येसुन लाड किय्वल बक्तना मरन
11
1 बेतनिया इंवल नाटे लाजर इंवल वोरोर बेमरिते अर्सि मत्तोर.
वोनङ तकक मार्तल अनि मरियल गिर, अदे नाटे पिसेर मत्तङ.
2 पर्बुन सेंट+ सोक्सि, वोनङ कालकुन तंवङ केल्क्ने उसुम्ता अद मरियल इदे आंद.
वेर लाजर तानोरे तमुर आंदुर.
3 अदेन साटि अव रंड तकक, “पर्बु, निमे लाड किय्वल बेमरिते अर्सि मंतोर” इन्जेर येसुनगा कबुर सारि कीतङ.
4 अद कबुर केन्चि येसु, “इद बेमरि वोन जक्ले वाय्मकि.
बति बगवंतनोर मरिन मान सीसि, बगवंतने मय्मा तर्ले वाता” इन्जेर वेह्तोर.
5 येसु मार्तन, ताना सेलडुन अनि लाजरतुन लाड्दे सूड्ंदुर.
6 वोर लाजर बेमरिते मत्ता अद कबुर येसुन केन्जा वाता.
तेर बति, उंडे रंड रोज्क अगने आग्तोर.
7 अहन आग्ता पेजे, “यूदया येरियते मल्सि दाकट” इन्जेर सिस्यलिरकुन इत्तोर.
8 अस्के सिस्यलिर, “गुरुजि!
अगटुर यूदुल्क इंद्केट्के नीकुन बंडने पाय्ले सूड्सेर मंतेर.
उंडे अगा दाका इंतिय?”
इन्जेर येसुन पूसि कीतेर.
9 ते येसु, “उंदि दिवोसुन बारा गंटङ वेड्चि मंदंता.
+ इद दिहते ताक्वल दुनियता वेड्चि सूड्ता काड्कि, कोदा पायोर.
10 बति रात्ने ताक्वल वेड्चि सेल्वा काड्कि, वोर कोदा पांतोर” इन्जेर वेह्तोर.
11 इहिन वेह्ता पेजे येसु, “मावोर सोप्तल लाजर मींड्सि मंतोर.
वोन जोपनल तेह्ले दांतोन” इन्जेर इत्तोर.
12 अस्के सिस्यलिर, “पर्बु, वोर मींड्सि मत्तेके, तप्वक तेच्चि चोकोट आंतोर!”
इन्जेर वेह्तेर.
13 येसु लाजर्ता मरंतुन बारेते वेह्तोर बति, वूर सिस्यलिर सादरन जोपुन बारेते वेह्तोर इन्जि मत्तेर.
14 ते येसु, “लाजर मार्तोर” इन्जि कुला कुला वेह्चि,
15 “अगा नना मन्मकि अचोर चोकोट आता.
मी साटिने इहिन जर्ग्ता.
मीवा बरोसा बडे मायना इंवले नावा इचा.
इङे मरट अगा दाकट देट!”
इन्जेर वूरकुन इत्तोर.
16 अस्के येमल* इन्जेर केय्वल तोमल, “येसुन तोडो मरन आय्ले, मरट गिर दाकट देट” इन्जेर तंवा बरोबर मंवलिर सिस्यलिरकुन इत्तोर.
सातुरकुन नेंडुस्वल सक्ति येसुनगा मंता
17-19 बेतनिया नार येरुसलेमनल करुम करुम रंड कोस्क लङ मत्ता.
अगा तमुना मरंतुन हिंदल, दुक्सते मंवलिक मार्तन अनि मरियन सुम्जि किय्ले, वेलेटिर यूदुल्क वासि मत्तेर.
ते येसु अद नाटुन करुम येव्ता पेजे, लाजर्ता कूरदुन नारिता बंडता वीच्ना बुयरितगा इर्सि, नालुङ रोज्क आता इन्जेर करि कीतोर.
20 मार्तल, येसु वासेर मंतोर इंवल केन्चि बेटे माय्ले मुनेत्क सोत्ता.
बति मरियल रोतगन रेहे माता.
21 मार्तल येसुन बेटे मासि, “पर्बु!
