लबड वड्क्ता काड्कि अननियना अनि सपिरना मरन आय्वल
5
1 अननिया इंवल वोरोर मायनल मत्तोर.
उंदि दिया वोर मायनल अनि वोना बाय्को सपिरल मीरे मासि, तम्वा बोमितल इचुसि बागम वोम्तेर.
2 वोम्ता पेजे, वाता रकमनल इचुसि तम्गा इर्ले बाय्को गिर वोप्ता.
ते वोर इचुसि इर्सि, मेय्ता रकम अपोस्तुल्क्नगा तचि सीतोर.
3 अस्के पेतुरु, “अननिया, पवित्रा आत्मतुन मोसेम किय्ले, वाता रकमनल इचुसि इर्ले, नीवा दिलतुन सय्तंदा केय्दे बारि हक्लि कियुसीति?”
इन्जेर पूसि कीतोर.
4 “अदेन वोम्वक मनेके, नीवय आंद.
वोम्ता पेजे गिर, अद निह्गन मत्ता.
बति बारि, नीवा दिलतगा इहिन सोन्च कीति?
निमे माय्नलिर सङा आयो बति, बगवंतन सङने लबड वड्क्ति” इन्जेर इत्तोर.
5 इद गोस्टि केन्ज्नेकेने, अननियल बूड अर्सि, तंवा जीवा सुटि कीतोर.
इदेन बारेते, केन्ज्तुर वूरकुन वेले दड्कि पिय्ता.
6 डियुर तेच्चि, वोना कूरदुन पूना कप्डि गूंडि कीतेर अनि वोसि, माति कीतेर.
7 लग-बग मूंद गंटङ आता पेजे, वोना वेय्लो अद जर्ग्ता गट्ना टावा सेल्वक्नेन अगा वाता.
8 पेतुरु, “मिरट मीवा बोमितुन इचोट्के वोम्तिट कि?”
इन्जेर सपिरन पूसि कीतोर.
ते अद, “हो अचोट्के” इन्जेर वेह्ता.
9 ते पेतुरु, “आड-माड्सो इविर आसि पर्बुना आत्मतुन बारि परिक्सा कींतिट?
सूडा!
नी माड्सोन माति कीसि वातुर डेरोटतगन मंतेर.
वूर नीकुन गिर माति किय्ले वोंतेर” इन्जेर वेह्तोर.
10 अस्के येंटने सपिरल वोनङ काल्क्नगा अर्सि, तंवा जीवा सुटि कीता.
अद सूड्सि, वूर डियुर तान गिरे वोसि, तानोर माड्सोन करुम माति कीतेर.
11 इदेन बारेते केन्ज्तुर पूरो चर्चितुरकुन अनि दुस्रुर लोकुरकुन वेले दड्कि पिय्ता.
अपोस्तुल्क वेलेटिर लोकुरकुन चोकोट किय्वल
12 पर्जतुन नड्डुम वेले चमत्कार्क अनि मय्मतङ काम्क अपोस्तुल्क्ना केय्दे जर्ग्सेर मत्तङ.
वूर अपोस्तुल्क अनि बक्तलिर सम्दिर सोलोमोंता मंडोप्नगा मन-दिल्ते उंदि आसि, हर रोज मीरे मांदिर.
13 पर्जा वूरकुन वेले मानि कींदिर बति, बोरे गिर वूर सङा मीरे माय्ले, गटि-दीर्या किय्मकि.
14 तेर बति, तंवा पोरो बरोसा इर्तुर वेलेटिर वेय्लो-माय्नन पर्बु बक्तलिर्गा मीरि कीतोर.
15 इव सम्दोन पिय्सि पर्जा, पेतुरु सरिय सोनेके वोना दड्मि अर्तेके गिर येड्कि-दुक्ने मत्तुर चोकोट आंतेर इंवल बरोसते, वूरकुन तचि चाप्रन पोरो, बीडरकुन पोरो सरितुन बग्ला मींडुसींदिर.
16 येरुसलेमुन सिर्मुट्नङ चहर्कनल वेलेटिर पर्जा येड्कि-दुक वालिरकुन, बूत्क सोप्रे मातुरकुन पिय्सि गुब्डङ गुब्डङ वांदिर.
वूर सम्दिर चोकोट आंदिर.
अपोस्तुल्क दुक्सा बोगे माय्वल
17 अस्के पेर्सोर कटोडल अनि वोन सङा मंवलिर सदुकयुल्क्ना बाज्नुर अदिकारिर, अपोस्तुलकुन पोरो कुटा कुटा आतेर.
18 वूर जुल्मते अपोस्तुलकुन पिय्सि जेल्ते सोडुस्तेर.
19 बति बगवंतनोर दूतल अद रातुन वासि, अद जेल्दङ कावक तेरिसि वूरकुन बह्रि वोतोर.
20 बह्रि वोसि, “मिरट मंदिर्तगा सोंट अनि अगा निल्सि, इद पूना जिन्गनितुन बारेतङ सम्दो गोस्टिङ पर्जतुन वेहट” इन्जेर वूरकुन इत्तोर.
21 अद केन्चि बय बय आनेके मंदिरतगा सोन्जि, पर्जतुन बोदा वेह्वल मोदोल कीतेर.
वोर पेर्सोर कटोडल अनि वोन सङा मंवलिर, इज्रयेल पर्जतुर संहेद्रिंतुर पेदोल्क सम्दिरकुन केयुसि उत्तेर अनि अपोस्तुलकुन केयुस्ले सिपायिरकुन जेल्दगा सारि कीतेर.
