पव्लु तंवा मोक्डो-पांदुन सुटि किय्वल
9
1 पसंद वाता अद किय्ले नाकुन हक सेले कि बतल?
तप्वक हक मंता!
नना अपोस्तुल्ता आयोन कि?
तप्वक अपोस्तुल्ता आंदुन.
मा पर्बु आय्वल येसुन नना सूड्मकि कि?
तप्वक सूड्तोन!
नना पर्बुन साटि कीता सेवता पंडि मिरट आय्विट कि?
तप्वक मिरटे अद पंडि आंदिट!
2 मोका दुस्रुरकुन नना अपोस्तुल्ता आय्वेके गिर मीकुंते अपोस्तुल्ता आंदुन.
पर्बुनोर अपोस्तुल्ता आंदुन इंवडा मोरदुन दात मिरटे निसनि आसि मंतिट.
3 ना अदिकारदुन बारेते सवल किय्वलिरकुन नना वेह्वल जवब इद आंद:
4 तिंले-उंले माकुन हक सेले कि?
तप्वक हक मंता!
5 कड्मतुर अपोस्तुल्क, पर्बुनुर तमुक अनि पेतुरु, वीर सम्दिर गिर पर्बुनगा बरोसा इर्वल तंवा तंवा बाय्कोन सङा सेवता यात्रा कींतेर.
ते माकुन आतल हक सेले कि?
तप्वक हक मंता!
6 बर्नबल अनि नना वेह्ता बोदा केन्ज्तुर वूर्गटल मावा जिन्गनित साटि तल्क्वल हक सेले कि?
तप्वक हक मंता!
7 बोरे आयि कुद तंवङ कोतङ कर्चि कीसेर, सिपायिना नव्करि कीसेर, दलम्नगा काम कींतोर कि?
बोरे कियोर!
आङुर्क्ना वाडि उर्सि, अवेना पंडि तिंवक बोरे मंतोर कि?
बोरे मनोर!
मंदतुन मेह्चेर, बोरे गाय्कि पाल उंवक मंदंतोर कि?
बोरे मनोर!
8-9 इव गोस्टिङ दुनियतुर माय्नलिरा सोन्चुन पिय्सि इंतोन कि?
असले इनोन!
बति मोसेना कानुंतगा गिर इदेन बारेते, “कडतगा पाति पुह्वल कोंदतुन मुस्के दोस्वा” इन्जेर लिहि कीसि मंता.
ते बगवंतल सिरिप अव कोंदन साटिने इद गोस्टि वेह्तोर कि?
असले वेह्मकि!
10 ते मा साटिने इद गोस्टि वेह्चेर मंतोर.
बहन इत्तेके, वाव्टे ऊड्वल मायनल आसते ऊडा लागर.
कडतगा पाति पुह्वल, ‘इद पंटतगा ईसा येच्चेर मंतोन्’ इन्जेर आसते पाति पुहा लागर.
11 ममोट मी रोपो आत्मता बाव-बक्ति इंवल विजा वीत्तोम.
ते मा मेंदोडुन जुरत मंवल काने-येर इंवलिक चीज्क मिरट सीतेके, येत्वल तप आंद कि?
असले तप आयो!
12 दुस्रुर ईतल हकुन वाप्रि कीसि, मिह्गा ईसा येत्तेके, माकुंते मिह्गटल ईसा येत्ले, उंडे अदिक हक मंदंता.
तेर बति, इद अदिकारदुन ममोट वाप्रि किय्मकि.
किरिस्तुना चोकोट्ना कबुडा पचरतगा बवे अड्चंद्क वाय्वा इन्जेर सम्दोन वोर्चेर मंतोम.
13 मंदिर्तगा काम किय्वलिर मंदिरतगा वाय्वल काने तिंतेर अनि बलिदान सिय्वल बोव्लतगा काम किय्वलिर तान्गा सीतङ अर्पननगा ईसा येतंतेर.
14 अद तीर्दे चोकोट्ना कबुर पचर किय्वलिर अदेन हिंदल, पिसना इन्जेर पर्बु आगे सीतोर.
