येसु चोकोट्नोर गोरेङ गाय्कि आंदुर
10
1 ते येसु, “गोरेना गाव्टनतगा पाटकनल नेङ्वक्ने, दुस्रो बाज्नल
गोरेना गाव्टना
2 बति बोर्ते पाटकनल नेङंतोरो वोरे गोरेङ गाय्कि आंदुर.
3 गाय्किन साटि गाव्टना केप्वल पाटक तेरियंतोर.
गोरेङ वोना लेङ वोड्कि कींतङ.
वोर तंवङ गोरेन पोरोल मुट्सि केय्सेर बह्रि वोंतोर.
4 अहन तंवङ गोरेन बह्रि वोनेके, वोर गाय्कि बस्केट गिर अवेन मुने ताकंतोर.
वोना लेङ वोड्के माता काड्कि, अव गोरेङ वोन पेजेय दांतङ.
5 बति दुस्रोना लेङ वोड्के माय्वा काड्कि, बुज्डे मासि वोन्गटल परर आंतङ.
इद सतेम आंद” इन्जेर वूरकुन वेह्तोर.
6 येसु इद नमुना येच्चि वूरकुन वेह्तोर.
बति बतन बारेते वेह्तोर इंवल वूरकुन अर्तम आय्मकि.
7 ते येसु उंदुंदि जोका इहिन वेह्वल मोदोल कीतोर.
“इद गोस्टि सतेम आंद.
गोरेङ नेङ्वल पाटकुन दात्नोना आंदुन.
8 नाकुन तेर मुने वातुर सम्दिरे कलिर अनि लूटि किय्वलिर आंदिर.
वूरा लेङ अव करल गोरेङ केन्चि ताक्मकि.
9 ननय पाटकुन दात्नोना आंदुन.
नह्गटल रोपो नेङ्तङ अव बचे मांतङ अनि रोपो-बह्रि वासेर रंदि सेल्वक मंदंतङ.
अव गोरेन हिर्वल जाडि पुटंता.
10 कले सिरिप कल्लेक, जक्लेक अनि नासेडम किय्लेके वांतोर.
बति नना पूना अनि बर्पुर जिन्गनितुन गोरेन सिय्ले वातोन.
11 नना चोकोट्नोर गोरेङ गाय्किना आंदुन.
चोकोट्नोर गाय्कि गोरेन साटि, तंवा परन गिर सींतोर.
12 बति बूय्तल गोरेनोर करल गाय्कि आयोर.
अव गोरेङ तंवङ आय्वा काड्कि, लांडिगल बदे वोन दिस्तेके गिर परर आंतोर.
अस्के अद लांडिगल अवेन पोरो मुच्लि अर्सि, बुजिडि कींता.
13 बूय्तल सिरिप बूतित साटि वाता काड्कि, गोरेना चोकोट-वायुट पटि किय्वक्ने परर आंतोर.
14-15 बति नना चोकोट्नोर गाय्किना आंदुन.
बाबो नाकुन अनि नना बाबोन टावा.
अह्ने नाकुन गोरेङ अनि नावङ गोरेन नना टावा.
ना गोरेन साटि नावा परन सींतोन.
16 इद गाव्टनतङे आय्वा, उंडे दुस्रोक गोरेङ गिर नाकुन मंतङ.
अवेन गिर नना पिय्सि वाया लागर.
अव ना लेङ केन्जंतङ.
अस्के इव अनि अव उंदिय मंदा आंतङ.
अव सम्दिन वोरोरे गाय्कि मंदंतोर.
17 नना सासि-नेंड्ले, नावा परन सीसेर मंतोन.
इदेन हिंदले, बाबो नाकुन वेले लाड कीसेर मंतोर.
18 नावा परन बोरे येता परुर.
नावा ननय परन सीसेर मंतोन.
बगवंतल नाकुन हुकुम सीता काड्कि, अद परंतुन सिय्ले अनि उंदुंदि जोका तान येत्ले गिर नाकुन अदिकार मंता” इन्जेर वेह्तोर.
19 इव गोस्टिन हिंदल, यूदुलकुन नड्डुम उंदुंदि जोका बेद-बाव पुड्ता.