निमे इगे मंदि इत्तेके, नावोर तमुर सासि मनोर.
22 बति इंके आतेके गिर बतय आयो.
निमे बगवंतन बतल तल्ककि अदेन, नीकुन सींतोर” इन्जेर इत्ता.
23 अस्के येसु, “नी तमुर नेंडंतोर” इन्जेर वेह्तोर.
24 ते मार्तल, “हो पर्बु, तस्वा किय्वल दिवोस्ने वोर नेंडंतोर इंवल नाकुन टावये” इन्जेर इत्ता.
25 अद केन्चि येसु, “जीवता अनि नेंडुस्वना ननये आंदुन.
ना पोरो बरोसा इर्वल सातेके गिर मर्ला पिसंतोर.
26 जीवते मन्जि ना पोरो बरोसा इर्वन बस्केट मंवल मरंता सिक्सा पुटो.
+ इदेन बरोसा कींति कि?”
इन्जेर पूसि कीतोर.
27 ते अद, “हो पर्बु!
निमेय बगवंतनोर मरि किरिस्तुनि आंदि अनि इद कलिते वाय्ले मत्तोनि गिर निमेय आंदि.
इदेन बरोसा कींतोन” इन्जेर वेह्ता.
28-30 येसु अस्के वेरि नाटे नेङ्मकि.
मार्तल बगते बेटे मातयो अगने आग्सि मत्तोर.
ते मार्तल रोन सोत्ता अनि मरियन कुसये केय्सि, “गुरुजि वातोर.
नीकुन केयंतोर” इन्जेर सेलडुन सङा वेह्ता.
इद गोस्टि केन्ज्ता बरोबर मरियल तेच्चि, येसुनगा सोत्ता.
31 कहितुर यूदुल्क मरियन सुम्जि कीसेर रोन मत्तेर.
अस्के अद सपा-सिपा तेच्चि सोंवल सूड्सि, वीच्नगा सोन्जि आडंता बतलो इन्जेर, तान पेजेय सोत्तेर.
32 मरियल येसु मंवल जागते सोन्जि, वोनङ कालकुन पोरो अर्सि, “पर्बु!
निमे इगे मंदि इत्तेके, नावोर तमुर मार्सि मनोर” इन्जेर इत्ता.
33 मरियल अनि तान सङा वातुर यूदुल्क सम्दिर आड्वल सूड्सि, येसुना दिल्ते बेय दुक्सा लाग्ता.
34 अस्के येसु, “वोना कूरदुन बगा इर्तिट?”
इन्जेर पूसि कीतोर.
ते वूर, “पर्बु, वासि सूडा” इन्जेर वेह्तेर.
35 अद केन्चि, येसु जोडा जोडा काडेर तुह्तोर.
36 अद सूड्सि वूर यूदुल्क, “लाजरतुन बचोर लाड कीतोरो सूडट” इन्जेर इत्तेर.
37 वूर्गटल कहि लोकुर, “वेर येसु, गुड्डिरकुन नदुर वायुस्तोर.
ते वेर लाजरतुन साय्वक्ने इरा पर्सि मनोर कि बतल?”
इन्जेर इत्तेर.
सातोर वोर लाजरतुन येसु नेंडुस्वल
38 येसुना दिल्ते उंदुंदि जोका दुक्सा लाग्ता.
ते वीच्नगा सोत्तोर.
अद उंदि नारिता बंडता बुयरि आंद.
उंदि बंडा तान्गा अड्डम इर्सि मत्ता.
39 ते येसु, “अद बंडतुन तेंडट!”
इन्जेर वूरकुन वेह्तोर.
अस्के सातोर वोना तक्का मार्तल, “पर्बु, इंके वोना कूर कडिसि गाडि वासेर मंदर.
बारितेके वोर मार्सि नालुङ रोज्क आसेर मंतोर” इन्जेर वेह्ता.
40 अस्के येसु, “निमे बरोसा इर्किते, बगवंतना मय्मतुन सूड्कि, इन्जि नीकुन वेह्तोन कि?”
इन्जेर इत्तोर.