15 बति इद हकुन नना वाप्रि किय्मकि.
ना साटि मिरट अहन कियना इन्जेर इदेन लिहि कीसेर सेलोन.
मिह्गटल मदत येच्चि, नावा डगुर-पांदुन सोडुस्वडुन तेर, नावा परन सोंवल चोकोट मंदंता.
16 नना चोकोट्ना कबुर पचर किय्वडुन हिंदल, पोके माय्ले कारन बतय सेले.
बारितेके, इद कबुडुन पचर किय्वल जिमा ना पोरो इर्सि मंता.
अय्यो!
नना चोकोट्ना कबुर पचर किय्वेके दाकते, नाकुन तक्लिब वांता.
17 इद कामुन नना इस्टम्ने कीकते नाकुन इनम पुटंता.
इस्टम्ने किय्वेके गिर कामुन मुने ताकुस्वल जिमा बगवंतल ना पोरो इर्तोर.
18 इदेन हिंदल, नावा हकुन वाप्रि कीसि बवेंते नना येतनयो, अवेन येच्चेर सेलोन.
ते, नाकुन बद इनम पुटंता?
जुल्मते आय्वा, नावा इचते नना चोकोट्ना कबुर पचर किय्वले, नाकुन पुट्वल इनम आंद.
19 नना मोक्डो मंवल माय्नना आंदुन.
बति वेलेटिरकुन पर्बुनगा तरना इन्जेर सम्दिरकुन नावा नना दासिना आतोन.
20 यूदुलकुन पर्बुनगा तर्ले, वूर मोडिन नना पिस्तोन.
मोसेना कानुंतुन पिय्सि ताक्वलिरकुन पर्बुनगा तर्ले, अद कानुंतुन पिय्सि ताक्वल जुरत सेल्वेके गिर अदेन पिय्सि ताक्तोन.
21 अदे तीर्दे, दुस्रोक जातिनुरकुन पर्बुनगा तर्ले, यूदुल्क्ना दर्मता कानुंतुन पिय्सि आय्वा, वूर दुस्रुर मोडिन पिस्तोन.
इत्तेके, बगवंतना कानुन पिय्सि ताकोर वोना आयोन बति, किरिस्तुना गोस्टित हिंदल अद कानुंतुन पिय्सि ताक्तोना आंदुन.
22 बरोसतगा कमि वालिरकुन पर्बुनगा तर्ले, वूरकुन बूड अरुस्वलिक काम्क बवे नना किय्मकि.
बद तेर उंदि तीर्दे कहितुरकुन तेर बचि कियना इन्जेर, सम्दिर साटि सम्दो तीर्क्ने मारितोन.
23 वूर बरोबर चोकोट्ना कबुडङ आसिर्वाद्क्नगा ईसा येतना इन्जेरेन अव सम्दो कीतोन.
24 वित्वल पोटितगा वेलेटिर वितंतेर बति, वोरोने इनम पुटंता इन्जेर मीकुन टावा सेले कि?
तप्वक मीकुन टावय!
अदेन साटि, आतल इनम पुटना इंवल आसते वित्तट.
25 अद पोटितगा वित्वल हर वोरोर तंवा तना सम्दोनगा जरब्ने इरंतोर.
मूरे मासि सोंवल इनम्ना किरिटुन मेय्लेने, वूर तम्वा तमा जरब्ने इर्तेके, बस्केन मूरे मायो अद इनम्ना किरिटुन मेय्ले, मावा मरट उंडे बचोर जरब्ने मंदा लागर.
26-27 अदेन साटि, वडिदुन पिसल पातपिनय नना पासेर सेलोन.
बति नना येव्वल जागतेके नीटम सूड्सिने, बरोबर विच्चेर मंतोन.
बारितेके, दुस्रुरकुन पचर कीता पेजे, ननय अद पोटितगा कामि सिय्वक आंतोनो बतलो इन्जेर, नावा नना मेंदोडुन जरब्ने इर्सेर मंतोन.