अपोस्तुल्क्नङ काम्क
अपोस्तुल्क्ना केय्दे पवित्रा आत्मा कियुस्तङ काम्क
पवित्रा आत्मता वाग्दन
1
1 मान-मर्यदा वाले तियोपिला साब!
येसु सुरु कीतङ सम्दो काम्क अनि वेह्तङ बोदन बारेते, नावा मोदोडा ग्रंत्नगा लिहि कीतोन.
2 येसु पर्बु स्वर्ग्ने मल्सि सोनल वेरि, तना नेमि कीतुर सिस्यलिर्कुन* पवित्रा आत्मता सक्तिते सूचनङ सीतोर.
3 दुक्सङ बोगे मासि, सासि-नेंड्ता पेजे तंवुर सिस्यलिरकुन जीवतेन मंतोन इंवल वेले तीर्क्ने निरुपन कीसि तोह्तोर.
अहन पर्बु चालिस (40) रोज्क्नगा वेले जोकङ वूरकुन दिसेर मन्जि, बगवंतना राजुन बारेते बोदा कीतोर.
4-5 येसु उंदि जोका तिन्जेर मनेके, “योहन येते बाप्तिस्मा सीतोर.
बति कहि रोज्क्ने ना बाबो पवित्रा आत्मते मीकुन बाप्तिस्मा सींतोर.
इद नना मोदोल मीकुन वेह्ता वाग्दन बर्पुर आनल वेरि, येरुसलेम नगुडुन सुटि कीसि असले सोन्मट” इन्जेर सिस्यलिरकुन हुकुम सीतोर.
येसु स्वर्ग्नगा ताच्चि सोंवल
6 वूर सिस्यलिर अहन मीरे मासि, “पर्बु, निमे इज्रयेल लोकुर पोरो राज ताकुस्वल कालम वाता कि?”
इन्जेर येसुन पूसि कीतेर.
7 ते येसु, “कालम्क अनि वकत्क बाबोना अदिकार्दे मंतङ.
बति अवेकुन मिरट करि किय्वल जुरत सेले.
8 तेर बति, पवित्रा आत्मा मिह्गा वायर.
अस्के मीकुन सक्ति वांता.
इदेन हिंदल, मिरट येरुसलेम्नगा, मेय्ता यूदयतगा, समरयतगन आय्वा दुनियतङ सम्दो जागनगा ना बारेता कबुर पचर किय्ले, गवदार्क आंतिट” इन्जेर वेह्तोर.
9 अहन वेह्चि, येसु पोरो स्वर्ग्नेके ताच्चि सोत्तोर.
अस्के वूरङ कडकुन दिस्वक्ने उंदि टेपा कप्सि, वोन वोता.
10 अहन वूर नेह्ना पोरो सूड्सेर मत्तेर.
अस्केने बेय दव्रलिक पाङुक पोंड्तुर इविर माय्नलिर वूर्गा करुम निल्सि,
11 “गलिलया लोकुर्निट!
मिरट बारि पोरो हाबडेके सूड्सेर मंतिट?
वेर येसु मिह्गटल बहंते पोरो स्वर्ग्नेके* ताच्चि सोत्तोरो, अह्ने मल्सि उंदुंदि जोका वांतोर” इन्जेर वेह्तेर.
यूदन बद्लि उंडे वोरोर सिस्यन नेमि किय्वल
12 अस्के वूर सिस्यलिर अद ओलिवा मरक्ना गुटतल येरुसलेम पेसितेर.
अद गुटा येरुसलेमनल उंदि किलो मीटर* लक मत्ता.
13 वूर सिस्यलिर नगुडे येव्सि, तमा मंवल मिदेता कम्रतगा सोत्तेर.
