पीर किय्वल पाप चर्चितुरकुन नासेडम कींता
5
1 मी नड्डुम पीर किय्वल पाप्ना काम ताक्सेर मंता इंवल नाकुन केन्जा वाता.
मिह्गटल वोरोर, तंवोर बाबोना वेय्लोन सङा मींड्सेर मंतोर अले.
इहिन पीर किय्वल तरिका दुस्रोक जातिनगा गिर जर्ग्सेर सेले.
2 इहिन मनेके गिर, मिरट पोक्डा कीसेर मंतिट.
बति जरा गिर अदेन बारेते चुक चुके मासेर सेल्विट.
अनि वोर आतोर पीर किय्वन अलदि वाट्सेर सेल्विट.
3-4 नना मेंदोडा रूप्ने मिह्गटल लङ मंतोन.
बति आत्मता रूप्ने मी नड्डुमे मंतोन.
नना करलेन मी सङा मत्तपिनय ईतल काम कीतोर वोन, इदेन मुनेने येसु पर्बुना पोरोडे तस्वा कीतोन.
बहन इत्तेके, पर्बुना पोरोडे मिरट मीरे मांतिट अस्के, मी सङा नावा आत्मा मंदंता अनि पर्बुना सक्ति गिर मी रोपो मंदंता.
5 अवेन हिंदल, बक्तलिर्गटल वोर माय्नन अलदि वाटट.
वोन बरोबर अद पाप्ना गुंतुन मिह्गटल तेंड्सि वाट्ता काड्कि, पर्बु वाय्वल दिवोस्ने मिरट सम्दिर बचे मांतिट.
6 मिरट पोके माय्वल चोकोट्ना गोस्टि आयो.
“सोविता पिंडि इचुसि मत्तेके गिर, मुद्दा पूरो सोवुसंता”* इंवल गोस्टि मीकुन टावा सेले कि?
तप्वक टावये!
7 सोवुस्वल चीजुन मोडि मंवल करेबन मी नड्डुमनल अलदि वाटट.
अस्के मिरट सोवुस्वल चीज सेल्वक तातो पिंडिता मुदत मोडि आंतिट.
करलेन मिरट अहन मंतिट.
बहन इत्तेके, मावोर किरिस्तु मा साटि पस्का सड्दा गोरे पिलत मोडि बलि आतोर.
8 अदेन साटि, इद सडदुन मरट पडना सोवुस्ता पिंडिते इत्तेके, वायुट गुन अनि करब-पांदे आयो बति, तातो पिंडिते इत्तेके, नियत अनि सतेम्ने इदेन वीडुस्कट.
9 नना इदेन मुने रोह्ता चिटितगा, पीर किय्वलिर सङा मीरे मासि मन्मट इन्जेर लिहि कीतोन.
10-11 इदेना अर्तम बतल इत्तेके, मी बरोबर्तोर बक्तल पीर किय्वले आयि, बद सूडा नाके पह्जे इंवले आयि, मूर्तिनङ पूजङ किय्वले आयि, राङ्वले आयि, कल-पिदेडले आयि, लूटि किय्वले आयि, ईतङ बदे उंदि गुन वोन्गा मत्तेके गिर, वोर आतोन सङा मीरे मासि मंवा अनि तिंवा.
बति मरट इद दुनियतगा पिसि मनेके, पीर किय्वलिर, बद सूडा नाके पह्जे इंवलिर, लूटि किय्वलिर, मूर्तिनङ पूजङ किय्वलिर तप्वक मंदंतेर.
ते वूर बरोबर मरट पिसय लागर बति, वूर ताक्वलिक बवे करेबलिक सरिनगा ताक्वा इन्जेर लिहि कीसेर मंतोन.
12-13 पर्बुन नंमकि वूरा तस्वा नना बारि कीका?
वूरा तस्वा बगवंतले कींतोर.
मिरट मी बरोबर्तुर बक्तलिरा तस्वा किय्वलिर आता काड्कि, वोर करेबन मिह्गटल अलदि वाटट.