इज्रयेल लोकुरा चरित्रतल करिवलिक दम्किङ
10
1-2 दादलिर-बायिक्निट!
इद गोस्टि मीकुन करे माय्वक मंवल नाकुन पसंद सेले.
अद बतल इत्तेके, मावुर तोत्तुर टेपता दड्मिते मत्तेर.
अनि वूर सम्दिर मोसेन पेजेय सम्दुरतुन नड्डुमनल ताक्सेर टेपतगा अनि सम्दुरतगा बाप्तिस्मा येत्तपिनय जर्ग्ता.
3-4 मा दात वूर सम्दिर बगवंतल सीता उंदि तीर्दा काने तित्तेर अनि येर उटेर.
वूर साटि बंडतल येर सिय्वले, वूर सङा वातोर.
वोरे किरिस्तु आंदुर.
5 बति वूर्गटल वेलेटिर बगवंतन आनंद सीनल पिस्वा काड्कि, अव बोडि गुटनगा मार्तेर.
6 वूर कोर्ता तीर मरट करब्नन कोर्वा इन्जेर इव गट्नङ माकुन नमुनन मोडि मंतङ.
7 वूर्गटल कहितुर मूर्तिना पूजा कीता तीर, मिरट किय्मट.
वूर बारेते दर्मा-ग्रंत्नगा, “पेन्क्नगा अर्पना कीतन तिंदन साटि अनि उंडन साटि उत्तेर.
अनि तेच्चि येंद्तेर” इन्जेर लिहि कीसि मंता.
8 अनि मरट वूर दात लन्जेतनम किय्वक मंद्कट.
वूर्गटल कहितुर लन्जेतनम कीता काड्कि, उंदिय दिवोस्ने वीसा मूंद हजर्क (23,000) मांदि मार्तेर.
9 अनि मरट पर्बुना* हवड सूड्वक मंद्कट.
वूर्गटल कहितुर पर्बुना हवड सूड्ता काड्कि, वेलि ऊम्सि मार्तेर.
10 मिरट वूर मोडि गोल्ग्मट.
वूर्गटल कहितुर गोल्ग्सि, जीवा येत्वल दूतना केय्दे नासेडम आतेर.
11 इव गट्नङ माकुन नमुनन मोडि मंदना इन्जेर वूरकुन जर्ग्तङ.
इद कलिता आक्रिता गट्कते मंवलिर माकुन दम्कि सिय्लेने, इव लिहि कीसि मंतङ.
12 अदेन साटि तना बगवंतना बक्तितगा बरोबर मंतोन इंवल बूड अर्वक्ने दिहंते मंदना.
13 पाप कियुसन साटि पुट्वलिक आसङ मा सम्दिरकुन तप्वक वांतङ.
बति बगवंतल बरोसतोर आंदुर.
अनि मिरट सोसि किया पर्वडुन तेर अदिक आसनगा अरा सियोर.
अचोरे आय्वा, अवेनल तपुस्ले सरि गिर बगवंतल तेरियंतोर.
मूर्तिना पूजनल लङ मंदना
14 अदेन साटि लाड्नुर दादलिर-बायिक्निट!
मूर्तिना पूजनल लङ मंट.
15 मिरट बुदिवंतलिर आंदिट इन्जेर इहिन वड्क्सेर मंतोन.
नना वेह्वलिकुन बारेते मिरटे निर्नय येतना.
16 पर्बुना सुदुड कार्यतगा, बगवंतन दनेवाद वेह्चि, चंबुतल आङुर रसा उंटट अस्के, किरिस्तुना नेतुडगा ईसा येत्तुर आंतट.
अनि सारितुन उरुसि तिंतट अस्के, किरिस्तुना मेंदोडगा ईसा येत्तुर आंतट.
17 मरट सम्दिर गिर अद उंदिय सारितगा ईसा येच्चेर मंतट.
उंदि सारि आता काड्कि, वेलेटिर आय्वलिर मरट उंदिय मेंदोल आसि मंतट.
18-20 इज्रयेल पर्जता नेकित पिय्सि, बगवंतन अर्पना कीता कानेतुन तिंवल, बगवंतना पार्तना-विंति किय्वडा लेकतगन वांतोर.
इत्तेके बूर्ते पेन्क्नङ मूर्तिना बोव्लतगा अर्पना कीतङ तिंतेरो, वूर गिर अवेना पूजा कीतुरा लेकते वांतेर.
अदेन साटि, मूर्तिन अर्पना किय्वल अनि अवेना पूजा किय्वल बूत्क्ना पूजा कीतोना लेकते वांता इन्जेर वेह्चेर मंतोन.
मिरट बूत्क्ना पूजतगा ईसा येत्वल नाकुन पसंद सेले.
21 मिरट पर्बुना तिंवल-उंवल सुदुड कार्यतगा अनि बूत्क्ना निवोद्ना उंवल-तिंवल कार्यतगा ईसा येता पर्विट.
22 इहिन कीकट्ते पर्बुन सोङ वायुस्वलिर आंतट.
वोर पर्बुन तेर ताकद वालिर आंदट कि बतल?
असले आय्वट!
बगवंतन बस्केट डगुर-पान सियना
23 ‘मरट बतल गिर किया वचो’ इन्जेर मिरट इंतिट.
अद करले बति, सम्दो मा साटि चोकोट्नङ आयोङ.
मरट बतल गिर किया वचो बति, सम्दो मरट येद्ग्ले कामि सियोङ.
24 बोरे आयि तंवा चोकोटुन साटिने आयो बति, दुस्रुरा चोकोटुन साटि गिर सूडना.
25 हाटुम्नगा काड्गि वोम्वलिक बव सविङ गिर मिरट तिंदा वचो.
तिंदना कि तिंवा इन्जेर मन-दिलतगा मिरट सोन्च किय्मट.
26 बारितेके, “दर्तुरि अनि तान्गा मंवल सम्दो गिर बगवंतनङे आंदुङ”+ इन्जेर लिहि कीसि मंता.
27 पर्बुन नंमकि वोर जेवुन किय्ले केय्तेके, मीकुन सोंवल मन मत्तेके, सोंट.
अनि अगा सोत्ता पेजे, मीकुन बतल्ते वह्डि कींतेरो, अदेन बारेते तिंदना कि तिंवा इन्जेर मन-दिलतगा मिरट सोन्च किय्वक्ने दनेवाद वेह्चि तिंदना.
28-30 बारितेके, मीवा मन-दिलतुन पिय्सि, मिरट बतल गिर किया वचो.
बति मिरट बगवंतन दनेवाद वेह्ता पेजे, बोरे आयि मी सङा, ‘पेन्क्नगा अर्पना कीता अद काने आंद्’ इन्जेर वेह्तोर इंट.
अस्के वोन साटि अनि वोना मन-दिलतुन साटि, अदेन तिन्मट.
बारितेके, इहिन तिंवल मीकुन बतय नुक्सन कियो बति, वेह्वना मन-दिल मीवा तस्वा कीनल मंदंता.
31 अदेन साटि, मिरट काने तिंवल, येर उंवल बतल कीतेके गिर बति, बगवंतने डगुर-पान वानल कीम्ट.
32 इहिन मिरट किय्वल यूदुल्कुने आयि, दुस्रोक जातिनुर्कुने आयि,* बगवंतना चर्चितुर्कुने आयि, अड्डम वाय्वक्ने सूडट.
33 इहिन नना गिर नावा पाय्दत साटि सूड्वक्ने, वेलेटिर बचे मायना इन्जेर वूरा पाय्दत साटि, सम्दो गोस्टिनगा सम्दिरकुन आनंद सीसेर मंतोन.