वूर सिस्यलिरङ पोरोल्क: पेतुरु, योहन, याकोबु, आंद्रेयल, पिलिपु, तोमल, बर्तलोमयि, मत्तयि, आल्पयिनोर मरि याकोबु, जेलोते इन्जेर केय्वल सीमोनु, उंडे दुस्रोर याकोब्नोर मरि यूदल.
14 वीर सिस्यलिर बरोबर येसुना अवल मरियल, येसुनुर तमुक अनि उंडे कहितङ वेय्लोक, वीर सम्दिरे मीरे मासि, तम्वा मन-दिल्ते बस्केट उंदि तीर पार्तना कींदिर.
15 अद तीर्दे उंदि दिया, येसुन नम्तुर वूर मीरे मातेर.
वूर सम्दिर नूटा वीसा (120) जन्क मत्तेर.
अस्के पेतुरु निल्सि इहिन इत्तोर:
16 “नावुर दादलिर-बायिक्निट!
येसुन पिय्सि वोय्वलिरकुन सरि तोह्वल यूदन बारेते, तोले पवित्रा आत्मा दाविद्ना केय्दे दर्मा-ग्रंत्नगा लिहि कियुस्तङ गोस्टिङ तप्वक पूरे माया लागर.
17 वेर यूदल मा रोपो वोरोर आसि, इद सेवतगा ईसा येत्तोर.
18 करब-पांदुन हिंदल, वोर यूदन कोतङ पुड्तङ.
अव कोतने उंदि पोलम येत्तोर.
अद आता पेजे, गप-मुड्गेङ पोरोडल अर्ता काड्कि, वोना पेटि पेय्सि, पोद्दुक बह्रि अर्तङ.
19 वोना मरंता गोस्टि येरुसलेम्नुर सम्दिरकुन करे माता काड्कि, वूरा बासते अद पोलमुन ‘अकेल्दमा’ इंदिर.
‘नेतुर बोमि’ इन्जेर इदेना अर्तम.
20 पेतुरु उंडे गिर इहिन वेह्तोर:
‘वोर माय्नना बोमि पाडसि सोंनि.
अद बोमितगा बोरे मंवक सतेनास आयिर’+
अनि अह्ने,
‘वोना सेवता नव्करि उंडे वोरोर आगुटि कियिर’+
इन्जेर कीर्तन्क्ना पुस्तक्नगा लिहि कीसि मंता.
21-22 अदेन साटि, मरट इंके यूदन बद्लि उंडे वोरोन तप्वक नेमि किया लागर.
योहन बाप्तिस्मा सीतोर अगटल्ते, वोर पर्बु स्वर्ग्नगा ताच्चि सोनल वेरि, वोर मायनल मा बरोबर अनि येसुन सङा मत्तोर आसि मंदा लागर.
अहन मंवलिर्गटल बोंते नेमि कींतटो वोर, पर्बु सासि-नेंड्तोर इंवडुन गवदारल आंतोर” इन्जेर वेह्तोर.
23 ते वूर, मत्तयल अनि बर्सबा इंवल योसेपुन निपुस्तेर.
(वेर योसेपुन यूस्तु गिर इंदिर.)
24-25 वूर सम्दिर मीरे मासि, “मा पर्बु, सम्दिरङ दिल्क्नगा बतल मंता इंवल नीकुन टावये.
यूदल तंवा जागतुन सुटि कीसि, वोर कीता पापुन पिय्सि, बगा सोंदनयो अगा सोत्तोर.
इंके वीर इविर्गटल मा बरोबर सेवा किय्ले, अपोस्तुल्क इन्जि नेमि कीसि, माकुन तोहा” इन्जेर येसुन पार्तना कीतेर.
26 पार्तना कीता पेजे, वूर इविरङ पोरोल्क्ने चिटिङ वाड्तेर.
अस्के मत्तियना पोरोल पेसिता.
अदेन साटि, वीर अक्रा जन्क अपोस्तुल्कुन बरोबर, मत्तियल गिर पर्बु नेमि कीतोर सिस्यल* आतोर.