बति मिरट केन्ज्मकि.
उंदुंदि जोका बारि पूसि कीसेर मंतिट?
मिरट गिर वोनुर सिस्यलिर आकोम इंतिट कि बतल?”
इन्जेर इत्तोर.
28 अस्के वूर, “निमेय वोनोर सिस्यनि आंदि.
ममोट मोसेनुर सिस्यलिर आंदुम” इन्जेर वोना लजा वोतेर.
29 अनि वूर, “बगवंतल मोसेन सङा वड्क्तोर इंवल माकुन टावये.
बति वेर मायनल बगटल वातोर इंवल माकुन टावा सेले” इन्जेर वेह्तेर.
30 ते वोर अद केन्चि, “इद गोस्टि वेले चमत्कार्ता आंद.
वोर बगटल वातोर इंवल मीकुन टावा सेले बति, नावङ कडकुन मात्रम नदुर वायुस्तोर.
31 बगवंतल पापेस्तलिरा विनंति केन्जोर.
बति बोर्ते बगवंतनोर बक्तल आसि, वोना इचा पिय्सि ताकंतोरो, वोनय विनंति केन्जंतोर इन्जेर माकुन टावा.
32 इद कलि गडे मातगटल्ते इंके वेरि, दुस्रोर बोरे मायनल पुटि-गुड्डिन चोकोट कीतोर इंवल मरट बस्केन केन्ज्मकि.
33 मोका वेर बगवंतनगटल वाय्वेके, ईतङ बवे काम्क किया पर्सि मनोर” इन्जेर वूरकुन वेह्तोर.
34 अद केन्चि वूर, “एहे!
निमे पाप्नगा पुट्सि, बेर्स्तोनि आंदि.
माकुन बोदा वेह्ले वाति कि?”
इन्जेर अगटल वोन बह्रि तेंड्सि पूड्तेर.
बाव-बक्तिता गुड्डि-पान
35 वोन तेंड्सि पूड्तेर इन्जेर येसु केन्चि, वोन मह्क्सि पुटुसि, “निमे स्वर्ग्नोर माय्नन पोरो बरोसा इर्सेर मंति कि?”
इन्जेर पूसि कीतोर.
36 ते वोर मायनल, “वोन्गा नना बरोसा इर्ले, वोर बोर आंदुरेय?
वेहा पर्बु” इन्जेर येसुन पूसि कीतोर.
37 अस्के येसु, “निमे इंके वोन सूड्सेर मंति.
नी सङा वड्क्वल वोरे आंदुर” इन्जेर वेह्तोर.
38 अद केन्ज्ता बरोबर वोर, “पर्बु नना बरोसा इर्सेर मंतोन” इन्जि, मुर-टोङ्रङ कोट्सि गप्ने काल कर्तोर.
39 अस्के येसु, “गुड्डिर सूडना अनि नदुर वालिर गुड्डिर आयना.
इद तीर्दे तस्वा जर्गना इन्जेरेन, इद दुनियते वातोन”+ इन्जि वेह्तोर.
40 ते वोन सङा मन्जि, अव गोस्टिङ केन्ज्तुर कहितुर परिसयुल्क, “ममोट गिर गुड्डिर आंदुम इंति कि बतल?”
इन्जेर पूसि कीतेर.
41 अस्के येसु, “मिरट गुड्डिर आंदिट ते, मिह्गा पाप मंवेके सोंदु.
बति मिरट सूड्सेर मंतोम इन्जेर इत्ता काड्किने, मी रोपो पाप निल्सि मंता” इन्जेर वूरकुन वेह्तोर.