11
1 नना किरिसतुन मोडि ताक्ता तीर मिरट गिर ना मोडि ताकट.
वेय्लोक तम्वा तला मुच्वडुन बारेते
2 सम्दो गोस्टिनगा मिरट नाकुन हेतु कीसेर, नना अंदुस्तङ बोदन पिय्सि ताक्सेर मंतिट इन्जेर मीकुन मेच्चेर मंतोन.
3 हर माय्नन किरिस्तु तलत मोडि मंतोर.
हर वेय्लोन तानोर माड्सो तलत मोडि मंतोर.
अनि किरिसतुन तलत मोडि बगवंतल मंतोर इंवडुन मिरट करि कियना इन्जेर कोरंतोन.
4 मायनल बोरे आयि, तंवा तला मुच्चि पार्तना कींतोरो सेलेके बगवंतल वेहा इततुन वेहंतोरो, वोर मायनल तंवा तलत मोडि मंवल किरिसतुन सिर्मिंदिङ कींतोर.
5 बति बदे आयि, वेय्लो तंवा तलतुन मुच्वक पार्तना किय्वल सेलेके, बगवंतल वेहा इततुन वेह्वल कींतयो, अद वेय्लो तंवा तलत मोडि मंवल माड्सोना लजा वोंता.
अद वेय्लो तंवा तला बोडि कीता लेकते वांता.
6 वेय्लो तलतुन मुच्वक मत्तेके, अद तंवङ केल्क कत्रि कियुसना.
उंदि मोका केल्क कत्रि कियुस्वले आयि, बोडि कियुस्वले आयि वेय्लोन सिर्मिंदिङ कीतेके, अद तप्वक तलतुन मुचना.
7 मायनल बगवंतना रूप अनि मय्मते मत्ता काड्कि, तलदुन मुच्वा.
बति वेय्लोन हिंदल माय्नन मय्मा वासेर मंता.
8 बारितेके, माय्ननले मोदोल वेय्लो वाता बति, वेय्लोनल मोदोल मायनल पुट्मकि.
9 अनि वेय्लो, माय्नन साटिने गडे माता बति, मायनल, वेय्लोन साटि गडे माय्मकि.
10 इद कारंतुन हिंदल अनि, बगवंतनुर दूतलिर सूड्वडुन हिंदल वेय्लो, माय्नना अदिकारदुन बूड मंतोन इन्जेर तोह्ले, तंवा तलदुन मुचना.
11 बति पर्बुनुर बक्तलिर्गा वेय्लोनल अलग मायनल सेलोर अनि माय्ननल अलग वेय्लो सेले.
12 बारितेके वेय्लो माय्ननल गडे माता तीरे, मायनल गिर वेय्लोनल जल्मा आसेर मंतोर.
बति सम्दोना पुट-गड्नुक बगवंतनले आता.
13 ते इंके वेय्लो तंवा तला मुच्वक्ने बगवंतन पार्तना किया वचो कि?
मिरटे निर्नय कीम्ट.
14 माड्सा तलदगा केल्क बेर्सुस्वल सिर्मिंदिङ किय्वल गोस्टि इन्जेर मीकुन टावय कि?
15 बगवंतल वेय्लोन तलदङ केल्क कोङुत दात मुच्ले सीतोर.
अदेन साटि, वेय्लो अव केलकुन बेर्सुस्वल तान डगुर-पान सींता.
16 मोका मी नड्डुम बोरे जग्डा-पोय्टल मंदनुर्ते, ममोट इहिन बोदा कींतोम अनि बगवंतना चर्चितुर इव नेकिङ पिय्सि, ताकंतेर इन्जेर वोर करि कियना.*
पर्बुना सुदुड कार्यतुन बारेतङ सूचनङ
17 मिरट मी चर्चितुर सङा मीरे माय्वल चोकोट किय्वडुन तेर वेले नुक्सने कीसेर मंता.
अदेन साटि इव सूचनङ मीकुन मेचन साटि लिहि कीसेर सेलोन.
