पवित्रा आत्मा वाय्वल
2
1 यूदुल्क्ना पेंतेकोस्तु इंवल सड वाता.
अंटित येसुनुर सम्दिर बक्तलिर उंदि जागा मीरे मासि मत्तेर.
2 अद वकत्ने हाबडल* अचनक बेय जोर्ते वडि वातपिनय आवज वाता.
अद आवज्ने वूर उच्चि मंवल रोन रोन्ज्ता.
3 अस्के वूरकुन वेन्जेकुन दात्नङ तड्मितङ जार्क दिस्तङ.
अव पाके मासि, हर वोरोन पोरो रेय्तङ.
4 अस्के वूर सम्दिर पवित्रा आत्मते निन्चि, अद आत्मा मदत कीतेकमना, दुस्रोक दुस्रोक बासने वड्क्वल मोदोल कीतेर.
5 अद गट्कते हाबडुन बूड मंवलिक सम्दो देस्कनल यूदुल्क्ना जातितुर बक्तलिर येरुसलेम्नगा वासि मत्तेर.
6-7 अद आवज वाततुन हिंदल, वूर बक्तलिर अगा मीरे मातेर.
तम्वा तम्वा बासा, येसुनुर बक्तलिर वड्क्वल केन्चि, वूर यूदुल्क, “अरे वीरकुन सूडट!
वीर वड्क्वलिर सम्दिर गलिलयतुरे आंदिर.
8 तेर बति, मह्गा मंवलिर हर वोरोना सोंता बासा बहन वड्क्सेर मंतेर?”
इन्जेर वेले गुल आतेर.
9-12 “इगे मरट, पार्तिया, मादि, एलामि, मेसोपोटेमिया, यूदया, कपदोकिया, पोंतु, आसिया,* पुर्गिया, पंपुलिया, ईजिप्ट देस्कनल अनि लिबिया देस्ना कुरेनि नगुडा आजु-बाजुता येरियतल गिर मंतट.
अह्ने रोम नगुडुर यूदुल्क अनि यूदुल्क्ना दर्मतगा नेङ्तुर केर्तियुल्क, अरबियुल्क गिर मंतट.
बगवंतनङ मय्मतङ कामकुन बारेते, मा सम्दिरङ बासने वीर बहन वड्का पर्सेर मंतेर?”
इन्जेर तकपिका आसि, वोरोन वोरोर पूसि कीतेर.
13 बति वूर्गटल कहि जन्क, “वीर उटा निसते, अहन वड्क्सेर मंतेर” इन्जेर चेडि कीतेर.
पेतुरु बोदा वेह्वल
14 अद केन्चि, पेतुरु अक्रा जन्क सिस्यलिर सङा तेच्चि निल्तोर अनि बेय जोर्ते, “यूदयतगा मंवलिर अनि येरुसलेम्नगा मंवलिर सम्दिर ना लोकुर्निट!
इद नन वेह्वल गोस्टितुन दिहंते केन्जट.
15 मिरट सोन्च कीतपिनय, वीर लोकुर उटा निसते सेलुर.
बारितेके, इंके पोड्द पेसिसि गंटमेन गिर आसेर सेले.
16 निसते सेलुर बति, योवेल पर्वक्तल* वेह्तपिनय इहिन जर्ग्सेर मंता:
17 ‘इव आक्रितङ दिवोस्क्ने नावा पवित्रा आत्मतुन
सम्दि जातिनुर माय्नलिर पोरो वेडियंतोन.
मीवुर मरि-मियडा केय्दे नावङ गोस्टिङ वेहुसंतोन.
मीवुर डियङ-डियुरकुन दर्सन्क तात्कर तोहंतोन.
मीवुर बुडि-बुडियलिरकुन सप्नङ वायुसंतोन.
18 वीरे आय्वा वेय्लो-माय्नना बेद-बाव सेल्वक
ना सेव्कलिर सम्दिर पोरो नावा आत्मतुन वेडियंतोन.
