पेन्क्नङ मूर्तिनगा अर्पना कीता अदेन तिंवडुन बारेते
8
1 इंके पेन्क्नङ मूर्तिनगा अर्पना कीता अदेन तिंवल बारेते, मा सम्दिरकुन गियन मंता इंवल माकुन टावा.
इद गियन गर्वते पोके मानल माय्नलिरकुन कींता.
बति पेर्मा दुस्रुर माय्नलिर बरोसतगा येद्ग्ले कामि सींता.
2 तनकुन सम्दो टावय इन्जेर बोरे इंदनुर्ते, बगवंतल वोन बतल करियना इंतोरो अदेन वोर, उंडे गिर करि किय्मकि इन्जेर सम्जे मायना.
3 बति बगवंतन वोरोर पेर्मा कीसेर मंतोर इत्तेके, बगवंतन वोर टावये.
4 ते पेन्क्नङ मूर्तिनगा अर्पना कीततुन तिंवल बारेते बतल कियना?
बगवंतल वोरोरे जीवा वाले आंदुर अनि इद दुनियतगा मंवलिक पेन्क्नङ मूर्तिङ सम्दो जीवा सेलेङ अवे आंदुङ इन्जेर माकुन टावा.
5-6 तेर बति हाबडगन आयि, बोमित पोरोन आयि पेन्क इन्जेर केय्वलिक वेलेन मंतङ.
अनि पर्बुर इन्जेर केय्वलिर गिर वेलेटिर मंतेर.
बति माकुन वोरोरे बगवंतल मंतोर अनि वोरे मा बाबो आंदुर.
वोन्गटले सम्दो गडे मातङ अनि वोन साटिने मरट मंतट.
अह्ने माकुन पर्बु वोरोरे मंतोर अनि वोरे येसु किरिस्तु आंदुर.
वोन हिंदले, सम्दो गडे मातङ अनि मरट गिर वोन हिंदले, जीवते मंतट.
7 बति सम्दिर्गा ईतल गियन सेले.
पूना-पूनि वातुर कहितुर बक्तलिर इदेन मुने वेरि, करल पेन्क इन्जेर मूर्तिन पूजा कीसेर मत्तेर.
ते इंके गिर वूर तमा तिंवल काने मूर्तिन अर्पना कीता आंद इन्जेर तिंतेर.
वूर तम्वङ मन-दिल्क्नगा कम्जोर बरोसा वालिर आता काड्कि, बे-सुदुड आतोम इन्जेर सोन्च कींतेर.
8 बति मरट अद कानेतुन तिंवडुन हिंदल बगवंतन लङ आय्वट अनि तिंवेके सोत्तेके गिर बगवंतन करुम आय्वट.
9 बति मीकुन मंवल इद मोक्डो-पांदुन पिय्सि, उंडे गिर बरोसतगा कम्जोर मंवलिरकुन, मिरट अड्डम आय्वक्ने सूडट.
10 बारितेके, निह्गा मंवल गियंतुन पिय्सि, पेन्क्नङ मूर्तिनगा अर्पना कीता अदेन तिंले उच्चि मनेके, बोरे वोरोर नीकुन सूड्तोर इन.
वोर तंवा मन-दिलतगा उंडे इचुर बरोसा कमि वाले आसि, अद कानेतुन तिंले दर्यम कींतोर.
11 ते किरिस्तु बोन साटिते मरन आतोरो, आतोर बरोसतगा कम्जोर वाले नीवा गियंतुन पिय्सि नासेडम आंतोर.
12 इद तीर्दे, दादलिर-बायिकुन उल्टा पाप किय्वडुन हिंदल, अनि गटि-दीर्या सेले अद मन-दिलतुन नोयुस्वडुन हिंदल, मिरट किरिसतुन उल्टा पाप कीतुर आंतिट.
13 अदेन साटि सविङ तिंवडुन हिंदल, नावोर दादन सेलेके बायिन बरोसतल बूड अरुसनल मंद्कते, वूर अहन अर्वक मंले, अव सविन बस्केन तिनोन.