पेतुरु अनि योहन संहेद्रिन इंवल पन्चुन मुने निल्वल
4
1 पेतुरु अनि योहन अहन पर्जतुन बोदा वेह्चेर मनेके, कटोडलिर, मंदिर्तगा केप्वलिरोर अदिकारि अनि सदुकयुल्क अगा वातेर.
2 सासि-नेंडा परंतेर इन्जेर येसुना नमुना येच्चि वीर इविर पर्जतुन वेह्ता कीनेके, वूर अदिकारिरकुन बेय सोङ वाता.
3 ते वूर अदिकारिर पेतुरतुन अनि योहंतुन पिय्सि, अद पोड्द सोंवल येला आता काड्कि, इमुन नेटि सक्रे वेरि जेल्दगा इर्तेर.
4 तेर बति वेलेटिर लोकुर वूरा बोदा केन्चि, बक्तलिर आतेर.
वूर बक्तलिर आतुर माय्नलिरा संके लग-बग सियुङ हजर्क (5,000) मत्ता.
5 इमुन नेटि सक्रे अदिकारिर, पेदोल्क अनि सास्तिरिर येरुसलेम्ना संहेद्रिंतगा मीरे मातेर.
6 वूर मीरे मातुर्गटल अंनल इंवल पेर्सोर कटोडल, कयपल, योहन, अलेग्जांडर अनि पेर्सोर कटोडना कुटुंबतुर गिर मत्तेर.
7 अस्के वूर, पेतुरतुन अनि योहंतुन नड्डुम निपुसि, “बद अदिकार्दे अनि बोना पोरोल वेह्चि, इद कार्या कीतिट?”
इन्जेर पूसि कीतेर.
8 ते पेतुरु पवित्रा आत्मता सक्तिते निन्चि, “पर्जतुर अदिकारिर्निट!
पेदोल्क्निट!
9 कूटल चोकोट आततुन बारेते, ‘वेर बहन चोकोट आतोर?’
इन्जेर माकुन सवल पूसि कीकोम इंद्किट्ते,
10 मिरट अनि सम्दिर इज्रयेल लोकुर इद गोस्टि करि किया लागर.
बतल इत्तेके, नजरेत चहर्तोर येसु किरिस्तुना पोरोडेन वेर कूटल चोकोट आसि, मी मुने निल्सि मंतोर.
मिरट वोर येसुन मोद्नगा मोलने पासि जक्तिट बति, बगवंतल वोन नेंडुस्तोर.
11 वोर येसुन बारेते ग्रंत्नगा इहिन लिहि कीसि मंता:
‘रोन दोह्वलिर मिरट वाडि सीता बंडा,
इंके सम्दिनगटल मुके बंडा आसि निल्ता’+
अद बंडा वेर येसुये आंदुर.
12 वेर येसुना पोरोडुन सुटि कीसि, दर्तुरित पोरो* मंवलिरा बोनय पोरोल माकुन बचि किया परो” इन्जेर वेह्तेर.
13 पेतुरु अनि योहन साडा करिमकि अनि येसुन सङा मत्तुर आंदिर इन्जेर वूर अदिकारिर करि कीतेर.
तेर बति, तम्वा मुने वूर दर्यम्ने वड्क्वल सूड्सि बेय गुल आतेर.
14 चोकोट आतोर वोर कूटल वूर पेजेयेन मत्ता काड्कि, अदिकारिर वूरकुन उल्टा बतय इंदा पर्मकि.
15-16 अदेन साटि वूर अदिकारिर, “संहेद्रिंतल बह्रि सोंट” इन्जेर पेतुरु अनि योहंतुन हुकुम सीसि, “वीरकुन बतल कीकट?
डगुर मय्मता काम वूर हिंदल जर्ग्ता इन्जेर येरुसलेम्नुर लोकुरकुन टावय.
अद जर्ग्मकि इन्जेर वेहा पर्वट.
17 बति इद काम पर्जत नड्डुम उंडे पग्रे माय्वक मंले, येसुन बारेते बोन सङन वड्क्वा इन्जि, वेरुसि सारि कीकट” इन्जेर तम्वा तमा चर्चा कीतेर.
18 अनि वूर सिस्यलिरकुन उंदुंदि जोका केयुसि, “मिरट येसुना पोरोडे इङेडल वड्क्मट अनि बोदा करुस्मट” इन्जेर संहेद्रिंतुर अदिकारिर हुकुम सीतेर.
19 तेर बति पेतुरु अनि योहन, “बगवंतना गोस्टि केन्ज्वडुन तेर, मी गोस्टि केन्ज्वल, बगवंतना नदुड मुने बद नायम आंद, सोन्च कीसि वेहट.
