मार्क 15

येसुन पिलातुना केय्दे हव्लि किय्वल

(मत्तयि 27:1-2, 11-14; लूका 23:1-5; योहन 18:28-38)

1 सक्रेन डगुक कटोडलिर, पेदोल्क, सास्तिरिर अनि संहेद्रिंतुर सम्दिर अदिकारिर मीरे मासि पिलन वाड्तेर.

अनि येसुनङ केय्क दोह्‍चि, अद येरियतोर गवर्नर पिलातुनगा वोसि, हव्लि कीतेर.

2 अद वकत्ने रोमतोर गवर्नर पिलातु येसुन सूड्सि, “निमे यूदुल्क्नोर राजनि आंदि कि?”

इन्जेर पूसि कीतोर.

ते येसु, “निमे इत्तपे” इन्जेर जवब सीतोर.

3 अस्के वूर डगुक कटोडलिर, “बेय वेले तीर्क्नङ करब काम्क कीतोर” इन्जेर बद्नम कीतेर.

4 अव केन्चि पिलातु वोन सूड्सि, “इचुला!

बचोङ कसुक वाट्सेर मंतेरो सूडा.

निमे बतय जवब सिय्वि कि?”

इन्जेर पूसि कीतोर.

5 तेर बति, येसु बदे जवब सिय्मकि.

ते पिलातु गुल आतोर.

मोद्नगा येसुन टाङि कियना इन्जेर किलिवल

(मत्तयि 27:15-31; लूका 23:13-25; योहन 18:39–19:16)

6 हर पस्का सड जर्ग्नेके, जेलतगा अर्सि मंवलिर्गटल पर्जा सुटि कीम्ट इन्जेर कोर्तोर वोरोन, गवर्नर सुटि किय्वल रिवज ताक्सेर मत्ता.

7 बरबा इंवल वोरोर मायनल मत्तोर.

वोर रोम सर्कारदुन बय्मन आसि, तंवुर सोप्तलिर सङा वेलेटिरकुन जक्सि वूर बरोबर टानेते अर्सि मत्तोर.

8 हर साल टानेतल वोरोन सुटि कीतपे, इद सडदुन नेटि गिर वोरोन सुटि कियना इन्जेर पर्जा गवर्नर पिलातुन कोर्तेर.

9-10 वूर डगुक कटोडलिर कपट्ने वोर येसुन तंवा केय्दे हव्लि कीतेर इंवल, पिलातु करि कीतोर.

अनि, “यूदुल्क्नोर राजन मी साटि सुटि कियना इंतिट कि बतल?”

इन्जेर पर्जतुन पूसि कीतोर.

11 बति अद वकत्ने डगुक कटोडलिर, “‘येसुन बद्लि बरबन सुटि कीम्ट’ इन्जेर कोरट” इन्जि वूर पर्जतुन चह्‍डि कियुसीतेर.

12 ते पिलातु, “मिरट यूदुल्क्नोर राजल इन्जेर केय्वल वेर येसुन नना बतल कीका?”

इन्जेर पूसि कीतोर.

13 ते वूर सम्दिरे, “वोन मोद्नगा टाङि कीसि जकना” इन्जेर किलितेर.

14 अद केन्चि पिलातु, “बारि ‘वेन जकना’ इन्जेर मंतिट?

वेर बतल कसुर कीतोर?”

इन्जेर वूरकुन पूसि कीतोर.

ते वूर पर्जा उंडे इचुर जोर्ते, “वोन मोद्नगा मोलने पासि जकनये” इन्जेर किलितेर.

15 वूर सम्दिर पर्जा कोर्ततुन मानि कीसि, पिलातु टानेतगा मंवल बरबन सुटि कियुसीतोर.

अद आता पेजे येसुन चाटल्क्ने पाय्ले अनि मोद्नगा मोलने पासि जक्ले सिपायिर्गा वोर हव्लि कीतोर.

सिपायिर येसुन चेह्‍टेङ किय्वल

16 वूर सिपायिर येसुन गवर्नर्ता महलतगा वोसि, मेय्तुर सिपायिर सम्दिरकुन मीरि कीतेर.

