मर्मिन साटि नियम्क
7
1-2 मोदोल मिरट, ‘वेय्लो-मायनल मर्मिङ आयना कि आय्वा?’
इन्जेर नाकुन पूसि कीतिट.
इंके अद सवलदुन जवब बतल इत्तेके, मर्मिङ आय्वल अनि मर्मिङ आय्वक मंवल गिर चोकोट्नय गोस्टि.
बति लन्जेतनम्नगा कोंडे माय्वक मंले, हर वोरोन गिर संतम बाय्को मंदना, अनि हर वेय्लोन गिर संतम माड्सो मंदना.
3-4 बाय्कोन तंवा मेंदोड पोरो तनकुन अदिकार सेले बति, तंवोर माड्सोन अदिकार मंता.
अह्ने माड्सोन तंवा मेंदोड पोरो तनकुन अदिकार सेले बति, तंवा बाय्कोन अदिकार मंता.
माड्सो तंवा वेय्लोन साटि, अह्ने वेय्लो तंवोर माड्सोन साटि जिन्गनिता काम निबि कियना.
5 इद गोस्टितगा आड-माड्सो वोरोन वोरोर वोप्वक्ने ताक्वा.
बति बगवंतन पार्तना किय्ले, चोकोट्ना मोका पुटनल आड-माड्सो इविर आसि वोप्तेकेने, कहि रोज्क अलग अलग मंदा वचो.
अद आता पेजे, मीवा मंदुन आपुसा पर्वेके, सय्तन मीकुन पाप्नगा कोंडि किय्वक्ने तिरिसि मीरे मायना.
6 इद उंदि आगे आयो बति, इहिन कीतेके मीकुने चोकोट मंदंता.
7 तेर बति, सम्दिर ना दात सडसाट मंदना इंवले नावा इचा.
बति वोरोर उंदि वरमुन, उंडे वोरोर उंडे उंदि वरमुन पिय्सि, ताका लागर.
इव सम्दो वरम्क बगवंतले सीतोर.
8 ना दात सडसाट मंवले चोकोट इन्जेर मर्मिङ आय्मकि वूरकुन अनि रांडे वेय्लोकुन वेह्चेर मंतोन.
9 बति तम्वा मेंदोडङ आसन आपुसा पर्वेके मर्मिङ आया वचो.
मेंदोडङ आसने निन्चि तल्मेले मासेर मंवडुन तेर मर्मिङ आय्वल चोकोट मंदंता.
10 अनि मर्मिङ आतुर वूरकुन, “आड-माड्सो वोरोन वोरोर सुटि कीसि मंवा”+ इन्जेर नना आयो बति, पर्बुये आगे सीतोर.
11 मोका बाय्को तंवोर माड्सोन सुटि कीतेके, उंडे मर्मिङ आय्वा सेलेके, तंवोर माड्सोन सङा सांतिते मीरे मायना.
अनि माड्सो गिर तंवा वेय्लोन अद तीर्दे किय्वा.
12 इंके पर्बु आयो बति, ननय कड्मतुर सङा वेह्वल बतल इत्तेके, पर्बुनगा बरोसा इर्वल बक्तन, बरोसा इरो अद वेय्लो मत्ता इंट.
वोन सङा जिन्गनि किय्वल तान पसंद मत्तेके, वोर तान पार्कत सिय्वा.
13 अनि पर्बुनगा बरोसा इर्वल वेय्लोन, बरोसा इरोर वोर माड्सो मत्तोर इंट.
तान सङा जिन्गनि किय्वल वोन पसंद मत्तेके, अद वेय्लो वोन पार्कत सिय्वा.
14 बरोसा कियोर वोर माड्सो, बरोसा किय्वल बाय्कोन हिंदल, सुदुड आंतोर.
बरोसा कियो अद बाय्को, बरोसा किय्वल माड्सोन हिंदल, सुदुड आंता.
अहन जर्ग्वेके सोत्तेके, मीवुर मरि-मियड बे-सुदुड आंदिर बति, इंके वूर सुदुड आसिन मंतेर.