20 ममोट्ते सूड्ता अदेन, केन्ज्ता अदेन वेहा बीगर मंदा परोम” इन्जेर जवब सीतेर.
21-22 ते संहेद्रिंतुर अदिकारिरकुन, पेतुरु अनि योहंतुन बहन सिक्सा वाटनयो अर्तम आय्वा सोन्जि, सिरिप उंडे जरसि वेरुसि सुटि कीतेर.
बारितेके, चोकोट आतोर वोर कूटल चालिस (40) सालकुन तेर अदिक वहितोर आंदुर.
अनि पर्जा सम्दिर जर्ग्ता अद कार्यतुन पिय्सि, बगवंतन डगुर-पान सीसेर मत्तेर.
दर्यमुन साटि बक्तलिर पार्तना किय्वल
23 सुटे माता बरोबर पेतुरु अनि योहन, येसुनुर बक्तलिर्गा सोन्जि, डगुक कटोडलिर अनि संहेद्रिंतुर पेदोल्क इत्तङ सम्दो गोस्टिङ वेह्तेर.
24 अव गोस्टिङ केन्चि, वूर सम्दिर तम्वा मंदे उंदि तीर, “बगवंता!
निमे हाबडुन,* दर्तुरितुन, सम्दुरकुन अनि अवेनगा मंवलिक सम्दो जिव्रसुन गडि कीतोनि आंदि.
25-26 बगवंता,
‘दुस्रोक जातिनुर बारि सोङ्ने हाले मांतेर?
वूर पर्जा बारि वटि आगम्नङ पिलन्क बारि वाट्सेर मंतेर?
इद दुनियतुर राजलिर मीरे मासि पर्बुन
अनि वोर नेमि कीतोर राजन पोरो बारि उल्टा आसि मंतेर?’
+
इन्जेर पवित्रा आत्मते नीवोर सेव्कल, मा तोत्तोर दाविद राजना तोड्दे वेहुसीति.
27 अदे तीर्दे इद नगुडे, हेरोद राजल, पोंति पिलातु गवर्नर, इज्रयेल देस्नुर लोकुर अनि यूदुल्क आयुर वूर सङा मीरे मातेर.
अनि निमे किरिस्तु इन्जेर नेमि कीति वोर पवित्रा वाले सेव्कल, येसुन दुस्मन आतेर.
28 बगवंता!
नीवा सक्तिते अनि पिलंते बहन जर्गना इन्जेर मोदोले निर्नय कीतियो, अह्ने वूर जर्गुसीतेर.
29 अनि इंके पर्बु, वूरा वेरुस्वडुन सूड्सि, नीवा बोदा बेय दर्यम्ने वेह्ले, नी सेव्कलिर आय्वलिर माकुन सक्ति सीम.
30 येड्कि-दुक वालिरकुन चोकोट किय्ले, नीवोर पवित्रा सेव्कल येसुना पोरोडे चमत्कार्क अनि मय्मतङ काम्क किय्ले, नी केय चह्चि, सक्ति सीम” इन्जेर बगवंतन पार्तना कीतेर.
31 पार्तना किय्वल आता पेजे, वूर मीरे माता जागा हाले माता.
अस्के बक्तलिर सम्दिर गिरे पवित्रा आत्मते निन्चि, दर्यम्ने बगवंतना वचन वेह्वल मोदोल कीतेर.
बक्तलिर उंदि आसि मंवल
32 येसुनुर बक्तलिर मन-दिल्ते उंदि तीर बाव-बक्तिते मत्तेर.
नावा नीवा इंवक्ने हरियेक चीजुन मीरे मासि तूसेर पिस्वल सुरु कीतेर.
33 इदे आय्वा, अपोस्तुल्क उंडे अदिक सक्तिते, येसु पर्बु सासि-नेंड्ततुन बारेते गवङ वेह्तेर.
सम्दिर बक्तलिर पोरो बगवंतना पेर्मता-दया अनि आसिर्वाद्क वेले मत्तङ.
34-35 रोह्क-रचङ अनि वावुर-सेत्क मंवलिर वोम्सि, अद रकम अपोस्तुल्क्नगा तचि सींदिर.
वूर बोन बचोर जुरत मत्तयो अचोर तूसि सींदिर.
इदेन हिंदल, वूर्गटल बोने बतय कमि सोन्मकि.
36 सय्परस* इंवल लंकतोर* लेवि कांदांतोर योसेप मत्तोर.
वोन अपोस्तुल्क बर्नबा इंवल पोरोल दोस्तेर.
इदेना अर्तम मुने सोंट इन्जेर वेह्वल मायनल.
37 वोर तंवा पोलमुन वोम्सि, वाता रकमुन अपोस्तुल्क्नगा तचि सीतोर.