अस्के वूर नावङ गोस्टिङ वेहंतेर.
19 पोरो हाबडगा अनि बूड बोमित पोरो
वेले तीर्क्ने मय्मतङ काम्क तोहंतोन.
नेतुर, तड्मि अनि पोया वायुसंतोन.
20 पोड्द सिकटित दात कार्यल आंता.
नेलेन्ज नेतुडुन दात रगल आंता.
पर्बु वाय्वल बेय डगुर
अनि मय्मा वाले दिवोसुन मुनेने इव सम्दो जर्गंतङ.
21 अस्के पर्बुना पोरोल मुट्सि पार्तना किय्वल,
हर वोरोर बचे मांतोर’+
इन्जि बगवंतल वेह्चेर मंतोर” इन्जेर इत्तोर.
22 “इज्रयेल लोकुर्निट!
इव गोस्टिङ केन्जट.
बगवंतल नजरेत चहर्तोर येसुन नेमि कीततुन तोह्ले, वोना सक्तिते चमत्कार्क अनि मय्मतङ काम्क मी नड्डुम कियुस्तोर.
अव सम्दो मीकुन टावये.
23 बगवंतल, तंवा पिलंतुन अनि बविसत्ना गियंतुन पिय्सि, येसुन मी केय्दे हव्लि किय्ले वोप्तोर.
मिरट पापेस्तलिरा मदत येच्चि, मोद्नगा मोलने पायुसि, वोर येसुन जक्तिट.
24 बति बगवंतल, मरंतल वोन नेंडुस्तोर.
अद मरन येसुना जीवतुन दोह्चि इरा पर्मकि.
25 इदेन बारेते, दाविद इहिन इत्तोर:
‘बगवंतल बस्केट गिर ना सङन
मंतोर इंवल नाकुन टावा.
वोर ना करुम मंवडुन हिंदल,
नाकुन बतय हालि कियो.
26 अदेन साटि नावा दिल आनंद्ने निन्चि मंता.
नावा वेन्जेर बगवंतना विंति किय्वडे कुसिते मंता.
अह्ने नावा मेंदोल गिर आसते पिसंता.
27 बारितेके, नावा आत्मतुन साना लोकम्नगा सुटि किय्वि.
निमे नीवोर पवित्रवंतना मेंदोडुन कडिया सिय्वि.
28 नाकुन जीवता सरि-मारग तोह्ति.
नी चर्नते नाकुन बर्पुर आनंद सींति’+
इन्जेर लिहि कीसि मंता.
29 “नावुर दादलिर-बायिक्निट!
मावा कांदांतोर दाविद राजन बारेता गोस्टितुन तप्वक मीकुन वेहा लागर.
बतल इत्तेके, दाविद मार्ता पेजे, वोन माति कीतेर.
अद वीच नेंड वेरि, मा नड्डुम मंता.
30 वोर दाविद पर्वक्तल आता काड्कि, वोना कांदांता वेलितल पुट्तोर वोरोन, वोना राजा-गादितगा उपुसंतोन इन्जेर बगवंतल वाग्दन सीता अद गोस्टि दाविदुन टावये.
31 ‘बगवंतल वोना आत्मतुन साना लोकम्नगा* सुटि किय्मकि.
वोना मेंदोडुन कडिया सिय्मकि’ इन्जेर बविसतुन सूड्सि, किरिस्तु नेंड्वडुन बारेते दाविद वेह्तोर.
32 बगवंतल येसुन मरंतल नेंडुस्तोर.
इदेन ममोटे गवा मंतोम.
33 येसु स्वर्ग्ने सोन्जि, इंके बगवंतना तिना बग्ला* उच्चि मंतोर.
‘पवित्रा आत्मतुन मिह्गा सारि कींतोन’ इन्जेर मोदोल वेह्ता वाग्दंतुन बगवंतल वोन सीतोर.