41 ते वूर अद बंडतुन तेंड्तेर.
अस्के येसु पोरो सूड्सेर, “बाबा, नावा पार्तनतुन केन्ज्ता काड्कि, नीकुन दनेवाद.
42 निमे बस्केट नावा पार्तनङ केन्जंति इंवल नाकुन टावये.
बति निमेये नाकुन सारि कीति इन्जेर करि कीसि, ना सिर्मुट्नुर बरोसा इरनिर इन्जि वूर साटिने, इद गोस्टि वेह्तोन” इन्जेर इत्तोर.
43 इहिन इत्ता पेजे येसु,
लाजर बगवंतना सक्तिते नेंड्वल
इन्जेर जोर्ते केय्तोर.
44 अस्के तंवा कूरदुन गूंडि कीतङ कप्डिनेन लाजर बह्रि वातोर.
वोना मोकोम सेलते गूंडि कीसि मत्ता.
“गूंडि कीतङ कप्डिन ऊलि कीसि, वोन सोंदा सीम्ट” इन्जेर येसु वेह्तोर.
येसुन जक्ले यूदुल्क पिलन वाट्वल
45 अद कामुन सूड्सि, मरियन सुम्जि किय्ले वातुर यूदुल्क्नगटल वेलेटिर येसुन पोरो बरोसा इर्तेर.
46 बति वूर्गटल कहि जन्क, परिसयुल्क्नगा सोन्जि, येसु कीता कामुन बारेते वेह्तेर.
47 अदेन साटि डगुक कटोडलिर अनि परिसयुल्क पन्च्नुरकुन केयुसि, “मरट बतल कीकट?
वोर मायनल वेले मय्मतङ काम्क कीसेर मंतोर.
48 मरट वोर किय्वलिकुन इहिने सूड्सेर मत्तेके, वोरे राजल इन्जेर सम्दिरे वोन पोरो बरोसा इरंतेर.
अस्के रोमा राज्नुर अदिकारिर वासि, मा मंदिरतुन नासेडम कींतेर अनि मा जातितुरकुन इगेटल पूडि सींतेर” इन्जेर वेह्तेर.
49-50 अहन वेह्ता बरोबर, “पिसलिर्निट!
मा जातितुर नासेडम आय्वक्ने, वोरोर मायनल पर्जत साटि परन सिय्वल चोकोट इन्जि सम्जे माय्विटिय?”
इन्जेर अद गट्कते पेर्सोर कटोडल आय्वल कयपल इत्तोर.
51-52 सिरिप यूदुल्क्ना लाबमुन साटिने आयो.
बति दुनिया पूरो पग्रे मासि मंवलिर बगवंतनुर लोकुर सम्दिरकुन मीरि किय्लेने, येसु परन सींतोर इन्जेर मुने जर्ग्वल वचन वेह्तोर.
इद गोस्टि तंवा तना आसि वेह्मकि.
बति अद साल पेर्सोर कटोडल आसि मत्ता काड्किने, वेहा पर्तोर.
53 अद नेटितल वोन जक्ले पिलन वाट्वल मोदोल कीतेर.
54 अदेन साटि येसु अस्केडल यूदुल्क्नगा उजगिरि वेलिवक्ने, बोडि गुटन करुम मंवल येप्रायिम इंवल चहर्ते सोन्जि, अगा सिस्यलिर सङा कहि रोज्क मत्तोर.
55-57 अस्के यूदुल्क्ना पस्का सड करुम वासेर मत्ता.
ते, “बोने येसुना पता लाग्तेके वेहना.
ममोट वोन पियंतोम” इन्जेर डगुक कटोडलिर अनि परिसयुल्क हुकुम सीसि मत्तेर.
सडदुन साटि तम्वा तमा सुदुड किय्लेन, मुनेने वेलेटिर लोकुर आजु-बाजुतङ नह्कनल येरुसलेम वातेर.
वूर येसुन मह्क्सेर मंदिर्तुन रोपो निल्सि, “वोर इद सडदुन वांतोर कि, वायोर?
मिरट बतल इंतिट?”
इन्जेर वोरोन वोरोर पूसि कीतेर.