15-16 ये बायि!
नीवोर माड्सोन बचि कींतियो सेलेयो नीकुन टावा सेले.
ये दादा!
नीवा वेय्लोन बचि कींतियो, सेलेयो नीकुन टावा सेले.
अदेन साटि नीकुन पार्कत सींतोन इन्जेर नीवा जोडतुन सङा इन्मट बति, पर्बुनगा बरोसा इर्मकि वोर नीवोर माड्सो सेलेके नीवा वेय्लो पार्कत सीका इत्तेके, आपुसिय्मट.
बारितेके, सांतिते पिसनिर इन्जेरेन बगवंतल माकुन केय्तोर.
अदेन साटि, मीवा जोडतुन पसंद सेल्वेके मिरट मीरे मासि पिस्वल जुरत सेले.
बगवंतल मीकुन बारि केय्तोरो, तान साटि पिसट
17 सम्दो चर्चिनुरकुन इहिन आगे सीसेर मंतोन: मी पर्बु बगवंतल मीकुन बततुन साटि केय्सि नेमि कीतोरो, तान साटिने पिसट.
18 बहन इत्तेके, तोल कत्रि कियुस्वल कार्या कियुस्तोर वोर, बगवंतनगा बरोसा इर्तेके, वोर तोल कत्रि कियुस्वल कार्या कियुस्मकि वोन दात मंले, कोसिद किय्वा.
तोल कत्रि कियुस्वल कार्या कियुस्मकि वोर, बगवंतनगा बरोसा इर्तेके, वोर अद कार्या कियुस्वा.
19 बारितेके, तोल कत्रि कियुस्वल सेलेके कियुस्वक मंवडगा बतय सेले.
बति बगवंतनङ आगेङ पिय्सि ताक्वले मुके आंद.
20 हर वोरोन गिर बगवंतल बहन मनेके केय्तोरो, अदेनगन मुने ताकना.
21 उंदि मोका दासि-पांदगा मनेके नीकुन बगवंतल केय्तेके, अदेन बारेते निमे पिकर किय्मा.
बति दासि-पांदल सुटे माय्ले मोका पुड्तेके, अदेनल सुटे माय्वल चोकोट्ना गोस्टि.
22 मोका दुनियतुर नीकुन दासि-पांदे मंवन मोडि सूडनिर्ते, किरिस्तु नीकुन मोक्डो सुटे मातोन मोडि सूडंतोर.
अदे तीर्दे, पर्बु केय्नेके इद दुनियतगा मोक्डो मंवल, किरिस्तुनोर दासि आंतोर.
23 बगवंतल दाम सीसि, मीकुन येत्ता काड्कि, माय्नलिर बूड दासिर आसि मन्मट.
24 दादलिर-बायिक्निट!
बगवंतल मीकुन केय्तोर अस्के, मिरट बहन मतिटो, अदेनगन मन्जेर बगवंतना बक्तितगा बडे माम्ट.
मर्मिङ आय्ले मंवलिरा अनि रांडे वेय्लोक्ना गोस्टि
25 कोरो पेकिक्ना गोस्टित बारेते, पर्बुनल नाकुन आगे वाय्मकि.
बति नावा मंदा गोस्टि मीकुन वेह्चेर मंतोन.
पर्बुना दयतुन हिंदल नना वेह्वडगा बरोसा इरा वचो.
26 अद बतल इत्तेके, इद इंकेडा कस्टा-कालमुन पिय्सि, मायनल बहंते मंतोरेय, अह्ने मंवल चोकोट.
27 नीकुन बाय्को मत्तेके, तान पार्कत सिय्ले कोर्मा.
नीकुन मर्मिङ आय्ले मत्तेके, निमे मर्मिङ आय्ले कोर्मा.
28 बति उंदि मोका निमे मर्मिङ आतेके गिर, पाप आयो.
अनि कोरो पेडि मर्मिङ आतेके गिर पाप आयो.