अद आत्मतुन, येसु मा पोरो वेडितोर.
इगे मिरट सूड्वल केन्ज्वल अदे आंद.
34-35 दाविद स्वर्ग्नगा पोरो सोन्मकि बति,
‘“नी दुस्मन-दारकुन,
नीवङ कालकुन बूड्ना कुतुडुन दात,
नना कीनल वेरि,
निमे ना तिना बग्ला वासि उदा”+
इन्जेर बगवंतल ना पर्बुन सङा वेह्तोर’
इन्जि दाविद वेह्तोर.
36 अदेन साटि, मिरट मोद्नगा टाङि कीतिट वोर येसुने, पर्बु अनि बचि किय्वल किरिस्तु* इन्जेर बगवंतल नेमि कीतोर.
इद गोस्टितुन इज्रयेल देस्नुर सम्दिर लोकुर तप्वक करि किया लागर” इन्जेर वेह्तोर.
37 इव पेतुरु वेह्वलिक गोस्टिङ वूर लोकुरङ दिलकुन लाग्तङ.
ते वूर, “तादल-तमुर्निट!
ममोट बतल कियना इंतिट?”
इन्जेर पेतुरतुन अनि मेय्तुर अपोस्तुल्कुन पूसि कीतेर.
38 ते पेतुरु, “मिरट कीतङ पापकुन साटि चुक चुके माम्ट.
मीवा मंदुन मार्युसि, येसु किरिस्तुना पोरोडे बाप्तिस्मा येतट.
अस्केने मिरट कीतङ पाप्क मापि आंतङ अनि पवित्रा आत्मता वरम बगवंतनल मीकुन पुटंता.
39 इद वाग्दंतुन मी साटि, मीवा मरि-मियड साटि, पर्बु आय्वल बगवंतल तन्गा केय्तुर लङ मंवलिर मा सम्दिर साटि मंता” इन्जेर वेह्तोर.
40 इहिन पेतुरु वेले तीर्क्ने गवङ वेह्चि, “वाक्डियल बुदि मंवल इद पिडितुर्गटल बचे माम्ट” इन्जेर वूरकुन जुल्मा कीतोर.
41 पेतुरु वेह्ता बोदतुन वोप्तुर वूर बाप्तिस्मा येत्तेर.
अद नेटि लग-बग मूंद हजर्क मांदि येसुन पोरो बरोसा इर्सि, बक्तलिर आतेर.
42 वीर बक्तलिर अपोस्तुल्क वेह्ता बोदा तीर ताक्सेर, मीरे मासेर, काने तूसि तिन्जेर अनि पार्तना कीसेर मंदिर.
बक्तलिर उंदि आसि मंवल
43 अस्के वेले चमत्कार्क अनि मय्मतङ काम्क अपोस्तुल्क्ना केय्दे पर्बु कियुस्तोर.
हर वोरोनगा बगवंतन पोरो बाव-बक्तिते मंदना इंवल वेरे पुट्ता.
44 बक्तलिर सम्दिर उंदि आसि, तम्गा मत्ता अद सम्दोतुन तूसेर मंदिर.
45 इदे आय्वा वूर तम्वा दन-दव्लत वोम्सि, बोन बचोर जुरत मत्तयो अचोर सम्दिरकुन तूसि सींदिर.
46-47 वीर सम्दिर गिरे तन-मंदे उंदि तीर बाव-बक्तिते, हर दिवोस मंदिर्तगा मीरे मासि, बगवंतन डगुर-पान सींदिर.
रोह्क्नगा मीरे मासि, कानेतुन तूसि तिंदिर.
कपट सेले अद मंदे कुसिते मंदिर.
पर्जा सम्दिर गिर वीरकुन वेले मानि कींदिर.
पर्बु तना बचि कीतुरकुन, वूर बक्तलिर्गा रोजिता-रोजि मीरि कींदुर.