22 वूर सिपायिर जेल्दगा सोन्जि सूड्तेके, अपोस्तुल्क वूरकुन दिस्मकि.
ते वूर मल्सि सोन्जि,
23 “ममोट जेल्दगा सोन्जि नेह्ना सूड्तोम.
बहन मत्ता अहन कुन्जि डबा वाट्सि मत्ता.
डेरोटनगा केप्वलिर दिहंते केप्सेर निल्सि मत्तेर.
बति वूर अपोस्तुल्क मात्रम जेलदुन रोपो सेलुर” इन्जेर वेह्तेर.
24 अद गोस्टि केन्चि, वूर डगुक कटोडलिर अनि मंदिरतगा केप्वलिर सिपायिरोर अदिकारि, “अपोस्तुलकुन बतल आसि मंदर?”
इन्जेर गुल आतेर.
25 अदे वकत्ने वोरोर मायनल वासि, “मिरट जेल्दगा वाट्सि मत्तिट वूर माय्नलिर, मंदिरतगा निल्सि पर्जतुन बोदा वेह्चेर मंतेर” इन्जेर वेह्तोर.
26 इद केन्चि सिपायिरोर अदिकारि तंवुर सेव्कलिर सङा सोन्जि, पर्जा बंडने पानिर इन्जेर वेरिसि, अपोस्तुलकुन जुल्मा किय्वक्ने पिय्सि वातेर.
27 अनि वूरकुन संहेद्रिंतुर मुने निपुस्तेर.
अस्के पेर्सोर कटोडल,
28 “इदेन मोदोले येसुना पोरोडे बोदा वेह्मट इन्जि, मीकुन हुकुम सीतोम.
बति इंके सूडट!
मिरट येरुसलेम नगुर पूरो, मी बोदतुन पग्रि कीतिट.
अचोरे आय्वा, येसुना मरंता कसुर मा पोरो वाट्ले सूड्सेर मंतिट” इन्जेर इत्तोर.
29 ते पेतुरु अनि कड्मतुर अपोस्तुल्क, “ममोट माय्नलिरा हुकुम पिय्सि आयो बति, बगवंतना हुकुम पिय्सि ताका लागर” इन्जेर वेह्तेर.
30 “मिरट मोद्नगा टाङि कीसि जक्तिट वोर येसुन, मा तोत्तुरोर बगवंतल नेंडुस्तोर.
31 अद आता पेजे, येसुये राजल अनि बचि किय्वल इन्जेर मानि कीसि, बगवंतना तिना बग्ला उपुस्तोर.
बारितेके, इज्रयेल पर्जतुन चुक चुके माय्ले अनि वूरङ पाप्कनल मापि पुट्ले उंदि मोका सीसेर मंतोर.
32 इव गट्नन, ममोट अनि तंवा हुकुम पिय्सि ताक्वलिर्गा बगवंतल सीता पवित्रा आत्मता गवा मंतोम” इन्जेर वेह्तेर.
33 इद केन्चि, संहेद्रिंतुर अदिकारिरकुन बेय सोङ वाता.
ते अपोस्तुलकुन जकना इन्जेर निर्नय कीतेर.
34 बति दर्मता कानुंतुन वेह्वल सम्दिर पर्जा मानि किय्वल गुरु, परिसयुल्क्ना बाज्नोर गमलियेल सम्दिर मुने निल्सि, “अपोस्तुलकुन गट्कमेन बह्रि रोहट” इन्जेर हुकुम सीतोर.
35 वूरकुन रोह्ता पेजे, “इज्रयेल देस्नुर ना तादल-तमुर्निट!
वीर अपोस्तुलकुन मिरट बतल किय्ले आंतिटो दिहंते सोन्च कीम्ट.
36 इदेन मुने, ‘बेय डगुन’ इन्जेर तूदल इंवल वेह्तोर.
लग-बग नालुङ नुह्क (400) मांदि वोर वेह्ता तीर ताक्तेर.
वोन बोरेय जक्तेर.
अस्के वोना गोस्टि पिय्सि ताक्वलिर सम्दिर परर आसि, बततुने कामि सिय्मकि.
37 अद आता पेजे जनोबा लेक्वल कालम्ने गलिलयतोर यूदल वातोर.
कहितुर वोना गोस्टि पिय्सि ताक्तेर.
वोन गिर बोरेय जक्तेर.
अस्के वोनुर सिस्यलिर सम्दिर गिर परर आतेर.
38 अदेन साटि वीर अपोस्तुल्क्ना जोलित सोन्मट.
वीरकुन सुटि कीम्ट.
बारितेके उंदि मोका वीरा कार्या माय्नलिर तयर कीता मत्तेके, अद नासेडम आंता.
39 बति उंदि मोका अद कार्या बगवंतना मत्तेके, तान नासेडम किया पर्विट.
उंदि मोका अहन कीकिट्ते, बगवंतन सङा लडेय कीतुर आंतिट” इन्जेर वेह्तोर.
40 वूर अदिकारिर गमलियेल वेह्ता गोस्टितुन वोप्तेर.
अपोस्तुलकुन केयुसि पायुस्तेर अनि येसुना पोरोडे बोदा वेह्मट इन्जेर हुकुम सीसि, सुटि कीतेर.
41 ते येसुना पोरोडुन साटि तम्वा हिजत सोंले मोका वाता काड्कि, वूर अपोस्तुल्क वेले कुसिते संहेद्रिंतुर्गटल बह्रि सोत्तेर.
42 अनि हर दिवोस मंदिरतगा अनि रोह्क रोह्क तिरिसेर येसुये किरिस्तु आंदुर इंवल चोकोट्ना कबुडुन पचर किय्वल बंद किय्मकि.