अपो. का. 3

पेतुरु बिचेम तल्क्वल कूटन चोकोट किय्वल

1 पेतुरु अनि योहन, उंदि दिया दुपरि मूंद नेक्नेके^* पार्तना किय्ले मंदिर्तगा सोत्तेर.

2 अद मंदिर्ता ‘बेय सोब’ इंवल डेरोटतगा वोरोर पुट-गड्मितल कूटल मंवन कहितुर जन्क रोजि तचि उपुसींदिर.

वोर कूटल अद मंदिरतगा रोपो सोंवलिरकुन बिचेम तल्क्सेर मंदुर.

3 पेतुरु अनि योहन मंदिरतगा रोपो सोंले आनेके, वूरकुन सूड्सि वोर कूटल बिचेम तल्क्तोर.

4 ते वूर कूटन दिहंते सूड्सि पेतुरु, “मह्‍के सूडा” इन्जेर वोन इत्तोर.

5 अस्के वूर बतय सिय्मड मंदर इन्जेर वोर आसते वूर्के सूड्तोर.

6 ते पेतुरु, “नह्‍गा सोने-कूरा^* सेले बति, नह्‍गा मंता अदेने नीकुन सींतोन.

नजरेत्नोर येसु किरिस्तुना पोरोडे ताका” इन्जेर वेह्‍तोर.

7 अनि वोना तिना केय पिय्सि तेह्‍तोर.

अहन तेह्‍नेके वोनङ काल्क्नङ सीरा-दोरा मोक्डो आसि, सक्ति वाता.

8 ते वोर कूटल चङ्ने तेच्चि ताक्वल सुरु कीतोर.

अहन बेय कुसिते चङा चङा डेय्सेर, बगवंतन विंति कीसेर, वूर बरोबर अद मंदिर्ता आव्रत रोपो सोत्तोर.

9 अस्के पर्जा सम्दिर वोर ताक्वल अनि बगवंतन विंति किय्वल सूड्तेर.

10 अनि मंदिर्ता, ‘बेय सोब’ इंवल डेरोटतगा बिचेम तल्क्सेर मंदुर वोर कूटल वेरे आंदुर इन्जेर वूर वोड्कि पिय्तेर.

वोर चोकोट आता अद मय्मता कार्यतुन सूड्सि, वूर बेय गुल आतेर.

पेतुरु मंदिरतगा बोदा वेह्‍वल

11 चोकोट आतोर वोर कूटल, पेतुरतुन अनि योहंतुन सुटि किय्वक्ने पिय्सिन मत्तोर.

वीर मंदिर्ता आव्रतगा मंवल सोलोमोन दोह्‍पुसीता मंडोप्नगा मत्तेर.

पर्जा गुल आसि, अगा विच्चेर वातेर.

12 वूरकुन सूड्सि, पेतुरु, “इज्रयेल देस्नुर लोकुर्निट!

इदेन बारेते बारि गुल आसेर मंतिट?

मावा सक्तिते सेलेके, मावा बक्तिते वेन चोकोट कीतपिनय माकुन बारि निप्ने सूडंतिट?

13-14 इहिन जर्ग्ले कारन, अब्राहम, इसक अनि याकोब इंवलिर मा तोत्तुर सेवा किय्वल बगवंतले वोर कूटन चोकोट कीसि, तंवोर सेव्कल आय्वल येसुन मय्मा वानल कीतोर.

वोर येसुन मिरट अदिकारिरा केय्दे हव्लि कीतिट.

अस्के वोर पिलातु पवित्रवंतल अनि नियत्नोर येसुन सुटि किय्ले निर्नय येत्तोर बति, मिरट अदेन वोप्मकि.

इदेन बद्लि, माय्नलिरङ जीवङ येत्वन सुटि कीम्ट इन्जेर कोर्तिट.

15 बस्केट पिस्वल जीवा सिय्वल माल्कन मिरट जकुस्तिट.

बति बगवंतल सातुर्गटल वोन नेंडुस्तोर.

इद गोस्टितुन ममोटे गवा मंतोम.

16 येसुना पोरोडगा इर्ता बरोसये, इंके कुद मी कड्क्ने सूड्वल अनि मीकुन टावा मंवल वेर कूटन चोकोट किया पर्ता.

येसुनगा इर्ता मा बरोसतुन हिंदले, मी मुने वेर बर्पुर चोकोट आसि मंतोर.

17 तादल-तमुर्निट!

मिरट अनि मीवुर अदिकारिर, अद वकत्ने टावा सेल्वा अहन कीतिट इन्जेर नाकुन टावये.

18 बति बगवंतल, तना नेमि किय्वल किरिस्तु तक्लिब्क बोगे माया लागर इन्जेर पर्वक्तलिरा केय्दे वेहुस्ता वचन पूरे माय्लेने, इहिन जर्गुसीतोर.

19 अदेन साटि, मिरट कीतङ पापकुन चुक चुके मासि, बगवंतनेके तिरियट.

अस्के बगवंतल मीवङ पापकुन मापि कींतोर.

20 अस्केने मीवङ आत्मन पर्बु आरम सींतोर.

अनि नेमि कीतोर वोर किरिसतुन मी साटि बगवंतल रोहंतोर.

वोरे येसु आंदुर.

21 तोले पर्वक्तलिर वेह्‍तप बगवंतल सम्दो पूनङ कीनल वेरि येसु पर्बु स्वर्ग्नेने मंदा लागर.

22 तोले मोसे पर्वक्तल, ‘पर्बु आय्वल बगवंतल नाकुन मिह्‍गटल बहन नेमि कीतोरो, अह्‍ने वोरोर पर्वक्तन मी कांदांतुर्गटल सारि कींतोर.

वोर पर्वक्तल वेह्‍ता तीर ताकट⁺’ इन्जेर वेह्‍तोर.

23 उंडे मोसे, ‘उंदि मोका वोर पर्वक्तल वेह्‍ता तीर ताकुर वूर, बगवंतनुर बक्तलिर्गटल अलदि आसि, नासेडम आंतेर’⁺ इन्जेर गिर वेह्‍तोर.

24 समुयेल पर्वक्तनल मोदोल कीसि मेय्तुर सम्दिरे पर्वक्तलिर, इव दिवोस्क्ने इहिन जर्गंता इन्जेर किरिसतुन बारेते वेह्‍तेर.

25 अब्राहमुन सङा, ‘नीवा कांदांतुन हिंदल नना दर्तुरित पोरोडङ सम्दि जातिनुरकुन आसिर्वाद सींतोन’⁺ इन्जेर बगवंतल इत्तोर.

बगवंतल मा तोत्तुर सङा इर्ता नियम्नगा मरट ईसदार्क आसि मंतट.

बारितेके मरट पर्वक्तलिरा कांदांतुर आंदट.

26 बगवंतल तंवोर सेव्कल येसुन मह्‍गा मोदोल सारि कीतोर.

मा सम्दिरकुन मावा करब-पांदल मलुसि, माकुन आसिर्वाद सियना इन्जि, वोना इचा मत्ता” इन्जेर पेतुरु वूरकुन वेह्‍तोर.