17 वूर सम्दिर मीरे मासि, येसुन राजलिर पोंड्वल रगल वाले लाम पाङुड पोंडुस्तेर.

चह्‍क्ना कांदतुन उंदि किरिटुन मोडि गीडि कीसि तलदगा केरुसीतेर.

येसुना तलतगा चह्‍क्ना किरिट

18 अनि वूर, “यूदुल्क्नोर राजा!

नीकुन जेय जेय कार” इन्जेर किलितेर.

19 अनि येसुना तलदुन बेड्डेते पासेर, उस्क्सेर, वूर सम्दिर वोन मुने मुर-टोङ्रङ कोट्सि, काल कर्सेर चेडि कीतेर.

20 अहन वोन चेडि कीता पेजे, वोन पोंडुस्ता पाङुडुन तेंड्सि, वोना पाङुडुन वोन पोंडुसीतेर.

अद आता पेजे, मोद्नगा टाङि किय्ले, वोन पिय्सि बह्‍रि वोतेर.

येसुन जक्ले मोद्नगा टाङि किय्वल

(मत्तयि 27:32-44; लूका 23:26-39; योहन 19:17-19)

21 अस्के कुरेनि चहर्तोर अलेग्जांडर्तोर अनि रूपस्नोर बाबो सीमोन, बहिडल अगा वासेर मत्तोर.

ते वोन पोरो, येसु कान्चि मंवल मोदुन वूर सिपायिर जुल्मते कान्जुसीतेर.

येसुन मोद्नगा टाङि किय्वल

22 अनि वूर येसुन ‘गोल्गोत’ इंवल जागतगा पिय्सि वातेर.

‘गोल्गोत’ इत्तेके, तलदा टोक्रे इन्जेर अर्तम.

23 अगा केय्मुल^* वालेतुन मिस्डि कीता आङुर रसतुन उंले, वोन सीतेर बति, वोर येसु उन्मकि.

24 ते अद आता पेजे, येसुना मेंदोड पोरोडङ पाङुक कुडुसि, वूर वोन मोलने पासि मोद्नगा टाङि कीतेर.

अनि वोनङ पाङुकनल बोन बद ईसा वांता इन्जेर, चिटिङ वाट्सि तूस्तेर.

25 सक्रे नोव नेक्नेके, येसुन मोद्नगा टाङि कीतेर.

26 अनि, “यूदुल्क्नोर राजल” इन्जेर वोन पोरो वाड्ता कसुडुन लिहि कीता चेकतुन वोना मोद्नगा मोलते पातेर.

27 येसुन बरोबर इविर कलिरकुन तत्तेर.

अनि येसुना तिना बाजुन वोरोन, डेमा बाजुन वोरोन मोद्क्नगा मोलने पासि टाङि कीतेर.

28 ^*[इदेन हिंदल,

“येसुन कलिर बरोबर टाङि कीनिर!”

⁺

इंवल ग्रंत्नगा लिहि कीसि मत्ता वचन पूरे माता.]

29-30 अस्के अद सरिय सोन्जेर-वासेर मंवलिर तम्वङ तलङ हालि कीसेर, “अहा!

बगवंतना मंदिरतुन उल्टि कीसि मूंद रोज्क्ने दोह्‍वनि, नीवा निमे बचि कीम.

नीकुन टाङि कीता मोदनल रेय्सि वरा” इन्जेर येसुना हिजत वोतेर.

31 अदे तीर्दे डगुक कटोडलिर, सास्तिरिर गिर, “वेर दुस्रुरकुन बचि कींतोर बति, तंवा तना बचि किया परोर अले.

32 इज्रयेल पर्जतुन वेर राजल आय्वल किरिस्तु बेरे, इंके इद मोदनल रेय्सि वायिर.

अस्के वेन्गा बरोसा इरंतोम” इन्जेर चेडि कीतेर.

येसुन बग्ला मंवलिर इविर कलिर गिरे वोना हिजत वोतेर.