20 वूर्गटल वेलेटिर, “वेन्गा बूत सोप्रे माता काड्कि, वेनङ पिसङ अदिक आतङ.
वेना गोस्टि बारि केन्जंतिट?”
इन्जेर इत्तेर.
21 बति उंडे कहितुर, “इव गोस्टिङ बूत सोप्रे मातोनङ आयोङ.
बूत गुड्डिरकुन नदुर बहन सिया परर” इन्जेर इत्तेर.
बगवंतनोर मरिना इन्जेर येसु वेह्वल
22 अद पीनि-गालुम्ना गट्कते, येरुसलेम्ना मंदिरतगा नेङ्वल हानुक इंवल सड* जर्ग्सेर मत्ता.
23 ते उंदि दिया येसु मंदिर्ता आव्रतगा मंवल सोलोमोन मंडोप्नगा ताक्सेर मत्तोर.
24 अदे वकत्ने, यूदुल्क्नुर अदिकारिर वोन गेर-पासि, “निमे बचेजेल माकुन अनमिना कीसेर इरंति?
निमे बचि किय्वल किरिस्तुनि* मत्तेके, कुला कुला वेहा” इन्जेर पूसि कीतेर.
25 ते येसु, “इदेन मुने मीकुन वेह्तोन बति मिरट बरोसा इर्मकि.
बाबोना पोरोडे नना किय्वलिक काम्क, ना बारेते गवा वेह्चेर मंतङ.
26 बति मिरट नावङ गोरेना मंदतुर आय्विट.
अदेन साटिने ना पोरो बरोसा इर्विट.
27 नावङ गोरेङ ना लेङ केन्जंतङ.
नावङ बव इंवल नाकुन टावये.
अव ना पेजेय वांतङ.
28 नना अवेकुन बस्केट पिस्वल जीवा सींतोन.
अव बस्केन नासेडम आयोङ.
ना केय्दल बोरे अवेन ऊंदा परोर.
29 बारितेके, अव गोरेन ना बाबो नाकुन सीतोर.
बाबो सम्दिरकुन डगुर आता काड्कि, ना बाबोना केय्दल अवेन बोरे ऊंदा परोर.
30 नना अनि ना बाबो उंदिय आसि मंतोम” इन्जेर वूरकुन वेह्तोर.
31 अस्के वूर यूदुल्क, वोन पासि जक्ले बंडङ तह्तेर.
32 ते येसु, “ना बाबोनल बेय वेले मय्मतङ काम्क तोह्तोन.
अवेनल बद कामुन साटि, नाकुन बंडने पाकोम इंतिट” इन्जेर वूरकुन पूसि कीतोर.
33 ते वूर यूदुल्क, “निमे कीतङ चोकोट्नङ कामकुन हिंदल आयो बति, माय्ननि आसि बगवंतना इन्जेर वेह्ता काड्किने, बंडने पाय्लेन आंतोम” इन्जेर वेह्तेर.
34-36 अस्के येसु, “दर्मा-ग्रंत बस्केट्के लबड वेहो.
तोले मीवा दर्मा-ग्रंत्नगा, ‘मिरट बगवंतन दात्नुर आंदिट’+ इन्जि, कहि नायदिकारिरकुन बगवंतल वेह्तोर इन्जेर मंता.
ते नाकुन बाबो नेमि कीसि, तंवा काम किय्ले, इद दुनियतगा सारि कीतोर अस्के, बगवंतनोर मरिना आंदुन इन्जेर वेह्वल बहन रेह्चि वड्क्तप आंता?
37 नना ना बाबोनङ काम्क किय्वेके, ना पोरो बरोसा इर्मट.
38 बति नना अव काम्क कीकते, ना गोस्टित पोरो बरोसा इर्वेके गिर, नना किय्वलिक कामकुन पोरो तेर बरोसा कीम्ट.
अहन कीकिट्ते, बाबो ना रोपो अनि नना बाबोन रोपो मंतोम इन्जेर कुला कुला करे मांता” इन्जेर वेह्तोर.
39 ते वूर उंडे उंदि जोका, वोन पियना इन्जेर कोसिद कीतेर.
बति वूरा केय्दल तपुसीसि अगटल सोत्तोर.