येसुन मरंता सिक्सा वाट्वल
19
1 अस्के पिलातु येसुन चाटल्क्ने पायुस्तोर.
2
चह्क्ना किरिट
राजल पोंड्वल साय रङ्ना पाङुड वोन पोंडुस्तेर.
3 अहन पोंडुस्ता पेजे वोन करुम वासि, “यूदुल्क्नोर राजा!
नीकुन जेय जेय कार” इन्जेर ताप्डङ पातेर.
4 पिलातु उंदुंदि जोका बह्रि पेसिसि, “वेन मी मुने तरंतोन.
बति केन्जट!
वेन सिक्सा वाटनल, नाकुन बदे गल्ति दिसेर सेले” इन्जेर वेह्तोर.
5 येसुन, चह्क्ना किरिट अनि अद रगल रङ्ना पाङुड पोंडुसि, बह्रि तत्तेर.
अस्के पिलातु, “इचुला!
वेर माय्नन सूडट!”
इन्जेर इत्तोर.
6 येसुन सूड्सि, वूर डगुक कटोडलिर अनि मंदिरतगा केप्वलिर, “वोन मोद्नगा मोलने पासि जकना!
वोन जकना!”
इन्जेर किलितेर.
ते पिलातु, “वेन्गा नाकुन बदे गल्ति दिसेर सेले.
अदेन साटि मिरटे वेन मोद्नगा मोलने पासि जकट” इन्जेर वेह्तोर.
7 अद केन्चि, वूर यूदुल्क, “माकुन उंदि कानुन मंता.
बगवंतनोर मरिना आंदुन इन्जेर वेर इत्ता काड्कि, मावा कानुंतुन पिय्सि वेर तप्वक साया लागर” इन्जेर वेह्तेर.
8 अद केन्चि, पिलातु बेय वेरितोर.
9 अनि येसुन महलतुन रोपो वोसि पिलातु, “निमे बगटल वाति?”
इन्जेर पूसि कीतोर.
बति येसु जवब सिय्मकि.
10 ते पिलातु, “निमे ना सङा बारि वड्क्वि?
नीकुन सुटि कियुस्ले अनि मोद्नगा मोलने पासि जकुस्ले गिर नाकुन अदिकार मंता” इन्जेर येसुन वेह्तोर.
11 अस्के येसु, “पोरो मंवल बगवंतल सीसि मत्तेके तपा, ना पोरो बदे अदिकार नीकुन सेले.
अदेन साटि, नाकुन निह्गा हव्लि कियुस्तोर वोन, बेय पाप लागंता” इन्जेर वेह्तोर.
12 अस्केडल पिलातु, येसुन सुटि कियुसना इन्जेर कोसिद कीतोर.
बति यूदुल्क, “तना राजना इन्जेर वेह्वल हर मायनल, महा राजन बय्मन आतप आंता.
उंदि मोका वेन सुटि कीकिते, निमे महा राजनोर दोस्तनि आय्वि” इन्जेर किलितेर.
13 ते पिलातु इव गोस्टिङ केन्चि, येसुन बह्रि तत्तोर.
तस्वा कीनेके उद्वल चव्तोरत पोरोडा कुर्सितगा उद्तोर.
यूदुल्क्ना* बासते अद जागतुन, ‘गब्बता’ इंतेर.
14 अद पस्का सड्दा तयरि किय्वल दिवोस आंद.
अद वकत्ने बार दुपरि आसेर मत्ता.
ते पिलातु, “इचुला!
मी राजल” इन्जेर यूदुलकुन वेह्तोर.
15 अस्के वूर, “वोन जकनये!
वोन जकनये!
वोन मोद्नगा मोलने पासि जकना” इन्जेर किलितेर.
ते पिलातु, “मी राजन मोद्नगा मोलने पासि बारि जकनये इंतिट?”
इन्जेर पूसि कीतोर.
ते डगुक कटोडलिर, “महा राजल तपा, माकुन दुस्रोर बोरे राजल सेलोर” इन्जेर वेह्तेर.
16 अस्के पिलातु, मोद्नगा मोलने पासि जक्ले, वोन सिपायिरा केय्दे हव्लि कीतोर.
ते वूर येसुन वोतेर.
येसुन मोद्नगा मोलने पासि जक्वल
17 येसु तंवा मोद कान्चिकुन तला-टोक्रे इंवल जागतगा सोत्तोर.
यूदुल्क्ना बासते इदेन, ‘गोल्गोत’ इंतेर.
18 अगा नड्डुम्ना मोद्नगा येसुन मोलने पासि टाङि कीतेर.
येसुन तिना बग्ला वोरोन अनि डेमा बग्ला वोरोन मोद्क्नगा मोलने पासि टाङि कीतेर.
19 अस्के पिलातु, “नजरेत्नोर येसु यूदुल्क्नोर राजल आंदुर” इन्जेर चेकतगा* लिहि कियुसि, येसुन टाङि कीसि मंवल मोद्नगा पायुस्तोर.
20 येसुन मोद्नगा टाङि कीता जागा नगुडुन करुम मत्ता.
अद पाटितगा हेब्रि, लाटिन अनि ग्रीकु बासने* लिहि कियुस्ता काड्कि, सडदुन साटि वातुर वेलेटिर यूदुल्क वाचि किया पर्तेर.
21 अस्के डगुक कटोडलिर, “यूदुल्क्नोर राजल आयो बति, ‘नना यूदुल्क्नोर राजना इत्तोर’ इन्जि लिहि कियुसट” इन्जेर पिलातुनगा सोन्जि वेह्तेर.