18 मोदोडा गोस्टि बतल इत्तेके, मीकुन अर्सि वाय्वा सोन्जि, मिरट चर्चितुर सङा मीरे मांतिट अस्के, पाल्टिङ आसेर मंतिट इन्जेर केन्चेर मंतोन.
इदेनगा जरतेर करल मंदा वचो इन्जेर नमंतोन.
19 मिह्गा मंवलिक पाल्टिन पिय्सि बगवंतल बोन मेचंतोर इंवल दुस्रुरकुन करे माया वचो कि?
असले करे मायो!
20 इहिन मंवलिर मिरट, चर्चितुर सङा मीरे माता पेजे, पर्बुना सुदुड कार्यतगा बरोबर ईसा येता पर्विट.
21 बारितेके, मिरट अद सुदुड जेवुन कीनेके, मिह्गटल कहितुर दुस्रुरकुन पटि किय्वक्ने, पेटिमेन तिंतेर-उंटेर.
बति इदेन हिंदल, कड्मतुर करुते मंदा लागर.
22 मिरट तिंले-उंले मीवङ रोह्क-रचङ सेलेङ कि?
बगवंतना चर्चितुरकुन उल्टा आसि, गरिब लोकुरा हिजत बारि वोंतिट?
ईतल गोस्टितुन हिंदल मीकुन मेचना कि?
नना असले मेचोन!
23 नना मीकुन वेह्ता बोदा पर्बु नाकुन सीता आंद.
पर्बु आय्वल येसु तनकुन दुस्रुरा केय्दे हव्लि कीता रातुन, उंदि सारितुन पिय्सि, बगवंतन दनेवाद वेह्तोर.
24 अनि तान उरुसि वूर्गा सीसेर, “इद मीकुन बचि किय्ले नना अर्पना सिय्वल नावा मेंदोडा निसनि आंद.
मीरे मासि तिंवल इद कार्या नावा हेतुत साटि कीसेर मंट” इन्जेर वेह्तोर.
25 अनि अद तीर्दे तिता पेजे, आङुर रसता चंबु पिय्सि, “इद रसा मी साटि, नना सिय्वल नेतुडा निसनि आंद.
इदेन हिंदल बगवंतल माय्नलिर सङा पूना नियम टरि कीतोर.
इदेन उनेके हर गट्का नाकुन हेतु कियना” इन्जेर वेह्तोर.
26 मिरट इद सारितुन तिंवल अनि इद चंबुता आङुर रसतुन उंवल हर गट्का, पर्बुना मरंतुन, वोर वानल वेरि, पचर कीसेर मंदंतिट.
27 अदेन साटि पर्बुना इचा तीर, बोर्ते बरोबर ताक्वक्ने, इद सारितुन तिंतोरो, सेलेके पर्बुना चंबुतल इद आङुर रसा उंटोरो वोर, पर्बुना नेतुडुन अनि मेंदोडुन मानि किय्वा काड्कि, चर्चितुरकुन उल्टा पाप कीतोर आंतोर.
28 इद कारंते, हर वोरोर गिर तंवा तना बहन मंतोर इंवल परिक्सा कीसि, अद सारितुन तिंदा लागर अनि अद चंबुता रसा उंडा लागर.
29 बारितेके पर्बुना मेंदोडुन बारेते बरोबर सोन्च किय्वक्ने, अदेन तिंवल-उंवल तंवा पोरो सिक्सा वाय्लेके, तिंतोर अनि उंटोर.
30 अदेन साटिने, मी रोपो वेलेटिर कम्जोर वालिर आतेर, रोगेटलिर आतेर अनि कहितुर मार्तेर गिर.
31 बति मावा मरट मोदोले दिहंते परिक्सा कीतेके, माकुन बगवंतल सिक्सा कियोर.
32 बति मरट दुनियतुर सङा सिक्सा बोगे माय्वा इन्जि, मरट बरोबर सुद्रे मायना इन्जेर पर्बुना केय्दे सिक्सा बोगे मासेर मंतट.