येसुना मरन आय्वल

(मत्तयि 27:45-56; लूका 23:44-49; योहन 19:28-30)

33 अद देस्नगा दुपरि बारा (12) नेक्नेकेडल्ते मूंद (3) नेकनल वेरि, कह्‍चर सिकटि आसि मत्ता.

34 अहन दुपरि मूंद नेक्नेकेन येसु “येलि!

येलि!

लामा सबक्तनि”^* इन्जेर जोर्ते किलितोर.

इदेना अर्तम, “ना बगवंता!

ना बगवंता!

नाकुन बारि सुटि कीति?”

35 इनेकेन करुम मंवलिर कहितुर अद केन्चि, “इचुला!

वोर येसु, येलिया पर्वक्तन केय्सेर मंतोर” इन्जेर इत्तेर.

36 वूर्गटल वोरोर विच्चेर सोन्जि, पुलिता आङुर्क्ना रसतगा दूदितुन मुडुस्तोर.

अनि तान उंदि लाम बेड्डेतगा टटुसि, उंडन साटि येसुना तोड्दगा अंदुस्तोर.

बति उंडे वोरोर, “दीरा!

वोन येलिया पर्वक्तल वासि मोदनल बूड रेहंतोर बतलो सूड्कट” इन्जेर इत्तोर.

37 अद वकत्ने येसु बेय जोर्ते किलंडि वाट्सि तंवा परन सुटि कीतोर.

38 अस्के येरुसलेम्नगा मंवल बगवंतना मंदिर्ता पड्दा पोरोडल्ते बूड वेरि, सर्सि रंड टुक्डेङ आता.

39 अद वकत्ने नूर जन्क सिपायिरोर अदिकारि येसुन मुने निल्सि मत्तोर.

वोर येसुना मरंतुन सूड्सि,^* “वेर करलेने बगवंतनोर मरि आंदुर” इन्जेर वोप्तोर.

40 अद अहन जर्ग्वल सम्दो, मग्दलेने नाट्ना मरियल, चुडुर याकोब अनि योसेस्ना^* अवल आय्वल मरियल अनि सलोमि इंवलिक कहि जनिक वेय्लोक लङनल सूड्सेर मत्तङ.

41 इव वेय्लोक येसु गलिलया येरियतगा मनेके, वोना चर्ना पिय्सि बक्तिते मदत कीसेर मत्तङ आंदुङ.

इवे आय्वा उंडे येसुन पेजेय येरुसलेम वातङ वेले वेय्लोक गिरे मत्तङ.

येसुना माति जतुन किय्वल

(मत्तयि 27:57-61; लूका 23:50-56; योहन 19:38-42)

42-43 अरिमतया चहर्तोर योसेप इंवल डगुक अदिकारिर्गटल चोकोट्ना पोरोल कमय कीतोर आंदुर.

अनि वोर पर्जतङ दिल्क्नगा बगवंतल उच्चि राज ताकुसना इन्जेर मंदगा बक्ति कीसेर मंवल आंदुर.

आरम्ना दिवोसुन मुनेता दिया येसु मार्तोर.

अदेन साटि अद नेटि पोड्द सोंवक मनेके^* वोर योसेप दर्यम कीसि पिलातुनगा सोन्जि “येसुना कूरदुन वोया सीम” इन्जेर पूसि कीतोर.

44 ते पिलातु गुल आसि “अय्यो!

इचोर वेय्नेने येसु मार्तोरिय?”

इन्जेर सिपायिरोर अदिकारिन पूसि कीतोर.

45 वोर अदिकारि “ओहो!

मार्तोर” इन्जेर जवब सीता पेजे, योसेपुन येसुना कूरदुन वोयन साटि पिलातु वोप्तोर.

ते योसेप अद कूरदुन टाङि कीता मोदनल बूड रेह्‍चि,

46 बारिता पूना कादि कपिडे गूंडि कीतोर.

नार्युसीता बंडता पूना वीच्ना बुयरितगा अद कूरदुन इर्सि, अदेन बंडते मुहुसीतोर.

47 अहन इर्ता जागतुन योसेस अनि याकोब्ना अवल मरियल अनि मग्दलेने नाट्ना मरियल सूड्तङ.

नारिता बंडता उंदि वीच