22 अस्के पिलातु, “लिहि कियुस्तोन अगा, लिहि कियुस्तोन अह्ने मनि” इन्जेर इत्तोर.
23
येसुन मोद्नगा टाङि किय्वल
पोरोडा कमिसुन* गिर येत्तेर.
अद कमिस कोट्वक्ने लाम मत्ता.
24 ते सिपायिर, “इदेन सरुस्वट.
बोना पोरोल पेसितेके वोरे येतना” इन्जेर चिटिङ वाड्तेर.
“वूर नावङ कप्डिन ईसङ कीसि तूसि, नावा कमिसुन येत्ले, चिटिङ+ वाटंतेर” इन्जेर दर्मा-ग्रंत्नगा लिहि कीता वचन पूरि माय्लेने, इहिन जर्ग्ता.
अदेन साटिने सिपायिर इहिन कीतेर.
25 येसुन मोलने पाता मोदुन करुम, येसुना अवल, वोना काकि, क्लोपना बाय्को मरियल अनि मग्दलेने नाट्ना मरियल निल्सि मत्तङ.
26 येसु तंवा अवल अनि तंवोर लाड्नोर सिस्यल करुम निल्सि मंवल सूड्सि, “बेये इचुला!
नीवोर मरि” इन्जेर वेह्तोर.
27 अनि वोर सिस्यनेके सूड्सि, “इचुला!
नीवा अवल” इन्जेर वेह्तोर.
अद गट्कतल तान तंवा रोन वोसि कासा अवन दात सूड्तोर.
येसु तंवा परन सुटि किय्वल
28 अद आता पेजे, तना वाता काम सम्दो मार्ता इन्जेर करि कीसि, दर्मा-ग्रंत्नगा लिहि कीता अद जर्ग्ले, “नाकुन वट्का वस्ता”+ इन्जेर येसु इत्तोर.
29 अगा पुलिता आङुर रसा निह्चि उंदि बुड्डि मत्ता.
ते वूर तान्गा दूदि नह्चि, हिस्सोप मरता कांदतगा तटुस्तेर अनि येसुना तोड्दगा अंदुस्तेर.
30 अस्के येसु, अद रसता सवद सूड्सि, “नना वाता काम मह्तोन” इन्जेर तला वरुसि, तंवा परन सुटि कीतोर.
31 अद पस्का सड्दा तयरि किय्वल दिवोस आंद.
दुस्रो नेटि, बेय नेकिता आरम्ना दिवोस* मत्ता काड्कि, अव मेंदोल्क मोदकुन पोरो टाङे मासि मंवल यूदुलकुन इस्टम सेले.
अदेन साटि, “वूरङ काल्क उरुसि,* अव मेंदोलकुन बूड रेहुसा” इन्जेर पिलातुन पूसि कीतेर.
32 ते सिपायिर वासि, येसुन बरोबर मोद्क्नगा टाङि कीसि मंवलिर इविरङ्ते काल्क उरुस्तेर.
33 बति वूर येसुनगा वासि, अदेन मुनेने वोर सासि मत्ता सूड्सि, वोनङ काल्क उरुस्मकि.
34 बति वूर्गटल वोरोर सिपायि येसुना डोकतुन गोर्कते कोट्तोर.
येंटने नेतुर अरिक येर पोङ्ता.
35 मिरट गिर बरोसा इरनल, इद सूड्तोर वोर गवा वेह्तोर.
वोना गवा करल आंद.
वोर सतेम वेह्चेर मंतोर इन्जेर वोन टावा.
36-37 “वोनङ बोकनल उंदि बोका गिर उर्न्गोङ”+ अनि उंडे उंदि जागा, “वोन कोट्तुर वूर वोन बाज सूडंतेर”+ इन्जेर दर्मा-ग्रंत्नगा लिहि कीसि मत्तङ अव, गोस्टिङ पूरे माय्लेने इहिन जर्ग्ता.
येसुना कूरदुन नारिता बंडता बुयरितगा इर्वल
38 अरिमतया चहर्तोर योसेप इंवल यूदुल्क्ना वेरेते, येसुना बक्ति मक्डिते कींदुर.
बति इंके पिलातुनगा सोन्जि, “येसुना कूरदुन वोया सीम” इन्जेर पूसि कीतोर.
ते पिलातु वोप्ता काड्कि, येसुना कूरदुन वोतोर.
39 वेर योसेपुन सङा उंदि दिया रात्ने येसुनगा वासि, बेटे माय्वल निकोदेम गिर मत्तोर.
निकोदेम तंवा सङा लग-बग तीसा सियुङ (35) किलोङ बोलम अनि अगर इंवलिक गमा गमा गाडि सिय्वलिक चीज्क कूरदुन सोक्ले तत्तोर.
40 इव चीजकुन वूर इविर आसि, यूदुल्क्ना नेकि तीर येसुना कूरदुन सोक्तेर अनि अद कूरदुन बारिता पूना कादि कपिडे गूंडि कीतेर.
41 येसुन मोद्नगा मोलने पासि टाङि कीता जागतगा उंदि वाडि मत्ता.
अगा उंदि नार्युसीता बंडता पूना वीच्ना बुयरि मत्ता.
अस्के वेरि, अदेनगा बदे कूरदुन इर्मकि.
42 अद नेटि यूदुल्क्ना पस्का सड्दा तयरि किय्वल मत्ता काड्कि, लह्कि वर्सि येसुना कूरदुन अद करुम मंवल बुयरितगन इर्तेर.*