वीचनल जीवते तेद्वल
16
1-3 आरम्ना दिवोस आता तेलरि आय्त्वरतुन नेटि सक्रेने याकोब्ना अनि योसेस्ना अवल आय्वल मरियल, मग्दलेने नाट्ना मरियल अनि सलोमि बय बय आनेकेन तेत्तङ.
अनि गमा गमा गाडि सिय्वलिक चीज्क येसुना कूरदुन सोक्ले दाकट इन्जेर, वीच्नगा सोंले पेसितङ.
अहन सोन्जेर मनेके, “ममोट्ते सोन्जेर मंतट बति, अद वीच्ना बुयरितुन अड्डम इर्ता डगुर बंडतुन बोर कूडुसनिर?”
इन्जेर तम्वा तमा वड्क्सेर ताक्सेर मत्तङ.
4 बति वीच्ना बुयरित करुम सोन्जि सूड्तेके अद अड्डम इर्ता बंडा बग्ला कूडुसि दिस्ता.
5 ते, “बुयरितगा रोपो सूड्कट देट” इन्जेर करुम सोन्जि सूड्तङ.
अस्के अवेक्ना तिना बाजुन बेय दव्रलिक पाङुक केर्सि डियोर कांडि* उच्चि दिस्तोर.
वोन सूड्सि बेय निप्ने आतङ.
6 ते वोर दूतल, “नाकुन सूड्सि वेरिमट.
मोद्नगा टाङि कीसि जीवा येत्तेर वोर नजरेत्नोर येसुन साटि मह्क्सेर मंतिट इंवल नाकुन टावय.
वोर नेंड्तोर.
वोर इगे सेलोर.
इचुला!
वोना कूरदुन इर्ता इद जागतुन सूडट” इन्जेर वोर दूतल तोह्तोर.
7-8 अनि वोर, “‘येसु मीकुन तेर मुने गलिलया येरियते सोन्जेर मंतोर.
मोदोल वेह्तपिनय मिरट अगा वोन सूडंतिट’ इंवल, वोनुर सिस्यलिरकुन अनि वूर्गटल मुकेते पेतुरतुन तप्वक सोन्जि वेहट” इन्जेर अवेकुन वेह्तोर.
ते अव वीच्ना बुयरितल वेरिसेर पेसिसि, विच्चेर सोत्तङ.
अव वेय्लोक अद गट्नतुन सूड्सि दड्कि तिता काड्कि, अदेन बारेते बोने वेह्मकि.
*[येसु दिस्वल]
9 आय्त्वरतुन नेटि सक्रेन येसु जीवते तेत्ता पेजे, मोदोल मग्दलेने नाट्ना मरियन पावे मातोर.
तान्गटल मोदोल येडुङ बूतकुन तेंड्सि पूड्सि मत्तोर.
10 अद वेय्लो येसुनुर सिस्यलिर्गा सोत्ता.
अस्के वूर सम्दिर बेय दुक्सते आड्सेर मत्तेर.
तनकुन जर्ग्ता गट्नतुन बारेते वूरकुन वेह्ता.
11 तेर बति, येसु नेंड्ता अदेन अनि अद तात्कर सूड्ता अव गोस्टिन वूर नंमकि.
12 अद आता पेजे, इविर सिस्यलिर येरुसलेमनल उंदि नाटे सोन्जेर मनेके, वूरकुन पावे मातोर.
दुस्रो रूप्ने कीनेके, वूर येसुन वोड्कि किय्मकि.
13 वूर पेजे मल्सि सोन्जि, मेय्तुर सिस्यलिरकुन अदेन बारेते वेह्तेर.
तेर बति, वूर बोरे वीरङ गोस्टिङ नंमकि.
येसु तंवुर सिस्यलिरकुन पावे माय्वल
14 अद आता पेजे, येसु तंवुर अक्रा (11) जन्क सिस्यलिर जेवुन कीसेर मनेके, वूर्गा वासि वूरकुन पावे मातोर.
“नना सासि-नेंड्तोन इंवल गोस्टितुन वेलेटिर मीकुन वेह्तेके गिर बति, बारि नम्सेर सेल्विट?
मीवङ दिल्क बंडन दात मारितङ” इन्जेर दम्कि सीतोर.
15 “दुनिया पूरो तिरिसि इद नना सासि-नेंड्ता अद चोकोट्ना कबुडुन सम्दिरकुन वेहट” इन्जेर हुकुम सीतोर.
16 “इद चोकोट्ना कबुडुन केन्चि बूर्ते तान पोरो बरोसा इर्सि बाप्तिस्मा येतंतेरो, वूरकुन बगवंतल सिक्सतल बचि कींतोर अनि बूर्ते तान पोरो बरोसा इरेरो वूरकुन बगवंतल सिक्सा वाटंतोर.
17 ना पोरो बरोसा इर्वलिर ईतङ मय्मतङ काम्क कींतेर.
वूर नावा पोरोल्दा सक्तिते दुस्रुर्गटल बूतकुन तेंड्सि पूडा परंतेर.
अनि दुस्रोक दुस्रोक बासल्क्ने वड्का परंतेर.
18 तम्वङ केय्क्ने तरसकुन पिया परंतेर.
विक उटेके गिर वूरकुन बतय आयो.
इदे आय्वा, येड्कि-दुक वालिर पोरो केय्क इर्सि, नह्गा बरोसा इर्वलिर पार्तना कीतेके गिर, वूर चोकोट आंतेर.
इव सम्दो काम्क, ना पोरो बरोसा इर्वलिर किया परंतेर” इन्जेर वेह्तोर.
येसु मल्सि स्वर्ग्नगा सोंवल
19 येसु पर्बु तंवुर सिस्यलिरकुन इव सम्दो गोस्टिङ वेह्वल आता पेजे, वोर स्वर्ग्नेके पोरो ताच्चि सोत्तोर.
अनि बगवंतना तिना बग्ला उच्चि मंतोर.
20 अद आता पेजे, वूर सिस्यलिर सम्दिर गिर दुस्रोक दुस्रोक जागनगा, दुस्रोक दुस्रोक देस्क्नगा सोन्जि, येसु सासि-नेंड्ता इद चोकोट्ना कबुर सम्दिरकुन वेह्चेर सोत्तेर.
इद कबुर करल इन्जेर तोहन साटि, पर्बु वेले मय्मतङ काम्क निसनिना रूप्ने वूरा केय्दे कियुस्तोर.
आमेन!