बक्तलिर तम्वा नड्डुम मंवलिक लोलिना तस्वा किय्वल
6
1 मिह्गटल बोरे वोरोन उंडे वोरोन सङा लोलि ताक्सेर मत्तेके, बगड-नियत वालिर मुने अदेना तस्वा जर्गना इन्जेर बारि सोंदना?
असले सोंवा!
अदेना तस्वा सिरिप बगवंतनुर बक्तलिर नड्डुमे जर्गना.
2 बक्तलिर आक्रिता गट्कते, इद दुनियतुरकुन तस्वा किय्वलिर आंतेर इन्जेर मीकुन टावा सेले कि?
मीकुन तप्वक टावय!
मी केय्दे इद दुनियतुरा तस्वा जर्ग्वल मंता.
ते वेले चुडुक गोस्टिन बारेते, मिरट बोरे तस्वा किया पर्विट कि बतल?
3 मरट आक्रिता गट्कते बगवंतनुर दूतलिर्कुने तस्वा किय्वलिर आंदट इंवल मीकुन टावा सेले कि?
तप्वक मीकुन टावय!
ते इद दुनियतङ गोस्टिन बेय हल्कोते तस्वा किया परंतट.
4-6 बक्तल उंडे वोरोर बक्तन सङा लोलि कीसेर मंतोर.
अनि अदेना तस्वा बक्तलिर आयुर वूर मुने जर्गना इन्जेर इंतोर.
ते ईतङ गोस्टिना तस्वा, बक्तलिर आयुर वूरा केय्दे बारि जर्गुसींतिट?
असले जर्गुसिय्वा!
मी नड्डुम इदेना तस्वा कीनल वोरोर गिर तेलिवि वाले सेलोर कि बतल?
मीकुन लजा वायना इन्जेरेन इहिन वेह्चेर मंतोन.
7-8 लोलिङ किय्वडुन बद्लि, वूरा केय्दे पसे मासि, अवेन सोसि किय्वल चोकोट्ना गोस्टि.
बति मिरटे वायुट्ने ताक्सेर, मी बरोबर्तुर बक्तलिरकुन पसि कीसेर, वूरा सोंमुन तिन्जेर मंतिट.
इहिन किय्वडुन हिंदल, इंद्केट्के मिरट हारे माता लेकते वातिट.
9-10 करेबलिर बगवंतना राज्नगा ईसदार्क आयुर इन्जेर मीकुन टावा सेले कि?
तप्वक मीकुन टावय!
मेंदोडे पाप किय्वलिरे आयि, मूर्तिना पूजा किय्वलिरे आयि, पीर किय्वलिरे आयि, वेय्लो-जुङलिरे आयि, माड्सा माड्सा पीर किय्वलिरे आयि, कलिरे आयि, बद सूडा नाके पह्जे इंवलिरे आयि, कल-पिदेडलिरे आयि, सिर्मिंदिङ किय्वलिरे आयि, लूटि किय्वलिरे आयि बगवंतना राज्नगा ईसदार्क आया परुर.
मीवा मिरट पसे माय्मट.
11 इदेन मुने मिह्गटल कहितुर आतुरे मत्तिट.
बति, येसु किरिस्तु पर्बुना पोरोडे अनि मा बगवंतना आत्मतुन हिंदल नोर्सि, सुदुड आसि, नियत्नुरा लेकते वातिट.
मीवङ मेंदोलकुन बगवंतन मय्मा तर्ले वाप्रि कीम्ट
12 ‘मरट बतल गिर किया वचो’ इन्जेर मिरट इंतिट.
अद करले बति, सम्दो मा साटि चोकोट्नङ आयोङ अनि नना बदेनय केयदुन बूड दासिना आय्ले वोपोन.
13 ‘कानेतङ चीज्क पेटितुन साटि अनि पेटि कानेतङ चीजकुन साटि मंत’ इन्जेर मिरट इंतिट.
अद करले बति, बगवंतल तान अनि अवेन नासेडम कींतोर.
मा मेंदोल लन्जेतनम कियन साटि आयो बति, अद पर्बुनय आंद अनि वोना सेवा किय्लेने मंता.
14 बगवंतल पर्बुन नेंडुस्तोर.
अदे तीर्दे माकुन गिर तंवा सक्तिते नेंडुसंतोर.
15 मीवङ मेंदोल्क किरिस्तुना मेंदोडङ बागल्क आंदुङ इंवल टावा सेले कि?
तप्वक टावय!
नना किरिस्तुनङ बागलकुन वोसि, लन्जे वेय्लोनङ बागलकुन मोडि कीका कि?
असले कियोन!
16 लन्जेन सङा मींड्वल ताना मेंदोडगा मेंदोल आंतोर इंवल मीकुन टावा सेले कि?
तप्वक टावय!
इदेन बारेते, “वूर इविर उंदि मेंदोल आसि मंतेर”+ इन्जेर दर्मा-ग्रंत्नगा लिहि कीसि मंता.
17 अदे तीर्दे पर्बुनगा येकि आसि मंवल, वोन सङा उंदि आत्मा आसि मंतोर.
18 लन्जेतनम किय्वडल लङ मंदना.
मायनल किय्वलिक दुस्रोक पाप्क सम्दो मेंदोडुन बह्रिन मंतङ.
बति मेंदोडे पाप किय्वल तंवा तना उल्टा पाप कीसेर, तंवा मेंदोड पोरो नुक्सन तरंतोर.
19 मीवा मेंदोल पवित्रा आत्मा मंवल मंदिर आंद.
इद आत्मा बगवंतनल वासि, मी रोपो मंता इंवल मीकुन टावा सेले कि?
तप्वक टावय!
मीवा मेंदोल मी संतम आयो.
20 पर्बु मीकुन तंवा परन सीसि येत्ता काड्कि, मीवा मेंदोडे बगवंतन मय्मा तरट.