तेर बति, मर्मिङ आतुरा जिन्गनितगा वाय्वलिक तक्लिब्क मीकुन वाय्वा इंवले नावा इचा.
29 दादलिर-बायिक्निट!
नना वेह्वल बतल इत्तेके, माकुन उंडे वेले कालम मेय्सि सेले.
अदेन साटि, बाय्को मत्तोर वोर, बाय्को सेले इत्तपिनय, इङेडल मुने पर्बुना सेवा किया लागर.
30 आड्वलिर आड्सेर सेलुर इत्तपिनय मंदा लागर.
कुसिते मंवलिर कुसिते सेलुर इत्तपिनय मंदा लागर.
येत्वलिर येत्तङ अव तम्वङ आयोङ इत्तपिनय मंदा लागर.
31 इद दुनियतङ वसतुन मरट वाडकम किया वचो बति, सिरिप अवेन पोरोन मावा दिहन इर्वा.
बारितेके इद दुनियतगा इंके मंवल सम्दो गिर मूरे माय्वल मंता.
32 मिरट इद दुनियतङ गोस्टिन बारेते पिकर किय्वक मंदना इन्जेर कोर्सेर मंतोन.
मर्मिङ आय्मकि वोर, ‘नना पर्बुन बहन आनंद सियना?’
इन्जेर पर्बुनङ कामकुन बारेते सोन्च किया वचो.
33-34 बति मर्मिङ आतुर वूर आड-माड्सो, ‘तमा वोरोन वोरोर बहन कुसिते इरना?’
इन्जेर दुनियतङ गोस्टिन बारेते पिकर कीसेर मंदंतेर.
अह्ने मर्मिङ आय्मकि अव वेय्लोक सेलेके कोरो पेकिक, ‘तम्वा मेंदोडगा अनि तम्वा आत्मतगा बहन पवित्रा मंदना अनि पर्बुना सेवा बहन कियना?’
इन्जेर सोन्च किया वचो.
35 इद मीवा पाय्दत साटिने वेह्चेर मंतोन.
मीकुन कोंडि कियना इन्जेर आयो.
बति बद्ते बरोबर आंदुयो, अदेन पिय्सि मुने सोंदना अनि दुस्रोक बवेन पोरोन वेले आसा किय्वक बर्पुर मन-दिल्ते पर्बुना सेवा कियना इंवले नावा इचा.
36 ते बोरे आयि, वोरोर तंवा मियडुन मर्मिना वहि वीड्ता पेजे, तान मर्मिङ कियय लागर इन्जेर सोन्च कींतोर इंट.
वोन पसंद वाता तीर तानङ मर्मिङ किया वचो.
इहिन किय्वल पाप आयो.
37 बति बोरे आयि वोरोर तंवा मियडुन मर्मिङ किय्वा इन्जेर मन-दिलतगा निर्नय कीतोर इंट.
अहन दर्यम किय्वल तनकुन पसंद वाता तीर जर्गुसा वचो.
अद चोकोट्नय काम आंद.
38 अदेन साटि तंवा मियडुन मर्मिङ किय्वल चोकोट्ना काम कीसेर मंतोर.
बति इंकेडा कस्टा-कालमुन पिय्सि, मर्मिङ किय्वक मंवल गिर वेले चोकोट्ना काम कीसेर मंतोर.
39 वेय्लो तंवोर माड्सो पिसि मनल वेरि वोन बाय्को आसि मंदंता.
बति वोना मरन आता पेजे, तनकुन पसंद वातोन तुङ्ले रांडे वेय्लोन हक मंता.
बति अद सिरिप पर्बुनोर बक्तने तुङना.
40 तेर बति अद वेय्लो रांडे आसि मत्तेकेन, बगवंतनल आसिर्वाद येतंता इंवल नावा सोन्च.
मीकुन वेह्वलिक इव सम्दोन गिर नह्गा मंवल बगवंतना पवित्रा आत्मतेन वेह्तोन इन्जेर नाकुन वाटे मांता.